مديري .. يعاملني كأني إمعه...

والله صعبة لانك مش تقدري تتركي العمل وايضا مش تقدري تكلميه لانه باين انساني همجي ومابيفهم بالكلام , انا حاسة بيكي جدا لاني احتكيت بنوع هالناس اللي بيحبطو العزيمة ويهدمو المعنويات وبيحسسو الانسان انه ولا شي ولا بيفهمشي غريب امرهم والله بس اكيد هذا عنده عقدة او شي خلاه يكون كده
انت الحين ماتقدريتعملي شي الا انك تصبري عليه وتسمعي من اذن وتطلعي كلامه من الاذن التانية احسنلك لانك راح تتعبي نفسيا من كلامه وصراخه وربنا يصبرك على استحمال هالوضع ربنا معاكي اختي
بس حبيت اسأل هو كده مع كل الموظفين ولا بس معاكي؟
وكمان انت ماتقدري تنتقلي لمكان تاني ماتكوني تحت رحمته؟؟

ع فكرة اغلبيه المدراء جيه تعاملهم مع الموظفين نتيجه ضغط الشغل

انتي سوي اللي عليج واذا عيبه شغلج وماشكر تراا انتي سويتي الواجب واذا ماعجبه عيديه مرتين وثلاث لين يرضا

لاتضايقين ولاتكدرين عمرج وان شاء الله مع الايام بتقدرين تفهمين الشغل اكثر وتعرفين شو اللي بيعجبه والعكس

بالتوفيق حبيبتي

يا ام جنى حالتج مثل حالتي بالضبط بالضبط وانا يمكن زيادة بعد .. سوي لي شاي سوي لي الفواكة سوي لي الخضرة نظفي ذي روحي مني سوي جذي اووووووووووووف تصبرت وقعدت وتحملت لكن نفذ صبري من جد صج صج نفذ صبري معاة لدرجة هاوشني قدام الناس ورجعت البيت وانا اصيح في السيارة صياح من قلب ليما رجعت البيت وانا اصيح ورقدت بالليل كانا معزومين وشافتني خالتي جان تقول لي شفيها عينج قلت لها مديري جان تقول لي باجر استقالتج على الطاولة حطيها وسويتها واللحين باقي علي جم يوم وان شاء الله طالعة ولا المذلة

اختي الغالية والله لو انا مكانج مستحييييل احد يهيني بهل طريقة ان شاء الله لو احفي في الشارع
لا ترضين على نفسج العزيزة اختي و وقفيه عند حده
و ما عليج من كلام اللي يقولج معليه صبري هذي مافيها صبر ان سبج خليه ينطم و رفعي من نبرة صوتج و قولي له انت ليش انتقولي جذي والله لا اناديلك ريلي يتفاهم معاك ..

men_gady;6566551:
ع فكرة اغلبيه المدراء جيه تعاملهم مع الموظفين نتيجه ضغط الشغل

انتي سوي اللي عليج واذا عيبه شغلج وماشكر تراا انتي سويتي الواجب واذا ماعجبه عيديه مرتين وثلاث لين يرضا

لاتضايقين ولاتكدرين عمرج وان شاء الله مع الايام بتقدرين تفهمين الشغل اكثر وتعرفين شو اللي بيعجبه والعكس

بالتوفيق حبيبتي

يااختي الكريمه..

انا لست بالجديده بهذا المجال.. ولست لا اعلم ما هو طبيعه عملي .. ولكنه لا يرى الجيد ويركز على السيء وهو لا يذكر .. لا اختي لا يعامل الجميع بنفس الاسلوب ولو لا حظتي بعض مواضيعي لرأيتي التفرقه الواضحه ..

يله شنسوي ... مشكوره لمرورك ..

يا هلا خواتي ..

