ابي مشورتكم ........؟؟؟؟؟ساعدوني الله يخليكم

ياقلبي عليك استهدي بالله وتعوذي من الشيطان انا حاسه فيك واقدر ضيقتك

بس كل الحياة الزوجيه تمشي بالتفاهم يعني فهميه كل اللي كتبتيه وانك لازم تتوظفي الا بسألك

انتي ماشرطتي بالعقد انك تكملي تعليمك وتتوظفي والا لا؟

بعد عمري والله لا تقولين تطنزون اللي قلتيه حقوق شرعية لأي وحده مو من حق شخص يحرمك منها حتى لو كان زوجك ولا تقولين دقه قديمه لانه مو عذر له ياما في رجال دقه قديمه وحريمهم يشتغلون ويطلعون يعني مو من حقه يمنعك لا هو عيب ولا حرام ولا منقود يخاف نقد العالم عليه ( قلت منقود لان اغلب المتخلفين هذا همهم كلام الناس يتعذرون فيه)
ماادري شاقولك انا لاني توني متخرجه واحلامي نفس احلامك تقريبا حطيت نفسي بمكانك و اختنقت حاسه فيك هذا كل اللي اقوله الله ينولك اللي في بالك ويرضيك ويسعدك قولي اميين

الف شكر حبيبتي على ردج ..........لا والله للاسف ابوي وعمي ابو زوجي الله يهداهم ما خلوني كانو رافضين اني اكتب اي شروط بالعقد ......يقولون عيب ...اشلون عيب وهذا حقنا شرعا ؟؟؟؟؟....واصلا تصدقين انا من سذاجتي وعفويتي وبراءتي ...... انا مااكتشفت ان المراة ممكن تشترط في العقد الا بعد ما تزوجت اشوف في ورقة العقد مكتوب شروط الزوجة ...!!!!! والله العظيم مت مت مت من القهر بس بعد شنو ....والله ما كنت ادري

والله يا اختي كلمته مرة واثنين وثلاثة وعشرة .....طينة مو راضي ابد يقوللي مكانك بالبيت تربين العيال مو ترمينهم زي بنات هالجيل للخدم ووالله العظيم انا ما احب الخدم وما احب عيالي الا بحضنب بس احب الخدامة تجي تنظف وتروح وما احبها تمسك او حتى تشوف ولدي كله خاشته وقت ما تجي احطه بالدار وانومه ما احب الخدم وسوالفهم اللهم يا كافي ......هذا غير انه عمي ابو زوجي الله يهداه مشترط على ابوي وزوجي من قبل بهالشرط اني ما اكمل داستي ولا اشتغل .....اهما يتشرطون واحنا اللي اهوا حقنا الشرعي بالعقد لا عيب ........يعني مقفلينها من كل ناحية اختي ؟؟؟؟؟

حبيبتي بسألج انتي قبل ما تعرسين ما كنتي تعرفين انه هو مايباج تشتغلين و تطلعين و تدرسين ؟؟انتو فالبدايه ماتفقتو على كل هذا؟ يعني هل انج تعرفين هاي الاشيا عنه و وافقتي ولا هو غشج لاسمح الله و وعدج و بعد العرس اخلف ؟ خواته و بنات عايلته كلهم نفس الشي؟ محد يشتغل و يسوق و يدرس ولا شو

والله حرام تطلقين .. السالفه يبالها طولة بال و تفاهم مب طلاق و خلاص .. عيل لو خانج شو بتسوين؟ لو ظربج شو بتسوين؟ لو هانج جدام ولدج شو بتسوين؟ احمدي الله يابنت الحلال
الدعاء اييب نتيجه .. الكلام الحلو و فن الاسلوب اييب نتيجه .. وايد اشيا تقدرين تسوينها تخلينه يغير من تفكيره لو بنسبة 30% و السالفه يبالها قنااعة منج بعد .. بخبرج قصه

