للمتـزوجات المجروحات الغافلات ...شوفي نصرة ربي لي بعد صراع دام ست سنوات

السؤال الي يخطر ف بالي الحين هو

انا عندي طفلين الاول سنتين والثانية ما كملت شهر

سؤالي كيف ممكن انظم حياتي بوجود هالضيفة الجديدة الي نومها ابدا مش منتظم وكل شوي تقعد تصيح وما ترتاح وتسكت الا لما اهزها بحضني

يعني بعد شهر او شهر ونص لو رجعت لبيتي ما ادري كيف ابا تصرف ؟؟ احس حياتي بتنقلب كلها فوق تحت وخاااااايفة كثير من هالشي خصوصا ان زوجي ما يحب الفوضى

الي مهون علي ان اخوها ينام بوقت محدد لكن هي وش اسوي معها

افيديني الله يجزاك خير


اختي اتمنى انك تستفيدين باللي اكتبه واتمنى من الله ينفعك به .

بنتك الله يبارك لك فيها ويخليها لك ويبارك لك في اخواها

بنتك يا حبيبتي لسه توك ولادتيها وهي محتاجه لحضنك لانك عالمها بعد ما خرجت من بطنك اللي كان محتويها فهي تحس بغربه فحضنك يعتبر ملاذها من هالعالم اللي يخوفها باتساعه .

عموما هي الحين صغيره ومن تكملين الاربعين بيتعدل نومها وبيصير كل ثلاث ساعات تصحى وهي اكيد الحين كل ثلاث ساعات تصحى لو دققتي على تواقيت نومها لو ما في شئ يبكيها مثلا مغص او صداع براسها .

لو فيها مغص شربيها هالمشروب المتكون من ملعقه صغيره ينسون +شمر +حبة البركه +حلبه صفراء
"الحلبه علشان ما تكون فيها مراره من الليل نقعيها في كوب ماء والصبح فوريها مع البقيه وحطي لها المشروب في بكميات قليلة ما دامها صغيره يعني الين الربع وحليه لها بعسل طبيعي او سكر نبات مطحون.

هالمشروب بينظف بطنها من الاوساخ والغازات وبيهديها وبيخليها تنام بأسترخاء..

لو فيها صداع .
"علشان تعرفين فيها صداع حطي يدك الثنتين بحنيه على جوانب راسها وشوفي النبض لو شفتيه سريع وقوي معناتها البنت مصدعه .
ذوبي قطعة مر صغيره بماء دافي وادهني راسها فيه وخلف الاذن ورقبتها من خلف وانتظري شويه يجف.

لا تفكرين انه بيوسخ ملابسها ولكن فكري انه صغيرها وما تتحمل الصداع وللعلم هذي الطريقه سواء الطفل فيه صداع ولا ما فيه نحطها له علشان يرتاح وتخف عنه روائح العطور الفرنسيه والبخور القوي على الاطفال .

من يتعدل نومها بيتعدل وقتك ولا تشغلين بالك بالكركبه اللي بتحصل بحياتك شهرين او ثلاث شهور كل شئ بيرجع لوضعه .

انتي حاولي تكون مواعيد نومك انتي وزوجك وعيالك مضبوطه .

انضابط مواعيد النوم تخليك تتحكمين بحياتك ومن يطلع زوجك للعمل نامي ساعتين او ثلاث ترتاحين فيها من عناء سهرك بالليل .

شغل بيتك خلصيه اول باول تغسلين الملابس الصبح المغرب تكوني كويتهم ورصيتهم بالدولاب .
نفس الشئ شغل المطبخ خلصي اول باول وما دمكم اسره صغيره فالموضوع سهل هوني الموضوع انتي ولا تقلقين فكري بصحتك الحين وصحة بنتك وشغل البيت ملحوق عليه . وبعدين اتفقي مع زوجك يساعدك ويمسك معك البنت الين تخلصين شغلك .

