تجاربي بالبيت رقم 12

بسم الله الرحمن الرحيم

السلام عليكم ورحمة الله وبركاته ,,

كيف حالكم حبيباتي عساكم بخير ..

..........

تجاربي رقم 12 ..

وان شاء الله يعم الفائده على الجميع ..

.......

اليوم بطرح فكرتي بتنظيف البشره بشكل سريع جدا

حتى لو كنت مره مره تعبانه اني انظف بشرتي

ما عدت اقدر استغني عن هالطريقه المريحه

الي عملتها لنفسي وقمت اداوم عليها مره بعد مره

انتعاش ونظافه وبشره مشرقه بثواني ..

اكيد مر عليكم فكرة المناديل المنظفه للبشره

الي سعره ما يقارب 25 ريال وما فوق

لكن مو كل منتج انتي تستخدمينه موجود منه بطريقة المناديل السريعه المرطبه والمنقيه والمنظفه بنفس الوقت ..

وفي كمان مشكله ان لما تفتحين الكيس لازم انك تتأكدين من اغلاقه بالطريقه الصحيحه

عشان ما يتبخر رطوبة المنظف بالمناديل وتكون غير صالحه للإستخدام ..

خصتا ان اغلاقه يتم عن طريق لصقه

وهذي صوره توضيحيه للمنتج الي اتكلم عنه ..



طيب فكرتي تمت بالشكل التالي ..





وفرت قطن خفيف للإستعمال الواحد

وفي منه انواع واشكال وتلاقونه بالصيدليات بكثره ..






ووفرت علبه من البلاستيك النظيف





ووفرت كمان التونيك الي يناسب بشرتي لتنظيفها بشكل سريع

خليت القطن بالعلبه وعبيتها تونيك

واحكمت اغلاقها طبعا العلبه صغيره بحجم القطن ولكن لها عمق

وبكذا وفرت لنفسي مناديل نظيفه منعشه للإستخدام اليومي

كنت استخدم التونيك يوم ايوه ويوم لا ويوم انسى ولكن كنت على الاقل اداوم على اللوشن الخاص للبشره ..

لكن بالطريقه هذي السهله صرت اداوم على نظافة بشرتي كل يوم مرتين على الاقل

بالصباح و بالليل كمان ..

بعد ما ارتحت من هالطريقه السهله




قلت اطبقها كمان على كريمي الليلي والنهاري

وفعلا اخذ قطنه وامسح وجهي بالكريم وانتيهنا بأسرع وقت ..

.....

نفس الطريقه بالنسبه لغسول المنطقه الحساسه






وفري الغسول الي ترتاحين له

وعبي العلبه قطن من النوع الدوائر غير عن القطن الخاص بالوجه

القطن العادي مثل الحبات اكيد عرفتوا وش اقصد

المهم عبي العلبه قطن وصبي عليه الغسول وسكري العلبه

بكل مره تدخلي وتحتاجي للغسول اسحبي قطنه وامسحي المنطقه

واشفطيه بالماء وانتهيتي بسرعه ..

...........

فكرتي الثانيه بالنسبه للإهتمام بالمنطقه الحساسه وقت الشطف

اكيد المفروض انك تجففين المنطقه بكل مره ...

وطبعا المناديل العاديه غير معقمه ولا تستغربين ان حصل لك التهاب لا سمح الله

لأن المناديل غير صالحه لهذي الاستخدامات

ولكن للإسف الكثير يستخدمها بشكل يومي عشرات المرات من غير الانتباه لهذي النقطه

طريقتي بالتنشيف




وفرت لنفسي فوط ناعمه من الحجم الصغير مره الي ينفع للإستخدام اليومي فقط

الفوطه الوحده تقدرين تستخدميها يوم واحد للتنشيف واليوم الثاني ممنوع انك تستخدمينه

والسبب ان البكتيريا بتعمل عمايلها ..




