مدارس خاصة في البحرين

مخمل;7290957:

أختي أنا ماقلت هالكلام عبث وماقلته إلا عن تجربة طويلة وإنتي توج معاهم وأحب أسمع رايج آخر السنة ..

هلا اختي كيد الكل ما جذبش او شي .. و كل وحده لها وجهه نظر و توجه خاص في نمط تدريس ولدها ..

أنا كتب ولدي كان فيها سور وأدعية لكن فعلياً ماعلموه شي لكن في الشهر مرة يطرشون لنا نوت حفظو عيالكم السورة الفلانية مع إن هذي دور المدرسة والحقيقة إن المدرسة مالها علاقة بالدين وقطت هالمسؤلية علينا ..

يا اختي الغاليه .. معظم الناس اسمعهم يقولون بنوديهم المهد عشان يسوون واجباتهم و يدرسون و يرجعون مرتاحين .. و هذا الخطأ اهو صح عندهم ساعه اخر الدوام بس ما تكفي الطالب يدرس فيها كل المواد و يكمل واجباته طبعا هذي لصف الاول من خلال تجربتي مع اختي .. للعلم اني المسؤوله عن تدريسها و متابعتهم اول بأول ..

يعني اني كل يوم اقعد مع اختي و ادرسها اللي اخدته و و اذا في واجب ما كملته اكمله و اعطيها تمارين و تدريبات خصوصا في ماده العربي .. للعلم معلمتها العربي وايد زينه و تعطيهم تدريبات وايد و من مدرسات يشتغلون في مدارس حكوميه و حتى مكتوب اسم المدرسه الحكوميه اللي تاخد منها التدريبات و اسم المعلمه ..

و تدريسها وايد زين و تركيزها على الماده مقارنه بمدرسه خاصه انجليزيه و ساعه باليوم تدخل لهم ..

والمناهج مب قوية ولا متعوب عليها وأكثرها ملازم نسخ مصورة وهذي جوفة عيني محد قال لي حتى أختي يوم جافتهم قالت لي بذمتج هذي مناهج مدارس خاصة!!

بالعكس يمكن بدايةً في كي جي 1 بس مع الايام لا يعطونهم كتب اكثر .. و في كي جي 2 يعطونهم في نهايه السنه قصص عشان يتعلمون يقرأون .. و القصص جفتهم في تويز آر أس بـ 2دينارين و شوي ..

ومعلمة ولدي السنة اللي راحت تقول ولدج عارف المنهج قبل ماشرحه والمنهج أقل من مستواه بوايد أما الإنجليزي حفظ بلا فهم شلون مادري ..

هذا الشي و النقص من المعلمه اللي ولدج كان عندها .. يمكن ما كانت متمنه و جيده في اسلوب تدريسها او تعاملها .. و برايي اهم شي اول سنه كي جي 1 عشان يتأسس الطفل .. و الحمد لله اختي كانت عند تيجر حسينه وايد كانت زينه من ناحيه تدريس و الحمد لله اساسها صار قوي ..

وطبعاً مافي ذكر للصلاة والفروض والأخلاق في ديننا الإسلامي وسمعت والله أعلم إنها مدرسة تبشيرية للمسيحية ..

من ناحيه ماده الدين .. يعني اكيد اكيد مو التركيز مثل مدارس الحكومه .. بس يعطونهم كذا سوره و ادعيه .. و اختي اجوفها حافظه السور و الادعيه .. و الصلاه مع الايام بيعطونهم كتب الدين في صف الثاني فيه تعليم الصلاه .. و ما اتوقع اي ام راح تعتمد على تعليم ابنها الصلاه على المدرسه بس .. الصلاه مو درس يدرسونه بالمدرسه و يقدمون في امتحان .. الصلاه و الاخلاق لازم يتعلمها من البيت و يتعلم شلون يحافظ عليها ..

و اذا على انها مدرسه تبشيريه مسيحيه .. حالها حال معظم المدارس الخاصه و الغالبيه من مدرساتهم مسيحيات .. بس اني ما اجوف اختي ذكرت شي عن المسيحيه او علموها شي غلط عن الدين لانه الملتزمات بتدريس الدين و العربي كلهم بنات بحرينيات خريجات جامعه ..

والطامة الغريبة إنهم ماااااااااااااايدرسون الكمبيوتر!! حتى في الروضات يعلمون اليهال على الكمبيوتر ..

