محتاجة مشورتكم

السلام عليكم


لو سمحتواأنا محتاجة مشورتكم


دائماً كان والدي يقولي , أن الواحد لا يجب أنه يسمح لأي شخص أنه ينرفزه
لأن العصبية والنرفزة بتضيع الحقوق

و أن التغافل تسعة أعشار الخلق الكريم


بس أنا مش عارفة , طيب لما واحد يظلمني أعمل أية
إذا كان التعامل معاه بالحسنى مش جايب نتيجة
وهو مصمم يجرحني ويجرح ناس طيبين وغاليين عليا ..




أنا متزوجة من أربع سنيين

وأخويا كان بيحب أخت زوجي جداً , لأننا كلنا كنا جيران
وهي كانت بتعاني من مرض في الكلى
فتبرع لها بالكلى , حباً فيها
ومازال حتى الآن بيقدم لها دمه كل ما بتحتاج


طلب مني أخويا من فترة أني أفاتح زوجي وأهله
لانه كان عاوز يخطب أخت زوجي
فاتحتهم في الموضوع , ولقيت والدة زوجي لم توافق ..


قلت لأخويا كل شيء قسمة ونصيب
ورغم أني عارفة أنه أتألم , وخاصة أنهم لم يذكروا سبب الرفض
أخد الموضوع بروح طيبة , وتقبل الوضع , وقالي ربنا يوفقها
وكنت حاسة أنه حزين , بالرغم أنه بيحاول يبين عكس كدة


لحد هنا مفيش مشكلة

المشكلة أني عرفت بعدين أية سبب الرفض
والدة زوجي معاها ماجستير ووالد زوجي معاه الدكتوراة
وهما حصلوا على الماجستير والدكتوراة من وقت قريب


المشكلة أن والدة زوجي , بدأت من بعدها , تقول أن اللي معاه بكاليورس بس , يبقى جاهل !!!


مرة كانت عندنا في البيت , و هي بتتكلم , قالت أن أخت زوجي تقدم لطلب يدها , شخص , وأنهم رفضوه , وبعدين قالت أنهم رفضوه علشان هو معاه بكاليورس , ولم يكمل دراساته العليا , وبالتالي هو من وجهة نظرها جاهل !! وأن مستواه الفكري والثقافي متدني !! وبعدين لقتها بتضحك وبتقول : أزاي يجرؤ أصلاً ويتقدم لبنتها


الحقيقة الكلام جرحني
لأن أخويا أنا كمان معاه بكاليورس
وهو كمان أتقدم للزواج من أخت زوجي
يعني الكلام ده يشمله

رغم أن أخويا مهندس
والحمد لله أخلاقه طيبة جداً وبشهادة الجميع


عملت نفسي مش واخدة بالي من الكلام

بس بالاقيها في كل مرة نتقابل
تتكلم بتكبر وأستعلاء وفخر

يعني مرة قالت لي أن أخويا له الشرف أن جزء من جسمه دخل جسم بنتها !!


وكل ما تتكلم تقول اللي عايشين في شقق , مش في فيلا , دول يعتبروا ناس درجة تانية !
طيب أنا أهلي عايشين في شقة


الكبر لله
كلامها فيه تجريح كتير , وخاصة أنها بتقول كلام يحمل معنيين , وبتكرر الحكاية دي كل شوية , والكلام على أهلى وأخويا


لما حد بيجرح أهلي , بأحس بحزن وأهانة كبيرة , وخاصة أني قلت لها أن أهلي غاليين عليا


مش عارفة الحل أية
أتمنى تشيروا عليا
مبقتش قادرة أتحمل
وخاصة أنها كل شوية تزيد في التلميحات وفي التجريح