لا تنسين شرب الحليب والسوائل بكثرة والفاكهه الطازحه واخذ فيتاميناتك اللي بتساعدك على تحسين مزاجك

عندي سؤال :

كيف تقدرين تعيشين مع زوج له علاقات متعددة ومشبوهة مع حريم غيرك ؟؟

طبعا لا للمواجهة ولا للتفتيش ف الموبايل

طيب كيف الوحدة تتعامل معاه ؟؟

احس ان الوحدة تموووووووووووت قهر وغيظ وهي كاتمة بصدرها ويالسة تخدمه مثل الخدامة

ولاعبة دور المغفلة الي تسوي نفسها ما تدري عن علاقاته ولعبه من وراها

طيب والحل ؟؟ مو حرام ؟؟

(( ان مع العــــــسر يــــــسرا ))

قبل كل شئ الزوجه لما تخدم الزوج هي تخدم نفسها مو تخدمه ،الاجر لها هي سواء بدنيتها او باخرتها وهذا أهم هدف يجب على كل زوجه ان تضعه نصب عينيها "في اخرتي ماذا سأكون انا "

عن الزوج الخائن وكيف ممكن الزوجه تتعامل معه ،اولا شئ لازم تتأكد من اللي حاصل هل خيانه ام مجرد ظنون ..وما اكثرهن النساء هذه الايام عايشات بأوهام .ظلمات انفسهن وازواجهن بغير حق .

في حالة انها تأكدت انه بالفعل يخونها .هـنا الزوجه لها خياران لا ثالث لهما .

أما أصبر واتجرع مرارة الصـبر ولكن بحكمة وافوز في الاخير .

واما يا دار ما دخلك شر "ألم اغراضي واروح عند اهلي "واكيد الخسرانه الزوجه .بيتها عيالها بيروحون نتيجه خيانة الزوج وعدم تصرف الزوجه الحكيم .

طيب لو صبرت الزوجه وفضلت بيتها وزوجها وعيالها كيف تتحمل ما ترى هل تتعمى وتغمض عيونها .

لا يا عزيزتي .

الزوج هو أنسان يخطي ويصيب وواجب عليك تذكرينه ولكن بدون لا تسوين زلزلازل بالبيت اكيد هو بيفهم قصدك.

احكي له حكاية زوج يخون زوجته واهمل بيته وعياله وكانت النتيجة ضياع اسرته بكامله مثلا لانه مارس العلاقات المحرمة مع النساء فأصابه الايدز .

او احكي له حكاية رجل مات وهو يمارس المحرمات واخبريه انه من مات على شئ ماذا يكون مصيره ....

يعني مارسي معه الموعظة الحسنه وذكريه بالله .

ثانياً: شجعيه على ترك هذه الأفة بشكل راقي .

الزوج الخائن وكذلك الزوجه هم أشخاص فقدوا محبة واعجاب الطرف الاخر فقاموا يبحثون عنها بمكان اخر .

فعندما تهتمين بشخص زوجك "زوجي وحبيبي هل تعلم ما أحب فيك ؟! سينظر لك

اذا كان صاحب صلاة خاشعه أمدحيها ... احب فيك خشوعك في الصلاة او احب فيك محافظتك على صلاتك واذكارك .
مثلا احب فيك برك لوالدايك وانا فخورة بك لانك قدوة لابنائي .
احب فيك هندامك وروعة اسلوبك في الحديث تتحدث بثقة كانك ملك ."الملك لله وحده".

أّذكري الشئ الصحيح والحقيقي .لا تكذبي على نفسك وعليه هو يدري انه هذه الصفه فيه وليست فيه فأذكري الشئ الصحيح فقط.

ثالثاً: وهذا المهم "ثقي به"

اتركي التفتيش والتنقيب والحفر والجرف .ريحي بالك ونفسك من هم تعيشينه ليل مع نهار .اخبريني لماذا هذا التعب ؟!..

