هل ابني طبيعي لو فيه شئ انا ما ادري عنه

حبيبتي

ولدج ان شاء الله طبيعي

بالنسبه للقلم والمقص الياهل ما يطلع من بطن امه وفيديه قلم ومقص لازم انتي تعلمينه .. شو رايج ان حمود الين الحين ما يعرف يمسك القلم بالشكل الصحيح .. وما شاف المقص بعيونه .... ؟؟

للعلم اني انا مخبيه عنه كل القلامه لانه يشخط على الجدران مسوي حجرتي صبورة ..

وبالنسبه للبامبرز وايد تاخرتي .. كان المفروض من سن ال3 سنوات توفرون فلوس البامبرز لاشيا ثانيه بعنب الغلطه مو منه مسكين منكم انتوا ...

والملابس يعرف يعقهم بس ما يعرف يلبسهم لاني انا البسه وافصخله عمري ما قلتله البس بروحك يعني المشكله منا نحن يا عيوني

وبالنسبة للضرب شكله ولدج عنيد ويحب يطلع شخصيته ..

اتصدقين اني انا الين الحين احط حمود فالعربانه واحيانا اذا اصر ان يمشي اهدده اذا ما سمع كلامي ارجع البيت او السه فالعربانه .. طبعا يخاف ويسمع الكلام .. حاولي لما تطلعون تهياين الجو له تقوليله فلان شاطر استوى كبير ويسمع كلام ماماته يمشي ويانا ويمسك يدينا .. عطيه فرصه يتكلم ويناقشج ويسال .. قوليله اذا سمعت كلامي بشتريلك لعبه وكل ما يخالف امرج فالطلعه قوليله ما بشتريلك اذا ما سمعت الكلام وفي نهاية الطلعه اشتريله لعبه صغيره كمكافئه ..

شوفي حبيبتي ما عليج من كلام المدرسين لانهم يقارنون بين الاطفال .. المهارات اليدوية مثل الكتابه والقص واللعب هاي كلها اشيا تعليميه يعني الياهل ما يكتسبها بالفطرة انتي لازم تعلمينه .. الحمدلله انتي تقولين ان يتكلم ويستوعب معناته ان الولد طبيعي 100% ولازم تعرفين ان الاطفال انواع منه الشقي والحركي ومنه الهادي والنعزل ومنه الانطوائي ...الخ

لا توسوسين واقري على ولدج وكثري من الكلام باسلوب الكبار ..وكثري من نصايحج له

اختي ان شاء الله ابنج طبيعي بس هذي حركات اطفال وبالنسبة الى مسك القلم والمقص هذا يتعلمه منا احنا الكبار طبعا انا بعطيج نصيحة اخذي له طين او صلصال وخليه على طول يلعب بيه لانه يقوي عضلات اليد وانتي اقعدي وياه وعلميه مسكة القلم الصحيحة وايضا المقص وبالنسبه للعناد كل الاطفال يعاندون بس تفاهمي بطريقة حلوة مثل ما شرحت لك الاخت بجعة والله يهديه ويوفقه

وعلى سالفة البامبرز اختي اكبر خطأ انك تتركيه الى هذا السن انا ما شاء الله بنتي من كملت السنتين ما تلبس حفاظ احسك مقصرة معاه

الاخوات ماقصر افادوكي وتعلم الكتابه تجلسي معاه وتعلميه مره مرتين وبيتعلم

والبامبرز تاخرتي واجد عليه

وتصرفاته طبيعيه مثل الجهال

الله يخليه لك يارب

السلام عليكم ..

مشكوورات يا اخواتي .. بصراحه طمنتوني حسيت ان في شئ يمكن مو طبيعي عنده ..

بالنسبة للكتابة والله تعبت وياه اعلمه اشلون يمسك القلم عدل بس هو ما يرضى يبي يمسكه على هواه بس تراه يعرف يكتب فيه ويخربط ويلون وعنده كتب و دفاتر ماليه البيت وصلصال وغيره .. بس مو راضي يتعلم مسك القلم عدل ولا حتى المقص ما يعرف يقص فيه ..

