اول يوم لطفلك في الروضة او المدرسة ....

هلا اختي..

ولدي ان شاء الله بكرة بيداوم الروضة..

عاد متخرعة حدي واحس الا حوالي يقولون حشى ولدها مو بيروح روضة بيروح جامعة..

قاعدة وافكر شلون بخليه في الروضة وبمشي عنه ..

واحاتيه شلون بياكل وشلون بيروح الحمام عزج الله..

عاد الوساوس مرة تاخذني يمين ومرة شمال..

بس اختي بأكد على نقطة لوكان ولدج يروح بالباص الخاص للروضة ضروري تاخذي رقم السائق..

للحالات الطارئة,,

الله يخلي اولادنا ويهديهم للخير والصلاح ويعينا على تربيتهم يا رب..

نور المدينة شخبارش من زمان ما بينتين اني الحمدلله عدى اليوم الاول على خير وولدي مارجع في الباص احنا رجعناه وان شاء الله يمر عليش الوضع سهل لانه صعوبة تحسين فيها لما تخلينه في الروضة وتمشين عنه بس في النهاية ه>ا عشانه

الله يخلي عيالكم ويبلغكم فيهم يا رب :)



انا ولدي من صغره وديته حضانة واساسا انا كنت افارقه لاني اروح الجامعة ، واللعام وديته روضة .. والحمدلله في المرتين ما كان في مشاكل لانه الصلاة على النبي اجتماعي ويحب الناس :wink:

والسنة سجلته في مدرسة خاصة ( KG ) وهالمدرسة صايرة بعيييدة عن البيت وهو بيروح ويرجع في الباص واحاتي انه يتعب من المسافة ويكره المدرسة .. واحاتي بعد ان يصيرون معاه اجانب في الصف ويكره المدرسة بعد :(


حاليا هو متحمس جدااااا للدوام وبيدوام يوم الاربعاء ان شاء الله .. وبعدها بخبركم بالاخبار في اول يوم له في مدرسته الجديدة :D

والله هذا همي اللي شايلته من ايااام .. يوم الثلاثاء بيكون دوام بنتي في الروضه وهذي اول سنه لها وخايفه حدي .. بنتي وايد متعلقه فيني ومستحيل تروح مكان بدووني الا مراات قليله .. افكر شلون بتاكل بروحها فدييتها

واحس اول يوم احنا الثنتين بنصيـــــــــــح ههههه

يوم الاربعا بيكون اول يوم :(

شاليله هم هاليوووم

فديته بعده صغيروني عمره سنتين و بدخله حضانه بس يومين في الاسبوع

الله يستر

باقي على مدارسنا شهر ومن الحين كل يوم لا جيت انام تدمع عيوني

الله يوفقهم وينجحهم ويخليهم لنا يارب

اني عندي ولدي صدوقي عمره اربع سنوات واول سنة يروح روضة واول يوم راح مستانس وركب الباص وهناك قعد الى حزة الفطور وبعدين قعد يصيح يبي الماما
والحين كل يوم على هالموال ما يرضى يروح الروضة وكل يقول خلااص ما يبي يرروح والصبح يركب الباص بالصياح بس اذا يجي الظهر يجي مفرفش ومستانس بس بعد يقول ما يبي يروح الروضة تعبت منه وكل يوم ما يلبس ثيابه الا بالغصب وبالصياح والصراخ من صباح الله خيررر

في احد ولدها او بنتهاا مثل صدوقي ؟؟ وشنو ممكن اسوي اليه عشان يحب الروضة واي قد ممكن اصبر عليه ويتعود لانة تعبت ونفسيتي زفت منه

angel eyes;7153024:
يوم الاربعا بيكون اول يوم :(

شاليله هم هاليوووم

فديته بعده صغيروني عمره سنتين و بدخله حضانه بس يومين في الاسبوع

الله يستر

لا تحاتينه انجل ان شاء الله ماعليه الا الخير ..


