تجمع للمتأخرات عن الحمل بعد الإنجاب .. الجزء الثاني !!

السلام عليكم
كيفكم بنات ان شاء الله طيبيين

امممممممم انا مادري شفيني
دائما مستعجلة امس اخذت
تحليل حمل مع ان باقي عشرة ايام
على الدورة وطلع سالب تكدرت
شوي مع ان عندي امل كبييير هذا
الشهر الوالدة نصحتني استنى اسبوع
بس انا قلت بجرب شوراي

تهقونن لازم استنى صح ومتى يبان
تحليل المنزل تحياتي

لحظة ندم..
مرمر..

أشكركم على كلامكم الطيب،، طبع الدورة شرفت أمس في موعدها وخلاص زوجي مسافر اليوم لمدة أسبوعين على مايرجع خلص موعد إباضتي... يله الحمدلله على كل حال...
صدقوني ماتكلم مع البنات بالدوام.. واصلا اللي معاي بالمكتب مايجرحوني ولا يقولون شي، بس اللي بالطوابق الثانية لو رايحة شغلة خمس دقايق في الشئون الإدارية مسكوك وهدوا فيك بالأسئلة.. وعندنا وحده تقولين عاقدة عقد مع دكتور، من تشوف أحد قالت له روح له،والحين وحده معنا يابت توأمين 3 بنات وولد، من شافت أحد قالت له آنه قايلة لها روحي عنده شوفوها سمعت الكلام وأنتوا ماتسمعون..، أنا زوجة حماي معنا بنفس العمل بس بطابق ثاني من تشوفها بعد قالت لها روحي لهالدكتور... حتى زوجة حماي تعقدت من شوفتها... والبقية طبعا لازم النغزات...



ريحانة القدس... شلونج؟؟ صح أختفيتي عنا فترة الحمدلله أنك بخير... عمرة مقبولة مقدما ولاتنسينا بالدعاء... ولاتنسين أتخلين لينا تدعي مع كل طواف وسعي يارب تعطينا أخ أو أخت...
ويارب مثل ماقلتي تكون صفحة وتنطوي وبعدين كلنا نكون مع البيبي الثاني...




أم حبيبها.. ماشاء الله عليج وايد أستعجلتي بالفحص،، مايبان الحين بفحص البيت.. ربج كريم وإن شاء الله بعد أسبوع تبشرينا...
الا باسألج لاحظت أمهات البنات إن بناتهم وايد يفكرون في أخ أو أخت ومتعلقين بالبيبي دول،، آنه ولدي ماشوفه مهتم،، أنت بعد ولدج جذي؟؟؟

صباح الخير يا صبايا شلونكم؟ والله الكم وحشة.
الله يعوض يا رانيا و ان شاءالله قبل نهاية السنة نكون كلنا حوامل و نفتح تجمع نسميه تجمع حوامل الشهور الاولى اللي تأخروا في الانجاب بعد الحمل :-)

بالنسبة لسؤالك رانيا عن ابنك انه ما يفكر بأخ او اخت, انا احس انه بنتي مش مهتمة بوجود طفل بحد ذاته لكن اللي يهمها انها تقلد اولاد صفها و تقول سستر و برذر لانه كل اللي معها بالصف اما الهم اخوان اكبر او اصغر و حتى مرات في البيت احسها تتقمص دور المعلمة و تحط العابها و تصير تدرسهم. ان شاءالله يا رب يعطيني توأم و خلي بنتي تفرح و تدرسهم على كيفها بس اكيد راح تتسلط عليهم و تعمل عليهم الاخت الكبيرة :-)

هلا اختي رانيا


اي والله استعجلت واااجد

اما على سالفة ولدي زي ولدج

مااشوف منه انة يبغى اخت او اخ

المسالة صايرة عندة عادي

مع انه لما يشوف اولاد خالة من نفس عمرة
تقريبا يستانس بهم مرررة

يالله الله كريم

new member الحمدلله على كل حال... ويارب نفرح على قولتج قبل نهاية السنة... أمس رحت أعظم الأجر حق ناس من جماعة أمي ورحت بروحي لأن أمي كانت رايحة لهم من أول يومين.. طبعا أول سؤال انسالت شلون عبودي وها ماحملتي بعده؟؟؟ بعدين جات بنت خال أمي الا تقول ها ماحملتي؟؟ ياربي بس وهذا حالي يعني حتى لما تروحين توجبين الناس في حزن بعد ينطرح هذا السؤال..


