ليلة ملجتي (سفرة + توزيعات + ديكور)

ما شاء الله حلوة السفرة بس مثل ما قالوا ناقصها الشموع لان انه كذا مرة شايفة سفرة العجم كلهم كان فيهم شموع وكانوا حلويين واييد وعجبوني وعجبتني افكارهم

ما شاء الله السفرة واجد حليوة والأفكار أحلى والشغل كله مرتب ونظيف.. الله يبارك لش ويسعدش

بس بغيت آخذ رايش.. بالنسبة لتكاليف السفرة مقارنة بالسفرة الإيجار لو بنفس المستوى تحسين شغل السفرة بالبيت أقل ولا أكثر ولا نفس الشي خاصة ان سفرتش حتى لو اشتغلتين عليها ما بتستفيدين منها بعدين !

وفي النهاية ألف مبروك الملجة

الصرااااااااااااااااااااااحه روووووووعه ماشالله عليج ابداااااع

نسيت اقول ليش مشكورة على القلم واستخدمته يوم الثلاثاء كان عندي امتحان توظيف في الوزارة ان شاء الله ببركات الله وقلمش اتوظف

ماااااااشاء الله الصراحه شي جناااااااااان

والله انك مبدعه
خصوصا فكرة المساند هذي عجيبه

في بداية العرض مااعجبتني القماش الي على الجدر >>مدري وش يسمي
لكن في الاخير طلع شي جنااااااااااااان

الله يوفقك ويسعدك ويازوجك ياااااارب,,

ما شاء الله .. اللهم صلي على محمد وال محمد

طول عمرج مبدعة اوريانا .. ومبرووووووووووووووووك الخطوبة وعقالنا يااارب ..

الصراحة ابداع ماشاء الله ماشاء الله تبارك الرحمن

تبارك الرحمن
افكار رائعه جدا ,,والله يخلي لك اهلك وابوك وصديقاتك وكل من ساعدك
وبالتوفييييق

ما شاء الله .. اللهم صلي على محمد وال محمد

مببببدعه بصراحة فناانه جدا ..

للاسف ملجت وخلصت لووول

اممم افكر اسوي حركات في ليلة الحنننه شوو رايكم؟:)

ماشاء الله لاقوة الا بالله

جميل جدااااااااااااااااااااااااااااااااااااااا

الف مبروك وربنا يتمم بخير وعقبال الفرح

ما شاء الله

مبدددددددددددعه

الله يوفقج

ما شاء الله على افكارك فظيعه مو مثلنا ما ننفع ببيسه

الله يهنيش حبيبتي ولا تحرمينا من ابداعاتك

ما شاء الله عليكم ورشة بس عفيه عليج والله الصج ينقال مو تزعلين الشغل متعوب عليه يبين بس مو زود بالذوق مع اني احس ان يطلع منج أحسن من هالشغل على كل تسلم ايدج

حبيبة جيمي.. تسلمين يالغالية مشكورة والله يبارك في حياتش

أكواريوس.. مشكورة خيو.. فرحتيني بصراحة .. الله يسهل عليش أمورش.. العسل قصتهم قصة.. اني كنت اشوفهم في البرادات بس دائماً حزة اللي تبين الشي ما تحصلينه! كل ما اروح برادة أشوف جام لكن ما احصل عسل! وظليت أدور من برادة لبرادة! وكل برادة عندهم سعل غير وما احصل كارتون كامل! آخر شي حصلته من عند برادات الجزيرة وما كان في بعد.. كان عندهم كم واحد بس ومخلصين.. وكلمت الإدارة ودبروا ليي نص كارتون.. واشتريت النص الثاني من لاست جانس... غربال كانوا! أما شلون شلت القرطاس من عليهم.. ففي نوعين
نوع ينشال القرطاس بسهولة وتحت الماي الدافي يروح.. بس النوع اللي اخذته ما كان قرطاس ينشق.. كان قرطاس لماع لين اشيله يترك أثر الصمغ وما يترك أثر قرطاس.. وشيلانه كان صعب صعب.. يعني كنت افرق فيه بماي دافي وصابون وسائل لوكس.. ونقعتهم في ماي ولا في فايدة!
جبت تنر حاولت بالتنر أشيله بعد ما فاد
آخر شي البابا جاب ليي مادة يستخدمونها في السيارات ما ادري شنو هي بس كانت خايسة وريحتها قوية.. واضطريت استخدمها بقطعة قماش وبعدين ارد انقعهم في ماي وصابون واجففهم واعرضهم للهوا عشان الريحة تروح... وراحت اخيراً:D

ترانيم الصمت.. الله يبارك في حيتش خيو.. تسلمين خيو... اخجلتيني :shy:

توتي... الله يبارك في حياتش خيو تسلمين

نزوهة.. مشكورة خيوتي.. تسلمين... كلش ذوق :)

الجنون.. تسلمين خيو عليش بالعافية اما الأكياس فأخذتهم من العتبة.. كل المحلات عندهم بس اغلبهم مكتوب عليهم بيبي أو نيو بيبي.. بالغصب لقيت ديلين...

