هام لكل ام جديده او بتصيرر ام! وتحمدو لبنتي بالسلامه..+ نصايح من الدكتوره

السلام عليكم جميع

شخباركم؟
صج وحشتوني بس شسوي؟ لين وليان ماهم معطيني وقت احك راسي:o

اقول لكم اللي صار لي البارح والله يبعد عننا كل شر
البارح الساعه 7 تقريبا خليت التوأم عند اختي وقلت فرصه دامهم نايمين اقوم اخذ شاور واتفرك صح
المهم..

خلصت سبووحه وجيت البس.. لبس شورت البيجاما والستيانه.. الا اسمع صراخ ..
ماتت ماتت..
اطلع من الحمام الله يكرمكم الا امي ماسكه لين وتضرب ظهرها واختي تصارخ بهستيريا..

المهم انا ماني مستوعبه بس اذكر اني ركضت وصحيت ابوي وهو: يبه بسرعه شغل السياره لين ماتت نايم وصحى ياحياتي مفزوع
ولسه الصراخ قايم.. وانا ماني عارفه شسوي..
امي تشوف العبايه قدامها وماهي عارفه تلبسها ولسه تصارخ وتقول: ويلي بنتي مو قاعده تتنفس.. انا طالعت بنتي واشوف عيونها طايره فوق وخلاص ماتتنفس وجسمها قلب اسود!
ابوي ياخذها من امي وامي تاخذها يهفون في فمها يدخلون لها اكسجين
المهم انا لبست عباتي بسرعه بسرعه وشعري يقطر ماي .. واركض يمه اعطيني اياها..
وابوي جري شغل السياره وقسما بالله يابنات والله يشهد على كلامي امي جري ركبت السياره وحاملتها وماهي لابسه لاعبايه ولا شيله ولا نعال -الله يكرمكم- وابوي يسوق السياره وامي تسوي لها تنفس صناعه والبنت خلاص الهوا يدخل ومايطلع. وانا وقتها جتني حاله هستيريا..
امي تصارخ ماتتنفس وابوي مو عارف يسوق :: وانا اصارخ يبه اسرع المستشفى ..
المهم وصلنا المستوصف والحمدلله كان قريب من بيتنا .. وامي تنزل من السياره وماعليها عبايه ولا شي ولا عليها من اي احد خير شر وتركض ع الطوارئ وتصارخ بسرعه دكتوره البنت ماتت
والحمدلله في الطوارئ دكتوره موجوده وتصارخ بسرعه نادو دكتوره فلانه.
انا وقتها خلاااااااااااااااص اصااااااااااااااااارخ زي المفجوعه لاني خلاص شفت بنتي طلعت زبابيدها - زبد من فمها-
قعدوني الممرضات على كرسي وامي تصارخ جيبو لها ماي .. جابوي لي ماي وانا ارتجف واصارخ بهستريها مابي مابي ومالي خلق اشرب وشربوني غصب . والدكتوره تهديني تقول خلاص البنت تتنفس ومافيها الا العافيه وترجع تجيني حاله الهستيرها واقعد اصارخ ووالله كل الناس اللي جايين المستوصف دخلو الطوارى يهدوني وطاقم الرسبشن ..وامي شفتها لابسه عبايه - وحده من الرسبشن الله يجزاها خير جابت لها عبايه راس ولبستها-
قمت شفت بنتي حاطين لها اهواز في خشمها وفمها.. ومارتحت الا لما سمعتها صرخت..
وامي قالت لوحده ممرضه تتصل لاختي تطمنها ان بنتي بخير ومافيها شي
طبعا وصلت واختي واقفه على باب الشارع تنتظر .. ومارتاحت الا لما شافت ان بنتي بخير


اللي صار الله يسلمكم
بنتي كانت نايمه على ظهرها انا خليتها ع الظهر ورحت اسبح وقلت لاختي ربع ساعه وبطلع
اختي تقول ماشفت الا نافوره زوع -ترجيع- طلعت وتقول على طول قلبتها على بطنها عشان تطلعه لانه كان كثير
تقول ما امداني قلبتها مره ثانيه على ظهرها الا عيونها منفصه - مبققه- ومختنقه وقمت اضربها على ظهرها وبعدها على هالحاله
وعلى طول جري اعطتها امي وتقول لها امي لا تصارخين اختك في الحمام لاتسمع ويصير فيها شي
الا انا سمعتهم وطلعت من الحمام صاروخ..

طبعا نصيحه الدكتوره..
1- اول شي الام لازم تقوي قلبها عشان تعرف كيف تتصرف ماتقعد تصارخ وتقط ولدها وتندب حظها
2- الطفل اول شهر -خاصه لما يكون مولود قبل وقته- تكون غريزه المص عنده ضعيفه ولما يمص مايعرف يمص ويبلع
ويتنفس في نفس الوقت فلازم اول مايبدا يوقف عن المص الام تشيل الثدي عنه تخليه يبلع اللي في فمه ويتنفس..
3-الطفل اول 6 شهور ماينام على ظهره ينام على جنب وعشان ماينقلب وهو نايم ينحط تحت مفرشه فوطه ملفوفه على شكل اسطواني عشان تسنده وهو نايم على جنب وتمنع انه ينقلب على ظهره مره ثانيه واذا بدا يرجع البيبي اول شي نسويه ان احنا نقلبه على طنه او على جنب عشان يطلع اللي ببطنه كله واذا اختنق نبدا نضربه على ظهره لين مايتنفس..
طبعا امس حالتي يرثى لها جدا! وكل شوي اقوم احطها في حضني واقعد اصيح اصيح اصيح..

صج الله لا يمرركم باللي مريت فيه.. ويحفظ لنا كل غالي