حبيبتي 00000000000 تعالي

حبيبتي 00تعالي

كلنا نعرف مشاكل البنات
المكالمات والغزل وووو
البعض ينظر للبنت هذي نظره احتقار ودونيه 00ليش ؟؟سواء اختها او قريبتها او معها بالصف
ليه ماكل وحده تحتوي البنت هذي وتشوف ايش مشكلتهايمكن تتوب على ايدها وتاخذ فيها اجر
الرسول عليه الصلاه والسلام يوم جاته الحرمه الزانيه وقالت له اقم علي الحد
ما احتقرها وشهر فيها وفضحها
بالعكس عاملها بكل لطف وقدر وضعها وتركها حتى ارضعت وفطمت ولدها
يعني انتو احسن من الرسول عليه الصلاه والسلام ؟؟؟حشى لله
تناظرون البنات بأحتقار وتجرحونهم وتستهزؤن بمشاعرهم
ليه ؟؟ماتدون عن ظروف البنت هذي ولاتدرون وش خلاها تسوي كذا 000حاولوايابنات تستوعبونهم
وتعرفون وش مشكلتهم 00واذا مافاد 00ادعوا لهم بالهدايه

انتهت رسالتي للناس

واللحين بكتب رساله لحبيبتي البنت اللي ابتليت بالمكالمات

عزيزتي واختي
ادري ماخلاك تسوين كذا الا شي اقوى منك اما اهمال او فقدانك للحنان
صدقيني حبيبتي انتي الخاسره الوحيده في الموضوع 00وانتى الوحيده اللي بتدفعي الثمن
ثمن غالي 00وقتها ماينفعك الندم 00ترا الندم طعمه مر وحسرته تحرق القلب
والله والله والله ان الحلال طعمه غير غير
وانك يوم تجربين الحلال بتندمين على كل لحظه ودقيقه قضيتيها على مكالمات وغزل
انتي اطهر من كذا 00وانتى انظف من كذا حرام توصخين نفسك بالمكالمات

حبيبتي رمضان جاي نظفي نفسك وصلي ركعتين وقولي توبه معد اكلم ولا اعاكس احد
والله بتشوفين السعاده والراحه00قومي حبيبتي واكسري شريحتك وغيري حياتك للأفضل
والله انك بترتاحين وتذوقين طعم السعاده رددي ياربي ارزقني بالزوج الصالح
يارب اغنني بحلالك عن حرامك
يارب انا ابي الستر ارزقني بالزوج العطوف اللي يسترني ويسعدني

ابكي واشكي همومك على الله
خلي السجاده صديقتك كل ما زهقتي صلي ركعتين وادعي باللي تبين
ترا يمكن ربي حرمك من السعاده وتأخر زواجك بسبب المكالمات والذنوب
تذكري
لايغير الله مابقوم حتى يغيروا مابأنفسهم

غيري من نفسك
خصصي لك جدار داخل غرفتك ولصقي عليه ورق عليها عبارات00000000
انا الذي اصنع سعادتي بنفسي ولنفسي1
الم تعلم ان الله على كل شي قدير2
ادعوني استجب لكم3
احفظ الله يحفظك4
وغيرها كثير
جيبي لك سله او علبه شكلها حلو وعطريها وبخريها وحطي فيها سجادتك واوراق بأدعيتك اللي تدعين فيها
ونظفي غرفتك كل يوم وبخريها واهتمي فيها وخليها مكان لعبادتك وصلاتك
اكتبي ادعيتك بنفسك من كل قلبك وكثري من يا ارحم الراحمين
اكتبي يومياتك 00ارسمي 00مارسي هواياتك سوي اي شي غير انك تعاكسين