لا يدرسونهم من كي جي 1 كمبيوتر .. معلمتهم هي اللي توديهم اللاب .. اختي من كي جي 1 كانت تقول نروح اللاب و يخلونه نرسم و نلون في الكمبيوتر ..

و السنه صف اول عندهم ماده كمبيوتر .. و الله يعطونهم اشياء احنا ما تعلمناها الا في ثانوي .. عاطينهم الـinput و الـ output .. و اسأله و اجابات و تعريفات على ماده الكمبيوتر ..

وثنتين من ربعي طلعو عيالهم والثالثة تفكر جدياً تطلع بنتها وأختي صرفت النظر من اللي جافته ..

طبعا هذي تختلف من وحده للثانيه يمكن وحده ولدها يستفيد و تخليه و تمدح المدرسه و الثانيه العكس .. او انها تكون صعبه على الطفل و ما يقدر يمشي نفس الشي يطلع و بعدين يدمون في المدرسه ..

اني جارتنا بنتها كانت في النور الى ثالث اعدادي و بعدين ودتها المهد .. تقول فرق في التعامل و الاهتمام و المتابعه و تدريس قوي .. تقول اهي ارتاحت في المهد اكثر من النور و المنهج قريب من النور اذا مو احسن

وعندج ثياب الرياضة ولدي خلص السنة بدون جاكيت مع إنهم كل يوم يوعدون إنهم يوفرون كل المستلزمات ..

يا اختي .. صج احنا نوديهم مدارس خاصه و نقول احنا دافعين .. بس لازم احنا نتحرك عليهم .. يعني الثياب تشترينهم من المدرسه .. مدارس الحكومه تشترينهم من الدكاكين هذلين من نفس المدرسه بالعكس اريح من الدواره .. و في الملابس يشددون لازم الجوتي الله يعزج ابيض للرياضه و اسود للايام العاديه و كل الطلبه بالباس سواسيه احسن من الحكومه اللي كل وحده تلبس غير و جوفي البنات الا فلانه لبست و اني لازم البس .. هم موحد ما تحسين فيه فروق بينهم .. خصوصا في الشتا و الجاكيتات كلهم جاكيت واحد ..

وعلى فكرة من جم يوم في الصفحة الأولى من جريدة الوطن كاتبين خبر يمس سمعة المدرسة بالإسم وكاتبين إن فرع البسيتين مب مرخص قانونياً وأولياء الأمور يطالبون المدرسة ترجع فلوسهم ..

اني اختي في المهد اللي في سار .. ما اعرف عن اللي بالبسيتين ..

وبتدور الأيام وبتجوفينهم هاملين العربي والدين لأي درجة وكل يوم يحتفلون بشي وإنتي تعالي دفعي ..

اذا اهم هملوا الدين .. اني ما بهمله و بعلمها .. ترى هي حالها حال كل المدارس يعني حتى الحكومه لازم متابعه من البيت لو شنو المعلمه بتعطيهم دم قلبها لازم متابعه من البيت ..

و الحفلات مو لازم توافقين على المشاركه و تدفعيت او حتى تودين ولدج يوم الحفله .. هذي اختياري ..

و حتى الروضات يسوون حفلات .. شي عادي نهايه السنه يرفهون عن الطفل بيوم له ..

يعني الروضات و المدارس الحكوميه بتقولين لي ما يحتفلون بالقرقاعون و عيد الفطر و الاضحى و العيد الوطني..

يوم حفلة تنكرية ويوم حفلة هالووين ويوم حفلة رقص (كل صبي مع بنية) وخرابيط وايد ويقدسون مناسبات ثانية مثل الكريسمس والسنة الميلادية ..

اختي هذي السنه الثالثه عندهم و ما سمعتها في يوم قالت سوو لنا حفله هالوين او حفله تنكريه او حتى حفله كرسمس بس 25\12 اجازه عندهم .. حفله راس السنه ايه اذكر اللعام سوو لهم بس كانت تصدف مع العيد اضن بس قالت اخي حفله راس السنه .. اي و في الروضه يسوون لهم يوم خاص بلون معين .. مثلا صف يلبس احمر و صف يلبس اصفر مع معلماتهم و يدرسونهم الاشياء اللي بهاللون و الفواكه .. اسمه colour day .. حتى مدرسه النور اجوف عندهم جديه ..