قلنا من البداية اذا كنتي تريدين زوجك بيتك عيالك "اصبري" والفوز لك في الاخير .كيف ستفوزين وانتي تتذمرين وتلاحقينه تروي عزيزتي مارسي الهدوء بحياتك .

إذا تركتي عادة التفتيش وملاحقته بالاسئله انت وين ؟ اتصل فيك ما ترد ليش ؟ بتطول برا ؟ شو عندك للحين برا البيت ؟
بيسكر وبيقول يالله هذي متى بفتك منها
ولو كان هو قريب من البيت وبيغير مسار السياره ولا قرب كافي نت ولا استراحه يغير جو وبيقول خليها تنفجر هناك بروحها ناقص همها
انا يكفي اللي عندي من هموم .

طبعا بتتصلين مره واثنين وفي الاخير بيسكر الموبايل "وانفجري انتي .

طيب نغير الحركه طلع من البيت الساعه خمس العصر وانتي انشغلتي خلصتي شغلك اللي عندك بيتك عييالك جمالك جلستي تتصفحين عالم حواء وصار الوقت الساعه عشره بالليل دقيتي عليه
"حبيبي بتطول برا البيت ؟! بيرد عليك خير شو تبين "
متوقع تسوين مشكله ومصيبه
"تردين ابد عمري حبيت اتاكد لو بتتاخر تراني تعبانه وابي انام .بيقولك نامي نامي .هذي اول مره .
طبعا انتي نامي لا تفكرين متى بيجي
خليه بتقولين صعب
ما في صعب على الله
اتركيه لربك يهديه ادعي له بالهدايه وصلي ركعتين قبل النوم ادعي ربك يصلح احوالك واحواله ونامي .
خليك اسبوع على هالحال ولكن بدون لا تتصلين
من توصل الساعه عشر او 11 نامي هو بيفكر بروحه وبيقول غريبه هذي شو فيه
على بداية الاسبوع الثاني بتحصلينه مرتز عندك بالبيت يبي يكتشف سبب التغيير وان سالك قولي النوم صحه للجسم ولا يجوز السهر في شئ الا في طاعة الله .


رابعا :اجذبيه من بعيد لبعيد .

قلنا ونقول ونعيد ونزيد "لبسك مكياجك عطرك نظافتك صحتك "لنفسك اولا وثانيا وعاشرا مو لزوجك .

الزوج اللي متعود زوجته كشته وريحتها تقرف وذراعها وسيقانها صايره حشيش ومجرد انها شكت انه علاقه بوحده ثانيه
قامت غيرت بنفسها وتعدلت يقول لها زوجها بنيه وبين نفسه
صباح الخير الحين عرفتي انك حرمه...
الحين ما تلميني فيه اللي اجمل منك وانظف منك .

لكن لو كنتي من قبل نظيفه مرتبه جميلة المنظر والملمس والهمس ناعمه ذات اسلوب راقي .
ما راح يستغرب لو غيرتي شئ فيك
بيقول هذي طول عمرها "م ت ج د ده" وتحبها تكون قمر .

كيف اجذبه من بعيد لبعيد .
مثلا الاول تتزينين وترتزين مقابله وجهه تنتظرين كلمة
الله شو هالعيون
واااو شو هالشفايف
يا سلام شو هالتسريحه
وهو مطنش مب عاطيك وجهه وتقومين تزعلين وتغسلين وجهك وتشلين ملابسك وتقولين لمن اكشخ
اقولك انا لو لزوجك "من الحين جلسي رددي يا ليل ما اطولك "
ما راح يطالعك سواء خاين ولا لا
طبع الرجال ينظرون للجمال بصمت ويتذوقه بهدوء والنتيجه الفعليه اللتي تصدر مهم هو ما ترينه منه في افعاله ببيته وعياله ومعد وقت النوم فقط .

المطلوب منك سواء كنتي زوجة خائن ولا لا .تجملي لنفسك لانك تستحقين الجمال فقط .