انتي تستاهلين الخير وتستاهلين السعاده 00ليه تروحين للحظيظ بنفسك ؟؟ ليه تشقين نفسك وتحرمين نفسك الرزق والخير
ماتأخر رزقك ولاتعطل زواجك الا بسبب ذنوبك
ليش تحرمين نفسك 00ليش ترفسين النعمه
حبي نفسك 00والله لو تحبين نفسك ماترخصينها بالمكالمات 00ادري غصبن عنك ياعمري لكن
تشجعي 00انتي قويه وتقدرين تسعدين نفسك
قولي يارب وتوكلي على الله 00وتشوفين اذا ما ارتحتي قولي ماقالت
افتخري بنفسك انتي نظيفه 00انتي طاهره 00
وانا متأكده انو انتي بتقدرين وبتقولين ليتني سويت كذا من زمان
والله اني احبك وابيلك الخير
انتهت رسالتي للبنت


نجي لرساله ثانيه
حبيبتي اللي تكلمين شاب متزوج

حطي نفسك مكان الحرمه هذي 00ترضين احد يهدم بيتك ؟؟ترضين وحده تجي تأخذ منك زوجك
ترضين ؟؟
لاوالله ماترضين0000000 و تراكي ظلمتيها
وش يدريك يمكن هي كل يوم تدعي عليك وانتي سهرانه تكلمينه----- تكلمين حبيب القلب
و زوجته المسكينه فارشه سجادتها وتدعي عليك:confused:

لاتظلمن اذا ماكنت مقتدار
فالظلم ترجع عقباه للندم
تنام عينك والمظلوم منتبه
يدعوا عليك وعين الله لم تنم

وش استفدتي ؟؟ دعت عليك المخلوقه وانتي ولا داريه

هو متزوج وعايش حياته ومصيره بيرجع لحرمته وانتي مجرد وحده يتسلي معها
وتدغدغ له مشاعره مثل الزقاره او الدخان يشفطها بعدين يدعسها برجله
بعد ما يحرقهااااااا
ترضين انك تندعسين بالرجول 00حاشاك انتي مكانك فوق الراس
انتي نصف المجتمع وانتي اللي تربين وتنجبين النصف الأخر
يعني انتي الكل بالكل ياحبيبتي

والله والله انك انظف واطهر من كذا ياغاليتي

اعرف وحده دائماتدعي في صلاتها 00تقول الله ينتقم من كل وحده تهدم بيوت الناس
يحز بخاطري انها دعت عليك ياعمري
حرام تضيعين نفسك
انا ما ارضاها والله 00واحزن عليك ولا ابي لك الشقى
ترضين الزوجه المسكينه تدعي عليك
انا ما ارضى 00لاني احبك واخاف عليك يانور عيوني
اعرف بنات كانوا يتصلون على واحد متزوج وكان يكلم وزوجته جمبه واحيانا كانت ترد على البنات
بنفسها 00مسكينه كانت تقول ان شاء الله يوم تتزوجون يصير فيكم مثلي
وفعلا والله اني اشوفهم قدام عيوني وذكرتهم في الحرمه المسكينه
جاتهم عقوبتهم من الله


توبي ياحبيبتي قبل يعاقبك الله ويبلاك اما بالطلاق او العنوسه او الخيانه الزوجيه

لاتحطين نفسك بهذا الموقف وعزي نفسك انتي حبيبتي انظف من الثوب الأبيض لاتلطخينه بالطين

ادري انك وحيده ولاعندك احد يفهمك ولااحد حاس فيك
لكن موهذا الحل 00انتي كذا تدمرين نفسك

