ضعف حركة الحيوانات

انا تزوجت من 5 سنين بعد تخرجى من الجامعه مباشره يعنى من سن 23 سنه
وزوجى مسافر السعوديه على طول وينزل اجازات يعنى فى ال 5 سنين معشتش معاه الا سنه متقطعه ومع ذلك من اول شهر تابعت واخدت علاجات لهرمون اللبن هدت صحتى ومعملتش نتيجه معايا لكن خفضته بالاعشاب وعملت تحاليل كتير حتى اشعه الصبغه عملتها ومحدش من الدكاتره طلبها منى ومع ذلك عملتها وطلع الحمدلله سليمه
لكن المشكله ان جوزى عمل تحليل سائل منوى وطلعت النتيجه معاه مش حلوة اوى لان الحركه عنده بعد ساعتين 30% والدكتور قال انها لازم متقلش على 50% بعد ساعتين ومع ذلك محاولش ياخد اى علاج او انه حتى يعترف بهذا . ودلوقتى انا جيت من مصر وسافرتله السعوديه عشان اعيش معاه
رغم انى تعبانه نفسيا جدا هنا لانى مش واخده على الحياه هنا ومش قادره أتاقلم عليها خصوصا انى بعدت عن ماما وأهلى ومش قادره اعيش من غيرهم بجد ومع ذلك بستحمل عشان الحمل
وتابعت مع دكتورة مصريه فى الرياض كويسه جدا وبتدينى منشطات لان البويضه بتقف عند حجم 17 ومش بتكبر تانى لكن قالتلى جوزك لازم يعيد التحليل ويتابع لان عنده بطء فى الحركه وجيت بلغته وهو قالى حاضر وصام عنى عشان يعمل التحليل ويوم التحليل اتحجج عشان ميعملوش وقالى ورايا مشوار شغل مهم الصبح وفوجئت بيه نايم وواخد اجازه ومرحش يعمل التحليل ودايما يعمل الحكايه دى معايا .. اروح انا اكشف واحلل واخد ادويه تتعبنى جدا رغم ا ن الدكاتره قالوا ان مافيش مانع يمنع عندى . لكن هو مش عايز يتابع رغم ان الدكتور قال ان علاجه ممكن ياخد من 3 الى 6 شهور وان المشكله بسيطه لكن هو مش بيسعى ورا اى حاجه وبيشرب قهوة وسجاير كتير جدا رغم معرفته انه تضر الحركه اكتر ولما اوجهه يجي يقولى الشهر الجاى والشهر الجاى يجيب شهر كمان
المشكله ان حتى مشكله التحليل مش مقتصره على عدم رغبته فى عمل التحليل
ده كمان مش بيقدر يعمل التحليل بمعنى ان التحليل لازم يتم عن طريق الاستمناء اى العاده السريه وجوزى مالوش فى الكلام ده ومش بيحصل له اى استجابه من وقت جوازنا الا من خلالى وليا انا بس . فعشان يعمل تحليل لازم يعمله فى البيت ودى مشكله لان ممكن النسبه متطلعش اكيد عشان عقبال ما هتروح المعمل ممكن الحيوانات المنوية تموت وهو مش قادر يسعى ويعمل اى شىء او انه حتى يعمله فى البيت وخلاص
انابجد تعبت نفسيا جدا لانى بسعى لوحدى فى الموضوع وكأن الحمل هقدر احققه لنفسى وبنفسى بس ..وانا خايفه اوى السن بكره هيكبر وممكن تضيع منى فرصه الحمل ومش عارفه اعمل ايه ؟
ياريت تدلونى بجد لانى تعبانه نفسيا جدا . وشكلى هنزل مصر وانسى الموضوع كله
ماهو متكونش غربه ووحده وتعب نفسى كمان
ياريت حد يرد ويقولى اعمل ايه من غير كلمه حاولى معاه لانى فعلا حاولت كتير ومافيش نتيجه
انا اسفه انى طولت عليكم بس انا مش عايزه احكى لحد من اهلى الموضوع ده وحبيت افضفض معاكم لان بجد المنتدى ده هون عليا كتير اوى من اول ما دخلته وبقيت واحده منكم
وان شاء الله ربنا يرزقنا جميعا بالحمل ونكون حومل فى رمضان
ياريت حد ينورنى