اجذبيه باسلوبك في لبس جديد ولكن لا تساليه هاه شو رايك ؟!
ليش الحبيب اعمى ؟!
هو يشوف ما دامه ما قال شئ وما علق معناته ذايب دايخ مب قادر يتنفس باهرنه الجمال اللي قادمه وساكت . وما يبي يبين لك علشان ما تتدلعين عليه .والشاطره هنيه تلعبها صح تزود الدلع وتتمشى قدامه بدون لا تساله شو رايك .

اخيرا وهو اهم شئ لا تلاحقينه ابدا . لو استمريتي بملاحقه بيهرب منك اثقلي .ودوسي على نفسك وهو بيجيك ملهوف .

اهم شئ يا متزوجات يا زوجات يا مقبلات على الزواج الثقافه الجنسيه .

تعلمي كيف تجذبيه زوجك لفراشك مو بالقمصان الملونه وان كان لها دور عظيم ولا بالمفارش ولا بغيرها
الثقافه هو كيف تغرينه وانتي معه وبين يديه كيف تعيشين زوجك احساسك الصادق وتقبلك له وحبك وعشقك له .
حبك زوجك لك يبان في الفراش وهو يقيس محبتك له على هذا الاساس تبعدين بالفراش معناتك تموتين فيه .

اتمى يكون ردي واضح وكامل وشامل لسؤالك

تعليق على إحدى الأخوات

عزيزتي دعواتك الطيب ،لامست شغاف قلبي .
وانا اقـرأكل دعوة منك أقول امين واتخيل كتابي وأنا أمسكه بيمني ** فَأَمّا مَنْ أُوتِيَ كِتَابَهُ بِيَمِينِهِ فَيَقُولُ هَآؤُمُ اقْرَؤُاْ كِتَابيَهْ * إِنّي ظَنَنتُ أَنّي مُلاَقٍ حِسَابِيَهْ * فَهُوَ فِي عِيشَةٍ رّاضِيَةٍ * فِي جَنّةٍ عَالِيَةٍ * قُطُوفُهَا دَانِيَةٌ * كُلُواْ وَاشْرَبُواْ هَنِيئَاً بِمَآ أَسْلَفْتُمْ فِي الأيّامِ الْخَالِيَةِ
.
الانسان يا عزيزتي عندما يكون له هدف يريده ربي دائما يسهله له لان الانسان مصر على الوصول له.
وانا يا غاليه لي هدف ان كل حرف اكتبه واي اخت تستفيد منه هو لله ويكتب لي في كتابي يوم لا ينفع مال ولا بنون الا من أتى بقلب سليم .

لست بمعلمه ولا املك شهادات ولكن اعطاني ربي نعمة الصبر ومنها تعلمت الحكمة وهداني ربي للقرأة .
ومنها قرأت وقرأت ومازلت اقرأ ولا اشبع من القـراءة .
وما شاء الله لا حول ولا قوة الا بالله لي كتب شهريه لازم اشتريها مثل الاغراض الشهريه للبيت صار لازم اخذ كتب .

والحمد لله كل ما أقرأ دعوة وحده من الاخوات لي ابتسم واقول الحمد لله وصلت أقترب الوصول للهدف .

والهدف "وعلم يستفاد منه" فهل من منافس لهذا الهدف !!!

من هنا اطرحها دعوة للأ خوات للمنافسه ففي هذا فلتنافس المتنافسون .
في العلم والتعلم والتعليم .

تعلمي يأ أختي تعلمي وعلمي .

تعلمي:

القــرآن وعلميه لابنائك وتخيلي نفسك يوم القيامة تلبسين والدايك اللذان رباياك واحسنا اليك وعلماك تاج من نور وانتي تطلبين من ربك يا رب اشفع لوالدي الذان ربياني صغيرا .
تخيلي ،وأنتِ تشفعين لمن ترغبين من أهلك ويأتي أبنك يلبسك تاج من نور لانك علمتيه وشجعتيه على الحفظ ويشفع لمن يرغب وتأتي ابنتك وهكذا تكونون من أهل الجنة ومن المقربين لله سبحانه وتعالى.