انا بعطيك حل ان شاء الله بيعجبك جربيه وشوفي

اللحين رمضان انشاء الله جاي الله يبلغنا رمضان والمسلمين اجمعين
طيب هذي احسن فرصه
عصفورين بحجر ياقمر
انوي التوبه وتوكلي على الله
وقولي يارب اشرح لي صدري ويسر لي امري
صلي ركعتين وعاهدي نفسك انك ماترجعين للشي هذا 00وابدي طبقي هذا العهد
رددي دائما انا بنت حلال واستاهل احسن وافضل من كذا
وثقي بالله انه بيعوضك خير
اسهري في الليل على صلاه التهجد صلي ركعتين او اربع
وادعي باللي تبين 00
اقري بعد كل صلاه 5صفحات من القران
يعني 5بعد الفجر و5بعد الظهر و5بعد العصر و5بعد المغرب و5بعد العشاء
كم صارت ؟؟25صفحه في اليوم
واو حلوه صح ؟؟
كذا بتختمين بسرعه 00اذا ختمتي القران بتحسين بشعور يجنن
واستغفري بعد كل صلاه 100 مره كم صارت؟؟؟؟ 500
واااااااو
كذا بأذن الله تغفر ذنوبك ولو كانت مثل زبد البحر
طيب اذا قدرتي روحي صلي صلاه التراويح لاتفوتينها تراها توسع الصدر
وتقطع عليك الوقت
فيه شي حلو بعد
طريقه اسرع عشان تختمين
اقري القران قبل صلاتك وفي اثناء صلاتك وبعد صلاتك
كيف ؟؟ بقولك كيف مثلا قبل الصلاه تقرين ص 1+2 من سوره البقره واذا صلتي اقري بصلاتك ص3+4
وبعد صلاتك اقري ص5+6
وبصلاه الظهر كملي اقري صفحه 7+8+9+10
وبعد الصلاه اقري وهكذا لين تختمين القران
طريقه سهله ترا
والله ياحبيبتي المتزوجات موب احسن منك 00ماتحبين يكون لك زوج وبيت وعيال ؟؟
ماتحبين تسمعين من زوجك كلمه حبيبتي
ماتحبين تسمعين كلمه ماما 00
اتركي الذئاب البشريه وفكري بحياتك ونفسك 00ترا والله مابينفعونك

انا مقدره وضعك 00وادري ياحبيبتي
وترا التحريم ماجاء مره وحده 00الموضوع حبه حبه
ربي يوم حرم شرب الخمر ماحرمه مره وحده لا00كان التحريم بالتدريج
عشان كذا انا بساعدك
يعني غيري من حياتك شوي شوي
اول شي اكسري الشريحه وقولي انها احترقت 00وطلعي لك رقم جديد محديعرفه الا
اهلك 00حتى رفيقات السوء لاتعطينهم الرقم
اعتبريها فتره نقاهه
وحاولي في الفتره هذي تجلسين مع اهلك لاتجلسين لحالك ابد عشان مايوزك الشيطان
ترا الشيطان مايجي الا الشخص اللي جالس لحاله مثل الذيب يأكل القاصيه من الغنم
بالنسبه للأغاني اضغطي على نفسك00لاتسمعين اغاني لانها تقطع الرزق وتجيب الفقر وتجمع الشياطين
تدرين ان الشياطين تتجمع على صوت الأغاني ويقعدون يصفقون ويفلونها00تخيلي وانتي جالسه تتسمعين اغاني
الشياطين جمبك ترقص وتصفق:eek:
اعوذوا بالله منهم
شوفي انا ما اقول صيري ملاك 00لا بس اهم شي الأغاني والمكالمات اتركيها

صيري نظيفه 00حلوه النظافه انتي نفسك بترتاحين
حتى لو انتي تكشفين وجهك وتلبسين عبايه كتف ملونه وتلبسين بنطلون وووو
معليش حبيبتي 00اهم شي اتركي المكالمات وبعدين انتي من نفسك بتتغيرين وبتصيرين تكرهين الذنوب وتكرهين تسوينها
لاتقولين انا اللبس بنطلون مايصلح اختم القران او انا اكشف ماينفع اترك الأغاني
شوفي ذنب عن ذنب يفرق واهم شي نيتك بالتغيير
وكل شي بيتغير مع الوقت حتى انتي بتحبين نفسك وتزعلين على نفسك يوم ترتكبين معصيه
عرفتي ياقلبي

عيشي حياتك وانبسطي واضحكي واستانسي 00بس بالحلاااااااال
الحلال طعمه يجنن 00ذوقيه 00بتحبينه وبتركين كل شي حرام

