المغتربات الليبيات

ان شاء الله اختي انا كنت في مصر شهر 2 الي فات عشان معرض الكتاب

بس اريد ان اسالك سؤال ؟؟؟

هل سمعت عن الدكتور الي بيسناء الذي يعالج بالاعشاب كل الامراض ؟؟؟ لو سمعتي عنه ممكن تفيديني هل صح انه يعالج او مجرد دعايات
ومشكورة

هلا حبيبتى نارنج
والله ماسمعت عن الدكتور اللى يعالج بالاعشاب
بس ممكن اسأل واخبرك

هلااااااا و غلااااااا :21_103:و اخيرا تجمع لليبيات و اللهي فكرة حلوة
انا ليبية كنت مغتربة بس توا رجعنا لليبيا لينا اربع سنين

حبياتى الليبيات خلينا نتعرفو على بعضنا اكثر وياريت كل وحدة تقوللنا هى من اين مدينة
انا طالبة فى القانون فى جامعة قاريونس احلى مكان فى الدنيا عشان هى سبب خطبتى
وانا كيف ما قتلكن ما زلت ما تغربت لكن حانتغرب لماليزيا باذن الله بعد ما نزوز (يارب ان شاء الله نزوز واندير عويلة وانبوز) راك تقولن انكن نسيتن الشتاوى واغانى العلم خطرها رانى مش بدوية لكن نحبا الجو هذا
انتن شن اخبارك فى الغربة اكيد وحشتكم ليبيا وهلها لكن والله كيف ما خليتوهم حتلقوهم مزالوا يردمو الدلاع فى الرملة عشان يسقع ومازال الزردة تمشى شواية ووكال ومازالن مناسبتنا حوسة وتعب
حبيباتى خلونا على اتصال والمرة الجاية حانهدرزلكم اكثر بس انا توا مشغولة::cool:

عروس رايقة اهلا فيك معانا انا من طرابلس وايضا خريجة قانون بس جامعة الفاتح وانا الان ادرس الماجستير في ماليزيا مع زوجي
ها نبو تفاعل ياله

حبيبتى نارنج الوادى والله حتى انا ناوية نعدى مع زوجى بعد الفرح عشان نحظروا بس بصراحة انا كنت انانية خفت نسافر واقنعتا ان هوا يحظر فى ليبيا واقنعتا بعد الفرح انا نحظر فى ماليزيا هوا معجب بماليزيا بس انا خايفة منها بعيدة وانا مرتبطة بهلى واجد وكلا بالنصيب خطرها انا ماسية لطرابلس اكثر من مرة ونحب لهجتها واجد ونحب الزمزامات كان تعرفيهن ومطعم البرمة الذهبية حاجة صقع
حبيبتى ياريت تقوليلى شن الجو فى ماليزيا وانتى متجوزة من زمان ولا مازلتى عروسة احكيلى عليك مرات نقعد جارتك فى ماليزيا
مع حبى

انت تشرفينا وتانسينا وبالنسبة للهجة انا اموووووووووووت في الشرقاوية وتمنين نتزوج شرقاوي بس ما جاش هههه وجى حبيبي زوجي الله يخليه لي

انا يا غالية متزوجة من سنة وسبعة شهور ما عندى اطفال لسه الله يعطينا عن قريب يااااااااارب

ماليزيا بلد مسلم خيالي سياحي ملرتاحة فيها واجد ( هلبة) ولا تاخدي على كلام اغلب الليبين انها مش حلوة بالعكس في البداية تتعبي من الطقس لكن بعدين تتعودي احسن شي انه الحرارة هنا ما تعديش 33 بس الرطوبة هي هلبة
بالنسبة للمعيشة كلا حسب ما يحب حلوة الجملة اها ايه يعني تبي تعيشي ملكة تعيش هنا حسب ما تبي والمنحة كويسة لو تبي تصرفيها لاخر قطرة انا هكي مدايرة عايشة في شقة نظيفة وراقية وناكل في كل ما لذ وطاب مش حارميين نفسنا وعايشين يومنا لان فيه هلبة يبخلو على روحهم في سبيل انهم يرجعو ببعض من المنحة لليبيا انا هكي قناعتي وكل واحد حر في قناعته

ايه شنو تاني المهم تعالي هنا والله جو راهو
والزمزمات انا ما نحبهم اخخخخخخخخخ غريبة صح
حتى في فرحي جابوهم غصبا عني بس نشطو الفرح هلبة اسمها امال طبعا اكيد تعرفيها
والمطعم صح حلو بس فيه احلى منه
وبنغازي مستاحشتها واااااااااااااااااااااااجد وااااااااااااجد سلميلي عليها كلها كلها

اختى نارنج الوادى والله ضحكت لما قريت رسالتك لانى حتى انا كنت نتمنى نتجوز طرابلسى بس ماجش لكن ربى جابلى خطيبى هو غرباوى فى الاصل لكن مش طرابلسى
ولهجتا شرقاوية بس والله متريحة معاه موت ولما قتلا انا كان خاطرى فى طرابلس قالى شن عجبك فيهم بدل ما يقولوا انا يقولو انىىىىىىىىىىىىىىىىىىىىى غاير منهم ممكن
بالنسبة لماليزيا والله ان شاء الله ربى يسخرها قريب مازال الاخ يبنى يكمل بنى ويطلع الفرح ونمشوا
وحبيبتى بالنسبة للصرف والله الواحد ماعارف عمرا المفروض يصرف ويعيش كويس وربى الرزاق
حبيبتى شن تعرفى فى بنغازى عشان نهدرزلك عليه
خطرها البرمة مش اصقع حاجة لكن هذا اللى متفكرة اسما
حبيبتى انتى راجلك تعرفتى عليه فى الجامعة ولاخطبة هل:o