واحد سار عند طبيب نفسي يصييح يقوله خلاص انا تعبت من حرمتي ما اباها افكر اطلقها معني احبها و تحبني بس ماقدر اعيش وياها .. سأله الدكتور ليش ؟ قال هي وايد اتدقق في اصغر و اتفه الاشيا و تعظم كل شي صغير و ماله داعي .. الكلينكس لازم يكون في مكان معين اذا شوي حركت العلبه نتضارب .. اذا شربت ماي و حطيت القلاص جدامي على الطاوله نتضارب .. لازم ارجعه المطبخ و اغسله .. قال الدكتور و بعد؟ خبرني شوي عنها و عن طبعها .. قال الريال هذا اكره طبع فيها .. حتى يوم نطلع نبا نشتري شي مستحيل هي تمشي على رايي كله انا اللي اسمع كلامها لانه ذوقها وايد صعب ما تقتنع بشي ابد .. ابتسم الدكتور و هو يقوله هذا اللي بيخليك نتفصل؟؟؟؟ انته ما فكرت انه على هذا الطبع و الذوق الصعب اللي فيها هدت كل رياييل العالم و اختارتك انت بالذات و حبتك انت و اقتنعت فيك انت عشان تكون شريك حياتها اللي بتعيش باقي ايامها تحت ظلك و حنانك؟؟ :) ماتحس انك محظوظ لانه مب وحده عاديه اللي اختارتك :) انصدم الريال لانه هالشي ما يا على باله من قبل و حب الحرمه اكثر عن اول و حياتهم حلللللللللللللللوه من احلى ما تكون .. لانه السالفه بس مجرد انه الشخص اذا ما قدر يغير من راي شريك حياته يتأقلم وياه و يشوف ايجابياات هالطبع

مب لازم كل اللي في بالج تسويينه .. الدنيا تنازلات و مهما كان هذا ريلج .. ماتدرين شو يدور في باله يمكن هو بيحس انه مقصر معاج اذا اشتغلتي او بيشوف عمره مب قد المسؤوولية او او او .... انا معاج الحياة ممله بهاي الطريقه ما الومج بصراحه باللي تفكرين فيه .. بس انا ادري و متاكده بعد انه هالقرار من زود الطفره و الملل و الضيج مب من خاطرج .. لسانج اللي ينطق مب قلبج
وبعدين مب حرام تفكريم في عمرج و تنسين ولدج :( عشانج تبين تشتغلين و تسيرين البحر و السينما و تسوين كل اللي تبينه تحرميين الولد من ابوووه ؟؟ الله يسامحج بس

تقبلي تحياتي و سامحيني اذا كلامي كان قاسي عليج
دعواتج لي يالغاليه

حبيبتي هدي اعصابك

انا مثلك مخطوبة وخطيبي مثل طباع زوجك بالضبط وابوي سوا مثل ماسوا معك منعوني اشرط وكل شروطي راحت هوا واهله كل بناتهم مايكملون دراسة ولايشتغلون ودايما يسوسون في راسه

اقلك شي دراستي مختلطة وخطيبي غيور للموت

تعرفي ايش سويت

دايما المرأة لها سلاح خاص ام الرجل بالذات انتي متزوجة يعني تقدري تسيريه على كيفك بالكلام الحلو والمعامة الطيبة وحركات الدلع

سوي لك جو رومنسي معاه واضمني يكون رايق جدا
يعني مايكون جاي من الدوام تعبان او مضايق
وافتحي حوار صريح معه
ذبلي عيونك واستعملي كل اسلحة الاغراء الي عندك
وكلميه عن طموحك
عن حقك ( دراسة- شغل- زيارات عائلية واجتماعيه )
حاولي تبحثي عن داخل قلبه مو عقله
اذا عندك شهادات من المدرسة - شهادات تقدير وشكر من معلماتك وريهم اياهم وقولي له شفت ويش قد انا كنت شاطرة تدري ان حلمي اكمل دراستي- اكون شي بالمجتمع
اساعدك في مصاريف هالدنيا اطلبي منه يحطك تحت الاختبار يعطيك اشتراك في دروة انجليزي او حاسب لمدة شهر ويختبرك فيها اذا رح تقدري توفقي بين دراستك وبيتك وابنك وزوجك ولالا

