أرجوكم أبا حل في نوم بنتي

اختي ما قلتي كم عمرها؟؟

بنتي عمرها 3 سنوات و 4 أشهر

عادي حبيبتي عن خبرتي مادري نجحت مع بنتي

دخليها غرفتها ونامي عدالها على السرير وإذا كان سريرها مال اليهال حطي راسج على مخدتها أو على سريرها (علشان تحس بالأمان ) أهم شيء تعرف إنكم خلاص بتنامون وطفوا الليتات مال بيتكم وأي مصدر للإزعاج ورقدي ريلج احسن
صدقيني شوي شوي خلاص بتنام على الوقت ها تعلمته من سوبر ناني المربية الأجنبية
بس أعيد عليج ممنوع الكلام والنقاش تتكلم تسوي صوت ماشي لا تردين عليها حتى لو صاحت إنتي نايمة يحليلها بتم تفكر وتلعب في الظلام بعدين ما بتسمعين إلا شخيرها

ها الشيء سويته مع بنتي لما كانت في عمر بنتج وألحين ولدي وكلهم مشى معاهم الحمدلله

هلا فيج اختي اذا انا اكلمج عن معاناتي مع نوم عيالي بتقولين انه حالتك ارحم بس الحمد الله غيرت نظامهم 180 درجه كله بفضل الله ثم مربيه جوو هذي اللي كانت تطلع على mbs 4اذكر عيالي كانو ينامو وقت اللي انا انام ويصحون معاي لدرجه انه هالنظام اثر على صحه بنتي اللي عمرها الحين 2 والولد 3ونص تعبت معاهم كم ليله بس يمكن ليلتين او 3 الحمد لله تعبي ماراح عالفاضي الحين ينامون 7 بالليل ويصحون 7 الصبح والطريقه اللي عودتهم انه ينامون لحالهم وبهالوقت انه اول شي ما اخليهم ينامون في الظهر لأنهم اذا اخذو قيلوله في الظهر مستحيل ينامون في الليل ..... والطريقه الثانيه اتعبهم باللعب طول اليوم لانه الأطفال عندهم طاقه هايله اذا ما تعبو في اليوم ما بينامون في الليل........ والطريقه الثانيه اللي هي مشكله نحن ما ننتبه له هي السكر لازم تقللين السكر اللي تأخذه بنتج هذا يزيد في طاقتهم كلما شربت عصاير الجاهزه او حلويات او اي شيء فيه سكر طاقتها تزيد وها المشكله صارت معاي العصاير الجاهزه لين ما دكتور قال لي اني ازيد نص الكلاس ماي وشوية عصير بس كطعم يكتبو لج انه طبيعي ومافي سكر بس كله كلام وانا كنت اعطي حك اولادي عصاير مراعي على بالي انه طبيعي وما في سكر زياده .....

والطريقه اللي تخلي الاولاد يتعلمو ينامو لحالهم هي انه احطهم بالسرير وقت النوم واطلع من الغرفه اكيد يلحقونج وهم يبكون بس انتي من غير ما تتكلمين معاهم ردي حطيهم في السرير واطلعي من الغرفه من غير ما تقولي لهم اي شي او تهديهم ولا تحظيننهم بس قولي لهم هذا وقت النوم ولاتزيدين كلمه ثانيه واطلعي وراح يلحقج مره ثانيه وانتي تجاهلي صياحه وحطيه وقولي له نفس الكلام يمكن يسوي معاج هالطريقه فوق 20 مره عشان جي لازم يكون معاج احد ريلج او اي احد معاك في البيت تتناوبون لين ما الولد او البنت تتعب وتنام والليله اللي بعدها نفس شيء صدقيني ماراح تندمين وتعبج ماراح يروح عالفاضي الطريقه هذي المربيه جوو تستعملها مع كل طفل يرفض ينام ودائما تجيب نتيجه وانا جابت معاي نتيجه لو تشوفين عيالي احطهم في السرير اقرأ الدعاء النوم معاهم اشغلهم القران وانا طول الليل ارتاح منهم وصدقيني راح يرتاح بالج انتي بعد طول اليوم واقفه على ريلج محتاجه راحه جربي هالطريقه وشوفي النتيجه

اتمنى اني افدتج تقبلي مروري

الله يبارك فيكم وفي عيالكم بجرب اخواتي الي ذكرتوه وعسا ينفع معها ولو اني اشك

أختي تعرفي ان بنتي أصلا من النوع الي ما تتقبل العصاير المعلبة نهائيا واذا اشتريت وعطيتها لو بتشرب منه ما بتاخذ أكثر من فنجان أما الحلويات فبنتي مو من أنصارها أبداً يعني ممكن تاكل مكسرات جوز لوز عين الجمل كاجوا اما سكاكر وحلويات لا

أما المشكلة الثانية وهي الصعبة جدا بس بحاول فيها كيف أتعبها باللعب ما عندي يهال واشكثر بلعب معها لان عندي شغل وما عندنيا يهال قريبمنا في سنها لكن عل وعسا هالطريقة تنفع معها بجرب معها اول شي بسويه بكرة اني أقوها بدري عشان أضمن نومتها بدري
تعرفي بعض الطرق الي ذكرتوها أسويها ادخلها الحجرة وابند الليت وانام جنبها حتى لدرجة اني عادي أنام وهي لا حتى مرات أقفل الباب بالمفتاح واشيل المفتاح من الباب عشان أظمن أنها ما تطلع لو راحت علي نومه وماشي فايدة


بس بجرب طريقتكم هذه وان شاءالله تنفع والله انا تعبت حتى من قلة النوم صداع وارهاق عندي حتى عندها عادة ما قدرت اغيرها تقوم بالليل مرتين وثلاث عشان تشرب الحليب ولو عاندت وقلت لها ماشي حليب نص الليل تسوي لي حشرة وصريخ فضيع ومستحيل تنام بدون الحليب

الله يساعدك حبيببي والله ما عندي خبره بس ان شاء الله باقي الأممهات ما يقصرون معاكي