التوظيف في وزارة التربية (بنات البحرين)

كوثر ما طلعتين؟؟؟

اني قمت والكترونيا رجعت>>>>>>>ما اقدر

الكتكوتة ودالية البيت........اسم الله على مخوخكم...

الي تبع صندوق العمل هم الي نادوهم شهر 4 او 6 وبس ينتظرون اسماء المدارس يعني اتصلو اليهم بس باقي اسمائهم تنزل في اي مدرسة......هذلين تبع ال 500 الي حصلت اليهم الوزارة شغل

اما احنا عاد.........تبع التربية الحين

هلا عاطلات

ان شاء الله هالكورس اناديكم معلمات يارب

اني متابعتنكم اول باول والصراحة اعرف الاخبار منكم بس مو مثلكم احاتي ماخذة السالفة عادي عقب صدمة السنة الي طافت لاني كنت متوقعة اشوف اسمي بس للاسف

يارب يحطون الاسامي الليلة ونفرح كلنا يارب

هلا كربلاء
شخبارش ام فطوم
ان شاء الله نشوف اسامينا كلنا الليلة يارب

ياااااااااااااااااااعلي بتموتون بس تركوا النت

الله يغربل اللي في بالي خلوكم مثل المجانين

الله ييسر وتطلع النتايج الليلة حتى بس تنامون عدل

اني اطلع وارد ارجع واشوفكم موجودين

الله يساعدكم

ها بنات ما في خبر
ما احد اتصل في الجريدة وسالهم
طمنونا

لالى البحرين
الله يسمع منش والله احس راسي بينبط من المحاتاه
سمعو النكتة هههههه
اقول الى زوجي بجيب الي وردة وقطف الورق مالها وبقول بيوظفوني ، ما بيوظفوني الى اخر الوردة وبشوف ويش يطلع اليي ولا هالمحاتاة ههههههه

بصراحة الوضع صاير كانه حلم كل ماقربنا نوصل لنهاية نرد نعيد من جديد

اني طلعت و توني راجعه سيده على الصفحه قلت يمكن حطوا خبر او شي ..


يا علي بيقتلونا الـ...........


ان شاء الله الليله تنزل الاسماء بس تعبنا ..

كوثر ما اتصلت ليش الصحافية ؟؟؟ طمنينا الله يطمنش

الله يهدي بالكم ان شاءالله وكل وحده تحصل الي تبغيه اكان بالتربيه او مكان ثاني

من الصفحات الاخيره خليتو قلبي يراقع هههههههههههه ماسوو فينا خير بالمره

ان شاءالله تنتهي المعاناه الليله او بالكثير نهايه هل اسبوع خلاص بتستخفوووووووووون

هههههه
صراحة بل وبلين بعد ،،
زوجي على النت واقول ليه شوف المنتدى وجريدة الوسط اذا حطوا اي خبر جديد ،،
وخليت صفحة المنتدى مفتوحة كل شوي اطل ،،
بس مصخوووووووووووها
الله يكون بالعون وتكون الخاتمة خير ،،
اما انه حلم صدقتون ،، من قريب يخلص يطلع شي يخليه يعيد ،،
ما اتحمل بعد يلعبون باعصابنا للاسبوع الجاي ،،
يعني باجر والخميس والجمعة والسبت ،،
يا مهدي ادركنا

اني بعد فاتحه المنتدى و كل شوي اطل .. اذا ما نزلوهم الليله او مع جريده باجر اتوقع الاحد او الاسبوع الجاي ..

ياربي بس ان شاء الله بعد هالمحاتاه خير .. بموت ودي انتف شعري .. لو يحطونهم و ريحونه على الاقل نعرف مصيرنا .. في شغل بارت تايم ساعتين في اليوم ادرس مجموعه طلاب محصله بس متردده و قلت اذا طلع لي توظيف مابروح ..

احس مخي مشوش .. عسى مخ اللي معطل نشر الاسماء تشويش ما تتعدل موجته ..