انا وديت حسوني الحضانه وكان عمره سنة و11 شهر .. ويداوم 3 ايام بالاسبوع ، والحمدلله حب الحضانة وتعلق بها .. لما نوصله كان بسرررعه ينزل يبي يدخل ولما نستلمه الظهر ما يرضى يمشي مع اني كنت اروح له متأخرة بحكم دراستي في الجامعه وقتها وما اروح الا في كم ياهل بس ومع هذا ما يرضى يمشي ويتعلق بالمربية واسحبه بالغصب هههههههههههههههههههه

ماما حسون;7153208:
لا تحاتينه انجل ان شاء الله ماعليه الا الخير ..


انا وديت حسوني الحضانه وكان عمره سنة و11 شهر .. ويداوم 3 ايام بالاسبوع ، والحمدلله حب الحضانة وتعلق بها .. لما نوصله كان بسرررعه ينزل يبي يدخل ولما نستلمه الظهر ما يرضى يمشي مع اني كنت اروح له متأخرة بحكم دراستي في الجامعه وقتها وما اروح الا في كم ياهل بس ومع هذا ما يرضى يمشي ويتعلق بالمربية واسحبه بالغصب هههههههههههههههههههه

ان شالله ولدي يصير نفس ولدج ...

تصدقين والله كنت بنزل موضوع نفس موضوعج

بالنسبة لي:
ولدي وديته قبل روضة خاصة وتعود عليها وبنفس الوقت انا بعد تعودت

بس ابوه اول مرة يشوفه ، فقلبه معورنه عليه لووووووووووووووول

لالالالالالالالالالازم كل ما يرجع من الروضة نشتري له اي شئ يشجعه على الكلام والكتابة او اي شئ المهم يحصل مننا دعم كبير

بس مرة وحدة الباص وداه الروضة والا كل يوم بروحنا نوديه ، ونروح ناخذ مشاويرنا لين ما يرجع

فديته ولدي فرحان وااااااااااااااااااايد

مرة بس بكى بالروضة ما اعرف ليش؟
دقت لي اختي( معلمته) تقولي ولدج فيه شئ اليوم ورحت له خذيته وبس ما عادها مرة ثانية

علمته يقول انا ريال ما اصيح الريااييل ما يصيحون وبروح الجنة وبسمع كلامج كله ان شاء الله
فديته حفظ الكلام ويردده كل يوم وصاير قوي الله يحفظه يا رب
مع انه صغيييييييييييييييييييير
شكله يدل انه سنتين بس


كنت بودي وادي الثاني الحضانة وخلاص والله دقو لنا، بس عمي ما رضى ولا عمتي ، ما هان عليهم وقالو حرام عليج صغير فهونت والا انا ابيه يروح يتعلم هناك شئ مفيد، الطفل لما يتلقى اشياء يحفظها، مثل ولد اخوي قام يرمس انجليزي عاد ما شاء الله مع انه اصغر من ولدي

احيانا ما اقوم الصبح والله القاه عندالي يقولي يالله ماما بروح الروضة

الحلو بالروضة توها يديدة وفاتحة وتفتح النفس وفيها قريبات ، وكفاية انه اختي تدرسه

وباذن الله تعالى لما بنتقل عند ريلي، بوديه مع ولد اخوي هناك يدرس بروضة خاصة، وبنت اختي بعد بروضة خاصة

يعني بكلا الحالتي محصلة حد عند ولدي ، وما اخاف عليه


الله يحفظ اولادي ان شاء الله من كل شئ

اليوم كان اول يوم لولدي في المدرسة

وصلته وقعدت معاه شوي ومشيت عنه وكان قلبي وياااه طول الوقت وكنت احاتيه لانه دخل عالم جديد يختلف عن الروضة في بعض الجوانب

والحمدلله عدى هاليوم على خير وشوي شوي بنتعود انا وهو خخخ

يارب تهدي ولدي وتحفظه من كل شررررررررررررررررر

هلا انسة معلقة,,

مشكورة حبيبتي..