بقولكم مواقف صارت معي
اول موقف 00اول ماتزوجت كانت فيه وحده تتصل على زوجي وفي مره رديت عليها
فأرتبكت وخافت بعدين قالت 00هذا تلفون فلانه 00رديت عليها بكل هداوه ورقه قلت لها
حبيبتي انتي عارفه انه مو تلفون فلانه 00هذا تلفون زوجي 00تبين منه شي ؟؟
قالت انا غلطانه وسكرت 00بعد كم يوم اتصلت وكنا بنام 000قالت هذا تلفون نوف00قلت لها ايه
انا نوف 00وانا بس ابي اسايرها ادري انها لاتبي نوف ولاعوف بس تستهبل
المهم قالت لامو انتي نوف قلت لها الا انا نوف بس تعبانه صوتي متغير 00بعدين ضحكت هي وضحكت انا وقفلت
وبعدين قعدت كم يوم ما اتصلت وبصراحه فقدتها00وفجأه اتصلت وانا في مطعم مع زوجي
رديت عليها وقلت لها هلا والله وينك لك كم يوم ما ازعجتيناا00قامت تضحك وقالت انا اسفه خلاص مابزعجكم وسامحيني
قلت لها ياحبيبتي هذي الحركات مهيب لك ولا تناسبك انتي شكلك بنت حلال وهذي حركات بنات الشوارع
عفي نفسك واتركي المكالمات تراك تستاهلين احسن من كذا
حتى انو زوجي استغرب وقال ماشاء الله عليك توقعتك تعصبين وتهاوشينها وتسفلين فيها
قلت له ليه احرق اعصابي انا اذا سويت كذا هي بتمبسط وبتصير تدق كل يوم لكن لو جيتها بالذوق والهداوه بتستحي على دمها
ويمكن اكون سبب في هدايتها
وعندما تحب عدوك يحس بتفاهته
الموقف الثاني
اتصلت وحده على رقمي 00انا رقمي مميز كان جايني هديه انا طبعا ما احب الأرقام المميزه اشوف انو
التميز بالأخلاق افضل من التميز بالأرقام لكن الهديه لاتهدى ولاتباع
المهم اتصلت وحده وقفلت 00رجعت اتصلت عليهاويوم سمعت صوتي قفلت
وكانت متوقعتني رجال لكنها انصدمت بالواقع المرير انو انا حرمه 00:ss::ss:
رجعت اتصلت عليها وبعدين ردت علي
قلت لها مين اتصل من شويه
قالت كنت غلطانه 00قلت لها غلطانه ؟؟؟؟؟؟؟والغلطان يسكر بوجيه الناس ؟؟؟:ss::ss:00والغلطان يتصل اكثر من مره ؟؟
على فكره هذي مو اول مره تتصلين 00قالت اختي اللي اتصلت مش انا 00قلت لها طيب عطيني اختك قالت طلعت
قلت لها طيب على العموم انا ماني مصدقه كلامك وادري انك تتصلين على ارقام مميزه تبين شباب
لكن صدقيني الشي هذا يضرك مايفيدك وانتي كذا تضيعين حياتك و تهدمين البيوت العمرانه 00ياحبيبتي خذيها نصيحه من اختك
انتي ذهب 00والذهب غالي 00لاترخصين نفسك
انحرجت البنت مسكينه وقالت خلاص اوعدك ماعاد اتصل بس تكفين سامحيني ولا تدعين علي
سكرت من هينا ولاعاد شفت رقمها اتمنى انها تكون عقلت
نجي لاااااااااااااااااخر شي