والله كأنكم تشوفون همي.... هو فعلا انسان سيئ لدرجه ان يزفني جدام الناس ولا يفتكر .... نفسي صعبانه علي ... والله ... ويتعمد ان يستحقرني وكأني ما افهم .. بشي... في شغلي .. انا مادرست على الفاضي ولا انا الي جديده بمجال عملي ... بس هو الي مب عاجبته .. لاني مب مثل فلانه وعلانه .. لا البس استرج ولا ثياب عاريه ولا اتدلع ولا امتصع ولا اتضحك ولا شي ... صباح الخير ومع السلامه ..
ياما نمت ودموعي على خدي من الحسره و القهر.. احس كأني جنيت على نفسي بالشغل هذا ..

الله كريم

في العنوان شي طريف ..

استخدمتي كاف التشبيه يعني أنت ما أقررتي أن كلام هذا المدير صحيح و واقع .. و هذا 75 % من الحل

أن تعرفي و تقدري جيدا نفسك .. و تعرفي أن هذا الوضيع لا يعرف غير طريقة التحقير .. لأن تفكيره المريض لا يدله الا على ذلك .. و لشي ثاني أيضا أن الناس تنصاع له بشكل أفضل كل ما رفع صوته أو قل أدبه ..

أنا اقول لك لا تعطيه فرصة يمس أي شي من مشاعرك .. و لا تذرفي دمعة بسبب هذا النكد

لا تخليه يدمر شخصك أمامه .. اشعري بالشفقة عليه و كم هو مريض يحتاج المساعدة ..

ابتسمي كلما قال لك كلمة و قولي في داخلك .. يا مسكين

خليه يزفك من غير ما يتمعر وجهك طنشيه اعتبري انها ذبابة تزن حواليك و ما لو داعي تقولي لها هش .. اذا شافك هادية بيمل و يبحث عن ضحية جديدة يفرغ فيها نفسه المريضة

لكن لو شافك زعلانه أو تتحاشيه بيتعاظم في نفسه .. و يزيد في ما يفعله

صح هذا صعب الآن .. لكن مع التكرار بتنحجي

مجرد أنك تتقبلي كلامه بهدوء ظاهر و بالغ .. هذا يخليه يقلل من كلامه معاك بتلك الطريقة

لازم تفصلي بين قوله و تأثيره عليك ..

سؤال .. ما زلت لا تستطيعين تقديم طلب نقلك من عند هذا المدير ؟!!

كان الله في عونك اختك

والله يصبرك على مابلاك

حسبي الله وهو نعم الوكيل منه

حبيبتي هذا مريض نفسي الله يصبرك عليه.. انت خليكي واثقة من نفسك وظلي سبحي واستغفري الله عشان تصبري عليه الله ياخذ حقك منو .. تعرفي نفس المشكلة بتصير مع خالي وانا صارت معي لكن ما كنت مضطرة للشغل استقلت وقعدت بالبيت الله ينتقم منهم هالمدرا الي مصدقين حالهم انهم خطيرين عشان هالكرسي

الله يعينج بس..

معظم المدراء طبعهم جذي..!

ما اقدر اقول لج غير الله يعينج
ويصبرج..!

ودامج في البحرين
بتلقين العجب العجاب بالنسبة للأشغال..
:)

كان الله في عونك اختي

والله يصبرك على مابلاك

السلام عليكم ورحمه الله وبركاته ..

اخواتي مشكورين على دعائكم ودعمكم المعنوي .. عسى ربي ما يخليني منكم امين ..

اختي بريق الجنه .. ياليت .. اقدر اسوي جذي طبعي مسالمه .. واسهل طريق لي هو الدمعه ,, والقهر .. حتى ريلي ما قدر اقوله شي غير اني متضايقه من الشغل .. او اقوله مشاكل بالشغل لو قلت له التفصيل الي يصير هناك .. اقلها يتهاوش مع مديري .. وانا مابغي هالشي يصير .. لان بيعتبر ان زوجي الي متهجم عليه .. واعتقد .. اني اكبر من اني اخلي زوجي يسوي هالشي..

القطاع الخاص يختلف عن الحكومي .. المدراء يتكلمون من منطلق قوه .. (يزعم) .. والمشكله .. لمن تكون الشركه معتمده عليهم مليون بالمئه .. مستحيل تستغنى عنهم .. يعني هم الداخلين وانا الطالعه ...

