قال تعالي (وشاورهم في الأمر فإذا عزمت فتوكل على الله)

السلام عليكم بنات
أنا صاحبة المشكلة
اليوم الأميرة نوره جزاها الله خير جابتلي لاب توبها مع اشتراك النت عشان اقرا واتابع معكم الردود على راحتي .
لأن العادة انا اقعد على كمبيوتر موجود في غرفة الجلوس اللي اغلب الأحيان يكونون متواجدين فيها اخواني ومااقدر اخذ راحتي .
اليوم انا دقيت على ام الولد علشان ابلغها رفضي .,, تخيلوا حتي لما قلت حق امي أو اللي منحسبه على ام . لما قلت لها مابيه , قالت انا مالي شغل . ماتبينه دقي على المره قوليلها مابيه .
في بنت تدق على اهل اللي خاطبها تبلغهم برفضها ؟؟ والله شي يضحك وشر البليه مايضحك وفعلا سلمت امري ل الله ودقيت على ام الولد قبل اشوي لأني قلت مومعقولة اطلع من ضيم اهلي و اروح حق ضيم زوجي يعني بس اغير الوجوه والاماكن !!!
قلت لها ياخالة انا داقة عشان اوفر وقتج ؟؟ واقوولج ماله داعي تجووون عشان النظرة الشرعيه لان انا موموافقه .
جان تقولي ليش يابنتي؟ احد خرب عليج؟
قلت لها لا بس انا صليت الاستخارة ومو مرتاحه؟
قالتلي ليش مومرتاحه بشنووو تفكرين؟
قلت لها .. عندي اعتراض على 3 شغلات
اولا ,.. ان الولد بدون وماله امل بالجنسية الكويتيه
ثاني شي ,.. هو رافض فكرة اني اشتغل او اسوق سيارة
قالت لي .. حبيبتي انا عندي بنات واعرف البنات بشنوو يفكرون؟ وشنو يتمنون؟
هو مستحيل يمنعج من انج تسوووقين او تتوضيفيين . راح تسووووقيين وراح تتوضيفين و لا تحطيين في بالج انج بتصيرين راعية بيت؟ (يعني مسؤولة عن البيت)
قلت لها <<<<<<< والجنسية؟؟؟ تضمنين لي ان هو ماراح يعارض فكرة انه نهاجر حق اي دولة خليجية وناخذ جنسيتها .
قالت لي ؟؟ هو يفكر بالمستقبل اكثر منج و انتوا ان شالله اذا ارتبطتوا تشوووفون رزقكم مع بعض . ماكو مانع انكم تسافرون وحده من دول الخليج وتحاولون تاخذون جنسيتها ؟
قلت لها (جم معاشه؟؟)
انا كنت حاطه فبالي ان معاشة وايد ضعيف (بالنسبة لكونه بدون)
قالتلي هو يشتغل بشركة خاصة ومعاشة فوق ال400 دينار هذا غير علاوة الزوجة .
انا لمحت الولد مره .. هو ماشء الله جميل الشكل والكل يمدح أخلاقه ,, كل معارفنه يتمنونه زوج لوحده من بناتهم .
وهو رفيج اخوووي الكبير الروح بالروح وكله قاعد بديوانيتنا .
اوكي بيخليني اسوق واتوضف وفي مجال مستقبلا نهاجر حق وحده من دول الخليج عشان ناخذ جنسيتها والله العالم هالمحاولة بتصيب والا بتخيب ...........؟ و مع هذا الكويت غالية على قلبي . لي اقارب كويتيين وانا ان شالله املي بالجنسية كبير واتمني اني ارتبط بواحد كويتي ومو هاين على اطلع من الكويت .
اليوم اربعاء 2/7/2008
هي قالت احنا بنجي يوم الجمعه 4/7/2008 عشان تشوووفون بعض الشوووفة الشرعيه .
قلت لها اوكي انا موافقة بس مو معناة انه بنشوف بعض اني موافقة .
احنا نشوووف بعض وبعدها لكل حادث حديث .
قالت لي خلاص اوكي توكلي على الله .
وانتهت المكالمه .
إشرايكم؟؟؟

الصراحه بعد كلامج اللي قلتيه الحين
انا من رايي انج تواصلين بالموضوع
ودامج استخرتي فتوكلي على الله واذا كان هو من نصيبج فكل شي راح يتيسر لج اما اذا ماكان من نصيبج بتجوفين ان بتطلع لج مية شغله توقف في طريجج
اما عن سالفة الجنسية فأنا ما اشوفها بهاذي الاهمية بس يمكن بعد انتوا عندكم الاوضاع غير
وجوفي يمكن هو بعدين يخليج تشتغلين لان بعدين الاوضاع بتتغير وهو اذا ماكان قادر على الصرف بروحه بيقول لج دوري لج شغل خخخخ
وماتدرين بعد اذا امه كانت حليوه ممكن تكون بديل حق امج اللي انحرمتي منها

انا مابي اطول عليج
بس لو كنت مكانج راح اواصل وان كان نصيبي زين وان ماكان فهاذي تجربه تتعلمين منها
والله يوفقج حبيبتي وييسر لج امورج
ولا تنسين تخبرينا عن آخر التطورات

الله يوفقك ياقلبي ربي اللي مسخر ودام الامور مشت كذا كملي واذا فيها خير لك ان شاء الله ربي كتبها لك ..