صدقيني لو بحثتي في داخل قلبه وغرزت مسامير احلامك في قلبه وسلبتيه مشاعره عقله المتحجر بيتغير

وبالنسبة للطلعات
دايما خدي رايه واعطيه خبر بدخلتك وطلعتك ورجعتك اشكريه لان سمح لك تطلعي وتزوري وتأدي الواجب
الرجال مايبيلهم غير ارضاء غرورهم المخدوعين فيه


ادعي

اللهم اجعل خيره بين يديه وشره تحت قدميه واجعل غضبه علي بردا وسلاما
اللهم طوع لي قلبه وعقله كما طوعت البحر لموسى
اللهم اجعلني اقرب الناس له واجعله احن القلوب علي


رددي هالدعاء دائما قبل ماتطلبي منه شي
وربي مارح يخيبك

اختى الكريمة فى البداية الله يكون معاك و يساعدك و يهدى زوجك ان شاء الله لكن ياختى فكرى فى طفلك ولا تظنى انك لما تطلقى ستعيشى احسن بالعكس ستصبحين فى نظر المجتمع مطلقة و سيكون الضعط عليكى اقوى و اصعب خصوصا مع طفل فى رائى الحل الوحيد و السليم ان زوجك يتغير حاولى معاه بالحب و الطيبة ازعلى منه كم يوم معليش اقنعيه ان حياتك بهذه الطريقة صعبة لازم يحس انك لما تكونى مش سعيدة و مرتاحة انه هو ناقصة شى و لما يصرف اى تصرف تحبيه حسسيه بيه و فرحيه و اشعريه بالفرح حتى يكرر هذا مرة اخرى و ربى يهدى سرك و يحفظلك ابنك و زوجك

ماعندك حل الا الطلاق
وخليتية اول الحلول بدل مايكون اخرهاااااااااااااااا

وين محاولاتك واقناعك لزوجك وين السياسة في التعامل

لاياختي كل باب ولة مفتاح وعرفي كيف تكسبي زوجك

وكيف تقدري تقنعية بانك تكملي تعليمك ويمكن لانكم بغربة خايف عليك

واذا رديتي ديرتك اكيد راح يتغير

هو خايف عليك

وكل شي بالاقناااااااااع والسياسة يجي

ولهانه على الكويت يالغاليه كبري عقلك ومدي نظرك شوي وتعلمي ان هالدنيا عمل وبالآخره الجزاء ولاتخافين العشرين السنه الجايه فقد يغير الله من حال الى حال وانتو بينكم طفل يعني الالم يصير ألمين وحاولي تكون اهدافك في الحياه اعلى من كذا وانت لك ثلاث سنوات مفروض كل شخص فيكم ارتبط نفسيا بالاخر واصبح مكمل له وصدقيني هو مااجبرك على شي الابعد ماشاف الضوء الاخضر عندك وانتي نفس الشي فأحمدي ربك مأمرك بمنكر او زلك على الحرام يالغاليه واتركي عنك الافكار المستقبليه الي يتشبث بها الضعفاء لأنهم يعلمون نهم لايملكون من امرهم شيئ

اتمنى ماكون قسيت لكن الاسباب الي ذكرتيها اتلفت اعصابي وقلت وش بيكون حال الاطفال اذا بنتطلق على اشياء تافهه مثل هذي

كنت كتبت رد طويل و بعدين خفت أن اتهم بالقسوة و سوء الأسلوب ..

لكن أختي أريدك أن تسألي نفسك هذا السؤال و ما تردي علي فقط احصلي على إجابة لك أنتي وحدك ..

