كرات الكيك+ الكب كيك الكذاب ((بالصور ))

هذا سويت سريع و بسيط و مقاديره بعد بسيطه..و هو نفس السويت عملت منه شكلين واحد كرات و الثاني الكب كبك الكذاب.. و خليتهم بنفس الموضوع لاني ما يسوى اسوي موضوعين منفصلين و هم نفس الفكره لكن الشكل يختلف

المقادير

شوكليت خام ((للتغليف ))
سكر ملون اختياري للتزين
نحتاج الي كيكه ((تسوينها بنفسج او كيكه من العلبه او كيكه جاهزه))

وعلبه كريمه الجبنه ((ليست جبن ..و يا اما تشترينها جاهز او تسوينها اذا لم تتوفر ))

و هذي صوره كريمه الجبنه الجاهزه ((لاحظوا المربع و السهم ))



و اذا مالقيتيها جاهزه تقدرين تسوينها بنفسج و هذي مقاديرها

لعمل كريمه الجبنه :
علبه جبنه فيلادلفيا المستطيله
اصبع زبده
كوب سكر بودره

نخفق كل المكونات و تطلع لنا كريمه الجبنه

الطريقه :

اول شي اذا كنتي مسويه الكيكه بنفسج تخلينها لين تبرد تماما و تفتتينها ...يا اما بالخلاط او باليد



بعدين تضيفين عليها كريمه الجبنه


بعدين تعجنينها لين تصير متماسكه و تكورينها و تدخلينها الثلاجه لمده نص ساعه



و بعد النص ساعه لج الخيار تغلفينه باي شكل تحبينه من الشكلين الي راح اعرضها لكم

اولا لعمل كرات الكيك :

تذوبين الشوكليت و تغمسين فيها الكرات لين تتغلف بالكامل و تخلينها تبرد و ممكن تزينيها بالسكر الملون بالمكسرات باي شي تحبيه ...و هذا الشكل النهائي للكرات






ثانيا لعمل الكب كيك الكذاب :

حطي اوراق للكب كيك في قالب كب كيك اصغر حجم ...

و ذوبي شوكليت و في كل تجويف حطي شويه شوكليت ...الكميه ترجع لحجم الكرات و القالب ...((اسمحولي نسيت اصور الخطوه هذي ))

و بعدين هاتي كوره من كرات الكيك و حطيها بتجويف القالب و اضغطي عليها شويه لين يطلع الشوكليت على الاطراف يعني يصير له ازاحه..ان شاء الله تكون الصوره واضحه ...و تدخلينه الثلاجه يبرد ..الصوره بتوضح قصدي اكثر



بعد ما برد تطلعينه و تجيبين شوكليت ابيض او ممكن تضيفين عليه لون و تذوبينه و بالملعقه تحطين على كره ((نسيت اصور اسفه )) و تزينيها بالسكر الملون ...و تدخلينه الثلاجيه يبرد و بعدين شيلي الاوراق و يطلع عنج بهذا الشكل ((ان شاء الله اكون عرفت اوصل الفكره ))

الصوره من اعلى و من الجنب



و هذي صوره الكرات و الكب كيك الكذاب




اتمنى انه ينال على اعجابكم

و هني و عافيه