اذا بعد الشوفه قدرتي تتكلمين مع الولد وتتفاهمين معاه يكون احسن كمان ...

وركزي على موضوع الجنسيه لانه مهم وانا كثير قريت عنه وشفت ناس يعانون من هالمشكله وربي يوفقك ويسعدك ويكتبك الخير وييييين ما كان ......

طمنينا عن احوالك .....

والله مادري شقولك
بس يمكن جحيم اهلك اهون من جحيمه واذا هو من الان يتشرط فالله اعلم بنفسيته
والدين مو بس انه يصلي وملتزم ولحيه قبل ذا كله لازم يكون اخلاقه عاليه
ومن الناحية الماديه فالارزاق بيد الله المهم الاخلاق والتعامل ؟!
والله مدري انصحك بشو بس انتي فكري عدل وحاولي تعرفين اي شي عنه
شوفي كيف تعاامله مع اهله واخلاقه معاهم
كيفه مع امه وابوه يحترمهم اولأ
له اصحاب او ماله واذا له كيف علاقته معهم
وبعدها انتي قرري
وماتدرين يمكن ربي يعوضك بالي يغليك قد عيونه
الله يختارك الصالح ويسهل لك امره

والله القصة تصيح وتحزن

وجنه المطوع ما يختلف عن الوالد دام انه ما يبيج تشتغلين ولا تسوقين سياره (( يعني تعيشين حياتج في سجن البيت بدون شخصيه مستقله)) ومثل ما قلتي انج بنت تحبين تطلعين وتعيشين حياتج وهذا مو حرام ولا عيب

واعرفي اختي ان بعد العسر يسر ان شاءالله ييج واحد متفتح العقل ويحترم المرأة ويكون لج قرار مستقل

أختي شوفيه و توكلي على الله

مش خسرانة شيء

و عجبتيني جدا إنك قلتي شروطك من الأول...و فهمتيهم إنك بنت واعية و فاهمة حقوقك كويس...

الله يسهل لك أمورك...

ملاحظة...الشوفة أول مرة كمان مش مقياس...الموضشوع مش بالشكل...حاولي تتكلمي معاه...و إسألوا عنه كتير و عن أخلاقه...

و إن شاء الله ربي يقدم اللي فيه الخير :)

حبيبتي كرري صلاه الاستخااره اكثر من مررره ,,, ووكلي امرك لله عزوجل ,,, وانتي لاتحكمي على الرجال بسبب حاله المااديه ,,, عمر الماديات ماكانت سبب لسعااااده ,,, انتي فكري مره مرتين ثلاثه ,,, لان وضعك في البيت مو عيشه بصراااحه ,,, وخااصه علاقتك معا امك ,,, وبعدين لاتزعلين على امك ترى هي مضغووطه وعاايشه في قهر بسبب الوالد ,,, انتي بنتها الوحيده يعني احن قلب عليها ,,, تقربي منها لاتخليها مهمووما لووحده خذي بااخطرها ,,, لو استدعا الامر تبووسي رجلها عشاان رضااها بووسي ,,, ماافي ام تكره بنتها ,,, بس انتي ماعرفتي تتقربي منها ,,, ماااارح تلقي قلب في الدنيا احن من قلب امك عليكي ,,, ارضي امك عشاان الله يرضى عليكي وينور لك دربك ,,,

* الله يوفقك لطريق الخير *

ام يارا

وكلي امرك الى الله سبحانه وتعالى من توكل على الله فهو حسبه

اختي بعد هذه المكالمة عندج يومين الزمي فيهم الاستغفار وقراءة سورة البقرة والدعاء بان اذا كان في الامر خير ييسره واذاكان ما فيه خير يصرفه عنك ويصرفك عنه والله يوفقك

دعواتي من قلبي:الله يوفق لج كل خير

انا رأيي من رأي اختنا مرموم

والله لا حول ولا قوة الا بالله انا ياختى اوعدك انى ادعيلك فى صلاتى ربى يوفقك لما فيه خير لك وانت ماجورة حبيبتى اصبرى على امك واستميلها لك فانتم من لها فى هذه الحساة بعد قسوة الزوج وبفضل دعئها سيسخر الله لك الافضل

الله يعينج
والله يوفقج وين ما كنتي..