الحفاظ لان انا كنت حامل وما عندي شغالة تنظف لي فإعتمدت عليه وبعد لاني اوديه عند امي تنومه على سرير اختي الصبح لما اكون في الدوام ويوسخ لها ويسبب لي وياها احراجات .. لكن اللحين هو وياي قاعد بالبيت فشلته عنه ..

اما الدراجه وش رأيكم اشتري له وحده كبيرة يمكن اللي عنده صغيرة ما يعرف لها .. بحاول اخذه محل وانشوف له سيكل يعرف يمشيه ..

وعناده وعصبيته يمكن بسبب اني ما دخلته الروضة بس ان شاء الله السنة الجاية ويا رب يتغير ..

مشكووورات يا اخواتي طمنتوني بصراحه حسيت امس يمكن فيه شئ لانه تعبني وانا اعلمه اشلون يقص بالمقص ولا فاد وياه
بس بحاول مرة ثانية .. وان شاء الله يتعلم بسرعه ادعوا له الله يهديه وااايد مغربلني ..

الأخوات ماقصروا وماشاء الله أمه الله أعطتك أمثلة كثيرة...

ونسيت أبارك لك بالمولود الجديد...


أنت حاولي تشتري المقص الصغير اللي للورق .أنا شريت لعبودي وخليته عنده يكون يقص منه الورق واللماع ومافي خطورة على يده..

أشتري الدفاتر اللي بالخطوط والنقط وعلميه يمسك القلم وحاولي أنت تبتدين معاه...

بخصوص الحفاظة أختي أسمحي لي آقول لج تأخرتي عليه وايد،، كان المفروض تعلمينه من السنتين وشوي يكون يتعود من الصغر.. الحين حاولي معاه بالليل لما يتبول لا تهاوشينه او تعلقين عليه لكن بيني له ان غلط ان ولد بسنه يسوي هالشي...

اهلا رانيا ..

انا كنت اتمنى اشوفك تدخلين تردين علي لان ولدك بنفس عمر ولدي ..

انا صح غلطانه بالنسبة للحفاظ بس ترى ما البسه الا في الليل مو طول اليوم و السبب مثل ما ذكرته من شوي ..

لكن هل ولدك يقدر يركب دراجه بثلاثة عجلات ؟ وهل يلبس ملابسه بروحه ؟ يعني الاشياء اللي ذكرتها عن ولدي هل تحسيها في ولدج ؟؟ والدفاتر اي اخذ له اللي فيهم نقط حتى هالمرة اشتريت له كتاب مثل السبورة يكتب على الاحرف بقلم السبورة ويمسحهم .. بالانجليزي وااايد حلوو الكتاب وتعلم منه وااايد .. ويقدر يكتب بعض الاحرف بدون الكتاب بس المشكلة في طريقة مسكه للقلم ..

السلام عليكم ورحمة الله وبركاته

حبيبتي انا مدرسة وعندنا طلبة بصفوف اول وثاني وثالث

ابو الاول اعماراهم بين الست والسبع سنوات احنا نعلمهم ونتبهدل عشان يمسكون القلم والمقص شو عاد ولد الاربع سنوات

وعن الحفاظ انتي الغلطانه المفروض تخليه يدخل الحمام قبل لا ينام وتعوديه بعد فترة من شرب السوائل يدخل الحمام

وعن اللبس عادي مهارات تختلف من طفل للثاني

لا تخلي بقلبك وساويس واذا فعلا شايفة فيه شي مو طبيعي وديه لطبيب اطفال بس اشوف الامور طبيعية العناد وغيره

ويمكن المعلمة تفاجات اونه انه ما يمسك القلم والمقص يمكن تبغاه على الجاهز عشان لا تتعب وياه بس اقولها لج عيال الست سنوات نعلمهم مسكة القلم عادي