يقول الرسول صلى الله عليه و سلم : (( أيما امرأة سألت زوجها الطلاق من غير ما بأس فحرام عليها رائحة الجنة ))

سؤالي هو ..

هل في كل ما قلتيه ما يعتبر من البأس الذي ان طلبت معه الطلاق لا تحرمين من رائحة الجنة .. و رائحتها تشم من على مسيرة 500 عام ؟!!

اخيتي في الله اياك وطلاق اذا حصل الطلاق ستعيشين في نار المجتمع الذي لا يرحم المطلقه وينظر لها نظرة سيئه بحيث تترحمين على أيام العيشه مع زوجك .....وبعينك الله استحملي على الاقل علشان ابنك والله يهدي زوجك ويحنن قلبه عليك.

والله يا اختي ماعرف شاقولك بس لا تضعين بيتج بيدج كل بنت في هالدنيا لها طموح وخاطري تسووووي كل اللي تبيه بس الحين انتي تزوجتي لازم تضحين عشان تمشين حياتج اعرف انج تتمللين بس حاولي تشغلين نفسج باي شي واذا عن الدراسه تقدرين تتدرسين انتساب يعني بالمراسله

ليس كل مايتمنى المرء يدركه

حبيبتي استهدي بالله يالغالية
بعدين حاولي معلية واصبري على اللي انتي فيه ماوافق من اول
بيجي يوم ويوافق ان شاءالله ايش ذنب الطفل يعيش بعائلة الام بجهه والاب بجهه اخرى ..
والسبب يمكن وظيفة او حرية بس بحدودك ...
الحين انتي تقولين ابوك قال عيب انك تكتبين شروط صح
فما بالك اذا كنتي مطلقة يمكن يقول عيب تطلعين لحالك عيب كذا وكذا ..
انا اعرف المطلقات الغالبية مظلومين وماعندهم سوالف خرابيط بس المجتمع ماصار يرحم احد
فكري ياقلبي قبل كل شئ

انا قريت عن وحده كاتبه قصتها... ان زوجها كان مره قاسي مايعملها عدل ولا يعامل اهلها عدل, كان مرررره متضايقة.
بس بعدين قامت تقرا سورة البقرة كل يووم واتقووم اليوم كل يووم وتدعي.. وبعد فتره تغير زوجها.. صار يحبهاا يمووت فيها ومايرضا عليها.... ماشاءالله الله يتمم عليها....

فانتي جربي...

وبعدين شي ثاني...تقدرين في هل الفترة او لما ولدج يكبر.. اتشوفين معه افلام مثلاً
دزني وغيره... وبعدين بإمكانك ان تلعبين وياه... سياكل, سكوتر, كوره اي شي...

وان شاءالله الله يهديلك زوجك... لان ماعندي انك راح تستانسين لين تطلقتي لان بعدين راح ياخذ الولد..