تعلمي :

الحديث واحفظي وحفظيه لأبنائك .فوالله اذكر ابوي الله يرحمه عندما كان يسمعني اسمع لنفسي الحديث وانا طفلة يصححه لي فكنت اتسائل ابوي متعلم ولا لا.؟
وعندما سألته قال ما اعرف اكتب ولا اقرأولكني حافظ .
الله يغفر له ويرحمه ويرحم جميع امواتنا واموات المسلمين جميعا في هذا اليوم العظيم يوم عرفه الله لا يحرمهم من عفوه وكرمه ومغفرته اللهم امين .

تعلمي :

الدعاء وما ادراك مالدعاء مزيل الهم والغم والبلاء .
دافع الشر مجلب الخير .
مزيل العثرات من امامك في دنيا به يفرج كربك وهمك وبالاخرة هو لك رصيد كالجبال يجمعها لك ربك .
سبحانك ربي ما اعظمك.
تكرمنا بالعطاء ونحن البخلاء .

تعلمي:

فن القــرأة وعلمي ابنائك وشجعيهم .
قولي لهم نحن أمة اقـرأ
الامة اللتي نزل فيها قوله تعالى ( أقرأ باسم ربك الذي خلق . خلق الإنسان من علق . اقرأ وربك الأكرم . الذي علم بالقلم ..علم الإنسان ما لم يعلم )
حببي لهم القـرأة في كل المجالات وتذكري انه لفعلك أجر .
ففي الدنيا أنتي ام للمتعلمين وفي الاخرة أجر تعليمك لهم .

تعلمي :

كيفية الاهتمام بنفسك وتقديرها وكيف ترفعيها عن الشهوات والرغبات اللتي لا تليق بك كأمة لله سبحانه .
واغرسي هذه الصفات بأبنائك وبناتك فأنت الفلاح وهم التربة الخصبة اللتي يبان فيها نتيجة زراعتك وتعبك
فلا تكوني كمن يملك صحراء قاحلة لا يوجد فيها غير الاشواك الضارة بل كوني كمن تملك جنة غناء مثمرة بكل ما طاب من ادب واخلاق وحسن تربية وتنظيم ورعاية .
انشئ جيل فاهم متحضر متعلم فاهم متأدب يفرح الناس بلقائهم نظيفين عطرين انيقين مترفعين عن الكلام البذئ كلامهم عطر وملابسهم عطره ومشيتهم واثقه كانهم ملوك .

تعلمي:

كيفية العناية بجمالك
جسدك
شعرك
اظافرك
كل شئ فيك وعلميه لكل من لا تعلم وكل جاهلة علمي ابنتك وابنك كيف يهتمون بنظافتهم ونظافة المكان من حولهم منذ نعومة اظافرهم .
اخبريهم ممنوع قص الاوراق ورمياها في الارض
ممنوع تكسير الاقلام والرسم على الجدران والذي يفعل خطا يقوم بالاعتذار لك اولا ومن ثم ينظف ما قام به .
اغرسي فيهم حب اجسادهم وممتلكاتهم وبيتهم .

عوديهم على نظافة اسنانهم وكل ليلة ينظفون لسانهم بالملعقة حتى لا تتكون البكتيريا على لسانهم ويمرضون .

علميهم ان كل جمعة هو يوم طهارة الابدان يوم قص الاظافر .
ترتيب الشعر وازالة الغير مرغوب فيه لانه يوم عيدنا نحن المسلمين .

تعلمي:

فن الاتيكيت وعلميه لابنائك هل ترضين ان ينظر الناس لابنائك بنظرة اشمئزاز ولا يحبهم ان يزورنهم او يجلسون معهم لانهم غير متعلمين لفنون الادب والذوق العام .!