اختي بالنسبة للقلم والمقس والالوان هالشي عادي لانه توه صغير وما تعود على مسكة القلم واسمحي لي هالمعلمة ابدا ما كان المفروض تقول هالكلام اذا كان الطالب في الصف الاول يكون صعب عليه مسكة القلم منالبداية الا لو كان متعلم في البيت او الروضة وفعلا مثل ما قالت الاخت انا شخصيا اول ما يدخلوا الطلبة المدرسة واقصد الصف الاول يكون عندنا طلبة ما تعلموا في روضة ولا في البيت ناخذ وقت معهم عشان يتعلموا مسكة القلم وهالشي مو صعب .

شوفي انتي خذي له اقلام تلوين خشب وعطيها له مع كراسة صغيره وخليه يشخبط بروحة لو شفتيه يغلط مو مشلكة عادي مرة مرتين عشر عادي مو ضروري تقعدي معه في كل مرة

عندج هالطريقة سويها احكي له قصة مثلا بس عن طريق الرسم اسويها مع بنتي وتحبها وايد كل شوي ماما يالله احكي لي قصة بالالوان وانا احكي القصة وارسم الاساسيات مثلا كان فيه شجرة كبيرة فيها تفاح وارسم الشجرة جا عصفور وارسم العصفور وهكذا وهو بيقلدج صدقيني خلال اسبوع او اثنين ابنج بيمسك القلم وبيشخبط بروحة وحتى المقص نفس الحركة سوي عنده وردة شجرة دوائر مثلثات وقصصيها ولو تشتري مقصين افضل واحد حقج والثاني حق ولدج وتشتغلوا انتوا الاثنين تقصصوا الدوائر والاشكال وحتى الملابس عادي مو مشكلة مثل ما قلت لج طلبتنا في الصف الاول عند تغيير الملابس بحصة الرياضة في البداية صعب يلبسوها بروحهم تساعدهم المعلمة ومرة بعد مرة يلبسوها بروحهم كيف عاد ولدج توه صغيرون بس بعد خليه يتعود شوي شوي وانتي تلبسيه قولي له شوف كيف نلبس الفانيلا كذا لو ما عرف عشر مرات بعد مو مشكلة لان شكل ابنج عنيد شوي وحتى البنطلون شوف كيف وخليه يلبس امامك وصلحي له صدقيني لو سويتي الي قلت لج عنه بدون كلل ولا ملل خلال هالشهر ولدج بيمسك القلم والمقص وبيلبس بروحة

وبالليل بعد ما ينام بساعتين صحيه وديه الحمام حتى لو ما صحي قوميه انا اتبعت هالطريقة من تنام بساعتين مثلا او ثلاث حسب ما اقدر كمية السوائل الي شربتها اقومها اوديها الحمام عزج الله وارجعها مرات اشيلها وهي مغمضة عيونها بس تكون حست بهالشي وتعودت مرات تقولي لا ماما ما فيني شي وترفض ومن اشيلها وادخلها تكون مجمعه واضحك عليها بس لازم نتعب وبنرتاح


والله يكون معج كلامي صح كثير بس تنفيذ الكلام بسيط جدا بس كان لازم اوضح لج

اختي اني ولدي بعمر ولدك وعمره 4 سنوات وتي مسجلته للروضة السنة هذي ان شاء الله بيروح

وفي اشياء ذكرتينها موجودة في ولدي صدوقي مثل ما يلبس ثيابه عدل واني بصررراحة ما علمته واذا يلبس بروح يلبس بالمقلوب ساعات واجد ياخذ وقت وهذي ما تعتبر مشكلة
وما يلعب وية اطفال اول مرة يشوفهم ومو اجتماعي وما يحب يحتك وية ناس حتى لو اطفال في عمره ما يحتك وياهم الا اذا متعود عليهم عدددل مثل اخواني
والعناد والضرب والعصبية عادية بالعمررر وما في شي يخووف
وعن السيكل اني بعد ولدي تاخر على ما عرف يمشي السيكل واشوف الاطفال الي بعمره يمشون السيكل عدل ولدي ما كان يعرف بس يوم كمل 3 سنوات واشوي اشوفه قام يمشي السيكل واني دربته والحين اوكي وانتي اخذي له سيكل كبيررررة وبيعرف ان شاء الله بس انتين حطيه في مكان واسع وعلميه وبيعرف
وعن القلم والمقص عليمه لانة هالاشياء ما تجي بالفطررة
وصدقيني ولدش طبيعي 100% والناس واجد يحبون يبالغون ويقارنون بين اطفال ثانين واني جتني فترة جدي من تعليقات الناس
والله يهديه ويخليه