اخذ الفوط

اغسلها اجففها





واكويها عشان تتعقم

واحطها بعلبه واسكرها وبعدها اخليهم بالحمام كرمكم الله

وبكل يوم اسحب فوطه نظيفه واستخدمها ..

كثير ارتحت من هالطريقه رغم ان فيها بعض الخطوات الكثيره

لكن صدقوني ان اهتمامك بالمنطقه هذي بالذات راح تريحك

من الامراض الي منتشره ..

..........





غسول الفم السريع ..

كنت اعاني من اطفالي

صحيح ان استخدامنا للغسول شي مريح خصتا بعد الوجبات

او قبل طلوعنا من البيت عشان ينعش النفس ..

لكن اصرار اطفالي على استخدام الغسول

خلوني اجهز لهم غسول للفم جاهز من البيت

وبأشياء طبيعيه افضل من الجاهز خوفا من بلعه





جبت قاروره من الزجاج





وحطيت فيه ماء ورد




وكم خيط من الزعفران




و حبة هيل مطحون طحن ناعم جدا

خلطتهم ورجيت القاروره

وخليته لهم وقت ما يحتاجونه

لكن المفاجأه ان زوجي صار مدمن على الخلطه

وبدل القاروره الوحده صرت اسوي اثنين

وانا كمان صرت أأيد الاشياء الطبيعيه للفم

والريحه منعشه عن جد ..

...........

طيب خلصنا من سوالف الانتعاش والنظافه ووو

نتكلم الحين عن تعطير السياره

لكن بقول لكم سالفه حصلت قبل يومين

وهالشي الي خلاني اتذكر اني اضيف هالتجربه

هنا عشان تعملوها لسياراتكم او لأزواجكم ..

جارتي الله يذكرها بالخير جت معي زياره لوحده بالمستشفى

وبعد ما انتهينا من الزياره وصلتها بيتها

سئلتها بنتها مع مين رحتي المستشفى ؟؟

قالت مع ام يوسف

قالت ايه ادري اصلا ريحة سيارتها عالقه بعبايتك !!!

اتصلت امها تقول لي السالفه وتقول لي وش تحطين بالسياره

اكيد قلت لها وش استخدم لتعطير السياره

والحين بعطيكم سر الريحه الي كانوا يسئلوني عنها

حتى زوجي صار يدور على السر

خصتا ان الريحه مهي جايه من معطر باين وواضح للعلن

الريحه الله يسلمكم

سجادة السياره

المكان الوحيد الي يعلق فيه ريحة السياره



دائما اشتري توله من مركز الفراوله

لاحظوا مو عطر لااااااااا مركز يعني التوله بحوالي 20 ريال
وفي الاسبوع مره وحده اجي امسح فيه السجاد الخاص بالسياره

وبس هذا السر الي خلى الناس يميزون ريحة الي راكب معي

هالتوله كنت استخدمها وقت ما كنت ادرس بالمتوسطه

والبنات كانوا دائما يسئلوني عن الريحه

مع ان البعض كان يشك ان الريحه هذي جايه من صابون الفراوله

..........

فكرتي اليوم تغليف هديه

آخر هديه شريتها لصديقتي

يا الله ما عرفت كيف اغلفها لأني طبعا

مو فنانه بالتغليف بالدرجه الاولى

فحبيت ان التغليف يكون مبتكر بعض الشئ ههههه

وبسيط بنفس الوقت

الي عملته اني دخلت برنامج الوورد

وكتبت اسمها ونسخته عشرات وعشرات المرات

واخر شي عملته برنت

وغلفت الهديه ههههههههه

عن جد حسيتها تفاجأت بأسمها على غلاف الهديه

وناويه اني اسوي هالطريقه بعد

لما يكون عندنا مناسبه خاصه بالاطفال اكتب عليه اسماء الاطفال

واغلف الهدايا فيها ..

............

تجاربي رقم 12
إن شاء الله حاز على اعجابكم

وجزاكم الله خير على حسن متابعتكم

وموفقين إن شاء الله ..

يمنع النقل الا بذكر المصدر واسمي والدعاء لي بالخير ..