[COLOR="Magenta"]حبيبتي احب اقولك الف مبروك على وجود هذا الرجل الغيور الشهم الكداد الي حافظك في بيته في هذا الزمان الاغبر الي ماعاد فيه رجال من هالنوع.............
انتي بنعمه مستحيل بتقدرينها الا اذا فقدتيها
غيرك من البنات تتزوج رجل امعه يسكنها ويا اهله وتشتغل وتصرف على الكل
غيرك يخلي مرته تصرف وتحتك بالرجال ولا يغار عليها ابدااا ويبهذلها وهي الي تشتري كل شي للبيت وهو اخر الليل بعد الوناسه يجي ياكل وينام في البيت وما يدري وش صار
غيرك درست واشتغلت وحققت كل امانيها لكن تحلم بزوج تغدق عليه حنانها وتحلم بطفل يجلس بحظنها
وغيرك وغيرك اشكال والوان
طيب لو تطلقتي ورجعتي للكويت وحرمتي ولدك من ابوه هذا اذا اعطاه لك واشتغلتي وسقتي سياره وحققتي كل احلامك هل بتكونين راضيه وانتي مطلقه كل العيون تتهمك بالنقص فقط لانك مطلقه؟؟؟
كل عيون الرجال تنهشك ويعتبرونك فريسه سهله ويمكن اول ناس بيحسون انك حمل عليهم اهلك
لان تطلقتي لاسباب واهيه واحلام الاستقلاليه
الاستقالاليه فكره غربيه يسعون بها تفخيخ عقول بناتنا ((كوني مستقله تكوني سعيده))>>وهم العاجز
المرأه لا تحس بانوثتها الا مع رجل كزوجك يخاف عليها ويغار ومدلعها ويصرف عليها ومش مقصر معها بشي
حبيبتي هذي وساوس الشيطان تنهش عقلك وتقولك انتي مظلومه وخلتك تنسين كل محاسن زوجك
وابو ابنك يعني اصدق زوجك مقصر معك لهذه الدرجه؟
انتي ما ذكرتي ولا عيب الا فحولته ورجولته الزائده والتي يحلم بها اغلب البنات
احمدي ربك على النعمه الي انتي فيها
والحياه لا تقف هنا بكره بتجيبين الاولاد والبنات وبنتشغلين في تربيتهم وتزوجيهم وتشوفينهم وهم ينجبون اولاد
وهذا فقط يبيله قوه عقليه وبدنيه مش بسيطه حبيبتي الدينا حلوه انتي بس اقنعي زوجك ان يطلعك ويمشيك
واقترحي عليه ان اجازه لك واجازه في بيت اهله وحاولي تقنعينه بالكلمه الطيبه والرقه وانتي قادره على هالشي ميه بالميه لانك انثى
الله يوفقك
تحياتي[/COLOR]

السلام عليكم ورحمه الله وبركاته ..

اولا عجبني رد مريم نور . وعجبني رد قويه الساس .. مريم نور استرسلي اختي .. واكتبي ..مايجول في بالك ... ومحد بيفهمك غلط

عموما .. اختي .. مثل ما قالو لج اغلب البنات ...لحد الحين ماذكرتي سبب رئيسي ...

وبعدين اختي .. يعني صحيح للحين في بنات تنجبر على الزواج .. بس نسبتهم ضئيله جدا .. ومثل ماقالت الاخت انت ما كنتي تعرفين بالشي هذا قبل الزواج ____ في الخطوبه طيب .. كلش ما بين شي ...

عموما على افتراض انج ما كنتي تعرفين .. هل تحرمين ولدج .. من ابوه عشان احلامج اختي .. تدرين كم بنت موجوده بالمنتدى .. مستعده تتخلى عن كل طموحها من اجل ان تمضي بقيه عمرها مع زوج .. ...

يقول المثل مشوار الالف ميل يبدأ بخطوه ... انزين .. انتي ابتدي بالطلبات البسيطه .. مثلا ..

يوم الجعه الغدا عند اهلك ,, والعصريه انا وابنك نطلع . ونتمشى ,, والعشا عند اهلي ... وتحطي الاسباب .. كذا وكذا وكذا ..

ما اقتنع حطي حل ثاني .. قولي طيب .. الجمعه مع اهلك ,, بالغدا وبعدين الباقي من الوقت معانا ,, وبعدين الجمعه الي بعدها .. مع اهلي بس غدا وباقي اليوم مع بعضنا ,,,

طبعا ما اتصور زوجك ما عنده اجازه سنويه ... اقترحي انكم تسافرو .. شوي الكويت تتسوقون تشوفي اهلك ... ما رضى اقترحي اجازه كم يوم يقضيها معاكم ... لان اعتقد معارضه زوجك للعمل .. فقط وخروجك..

طيب في كتب للتعليم الذاتي ... يعني ..دورات فوتو شوب .. كتب لغه .. كتب تربيه .. كتب طبخ..
ليش ماتتعلمين الطبخ ... وتبعين كتسليه ..