اختي ابنك عااااااااااااادي جدا ومثله مثل كل الاطفال اللي بعمره لا تحاتين :)

عن مسك القلم لا تخافين عليه يبي له يتعود شوي شوي وبعد ما يروح الروضة راح يتقن الموضوع ونفس الشي بالنسبة الى المقص ..

وعن لبس ثيابه عاااادي انا ولدي عمره 4سنوات و3 شهور وللحين ما يلبس عدل سواء الثياب او الله يعزج الجواتي والصنادل .. يحاول يعني بس مو دايما تضبط لانه احيانا يلبسهم مقلوبين او اللي ورا يصير قدام ههههههههههههههه

والسيكل تخيلي انا بعد ولدي للحين ما يعرف يمشي سيكل عدل :o والسبب انه ما يهتم رغم ان عنده بدل الواحد 3 ومن اول ما جبته كانت هدية عمته له سيكل وقدامه موجود من صغره لكنه ما يركب زين ولا يهتم له عدل عكس السيارات يحبها اكثر ،، فأعتقد انه ما يعرف لانه ما يحب يمشيه ولا يهتم زين ولو كان يحب السيكل كان اكيد تعلم اما الحين فهو يوم من سنة اذا يركب ..


اما عن العناد العصبية فهذه عادة عند كل اليهال واعتقد في هالسن يحبون يفرضون شخصيتهم علينا ويثبتون وجودهم :)


وسالفة انه يكون اجتماعي مع الاطفال فهذا عادي انا الحمدلله ولدي من النوع الاجتماعي ويندمج بسرعه مع اليهال حتى اللي ما يعرفهم واول مرة نشوفهم عااادي تلاقينه يلعب معاهم ويسولف لهم بعد ههههههههههه
بس اذا كان الطفل يستحي وما يندمج بسرعه مع باقي الاطفال اللي مو متعود عليهم احسه طبيعي هالشي وما فيها اي مشكله :wink:


خلّي عنك الوساوس وكلام الناس وتعلقياتهم .. وانا وحده عانيت وااااايد من كلام الناس وللاسف اكثرهم كانوا من الاهل لكن الحين ولدي كل ما يكبر زادت تطوراته وصار يتفوق على بعض الاطفال اللي من عمره في نواحي كثيرة وتطمنت عليه ، واتذكر اني مرة حطيت موضوع مشابه هني بسبب الوساوس اللي سببوها لي الناس من تعليقاتهم على ولدي وقمت احس انه دايما اقل من باقي الاطفال وسبّب لي اكتئاب عدل :16:

ملاك ..
اتصدقين عاد اني انا بعد مدرسة ابتدائي وشفت هالشئ في طلابي ............ولكني ما حطيت في بالي هالشئ ... عاد في بنات حتى المقص وحتى القلم ما يعرفون لهم .. الله يهديني كبرت الموضوع وهو ما يسوى ..


قلوووووووب ..
طريقة وااايد حلوة وان شاء الله اطبقها مشكووورة يا عمري ..