طبعا القحط بالاشغال ... هو الي مخليني اتصبر لين الله يفرجها .. افكر شلون لو الله كتب لي حمل .. اقدر اتحمل .. الضغط النفسي مب زين حق الحامل .. .. شلون احمل في بيئه عمل وصخه ومافيها ناس محترمه ابدا .. صدقوني صادتني مثل الحاله النفسيه .. ادعلي كل يوم الصبح من قلبي.. واقرى المعوذات .. وادعي ان شاء الله ما اغلط في شي او أخطأ خطا مطبعي ..

او يصير شي .. او حتى يخترب شي ..

تصدقون مره اختربت الطابعه علي مالت الكمبيوتر .. قد يلومني انا على التأخير .. واني بطيئه ..
صاد الجهاز فايروس وكان يحتاج وقت عشان يتصلح .. وقعد يلومني على التأخير .. ويقول كل هالوقت على الورقه .. من مساعه ماجهزتي الورقه .. واقوله الجهاز مخترب .. يقولي مب شغلي !!

بالله عليكم مب متحجج ..!!

اي شي يصير سواء الخطأ مني ولا مب مني .. انا استلم الصراخ والهواش والتهزيء.. وحتى يوم يكون هادي .. لازم يقط كلمه تنغص علي يومي.....

اخنقتني العبره .. ودي اطبق كلامج اختي مريم نور.. ودي اسمع واطنش , واشفق على هلاادمي الي خالي من المشاعر .. بس نفسي كاسره خاطري اكثر من اي شي ثاني .. يومي كله اخترب.. حتى بنتي ودي اقعد معاها مب قادره من القهر الي فيني ...

يقولي انتي ما تفهمين شي .. لا عربي ولا نجليزي....!! عشان خطأ مطبعي...

سامحوني طولت عليكم بس للحين مقهوره

امعه!!

هو اللي امعه وستين امعه

هذا مديرج يباله حد يغسله بخيزارنه لين يتأدب ..... حبيبتي مثل ما قالت وحده من البنات لما يصرخ ويزر عمره عليج ابتسمي وذخلي كلامه من الاذن اليمين وطلعيه من اليسار

الله يعينج حبيبتي
فعلا شي يبط الجبد
بس انا عندي اسلوب مع هذول
وما ينفع انج تسكتين وانج ما تدافعين عن حقج
مرة كنت في الجامعة قالوا لي لازم تروحين للمرشد الاكاديمي، وطبعا رحت لها والله ان لسانها وانتي بكرامة اوسخ من نعالي، تمت تسب في البنات، وليش ما نروح لها،، وعطيتها الجدول وقلت لها ابي هالمواد، قالت على كيفج!! تحسبين الدنيا فوضة والا التخصص لعبة!! والا انا مالي مقام!! انا اللي اعطيج وانتي تمشين على كلامي، لازم نسوقكم مثل البقر علشان تفهمون..!!! طبعا قلت لها اكاني جيتج، واللي تبين تسوينه سويه، بس مافي داعي للعصبية... طبعا هااااااااجت لما قلت جذي، المهم تميت سااااااااااااااااكتة ولا قلت شي وطلعت بعد ما خلصت،،،،
وصار معاها موقف ثاني بس ما سكت هالمرة، هي روتنا جدول غلط وتمت تهاوشنا وتقول انتوا بنات جامعة!!!! حتى عيال الروضة احسن منكم في هالسوالف، ايش هالغباء، حتى جدول ما تعرفون تحطون... قلت لها هاتي الجدول، واخذته من عندها وطلعت، ورجعت لها وكلي ثقة والابتسامة على ويهي، وقلت لها بعد ما عطيتها الجدول: انتي ماعطتنا جدول السنة اللي طافت وقاعدة تعيبين علينا!!! وطلعت من عندها، صدقيني كلت نفسها اكال من الاحراج...
حبيبتي لا تسكتين عن حقج ولا تغلطين على احد،، بس اهم شي ما تسكتين... ليش ما رديتي عليه وقلتي له بس حضرة المدير خطك موواضح..او تقولين له كل انسان خطاء، ما بتكونين قلتي كلمة غلط ولا اني قللتي من احترامه
وكل يوم تروحين الدوام قولي "اللهم اكفني شره واجعل كيده في نحره"
وادعي ربج دوم انه يعينج
والله يعينج حبيبتي