[COLOR="Red"]فكرة
شن رايكن ناخذو ايميلات بعضنا على الخاص ونتراسلوا مرة مرة[/CO:)LOR]

بالنسبة للزواج خطبة هل على قولتك لان والنصيب جى فجاءة والحمد لله ربي يدوم النعمة

وبالنسبة لبنغازي انا مولودة غادي يعني كنا نعيش غادي بس بمجرد ما كان عمري سنة رجعنا لطرابلس
بابا من التانوي عدى لبنغازي ودرس فيها وكمل غادي وتعين غادي وايضا كان هو دكتور في جامعة قاريونس

امى توا احنا اهلى في ليبيا وانا هنا
بالنسبة لبنغازي اعتقد انه كنا نسكن في منطقة اسمها الفويهات وبعدها حولنا للبركة وماما كانت مدرسة في مدرسة طارق بن زياد كنها قاعدة

عندي ماما بالرضاعة عايشة غادي وزوجها معروف في بنغازي توا لما نتلاقو نقولك عليه
عندي صاحبتي شرقاوية زي العسل حتى هم معروفين واجد عنكم وهي كانت تقرا معاي وتوا تشتغل ما شاء في مكان مرموق

انا يا حنى جيت هنا مع زوجي ونكمل في الدراسة نتمنى من الله ان تجينا وتنورينا

يامحلاه شارع دبي عندكم من زمان معاش عديت عندكم ....

راح نرسلك ايميلي على الخاص اوكي يا الغلا سلام وربي يتمم لك فرحك بكل خير لو تبي اي حاجة احنا بالخدمة

كيف حالكم يا حلوات حتى انى من ليبيا ومغتربة فى بريطانيا بس بعد كم شهر مروحة لى ليبيا نهائى الحمد الله بس حبيت نسلم عليكم ونقوللكم منورات يا حلوات

السلام عليكم ورحمة الله وبركاته
كيف حالكن .....ان شاء الله بخير

السلام عليكم با اخواتي الليبيات حتي انا متغرية زيكم وين تتوقعو في الصيييييييييين ياريت نتواصلا مع بعض

يعني هما الليبيات وين مارت حد لليوم؟؟؟؟؟؟؟؟؟؟؟؟؟؟؟

اول مرة اعرف ان فى ليبيات فى المنتدى و الله افرحت وحبيت امر واسلم عليكم
ياريت نتعرف...انا مش متغرابة الحمد لله ..بس احب اكون صداقات.......>الى تحب تتعرف ترسلى على الخاص.
مع السلامة....(f)(f)(f)(f)(f)(f)

السلام عليكم
هلا باخواتى الليبيات
انا ليبية حاليا فى اسكتلندة قريبة ها مش زى الصين هههههههههه نمزح اكيد اختى مغتربة فى الصين ربى يكون فى عونك على البعد على فكرة انا مدام مش انسة وعندى تلات اطفال ومن الجنوب هلا بيكم حبيباتى من اى مكان فى بلدى الغالى:9_28:

هلا بخواتي كيف حالكن كيف حالك يا امتاع الصين وربي يكون في عونك بس نصيحة مني تعلمي لغة
انا من بنغازي ومقيمة في سويسرا ومش عارفة امتى انروحو ادعولي اقريب يا رب انا متزوجة وعندي بنتين توأم
انحب انتواصل معاكم ونبادلو الثقافات

اهلا بيك اختنا فى الصين تعرفى بنت عمتى حتى هى مخطوبة وخطيبها فى الصين وهى خايفة واجد من الهجرة غادى انتى بيش تنصحيها

السلام عليكم

والله سفتونى على هذا التجمع وحابة نشارك معاكم

انا مش مغتربة بس عادى اكيد لو تشاركت معاكم

تعرفوا والله خاطرى موت نتزوج ونعيش برة ليبيا ونكون هكى زيكم متزوجة برة ومغتربة انحس فيها حلوة فكرة

الغربة تعلم الانسان حاجات واجدة

يلا يسعدنى التواصل معاكم وادعو لى بالزواج والغربة

فى امان الله

حبيبتي اميرة الانسات هي الفكرة حلوة صح لكن فيها تعب بصراحة واشتياااااااااااق مش عادي
وزيديها لما اتكوني متزوجة وتخطر في بالك حاجة تبي تسالي امك عليها وما اتقوليليش الاتصال عادي لان الاتصال والنت مش كيف التوشويش في الدار وانتي عارفة وزيدها يازايد لما تحملي واتجيبي
والله انا لما جبت بناتي التوأم بالعملية والله والله في وقتها تمنيت ندفع عمري كلها مقابل اني نلقا ماما امعايا
عموما في هكي وفي هكي مش كلها حلوة يااااااا حلوة