عرايسنا الحلوين، عساكم بصحة و عافية...
جايبة لكم اليوم حلو لذيذ و مميز... هو شوي يبيله شغل، لكن في النهاية تطلع النتيجة رائعة و مذهلة للجميع...
نبدأ بسم الله...
نجهز صينية الكب كيك الحجم الصغير... و نحمي الفرن على حرارة 350 فهرنهايت...
أول شي بنحتاج عجينة الباي مثل اللي استخدمتها في باي التوت ((بنحتاج نص مقدار العجينة بس))، إذا تذكرونه... و هذا الرابط...
http://www.3roos.com/forums/t323962.html
نجهز العجينة حسب الخطوات ((بنحتاج نص مقدار العجينة بس))، ونلفها بورق نايلون و نبردها في الثلاجة...
الحين نجهز الحشوة...
في طريقتين للحشوة...
الطريقة الأولى (و هذي اللي استخدمتها هنا)
2 صفار بيض (ونحتفظ بالبياض)
2 ملعقة كبيرة سكر
ملعقة صغيرة بشر ليمون
2 ملعقة كبيرة عصير ليمون
20 غ = 2 ملعقة كبيرة زبدة
نحط هذي المقادير في وعاء بايركس، و نخلطهم مع بعض بالملقعة الخشبية...
بعدين نرفعهم على حمام مائي... و نحرك باستمرار تقريباً لمدة 20 دقيقة، لحدما يبدأ الخليط يثقل...
عشان تتأكدون إن الخليط جاهز، مرروا اصبعكم على ظهر الملعقة الخشب، و شوفوا إذا الخليط سايل، بينمسح أثر اصبعكم... لكن إذا الخليط ثقيل، بيصير خط مكان اصبعكم على ظهر الملعقة...
الحين ارفعوا الخليط من على الحمام المائي، و غطوه و دخلوه في الثلاجة عشان يبرد...
الطريقة الثانية (هذي ما صورتها، لكن جربتها و طلعت لذيذة، و تصلح للي ما يحبون البيض)
هذا المقدار كبير لهذي الوصفة، فتقدرون تاخذون نص المقدار...
علبة حليب نستله المحلى، الحجم الكبير
9 حبات كيري بحرارة الغرفة
نص كوب عصير ليمون
ملعقة صغيرة بشر ليمون
نخلط هذي المقادير مع بعض بالخلاط لحد ما تصير مثل الكريمة... و نبردها بالثلاجة لين وقت الإستخدام...
في هالوقت، نجهز كريمة المارينغ...
بنستخدم فيها 2 بياض البيض اللي احتفظنا فيه
نص كوب سكر
نخلط البياض بخلاط البيض لحد ما ينفش و يصير مثل الكريمة، بعدين نضيف له السكر بالتدريج... و نستمر بالخلط عشان يذوب السكر... و هذا شكل الكريمة...
الحين نطلع العجينة من الثلاجة... و نرقها بين ورقتين نايلون...
نجيب قطاعة دائرية، و نقيس حجمها، لازم تكون أكبر من حجم القوالب بشوي...
نقطع العجينة دوائر، و نحط في كل قالب دائرة، و بالشوكة نسوي فيها فتحات مثل الصورة...
ندخل الصينية الفرن في الرف الأوسط، و لمدة 6 دقايق بالضبط...
نطلعها من الفرن، و نخلي الفرن شغال... نتركها تبرد شوي بعدين نقلب الصينية بحذر عشان نطلع قوالب الباي اللي سويناها...
بتلاحظون إن القوالب هشة كثير و تتكسر بسرعة... فتعاملوا معاها بحذر...
نصف قوالب الباي في صينية فرن عادية، و نجيب حشوتنا اللي جهزناها، و نبدا نوزع الحشوة بالتساوي في القوالب اللي طلعناها من الفرن... (بتحسون إن مقدار الحشوة قليل، لكن نص ملعقة صغيرة تقريباً لكل قالب يكفي)
بعدين نجيب المارينغ اللي جهزناه، و ناخذ منه مقدار ملعقة صغيرة و نغطي فيه وجه التورتات... تقدرون تحطون المارينغ في كيس الكريمة و تستخدمونها...
في الأخير نرش عالوجه جوزهند شرايح...
ندخل الصينية الفرن مرة ثانية، لمدة 6 دقايق ثانية عشان يتحمر الوجه و يصيرلونه أشقر، إذا ما تحمر، نولع عليه من فوق... لكن خلكم عنده، لأن المارينغ بسرعه يتحمر...
بعد ما نطلعها من الفرن، نخليها تبرد شوي، بعدين نحتفظ فيها بالثلاجة لحد و قت التقديم...
و هذا شكلها النهائي...
أدري دوختكم بالخطوات، بس في النهاية يطلع شي لذيذ :)
ن شاء الله يعجبكم و بالعافية عليكم (f)
