نورالبراءه;6751290:
بنات انا عندى جوزى طيب بس دلوقتى مش عارفه
هو مسافر ودايما ف خنقات ومشاكل كتيره اوى بسبب اهله
وبصراحه يابنات انا مرات من كتر قهرى لسانى بيفلت معاه ممكن اغلط وده طبعا غلط وحاسه دلوقتى نزلت من نظره بعد ما كان هيبنى بس والله يابنات متلومنيش لانى محدش داق العذاب قدى من اخواته البنات وامه ربنا يجازيهم وانا مش بعرف ارد عليهم بس كل شويه احكى لجوزى وممكن اغلط فيهم عرفه انا غلطانه بس والله اقسم غصب عنى لانهم ظلمونى كتييير اوى اوى ودلوقتى كل ما اكلمه بيغلط فيا ويقفل السكه ف وشى وحتى مش طايق سيرة اهلى وكرهم تخيلوااااااااااا والله تعبت ومش عارفه اعمل ايه ومش لاقيه حد يساعدنى ويعرفنى الصح من الغلط
الصراحة زوجك عنده حق يزعل
الراجل في غربة وقاعد لوحده ولما يكلمك بيبقى صعب عليه الكلام يبقى شكوى وغلط في أهله
حطي نفسك مكانه لو انتي أهلك متعبين بس في النهاية هما أهلك، تحبي إن زوجك يستحملهم ويصبر عليهم ويعاملهم حلو
والصراحة الإنسان هو اللي بيعلم الناس يكلموه ازاي، يعني أنا لو دايماً بتكلم معاكي بأسلوب فيه تجاوز وألفاظي مش كويسة انتي تلقائياً هتبتدي تكلميني بنفس المنظر، والعكس
خلاص عرفنا المشكلة فين؟؟ نيجي للحل
أولا: مهما يعملوا أهله فيكي أوعي تحكي له، لسببين، أول حاجة هو مش موجود علشان يشوف بعينه انتي عندك حق ولا ظالماهم، تاني حاجة هو مش في ايده حل حتى لو عرف انهم غلطوا يعني مش هيعرف يعمل لهم حاجة دلوقتي
تاني حاجة: صدقيني ساعات الواحد بيحس إن فيه كلام واقف في حلقه وهيموت لو مش قاله، صدقيني صدقيني لو ما قلتيه مش هتموتي، امسكي نفسك ومفيش حاجة اسمها كلام بيطلع غصب عنك
تالت حاجة: اصبري، اللي باظ بينك وبين زوجك أخد فترة علشان يبوظ، وهياخد فترة علشان يتصلح وهو ياخد باله انك اتغيرتي ويبتدي يثق فيكي تاني
ربنا يوفقك ويصلح بينك وبين زوجك