حبيبة جيمي ..
هلا فيج اختي طيب ولدش في اي روضة وديتينه لاني شفتك تسألين عن روضات تناسب المنطقة اللي عايشين فيها .. شنو احسن روضة ؟ وهل دخلتي ولدك القمر ؟ زينة لو لا ؟

ماما حسون ..
مو البلا والمشكلة في الناس هم اللي يخلون الوحده تتعقد في حياتها الا ليش ضعفان الولد ليش جسمه جذيه ليش ما يعرف يمسك القلم .. يعني يعقدون الواحد في حياته .. وانا بعد قارنته بأخوي الصغير اللي اكبر منه بسنة شفت ان اخوي بعمره يقص ويركب السيكل عدل ويلبس ملابسه بروحه من جذي خفت ..


مشكووووورات يا بنات بصراحه طمنتو قلبي وانا قاعده ادور لولدي دكتور طلعت انا اللي احتاج لدكتور يعالج وساوسي ههههههههههههههاااي

كيف حالك أم محمود :) ألف مبروووك البيبي الجديد :)

إبنك عادي و ما فيه شيء إن شاء الله...بس شكله يفتقد حنانكم...أو غيران من أخوه...يعني إنتبهوا له شويه...

و المهارات الثانية...يمكن لو كنتي دخلتيه روضة من بدري كات تعلمها...بس مصيره بيتعلمها ما تقلقي...لما بيدخل الروضة و يشوف الكل حواليه يشتغل و يرسم و يقص...راح يتعاون معهم و يصير مثلهم...

ما تقلقي :)

ايوت

حبيبتي لا تخلي بعقل الولد انه محتاج لطبيب نفسي ودامك معلمة يعني تشوفي ان فعلا فيه اطفال بحاجة لطبيب بس ولدك كل الامور طبيعية الحمد لله

وهذي مهارات يكتسبها بالوقت

تعرفي احيانا ناخذ مشغل ويعطونا مقصات واوراق نقطع فيها

وبعدها يقولولنا شوفوا الوقت الي قضيتوه بالقص

كل هذا عشان نحس بالاطفال وما نعصب عليهم اذا احنا الكبار واحيانا صعب علينا القص شو عاد هاليهال

عزيزتي انتي اتعلمت من ابنك الأول انشاء الله في ابنك الثاني مش تقصري معاه بالنسبة لموضوع الهدوم أنا ابني عنده أربع سنيين برضه و مع التدريب حيعرف يلبس لوحده .. شجعيه و هاتي حاجات حلوة بيحبها لما يلبس لوحده اعطيه واحدة و.

بالنسبة للقلم هاتيلوا ألوان خشب و كراسه و خليه يلون و دي حتنمي المهارات عنده انشاء الله.


بالنسبة للحفاض عوديه قبل ما ينام بساعة مافيش أكل و يروح الحمام و لما يصحي نظيف افرحي و خليه يحس انك فخورة بيه و اعطيه أي حاجة بيحبها واحدة واحدة حيتعود ان شاء الله .

ربنا معاكي:)

أختي أيوت.. كل طفل تختلف قدراته عن الطفل الآخر.. تعرفين كنت أشوف ولد من العيلة أصغر من ولدي بسنة وشوي وماشاء الله يعرف على السيكل بو 3 عجلات ولدي ماكان يعرف أستغربت،، بس لما شرينا له قبل أسبوعين في البداية ماعرف بس عقبها بكم يوم عشان الممارسة تعلم عليه ومسكين يافرحة ماتمت أمس أخترب بالمرة...

وعن الملابس مشكلتنا ان أحنا نسوي لهم كل شي، انا كنت ألبسه من راسه لأخمص قدمه.. بس من بدت الإجازة قمت أخليه بروحه يدخل ويغسل ويلبس بيجامته وكا خلال شهر مع الممارسة الحمدلله تعلم،، ما قال يلبس كل شي عدل لازم لخبطة بس شي أحسن من ولا شي...

عارفه ان الموضوع قديم جداً بس نفس. المشكله في طفلي عارف الأرقام والحروف ويعرف قراء بعض الكلمات بس بعده ما يعرف للقلم فالروضة من أسبوعين بداو يقولون عن الموضوع طفلي عمره 3 سنواات و7شهور

الاخوات ماقصرو غناتي ربي يحفظه