هناك إشارة للأولى

عاجل

______________________________



فيما تعلن قائمة "لجنة العاطلين" في وقت لاحق

أكثر من 300 معلم في قائمة توظيف " التربية" الجديدة



الوسط - زينب التاجر

[علمت " الوسط" من مصدر مسئول في وزارة التربية والتعليم يوم أمس ( الأربعاء) بأن قائمة توظيف الوزارة للفصل الدراسي المقبل جاهزة وتضم أكثر من 300 أسم في مختلف التخصصات وأن السبب في تأخر إعلانها لا سيما وأن أول يوم دراسي يوافق الأول من الشهر المقبل، ترجعه تلك المصادر إلى توجه مسبق من الوزارة لإعلان قائمتها مرفقة بقائمة من مشروع لجنة توظيف العاطلين الجامعيين.

وأضاف المصدر بأن تأخر اللجنة في إرفاق قائمتها أسهم في تأخير إعلان أسماء الدفعة الجديدة من المعلمين، مستدركا بالقول وفق وصفه بأنه سيتم " قريبا جدا" الإعلان عن قائمة الوزارة على أن تعلن قائمة اللجنة في وقت لاحق.

وأوضحت المصادر بأن إقرار القائمة النهائية لتوظيف الدفعة الجديدة يرتبط بعدة إجراءات وعدد من الإطراف تدخل فيها وزارة التربية والتعليم ومشروع لجنة العاطلين الجامعيين فضلا عن ديوان الخدمة المدنية والذي ينسق لحصر الشواغر في الوزارات الحكومية، مستدركة بالقول بأن الإجراءات الروتينية تعد أحد الأسباب في التأخر في إعلان النتائج.

هذا وسبق أن صرحت وزارة التربية والتعليم على لسان أحد مسئوليها بأن إعلان الدفعة الجديدة من المعلمين سيكون في الأسبوع الثالث من الشهر الجاري.

ويشار إلى أنه تم بقرار وزاري تشكيل لجنة وزارة لتوظيف العاطلين الجامعيين رصدت لها موازنة وتتولى مسؤولية حصر أعداد العاطلين الجامعيين والتنسيق مع الجهات المعنية كوزارة التربية والتعليم وديوان الخدمة المدنية لإيجاد الشواغر لهم، تماشيا مع توجيهات رئيس الوزراء بسرعة توظيفهم.


منقول من منتدى ثاني

سيتم " قريبا جدا"
يعني متى هالقريبا جدا ؟؟؟
بالنسبة ليي يعني احييييييييين
وشكورين على جهودكم بالمتابعة

الله المستعان

~أم فاطمة~;6995910:
سيتم " قريبا جدا"
يعني متى هالقريبا جدا ؟؟؟
بالنسبة ليي يعني احييييييييين
وشكورين على جهودكم بالمتابعة

احيييييييييييييييييين احيييييييييييييييييييييييين .. و اذا ما يفهمون حالا بشكل عاجل .. طوارئ

مادري والله اختي متى ترى ذولا لا يناخذ منهم حق ولا باطل
لكن الله كريم

ماعتقد باجر خلاص فقدنا الامل هالليلة تتوقعون ليلة الجمعة ينزلون الاسامي عادي لو ينطرون الى الاحد ؟

تصدقون كأنهم يقرأون المكتوب في المنتديات ويشوفون حالتنا ويضحكون علينا ويقولون خلونا نحرق اعصابهم اكثر وش ورانا نلعب فيهم شوي ونستانس على الأخير ،،
لكن الشكوى لله ،، شكلهم ما بنزلونهم إلا الاحد او حتى الاثنين الجاي ،،
الله كريم

تصدقووووون بنات أحس من زود ما مللونا على هالاسامي بس ما بي أعرف من توظف .... بس ما نقدر لازم نحرق في أعصابنا أزيد ما هم حارقينها الله يجازي الي كان السبب وحسبي الله ونعم الوكيل فيهم