أم حبيبها... الله كريم أنتظري بعد كم يوم... وعن ولدج يعني طلع مثل ولدي.. الله كريم...

الله يعوضج يا ام عبدالله وان شاء الله اخر مرة تشوفينها

يارب الله يسمع منج ياأم نور... وعقبالكم كلكم وأنا معاكم بنفس الشهر..

ريحانه : تروحين و ترجعين بالسلامه و عمره مقبوله و ذنب مغفور ان شاء الله

رانيا : الله يعوضج الشهر الياي ان شاء الله....و يصبرج على كلام الناس

new member : بنتي مثل بنتج بس حافظه الكلمه و تعيدها كل شوي حتى اليوم على DVD سمته ماي سستر ...لكن المشكله يوم الناس بيسمعونهم ما بيرحمونا بعتبرونه دليل إدانه ضدنا و كانه مسون جريمه و ان نحن السبب في حرمان هذيل االطفال البرئين من حق ان يكون لهم اخ او اخت

و عن نفسي الحبيبه مب راضيه تشرف ضيعت وقتي ..باجر بروح علشان يعطوني حبوب يخلونها تشرف ...ما ادري ليش عندي احساس يقول اني اول ما راح اشتري الحبوب و قبل لا ابدا اخذهم بتشرف

الله يعينج أخت مرمر.. صاجة الناس مخلينا أحنا السبب في حرمان عيالنا من أخوان أو خوات كأن الموضوع بيدنا... ربج كريم.. بنتج جم لها بالضبط؟؟؟

الدورة نزلت اليوم .......... والحمد لله رب العالمين على
كل حال . غدا إن شاء الله رايحة للطبيبة في رحلة علاج جديدة ...
ويارب خير إن شاء الله .......
عندي إحساس إن هرمون الحليب مرتفع !!!!!!!!!

رانيا البحرينية;6229086:
الله يعينج أخت مرمر.. صاجة الناس مخلينا أحنا السبب في حرمان عيالنا من أخوان أو خوات كأن الموضوع بيدنا... ربج كريم.. بنتج جم لها بالضبط؟؟؟

بنتي عمرها 3 سنوات ..بس الي يزيد المقارنات ان كان في وايد من الاهل و المقريبن حمل وياي بنفس الوقت حملوا مره ثانيه ...و غير الي تزوجوا ويايه بعد مجموعه كبيره و اغلبهم ما شاء الله صار عندهم ما بين 4 و 5 اطفال ما شاء الله

الله يرزقج أختي مرمر بالقريب العاجل.. آنه ولدي بيكمل الأربع الشهر القادم وماشاء الله كل اللي حملوا معاي الحين صار عندهم واحد او أثنين.. وتعرفين الكلام اللي يغث...

مرحبا انا عندي بنتين اصغرهم 8 سنوات تقريبا ظيت فتره طويله بدون حمل و حملت ببناتي بعلاج و حاليا اتعالج و الله كريم..

صباح الخير بنات وينكم ؟؟؟؟
للأسف الشهر هذا ما راح أزور الطبيب ، اختلفت أنا وزوجي في موضوع
العلاج وما وافق على البدء في رحلة جديدة لعلاجي وماني قادرة أفهم
ليش هو رافض فكرة ان حملي متأخر لسبب معين ،، يقول انتي ما فيك
أي شيء يمنع الحمل إحنا ما راح نروح الطبيب إذا حملتي كان بها ..
ما حملتي إحنا عندنا طفلين والحمدلله .. غيرنا يتمنون أطفال من 10
و 20 سنة وما حصلو على الي يتمنون .. طبعا أنا ما ني مقتنعة بكلامه
وقلت الشهر هذا راح اسمع كلامك بس الشهر الجاي مصممة على
زيارة طبيب جديد وما راح أيأس ..