أنا ولدي كان يمرض ويغيب ولاحد يسأل عنه ويوم حفلة الرقص متصلين يقولون لي ليش مادفعتي!! قلت لهم أنا يايبة ولدي يتعلم مب يرقص ومابيه يشارك في هالحفلة ..

اممم مادري والله شقولج .. بس هذا الشي بعد من المعلمه يمكن ما كانت معلمه ولدج اوكي و تهتم .. اختي مو من النوع اللي يغيب وايد بس اذا مرضت و غابت اجوف يكتبون لها في دفتر اليوميات و يحطون الواجبات و حتى تشرح لها المعلمه اللي طافها و تطرش شنو اخدوا و تقول انتوا درسوها بعد هذي الدرس..

غير الطلبات اللي ماتنتهي والإستغلال عيني عينك عيل بالله عليج كل جم يوم طلبو قلامة ومحايات ولا قواطي كلينكس لين رحت هديت عليهم قلت لهم تعالو لايكون اليهال ياكلونهم وين يروحون هالكثر!!

لا و الله طلباتهم اقل من غيرهم بوايد .. علبه الكلينس وحده بدايه السنه ما اذكر انهم طلبوا على اختي اكثر .. و الدفاتر من عندهم في الروضه .. بس صف الاول لا من عندنا .. لانه وايد دفاتر .. اذكر بدايه السنه 8 دفاتر علوم و 2 للرياضيات و واحد عربي و واحد دين و دفتر رسم .. هذي اللي اذكره حالياً..

و جان على الاقلام و المحايات من الطالب نفسه يعني اختي الله يسلمها كل يوم او يومين قلمين رصاص تودي.. لانها بالدقيقه تبري ..

انتي لو تقارنين بالمدارس الثانيه ترى هم ما يطلبون شي .. اني في العائله عندنا ناس في انفانت سكول و البيان .. امهاتهم يقولون حتى لين اخترب المكيف يطرشون لهم دفعوا 5 دينار المكيف خربان .. و الا دفعوا 20 دينار بنصبغ الصف .. المهد ما يتطلبون جديه .. بالعكس ما يطلبون فلوس لهالاشياء ..

والله يحاسبني على هالكلام ..

و الله يحاسبني على كلامي ..

يا اختي اني مو قصدي اجادلج او شي من هالقبيل .. و الله و ربي شاهد .. بس يعني يمكن الضروف اللي كان فيها ولدج خلتج تاخدين عنها هالفكره .. و الظروف اللي مريت فيها اختي خلتنا ناخد هالفكرع ..
و الله اعرف وحده ولادها كانوا فيها في البدايه تمدح و اوكي و يوم وصلت بنتها 3 ابتدائي قامت تدم و تقول مو زينه قبل احسن و طلعتها و مع الايام الا اختها تقول اهي مطلعتها لانها ما تقدر على تدريس بنتها و هي مخلصه بس ثانوي و المواد كل ماليها تصعب و بدأ مستوى بنتها ينزل و زادت عليهم المصاريف بنتها و ولادها 2 .. من جدي طلعت ولادها ثلاثتهم و نقلتهم حكومه ..

يعني ساعات ناس لسبب خاص فيهم اهم انفسهم .. يحطون اللوم على المدرسه .. و خصوصا انه فكرتهم احنا دافعين .. لازم كل شي يجينا .. برايي التدريس اذا ما فيه متابعه من البيت و الطفل ما عنده حب و استعداد للدراسه سواء في حكومه او في خاصه ما راح يستفيد ..

و اني قلت من قبل لام حسون .. اني كل نهايه سنه اروح اتكلم مع الكوردنيتر و اسألها عن مدرسات المرحله اللي اعلى و من احسن مدرسه و من ترشح لي اخلي اختي في صفها و شنو الاسباب اللي تميزها عن غيرها .. اللعام رحت لكوردنيتر الصف الاول و سألتها من بيدرس السنه القادمه اللي اهي السنه هذي و من احسن وحده فيهم .. و الحمد لله مدرستها كلش زينه اتمنى ترتفع معاهم لصف الثاني .. و حتى مدرسات العربي اسأل المعلمه اللي تدرسها او المسؤوله عن مدرسات العربي عن احسن معلمه عندهم .. لاني دافعه لهم اروح اتعب و ادور الزين .. عشان ما يطيح في جبد اختي و جبدنا وحده مو زينه .. وما تفلح ..

هلا اخواتي .. كتبت تعقيب على كلام اختي الغاليه مخمل .. بس مادري ليش ما يوصل ..