والله ان حالتي ما تسر عدو ولا صديق..

ولدي عمره 3 سنوات وبنتي سنة.. مراويني نجوم الضحى، اشتغل من الصبح الى 2 ونص و ابدا جامعة 3 ونص، وارجع الليل عشر ، اولادي عند امي الله يحفظها ..

ولمن ارجع ابدلهم للنوم ، ينامون 3 واذا يعني خلاص هم تعبانين ينامون 2 وبعض الاحيان بنتي تنام وولدي يلعب ولمن يدوخ ولدي وينام تقعد بنتي..

يعني ما فيه راحة أبد..

واليوم خذت ولدي الروضة اول شي سوا روحه مستحي ..

وبعدين عادي راح يلعب بالمكعبات..

اتصلت الروضة سألتهم عنه قالوا قاعد يلعب,,

البارحة لمن رحت اشتري أغراض من السوبر ماركت أخذ بسكوت يقول بيوزعة على اصدقائه في الروضة..

الله يهدي اوالدنا لخيره وصلاحة ويعينا على تربيتهم..

للرفع

لسه مافتحت المدارس عندنا لكن اتوقع بداية الايام تكون صعبة علي يعني ولدي راح يروح مجتمع كبير شوي مقارنة بالروضة الله يجعل الامور سهلة ان شاء الله

ولدي توه رايح المدرسة وكلش مستانس ويقلد على اللي يصيحون على امهاتهم بس اني طول الوقت احاتيه ويش قاعد يسوي مع انه اول يوم بس راووهم صفهم ومرافق المدرسة وعطوهم جبس وعصير والوان كتشجيع ليهم ورجع من وقت على الساعة تسع تقريبا ولا يفوتكم يعلق على المدرس مالهم ايقول شكله مكسورة على وجههه بيضة وميت من الضحك وهو يتكلم بس ماادري ويش يقصد الله يستر هاذي البداية والله يعينه على بعدين

السلام عليكم
هذا الموضوع اللي كنت ناويه ادخل واكتبه ولقيت نفس معاناتي

بنات ولدي اليوم ان شاءالله راح يدخل اولى روضه الله يعيين ويهديه ويصلحه اللهم امين

والله قاعده احاتي في البجوه
مادري شلون راح اهده وامشي عنه

اول يوم قالولي تقعدين معاه ساعتين ثلاث بالكثير وتاخذينه معاج ثاني يوم تخلينه شويه وترجعين له ثالث يوم تتركين لي نهاية الدوام


وانا نفسيتي تعبانه شلون راح يكون الوضع زهبت ملابسه كلها والكاميره قلت بصوره شكلي بصور نفسي قبل لا اصوره

اللي يسمعني يقولي شنو كله رايح الروضه مو الجيش

:)


والله يعين ان شاءالله انا قاعده احببه بالروضه واهيأه نفسيا

واقوله قصص عن الروضه وعن الالعاب اللي فيها ...

والله يسهل باجر ان شاءلله

بس احس ان ولدي كبر وانه راح يطلع من البيت ويلتحق بالدراسه ويغيب عن البيت جم ساعه احس اني الولد مدلل بالبيت اهو الملك فيه راح يكون حاله حال باجي اليهال شلون راح يكون ولدي يعني يمكن تزفه الابله يقعد يبجي مادري ماتخيل هالشي :)


خصوصا اني مجربته بالحضانه ماقعد وطلعته بعد اسبوعين من المعاناة والبجي حبيبي حياتي


ادعولي ان الله يسهل الامور



دمتم سالمين
اختكم شريفة

كتير اكله هم كمان بنتي بدي سجلها بلروضة
مشكلة بنتي متعلقة فيني كتير ومابترضى تبقى بمكان الا اذا كنت انا موجودة
الله يستر

عقبال ان شاء الله اجوف ولدي في يومه الاول بالدراسة وتخرجه ويبلغني فيه ويبلغكم في عيالكم جميع ونجوفهم بأعلى المراتب:)