معلش اسمحي لي الاطاله .. لو كنتي حابه تتعلمي وتواصلي تعليم .. معلش ... في دراسات عن طريق الانترنت .. ومن جامعات موثوقه تتعلمي وتاخذي كورسات عن طريق النت ...

يا اختي ابحثي في حياتك عن اصغر الامور ,,, التي تسعدك ... ولا اعتقد ان زوجك يسيئ معاملتك .. برفضه لهذه الامور .. فكره اثبات الكيان والنفس والشخصيه لا يأتي عن طريق العمل .. كلها افكار غربيه غرسوها في رؤس النساء ... برأيي العمل لمن تريد مشاركه زوجها المسؤوليه في تحمل ظروف الحياه .. وان كان زوجها قادر مقتدر .. فلاداعي الحمدالله لديك شهاده ,, تفيدين بها اولادك .. اختي لكل مشكله حل ,, وانتي اكثر شخص يعرف طريقه تفكير زوجك .. لهذا فكري كما يفكر وانظري .. ماهي الطرق التي ممكن تجعله يوافق . على بعض الامور..

تحياتي
ام جنى

اختي استهدي بالله وفكري مليون مره علشان ابنك

حبيبتي استعيذي بالله من الشيطان وفكري شويه
يعني انت لو اطلقتي لا سمح الله ورجعتي لبيت اهلك هتكوني مرتاحه وواخده حريتك
وابنك هتكون حياته عامله ازاي بدون والده
استهدي بالله والله عن تجربه حاولي تمدحي دايما جوزك ولو عايزه تروحي مثلا فرح او عزومه قوليله ان انت مش عاوزه تروحي لاكن علشان عارفه انه مابيحبش الناس تزعل منه وانه مابيفوتوش الاصول والواجب مضطره تروحي
وحاولي دايما تعملي كل شويه جو مختلف فالبيت يعني شموع وورود وعشاء مختلف
يعني حاولي تسعدي نفسك في بيتك ودايما اجعلي بيتك الجنه اللي دايما هو يتمني يرجعله كل ما يخرج منه
ويمكن يكون منعه ليكي من شده غيرته عليكي حاولي تبعدي عنه كل الاحوال اللي ممكن تخليك يغير

اما عن وجودك فالبيت فممكن تدرسي عن طريق النت او حتي تشتغلي علي النت
واكيد دايما ادعي ربنا يهديهولك ويسعدك معاه يااااااااااااااااااااااااارب

ياحبيبتي فديتج والله ..

حتى الكويت ولهانه علييييييج ..

انتي وين اي دوله ..؟؟

فديتج حاولي لأ تيأسين ..حاولي واصبري

قوليله ضايق خلقي انبطت جبدي .. كرهت حياتي وووو الخ من هالكلام يمكن ياثر فيه ..

والله مادري شقولج .. احترت يحير طبع ريلج والله

حبيبتي تذكري شي مهم

ان كيدهن عظيم

انا مهما اقولج شو تسوين مابقدر اعطيج حل مثل ما انتي تقدرين تعطين عمرج حل لان ريلج انتي تعرفينه اكثر عن اي مخلوق

بالنسبة لي استخدم الاسلحة الانثوية دااايما وابدا
دلع اغراء واسلوب كسر الخاطر (اتمسكن لين ما اتمكن)
والحمد لله على كل حال
واهممممممممممممم شي اختاري الوقت المناسب
لان لو كان تعبان او مشغول لا تفاتحينه باي موضوع من هالمواضيع

ولا تنسين الدعااااااااااااااء يا حبيبتي

ادعي ربج يهديه

ترا لا تلومينه البلاوي اللي يسمعها عن الخدم وهالجيل وايد يخاف بس خوفه مبالغ وانتي تقدرين صدقيني تقدرين تغيرين تفكيره