حبيبتي الغاليه
مو مشكله انك بدون
ولا مشكله انك مش مرتاحه في بيت اهلك
ولا المشكله ان الي تقدم لك شخص واحد فقط
حبيبتي المشكله انك تطمحين للافضل وهالشي مافيه لا غلط ولا حرام
شوفي بالرغم من ظروفك الي حكيتي عنها وانك ما تطلعين ولا احد يشوفك كثير الا انه جاك عريس
ومو مهم منو هالعريس لكنه جاك بفضل الله سبحانه وتعالى
بس لازم لا تهربين من واقعك على واقع امر والعن
ترى مو كل مطوع مطوع
يعني مو شرط انه خلوق ومتدين انك بترتاحين معه بالذات ان ظروفه مش حلوه نهائيا وبتطلعين
من بيت اهلك الي على الاقل مرتاحه فيه من ناحيه انك تنامين وتاكلين وتشربين بهدوء
الى بيت الله العالم اهله الاغراب وش جنسهم او عاداتهم الي ممكن ما تناسبك
والجواب باين من عنوانه بيسكنك في غرفه وبتكون حريتك الشخصيه معدومه تقريبا بالاضافه
الى التعب النفسي بعدم ارتياحك واخذ راحتك مع زوجك ويمكن ما يعاملك بالطريقه الي تتمنيها
انصحك لا تتسرعي ابداااااااااااااااا
ولا تهربي من فخ لتقعي باكبر منه
ترى الله سبحانه وتعالى كريم وانتي تعبتي كثير بحياتك واكيد الله بيعوضك
استخيري مره ومرتين واصبري وما بيصير الا الي الله كاتبه
واذا ما ارتحتي له ارفضيه وبيجيك واحد ثاني مثل ما جاك الاول..
ولا تيأسي من رحمة الله وادعي دائما ربك بالعوض والراحه وبتشوفين كل الخير .
تحياتي

للرفع

حبيبتي

البنات ما قصروا

بس حطي في بالج انج انتي الحين في بيت أهلج مهما كنتي متضايقه ما راح تتضايقين كثر ضيقج اذا تزوجتي الرجل الي ما يناسبج

مهما كنتي متضايقه في بيت اهلج .. تظلين اكبر همج نفسج

بس اذا تزوجتي اي واحد وطلع ما يستاهلج بتشيلين همه و همج و هم الطفل الي ممكن تحملين فيه


خذي وقتج و فكري عدل

مش كل واحد طول لحيته يعني اخلاقه واصله فوق .. بعضهم للأسف يستغلونها عشان يكسبون ثقه الناس فقط
أما عن حالته الماديه فعلاااا "خذوهم فقراء يغنيهم الله" و وين وحده تلقى ريلها يقول لها قعدي فالبيت و مصروفج يجيج لين عندج؟

استخيري و توكلي مثل ما قالوا البنات ..

والله يرزقج بالزوج الصالح

السلام عليكم بنات
اليوم الجمعة الموافق 4/7/2008 الساعة 12 ظهرا
جمعة مباركة للكل
وأشكر كل من دش وشاركني برايه او دعالي . عساها بميزان حسناتكم يا رب
المفروض اليوم تكون النظرة الشرعية !!!!
وانا استخرت اكثر من مره ومع هذا قلبي مو مرتاح كلش
فامس دقيت على اخت الولد وقلت لها ماله داعي تجون اليوم لان أنا رافضه بشكل نهائي .
يعني الموضوع انتهي خلاص وارتحت الحمدالله
والله يعوضني ويعوضه باالأحسن ان شالله
مره ثانية اشكر الكل وبالأخص منال الكويت اللي تواصلت معاي ع الخاص .
كفيتوا و وفيتوا بنات وماقصرتوا ........................................... جزاكم الله خير ياااااااااااااااااااااااااااااا رب .
وان شالله ادش مره ثانية وابشركم بمعرس جديد يعوضني فيه الله خير .
استودعكم الله الذي لاتضيع ودائعه

والله أنا وجهة نظري اعقليها وتوكلي على الله ومن يتوكل على الله فهو حسبه كوني مقتنعة بقرارك
والله يعينك على مشاكل مع أهلك لا حول ولا قوة الا بالله
بس اصبري اصبري الصبر مفتاح الفجر
والرجل ممكن يتغير مع الأيام ويعطيك حريتك بعد تأكده انكي انسانة محترمة وطيبة وكمان بتفوزي بالذرية الصالحة الي بتسعدك وتفرحك
أنا بس أتمنى لك السعادة والهناء والذرية الصالحة