كذا مره احاول كتب ما يوصل في كذا الموضوع .. مادري شفيه .. ليش ما يوصل للي كتبته و الله تعبت نص ساعه اكتب .. لاني عقبت على كله كلمه قالتها و كتبت رايي و وجهه نظري من خلال تعاملي مع المهد .. عشان الكل يستفيد .. من الايجابيات و السلبيات..

أهلين

اذا انتي من الرفاع باقولج عن مدرسة زينه (مدرسة حوار ) يعلمون الياهل الكمبيوتر و الفرنسي و الانجليزي طبعا من مرحلة الروضه و هذي المدرسه تابعة للنسيم
و الحلو اللي فيها ان البنات مفصولين عن الأولاد و مهتمين باللغة و الدين و ابشرج مديرة المدرسة متدينةو تخصص وقت للصلاة

في مدرسة ثانية ماعرف شسمها بس سألي عنها يكون التعليم فيها باللعب

في مدرسه كي جي كدز سألي عنها ماعندي وايد معلومات

Cute Mother;7773172:
اختي مخمل

مشكوورة
بصراحة كنت مترددة اودي بنتي المهد
شكلي خلاص كنسلت
الحكومة احسن واولردي بنتي بتكون مدرستها اختي يعني بتكون في يد امينة وفوق هذا الحمدلله المدرسة اللي بتروحها اختي طبقو نظام اللغة الانجليزية من اول ابتدائي السنة
وبعد ان شاء الله بوديها معاهد تتتعلم انجليزي
والله يوفق عيالنا وعيالكم

مخمل;7781412:
[grade="00008B FF6347 008000 4B0082"]

والله ياختي هالقرار أنا وصلت له متأخرة وتحسفت قد شعر راسي إني ماخليته في مدرسة حكومية من البداية

عشان جذي أتمنى من كل أم ماتغلط غلطتي وتركض ورا المدارس الخاصة عشان اللغة وبس

عندج البرتش كونسل لايعلى عليه في تعليم اللغة الإنجليزية ويمدحون المعهد الأمريكي بعد

والله يوفق الجميع

[/grade]

مشكوورة اختي مخمل:)

بس المعهد الامريكي وين يصير؟:o

مخمل;7781928:
[grade="00008B FF6347 008000 4B0082"]

تعقيب على كلام الأخت سمايلي

أختي ترى ولدي كان للكي جي 2 هناك وجفت مناهجهم بنفسي وهالكلام السنة اللي راحت يعني مب من زمان والقصص ولدي تعلم يقراها من الروضة اللي أسسته عدل وأدين لهم بالفضل

الدين والصلاة والأخلاقيات لازم تنغرس في نفس الطفل في المدرسة والبيت يعني التعاون المفروض يكون قائم ولو مايهتمون بالتبشير ماقدسو مناسباتهم الدينية اللي اليهال قاعدين يسألون عنها

أختي قلت لج ولدي كان هناك للسنة اللي راحت ماكان عندهم منهج كمبيوتر ولا لابات أصلاً وللعلم ولدي من المتفوقين المشهود لهم وطلع الأول السنة اللي راحت وهذي يثبت إنه كان ماشي معاهم بس الخلل وارد

بالنسبة للملابس حبيبتي أنا قلت إن السنة إنقضت وهم ماوفرو كل المستلزمات شلون أشتريها وشلون أحسن من الدوارة وهي مب متوفرة عندهم وكل ماسأل يكون عذرهم شكل كأن الملابس ببلاش

أنا أقصد فرع البسيتين وماعندي فكرة عن فرع سار وكانت المدرسة مثل ماذكرت تحتفل بالهالووين والكريسمس وتسوي حفلات رقص وحفلات التنكرية وأنا كنت رايحة مذركير بنفسي وجفت الملابس التنكرية كلها مخلصة والكيشر قالت لي مدرسة المهد كلها اليوم عندنا يشترون ملابس تنكرية

أختي أنا مازكي ولدي بس هو ملتزم بالدوام وأنا ماتعودت أغيبه إلا في الشديد القوي وماغاب عن المدرسة غير ثلاث مرات محد سأل عنه فيهم ويرة من المرات ماذكر ليش كانو بيصكون المدرسة يوم واحد وولدي كان غايب ويوم ثاني وديته المدرسة إلا صاكين ومحد كلف روحه حتى يطرش مسج يخبرنا وحق الفلوس يتصلون بدل المرة مرات