والحمد لله نحن كمسلمين ديننا الحنيف علمنا كل شئ.
فمثلا كيف ناكل عندما قال الرسول صلى الله عليه وسلم يا غلام سمي الله وكل بيمنك وكل مما يليك .

من هذا الحديث ناخذ ثلاث قواعدك
1) التسمية
2)الاكل والشرب باليد اليمنى
3)ناكل من امامنا فقط مو تروح الايادي يمين ويسار في الصحون .

انصحك عزيزتي قبل ان تتعلمي الاتكيت الفرنسي ولا اللبناني ولا الغربي تعلمي اتكيتنا الاسلامي لانهم اخذوه منا نحن ومن كتابنا العظيم .وهذا لا يمنع ان تتزودي باللذي ينفعك من علومهم حتى تكوني ارقى.

تعلمي:

فن التجميل لنفسك لتعرفين
كيف تبرزين جمال عيونك
شفايفك
اظافرك
شوفي المناسب لك وطبقي وتفنني فيه لكسب اعجاب ومحبة الزوج وتكوني ممن قال فيهن الرسول صلى الله عليه وسلم "وإذا نظر اليه سرته ".
وتذكري انك عندما تتجملين وزوجك يفرح يكون راضي وبرضاه كسبتي رضى الله سبحانه وتعالى الا تعلمين انه جنتك ونارك
فلا تحرميه من ان يرى عيناك الجميلة وقد اكتست بسواد الكحل
ورموشك ازادت سحر بالمسكارا
وشفتاك بمرطب خفيف ومسحه من غلوس ناعم يزدها رقه
وخدودك بمسحه من بلاشر وردي بسيط يعطيك نعومة الطفولة .
ويداك وقد زينتها نقوش بسيطه من الحناء وان لم يكون نقوش على الاقل رؤس اصابعك ببعض الحناء لتزدان جمال .

وهذا علميه لبناتك حتى ينشئن وهن يهتمن بانفسهن
حببي لهن النظافة والتجمل ولا تجعليهن يضيعن عمرهن في البحث عن الجمال
علميهن
مهم جدا تكحلي عينيك يوميا بكحل طبيعي (وليس القلم) .او الاثمد ولكن بالبيت وليس خارجه
عمليها ان تكون ملابسها نظيفه وتتعطر بعطر يناسب سنها والافضل كلونيا الاطفال او المسك او الزعفران للاطفال دون العاشره
وفوق العاشره اشتري للولد والبنت من ذى بودي شوب وعوديهم ان يضعوا ملطف ومزيل لرائحة العرق وتنظيف الاسنان
والولد اجعليه يمضغ بعض حبات الهيل مفيده للوالد والبنت اوراق النعناع لانها تزيد الانوثه .

تعلمي:

فن التقديم وعودي ابنائك عليه
البنت والولد مع بعض يجب ان يجيدوا هذا الفن .

والعلوم كثيره لو نعدها لا تحرمين نفسك وابنائك وكل من حولك كوني زهرة فواحه تفيد الغير بعطرها ولا تكون العكس .

ويوم القيامة سنرى من كتابها يكثر فيه أجر وعلم يستفاد منه

















سؤال ثالث واعذريني لو ثقلت عليج يا قلبي

انا الله يسلمج توي والدة وفي فترة النفاس انا ف بلد وزوجي ف بلد ثاني بحكم ظروف شغله

يعني انا غايبة عن بيت الزوجية من شهر 10 يعني باكمل 3 شهور وما راح ارجع بيتي الا شهر 2 يعني اربع شهور كاملة ما شفت زوجي

المهم يا اختي انا باقيلي 20 يوم تقريبا واخلص النفاس وباضطر اني اقعد هنا انتظر اخت زوجي تجينا باجازتها لانها تدرس برة

عاد انا خبرت زوجي اني لما اخلص نفاس ما راح اجي باظل شهر ونص عشان اخته تبي تشوف البيبي
قال لي اوكي خلج عشان اختي تشبع من البيبي رديت عليه اي وفرصة انت تشبع عزوبية
قال لي كلامج بايخ وما دري شووو