صباح الخير يا صبايا , فعلا البنات مختفيات,
عزيزتي التوت البري, حاولي تقنعي زوجك و قوليله انه الوقت مش في صالحكم, انتي بتكبري و الاولاد بكبروا و اذا لا سمح الله اذا فيه مشكلة افضل تنحل من البداية.
و ممكن الموضوع يكون بسيط مثل خربطة هرمونات او تكوني بحاجة لتنشيط بسيط لكن اذا كان عندك كل شي اوكي لا تاخذي تنشيط قبل ما يفحص زوجك, نصيحة من اخت لانها صارت معي.

بالنسبة لي ان شاءالله راح ابدأ بالتلقيح المجهري هالشهر و بكرة عندي الابرة التحضيرية , ادعولي ربنا يسهل امري

التوت البري.. الله يسهل أموركم،، وإن شاء الله زوجك يقتنع ببدء العلاج،، لاتتأخرين كثير، كل مالنا نتقدم بالسن وهالشي مو في صالحنا... ومثل ماقالت new member خل زوجك يفحص،، أنا بعد نفس مشكلتك ، الدكتورة عطتني منشطات وإبرة وماصار حمل وبعدين سوينا الفحص لزوجي وطلعت المشكلة عنده... لاتاخذين منشطات دام كل شي سليم عندج،، وربي يحفظ لك عيالك...


new member يارب الله يسهل أمورك وتنجح العملية ... خلي نفسيتك عال العال وإن شاء الله كل الأمور تمشي مضبوطة..


بالنسبة لي باقي يومين على تبويضي وزوجي بعده مارجع من السفر بعد باقي له اسبوع.. يعني هالشهر مافي حمل .. الله كريم يعوضني الشهر اللي بعده.

مساء الخير أنا جديدة معاكم في هذا التجمع ويا ريت الكل يستفيد أنا من تزوجت صارلي خمس سنين وحملت بعذ زواجي بعد خمسة أشهر لكن صار لي اجهاض في الشهر الخامس وبعد سنة حملت بولدي واللحين ولدي بيكمل الثلاث سنوات في شهر ثمانية وما حملت بعده الحمدلله ان فحوصاتي كلها سليمة وتبويضي ممتاز وزوجي فحص من مدة بسيطة وطلع كل شي اوكي بس ما اعرف سبب تاخيري في الحمل عسى الله يكتب لنا الحمل جميعا قبل رمضان بإذنه تعالى

تليفوني يرن،، حياج الله معانه،، وربي يسمع منج قبل رمضان نحمل كلنا ويرزقج بأخ أو أخت لولدج...

انا وحده يديده انا صارلى متزوجه من اربع سنين وعندى بنت وحده و الحمد الله حملت فيها بعد زواجنا بارع شهور ومن كملت سنه احاول احمل ولكن الله ما كتب والحمد الله على كل شى وهيه تقول ماعندى اخوان ليش ما عندنا اولد ووووااايد

وأبعد معكم حبيباتي مساكم اله بالفل
أناالحمدلله عندي 3أطفال الصغير داخل ال5سنوات أخذت بعدماجبته حبوب ياسمين الله لايردها وتركتها من وعمرولدي 3سنوات والحين ماصارحمل ورحت للدكتوره ونظمت الدوره لأنها تلخبطت تخيلو تجلس بالشهرين ماتجي والله حاله نظمتها لي وبعدين تتلخبط ورحت لمراخه ومسدتني وأعطتني سفوف أيام الدوره وتحميلتين وأحده والدوره علي والثانيه أخريوم للدوره لتنشيط المبايض بس للأسف مافي فايده
وياااناس زوجي يبي طفل جديد وأهله يدقون بالكلام الله المستعان ولاني عارفه شو أعمل والله طفشت