وبالنسبة لطلباتهم أنا رحت وكلمت البرنسبل وقلت لها ترى قلامة رصاص وقواطي كلينكس مب نهاية العالم عندي الخير وايد الحمد لله بس أنا ماحب ألعب دور الغبية وتستغفلوني عيل ياهل كل يوم والثاني تطلبون منه قلامة وعلب كلينكس وين يروحون لايكون ياكلهم مع العلم إن ولدي مايستخدم كلينكس إلا فيما ندر وقلامته أنا أبريهم بنفسي

البرنسبل نادت المعلمة وقالت لها وتفشلت وتعذرت بس ماكان عندها عذر مقنع لأن الشمس مايغطيها منخل والإستغلال واضح إنه كان السبب

خواتي كلكم عزيزات علي وعيالكم عيالي أنا قلت هالكلام من واقع تجربتي الشخصية وتجارب جفتها بعيوني وحبيت تستفيدون منها وماتغلطون نفس الغلطة والقرار النهالئي راجع لكم ومب قصدي الجدال لأن الموضوع لمصلحة عيالنا أولاً وأخيراً والله يوفقهم وينجحهم

[/grade]

هلا مخمل .. اني تكلمت عن تعاملي مع المهد فرع سار الفرع الرئيسي .. فيه لابات كمبيوتر و يدرسونهم من كي جي 1 .. و شكل ولدج من عمر اختي ..

و كلش ما عندنا مشاكل في الملابس بالعكس متوفره ..

و لامره سوو لهم احتفال هالوين و كريسمس .. يسوون لهم في فرع سار بس القرقاعون و عيد الفطر و الاضحى و العيد الوطني و راس السنه ..

و المعلمات اغلبهم زينين ..

بالعكس فرع سار ما احس فيه مشاكل مثل اللي طرحتينها .. يمكن البسيتين لانه جديد و مو مهتمين عدل فيه ..

Cute Mother;7783656:
مشكوورة اختي مخمل:)

بس المعهد الامريكي وين يصير؟:o

المعهد الامريكي .. في الجفير صوب مسجد احمد الفاتح .. و مكتبه الشيخ عيسى ..

Cute Mother;7783656:
مشكوورة اختي مخمل:)

بس المعهد الامريكي وين يصير؟:o

Sm!LeY;7788291:
هلا مخمل .. اني تكلمت عن تعاملي مع المهد فرع سار الفرع الرئيسي .. فيه لابات كمبيوتر و يدرسونهم من كي جي 1 .. و شكل ولدج من عمر اختي ..

و كلش ما عندنا مشاكل في الملابس بالعكس متوفره ..

و لامره سوو لهم احتفال هالوين و كريسمس .. يسوون لهم في فرع سار بس القرقاعون و عيد الفطر و الاضحى و العيد الوطني و راس السنه ..

و المعلمات اغلبهم زينين ..

بالعكس فرع سار ما احس فيه مشاكل مثل اللي طرحتينها .. يمكن البسيتين لانه جديد و مو مهتمين عدل فيه ..



المعهد الامريكي .. في الجفير صوب مسجد احمد الفاتح .. و مكتبه الشيخ عيسى ..

[grade="00008B FF6347 008000 4B0082"]





[/grade]

هلا خواتي أنا بصراحة اقولكم اللي يبي عياله يصيرون بلابل في الإنجليزي يدخلهم مدارس خاصة عدلة مثل البيان و ابن خلدون حتى لو الابتدائي بس والله المعاهد مافي منها فايده و لا الحكومة المدارس الخاصه كلشي بالإنجليزي


لكن تبقى مشكلة الإختلاط مشكلة

عشان جذي سوو مدرسه الشيخة حصة للبنات من الخوف على البنات

أنا سمعت إن الشيخ طارق سويدان بيسوي مدرسة خاصة في البحرين سألوا عنها

من عنده فكرة عن مستوى الروضة في مدرسة المعالي منهجهم وتدرس المعلمات اي احد عنده خلفية يفيدنا وجزاكم الله خير

لو سمحتو بغيت معلومات عن مدرسة الشويفات ؟؟
موقعها الرسوم مستوى الدراسه المراحل الدراسيه الي عندهم

