مجبوووووس

السلام عليكن خواتي
بخبركن عن طريقتي فمجبوس دياي

المقادير :
2 بصل
5 فصوص ثوم
بطاطا وحدة
3 طماطم
1 فلفل الاخضر البارد
1 فلفل الاخضر الحار ( القرون )
كزبرة
دياية
زيت
البهارات ( ملح , كركم , بزار , فلفل اسود اشوي , قرفة , هيل , مسمار, 1 ليمون يابس )
3 اكواب عيش

الطريقة :
نغل العيش قبل لا انسوي المجبوس ب ساعتين تقريبا
اول شي انييب جدر وانحط فيه البصل والثوم وقرفة , هيل , مسمار, 1 ليمون يابس وزيت

وانحمره وبعدين انحط عليه الطماطم والفلفل الاخضر البارد والحار
وملح و كركم وبزار وفلفل اسود اشوي واشوي ماي ( عسب لين ما يستوي الطماطم والفلفل البادر )
وبعدين نغسل الدياية وانقطعها لين اربع قطع وانبهر الدياي ( يعني ندهنه بشوي كركم وبزار وملح )

وانييب مقلى وانحط فيه زيت وانخليه يسخن بعدين انحط فيه الدياي وانخليه يحمر ونجلبه وبعد انخليه يحمر

يعني فنفس الوقت اللي قاعدين انقلي الدياي انزيد ماي فجدر الصالونة لين اكثر من نص الجدر وانخليه يغلي لين ما يجهز قلي الدياي

وبعد ما يحمر الدياي
انحط الدياي داخل الجدر وانخليه على النار لين ما يستوي الدياي وتخف اشوي الصالونة

وبعدين يوم يكون الصالونة واصلة لين اكثر من ربع الجدر
انظهر الدياي فجدر ثاني وانحط العيش داخل الصالونة واغطيه وانخليه ع نار هادية لين ما يستوي العيش

وجي خلصنا المجبوس واحلى شي يوم تاكلونه وهو حار


وبالعافيه عليكم