الحرمه المتزوجه

تزوجتي ياحبيبتي 00وصرتي على ذمه رجال
محسوب عليك كل حركه وهمسه
ربي فضلك على كثير بنات ورزقك بالزوج وغيرك محرومه تبي نصف او ربع رجال
اوحتى شايب 00يسترها ويعفهااا
وانتي ياحبيبتي تلعبين وتخربطين --مكالمات ومغازل ---ليه ؟؟
مالك عذر مهما كان زوجك سيء او خاين او قاسي او مخادع
مهما كان فيه من عيوب --مالك حق تكلمين شباب
اذا مو طايقه العيشه معاه خلاص---تطلقي وبيرزقك الله
لكن انك تلعبين بذيلك لا--انتي كذا تزيدين النار حطب
واذا ولعت مابتحرق الا وجهك--خصوصا اذا عندك عيال
غيرك كثير محرومين من كلمه ماما--اولهم انا الله يرزقني ويرزق المحرومات في القريب العاجل يارب
ليش تجحدين النعمه اللي عطاك ربي وحرم غيرك منها
حبيبتي ---مهما كان ومهما فعل فيك زوجك وخانك وكسر قلبك
هذا مايعطيك الحق انك تسوين مثله 00اذا هو عندك بالحلال ليش تروحين للحرام ؟؟
مهما كان مقصر معاك ومهما كانت معاملته لك --ان قدرتي تصبرين وتتحملين اجرك على الله
كله بأجره الله مابيضيع تعبك والله
وان ماقدرتي لايحمل الله نفس الا وسعها ---خلاص اطلبي الطلاق وبيعوضك الله خيرا منه
وعلى نياتكم ترزقون
لكن مكالمات وغزل ومعاكسات 000ارجوك ارجوك ارجوك لا
انتبهي لا يغرك ابليس
انتبهي ياحبيبتي ترا الشرف غالي
انتبهي لايعاقبك الله ويفضحك على رؤس الخلائق
واذا تبين حل صحيح انا بقولك
هذي وحده سلمك الله زوجها راعي حريم وكانت صابره ومتحمله لين جاء اليوم اللي قالها فيه انا بتزوج
انكسر قلبها ودارت بها الدنيا وراحت تستشير شيخ 00قالها استغفري
وفعلا تقول استغفرت لدرجه اني اذا جيت بنادي واحد من عيالي اغلط واقول استغفر الله
وكلها فتره بسيطه الا زوجي راجع لي وصارت حياتنا افضل من اول بكثير

استغفري وتوبي الى الله وقولي يارب اشرح لي صدري
ومن يتق الله يجعل له مخرجا
تكفين يا اختي وحبيبتي مانصحتك الا لاني احبك واخاف عليك


اعرف وحده كانت تشتكي لي من زوجها واهماله لها وانشغاله عنها وسوء معاملته لها
استغربت وضعهااا لان البنت بصراحه جميله وام خمس اطفال واستغربت انو كيف الجمال هذا كله
مااعجبه ولا حاز على رضاه والرجال ماشاء الله عنده فلوس ولد نعمه 00طيب فين المشكله
لين عرفت وين المشكله

الحرمه هذي الله يهديها كانت عينها برا عينها كانت على الشباب
وكانت تطلع كل يوم وترمي اولادها عالمربيه
وهي في الأسواق والمطاعم والقهاوي والحفلات و ماتلقينها في البيت ابد
وعشانها دائما برا ولاتحفظ زوجها في غيابه ولاتحفظ بيته ولا تصونه
عاقبها الله وصار زوجها مايشوف جمالها الا بشاعه

قلت لها اللحين عرفت يافلانه ليه زوجك مايعطيك وجه
نظفي قلبك من الملذات وصوني نفسك واهتمي بعيالك تراك بنعمه غيرك محروم منها
وش تبين اكثر فلوس وبيت وزوج وعيال ماشاء الله
المال والبنون زينه الحياه الدنيا وش تبين اكثر
والله لو تتركين عنك هالحركات بيتعدل وضعك وبترتاحين
الله يهدي الجميع


اتمنى رسالتي هذي تكون جات في وقتها واتمنى اكون وصلت الفكره بشكل واضح
الله يكتب لي ولكم الأجر وينفع بها بنات وشباب المسلمين
يارب استرني واستر خواتي وبنات المسلمين اجمعين
احبكم



نصيحه

اذا في مبايلك خدمه رنان وكنتي حاطه اغنيه

ارجوك غيري الأغنيه وحطي دعاء او قران لانو اي احد بيتصل عليك حتى لو كان غلطان وسمع الأغنيه بتأخذين ذنبه

شوفي كل مره يجيك اتصال باليوم ؟؟ وبالأسبوع وبالشهر ؟؟ كل هذولا شلتي ذنوبهم فوق ظهرك
وبتتحاسبين عليها يوم القيامه


تم بحمد الله وتوفيقه