المهم انا متضايجة احس انه ما هو مشتاق لي
انا اعرف الزوج لو غابت عنه زوجته يفقدها
يظل يلح متى ترجع بيتها وهو خبر خييييييييييييير

انا بس اللي رازة وجهي عليه عاد خبرته
قلت له انا ما راح ارجع بيتي الا لما انت تطلب مني هالشي ما راح ارز وجهي واجيك من نفسي

عاد هو ما يتصل ولا يرسل مسجات ولاش يتصل بس اذا في شي مستوي
اتصاله ابدا ما يكون بغرض الشوق ولا الوله
قاهرني وما يقول لي كلام حلو انا الي دوم ابادر واقول له كلام حلو

وهو يرد علي مثلا لو قلت له احبك ولا اشتقت لك
يقول وانا بعد بسسسسس

والله اذلااااااااااال هالازواج

ما اعرف شو رايج انتي بالموضوع ؟
انصحيني شلون اتعامل معاه


(( ان مع العــــــسر يــــــسرا ))

احب توقيعك

قبل لا ارد على سؤالك احب اخبرك بعض المعلومات عن الرجل .

فيه رجال يحبون زوجاتهم ويموتون فيهم بس ما تعودوا من الاساس يقولون كلام حلو لهن ويعتبرون الفعل اللي يسوونه لهن كافي مثلا توفير ملستزمات البيت والصرف وتحمل مسؤليات الابناء .

بعضهم نفس الشئ يحب زوجته كثير ويكون بعيد عنها مثل زوجك وما يبي يفتح العنان لمشاعره لان الرجال لما يفتح مشاعره ويقول كلام حب لازم يمارس الجنس فيفضل انه ما يفتح الباب لنفسه علشان ما يفضي رغبته الجنسيه بطرق محرمه .
ولما يجي عند الزوجه تنفجر قريحتة الغراميه وينام ويا زوجته ويرتاح .

بعضهم يقول انا وزوجتي شخص واحد فما له داعي اقول لزوجتي احبك كاني اوجه الكلام لنفسي واكيد احب زوجي ما دامها مثل نفسي .
"طبعا هذا ما يدري بحاجة زوجته لهذا الكلام فممكن الزوجه تفهمه انا احس بانك تحبني واني مازلت مرغوبه لك اذا قلت لي احبك .

السؤال لك انتي زوجك طول عمره بهذا الطبع ولا الحركه جديده عليه ؟ يعني قبل كان يقول احبك والحين توقف ؟

لو كان يقولها قبل وتوقف ...
لا تقولين له كلمة احبك ابداااا ابداااا ...
قوليها بافعالك بس غيري ترتبي تنظمي وزودي الدلع والرومانسيه بدون كلمة حب وهو بينطقعها غصب عنه .

لو ما كان يقولها من قبل وهذا طبع فيه فاكيد زوجك يحبك ويموت فيك بس فيه احدى الاسباب المذكوره قبل .

واحب اعلمك شئ مهم وضروري الزوج مثل الطفل اللي متعود على الرضاعه وتفطمينه يتعب في البدايه وبعدها يتعود .

يعني طول الغياب عن الزوج بيخليه يتعود فراقك فانصحك لا تطولين الغياب عنه وايد .
لانه بيتعود غيابك خليك حتى بانفاسه ولكن لا تطيحين عليه طيح اثقلي وهو بيركض وراك

الرجال طبعهم يحبون المهام الصعبه حتى في الزوجات يحبون اللي تثقل عليهم ويحبون هم يتقربون لها واما اللي تطيح عند رجولهم هذي يعتبرونها سهله جدا

وعندهم قناعه اللي يجي بسهوله يروح بسهوله .

و ارحب بأسالتك حتى لو وصلت للخامس بعد المليون انا هنا لكم