مدرسة الشويفات الدولية تتبع شركة أمواج التعليمية ، وتطبق نظام سابيس التربوي المعتمد من أرقى الجامعات في الولايات المتحدة الأمريكية وكندا والمملكة المتحدة وأوربا والشرقين الأوسط والأقصى واستراليا ، كما تركز بالأساس على تعليم الطلاب لغتين أساسيتين إضافة إلى المواد الأخرى من الرياضيات والعلوم الأخرى المختلفة
ناس وايد مدحوها وعندهم من الروضة الى الثانوي واسعارها جدا غالية

reddish;7791164:


أنا سمعت إن الشيخ طارق سويدان بيسوي مدرسة خاصة في البحرين سألوا عنها

المدرسة موجودة فعلا واهي ( مدرسة الابداع الخاصة )

وسمعت عنها انها واااااااااايد زينه ويمدحونها وايد








عن مدرسة الشويفات

ولد اخوي توه هالسنة اول سنة له هناك

عمره 4 سنين ماعرف عاد اي صف حاطينه

بس ما شاء الله عليه من اول سنة صار يعرف الالوان بالانجليزي و الحيوانات والارقام

حتى صار يقدر يقول جمل بسيطة بالانقلش

وصج دوامهم طويل لي الساعة 3

بس هناك يعطونهم وجبة غدا .. و يحلون معاهم الواجبات وكلشي

يعني يدشون البيت يلعبون ويرتاحون



السعر وايد غالي مادري جم بالضبط .. بس اجوف اخوي وزوجته مستانسين على ولدهم وجنه مو ناويين يغيرون المدرسة


وحتى ولد اخوي شكله مستانس هناك

جم مرة ايينا ولاصقين على يده ولا خده نجمة ستيكر لأنه يازعم شاطر واهي عاد يفوشر علينا :tongue:

ولا ايينا ويشلخ عينا يقول لنا سوو سباق وانا طلعت الاول ... واحنا ندري انه بطة في الركيض :tongue:


بس يعني دايما يحسسون الياهل انه شاطر وذكي ويعرف كلشي

ام حسون


عندش فكرة عن بوابة المعالي

ساعديني الله يخليش

مدارس خاصة وايد حلوين وممتازينو على مستوى سمعت عنها

مدرسة البيان

مدرسة AMA

في بعد لتقوية اللغة الأنجليزية KUMON

في بعد مدرسة او روضة ممتازة وسمعتها زينة؟بس راح عن بالي اسمها

الشويفات تصير في المحرق او وين ؟؟

ومن تقدر تقول لي اسعارها

في جزر امواج في المحرق والروضا الف وشوي وكلما ترتفع المرحلة تزيد الرسوم

إلي سألت عن مدارس المهد فأقول لكم عن تجربة شخصية مني ومن بنات اختي .. المدرسة تعليمها قوي بس الكادر التعليمي ليها كل هنوووووووووود .... يعني مثل ما قالوا قبل الانجليزية بطلاقة بس بلكنة هندية ... وبصراحة الحمامات واجد وسخة حتى بنت اختي ما تدخل الحمام لحد ما ترجع البيت وتقول الحمام فيه دودة .. وشي ثاني بصراحه الهنوود وسخين وما يهتمون بنظافة الطفل يعني مثلا بنتي يخلونها مع صفها بنظفون الصف بدون ما يغسلون ايديهم ويرجعون البيت حالتهم حالة ...

والأهم من كل هذا ان المدرسات الهنود يستخدمون اسلوب الضرب مع الاطفال الحركيين .. وبنتي نفسها ترجع البيت وتحت عيونها ضرب تقول من زميل ليها في الصف ... واكثر الاوقات ترجع مضربة يا من المدرسات يا من زملائها .. حتى صارت تكره الروضة ويوميا معركة علشان تروح واكثر ايامها غياب .. وتحسفت اني بديت وياها هالبداية علشان بتتكون عندها صورة سيئة عن التعليم ..

وهذا كلامي وكلام كل إلي اعرفه في المدرسة .. مع العلم ان بنتي في صف الكي جي 1 فرع سار

وعن الروضات القوية عندش مدرسة لؤلوة الخليج في البلاد .. بس المقاعد تخلص بسرعه وكله يكونون على الويتينغ ليست .. وعندكم روضة المجد واجد يمدحونها .. ومدرسة الروابي بعد قوية ...

انا ابي اعرف عن مدرسة الروابي مستوى المنهج والتدريس عندهم قوي او شنو لأن بعضهم يمدحون وبعضهم يذمون واحنا ضايعين مو عارفين وين الحقيقة

ارجو من الي عيالهم في الروابي يفيدونا