اختي تدرين شنو قال يوم .. قلت له خطك مب واضح ... يقوله اخذي الورقه ولفي فيها وبتشوفين ان الكل بيقراها..مب اول مره يقولي تغلطين انتي كل تغلطين .. ولا عمرج بتتعلمين .. بذمتكم احد يقولي كلام جذي .. ويقولي انتي اصلا ما تبين تتعلمين ..

السلام عليكم
هلا ام جنى
الناس استخفت واقعدت وما نقول الا الله يعين
والناس على بالهم دايمين
لو دامت لغيرك ماتصلت اليك
والاشكال هذي الله مايوفقهم
مرت علي مديرة اهانة بالموظفات واستحقار للناس والمراجعين والناس عندها طبقات والله جعلهم سواسيه
تزتهزء في اي عمل نقوم به تجعلنا كاذبين
كذبتني اكثر من مره
وانا اخصائية اجتماعيه اعرض عليها مشكله وحلولها تتهمني بالكذب وتمزق بحثي الاجتماعي
وحدثت معي اكثر من مره ولكن الله سبحانه وتعالى قادر على كل شي
تم نقلها من مكانها الاجتماعي والوظيفي العالي والممتيز وتم وضعها في اداره مهجوره وتم تجميدها الى الابد

والتعامل مع هالاشكال بعدم وضع الاهتمام لهم عليك باداء الواجب ولا تدعيه يؤثر على نفسيتك وعلى اداءك والحمدلله انتي تعرفين نفسج وتعرفين ادائج والحمدلله
ولكن هذا الانسان يعاني من الكبر وعدم التفاهم مع الاخرين وعدم الثقة بالنفس ..

اعملي كل ماهو مطلوب منج على اكمل وجهه واذا تكلم قولي له هذا هو العمل المطلوب مني وانا عارفة شغلي وأأديه على اكمل وجهه والله يكون في عونج
وراح يمر عليه يوم ويغيرونه ان شاءالله قريبا يارب


دمتم سالمين
اختكم شريفة

مريــم نور ما شاء الله عليكى كلامك عين العقل , فيه حكمه كمان بتقول عتاب الندل اجتنابه حتى مجرد الكلام

اول شي ابا اعرف انتي كيف طبيعتج معاه

يوم تسمعين هالكلام كيف تتصرفين .. وعلى اساس تصرفج انا بقترح عليج حل ..

شو تكون ردة فعلج لما يعاملج بقلة الادب هاذي.. ؟

ذكرتيني بنفسي ،، انا كان مديري جذي ...شوفي حبيبتي .. بما انك ما تقدرين تتركين الشغل الحين عشان القرض .. ما لك الا اصبر .. صبري والله يعينك عليه وفي نفس الوقت كل يوم قدمي في مكان ثاني حته لو في شركه .. قدمي ولا تيأسين قطي اوراقك كل محل في البنوك والشركات والحكومه ، كل ما تحصلين فرصه طرشي السي في ، وحطي جدامك هدف ان تحصلين شغل ثاني ، ولا تيأسين وصدقيني عقب هالصبر لازم الله بيفرجها ،، وقولي هالشي اللي انا فيه مؤقت والله يصبرني ، والله انا سويت جذي كنت استغل كل فرصه احصلها كنت ادور بالجرايد واحيانا بدون جرايد بروحي اروح اقدم ،،والحمدلله الله فرجها على والحين في قطاع الحكومه .. انتي لا تقعدين تحطين يدك على خدك وتقولين شسوي ... قدمي اوراقك والله يوفقك ويهدي هالمدير..