صمت العيون... تسلمين خيو.. كلش ذوق... الله يبارك في حياتش ويوفقش ويعطيش على قد نيتش

مميزة... تسلمين خيو والله يبارك فيج وادعي له بالصحة وطولة العمر
الفراشة.. مشكورة حبيبتي تسلمين والله يوفقش ويسهل عليش


سارة سوس وصاحبة الظل الخفي.. تسلمون وكلكم ذوق والله يبارك في حياتكم ويوفقكم ويعطيكم على قد نيتكم

دجانة ونرجس الخليج.. الله يبارك في حياتكم.. تسلمون والله يوفقكم ويسعدكم

لب الفؤاء.. مشكورة الغالية تسلمين وكلش ذوق

عاطفة.. تسلمين حبيبتي والله يبارك في حياتش.. عن الشموع.. حطيت في أول طاولتين شموع بس.. حوالين المنظرة وحوالين الجوز والبيدان... وما كنت بصراحة امبي السفرة تكون غفصة.. شفت سفر واجد بنفس الأسلوب تقريباً ارتفاعات مختلفة للطاولات لكن كانوا طاولات كبار وتنحط السفرة على جنب مو قبال العروس.. وكانوا على حجم الطاولات يحطون اشياء واجد ويترسونها.. ليش سوينا الطاولات.. لأن أبويي يحب يسوي كل شي بنفس.. وحتى اثاث بيتنا هو صممه ورسمه وجاب النجار بيتنا ينحتهم قدام عيونه! يعني هو طبع لا أكثر.. ممكن أحصلهم لو ادور لكن غربال بعد خصوصاً اني امبيهم كلهم مقاس واحد وارتفاعاتهم فرق انجين بس عن بعض... ما بحصلهم طقم كلهم مقاس واحد وارتفاعات متساوية :)

أما عن تمشش الرجول.. ترى كلها على بعضها السفرة عادات وليست معتقدات.. لأن الفال الخير يجي من الله ويعتمد على النوايا الحسنة للشخص.. أني وحدة اكره شي عليي إيدي أو جسمي يكونون رطبين وكله امشش ما احب رطوبة بسيطة في ثنايا صبوعي :D بس مو أول مرة اشوف فوطة بلون السفرة مع غضارة الورد :D

أشكر لش ملاحظاتش.. تسلمين

هلا فطوم... لا بصراحة ما تأخروا! لأني دفعت 20 دولار زيادة عشان يسرعون الطلبية وكنت متأخرة نوعاً ما وبصراحة ما كنت واثقة من الموقع كلش لأن ما قط تعاملت معاه وفي مواقع كثيرة في الانترنت عندها نفس البضاعة واسعارهم يختلفون وما تدرين أي موقع صادق أي موقع جاذب عادي يضربون الفلوس عليي واني مو مسوتنهم بس هم اني مسوية طلبية لشي ثاني بعد معاهم.. كله على بعضه كلفني 350 دينار بدون الشحن
الشحن تقريباً دفعت 40 دينار.... وكنت خايفة كلش ادفع مبلغ على الانترنت وما ادري طلبيتي بتوصل لو لا! واجد كنت على اعصابي لأن كان الوقت بينتهي ومافي وقت افكر في شي غير والإفلاس ضارب حده :D بس المدة كانت تقريباً اسبوعين

بحرينية.. مشكورة حبيبتي.. الشموع مثل ما قلت حطيتها في طاولتين بس وما حبيت اكثر.. ملاحظاتكم محط اهتمامي .. تسلمون :)

نايس مون.. تسلمين خيوتي.. عن التكفلة بصراحة ما حسبت.. بس بشكل عام بخبرش
حلقات الستاير كانوا عندي من قبل فما كلفوني شي يذكر غير الصبغ اللي صبغته والتور والورد والشبة والكاكو

التور المتر كان ب500 فلس.. واني اشتريت 6 متر استفدت من الباقي في اشياء ثانية
الصبغ استخدمت علبتين يعني دينارين
الورد كلفني تقريباً 5 دينار
الشبة والنقضة والحرمل كلفوني تقريباً كيلو بدينار اذا مو أقل بعد!!
الكاكو 6 دينار تقريباً

يعني تقريباً 16 دينار.. حلقات الستاير

الشجرة... ما كلفتني شي يذكر! لأن قوطي الصبغ عندي اياه مال فضيل الستاير!
اشتريت قوطي صبغ قلتر حق الأصيص كان بدينارين
والأصيص كان عندي اياه من قبل
والورد اللي في الشجرة عندي اياه من قبل
والخرز والكور عندي اياهم بعد تكلفتهم لو بحسبهم كانت 3 دينار تقريباً
والشجرة مثل ما قلت في الموضوع أن أبويي راح أخذها من البر لأنها من النوع القاسي واعتقد اسمه عوسج

يعني الشجرة كلها على بعضها 5 دينار يمكن

الطاولات.. البابا عنده كل شي... يعني حتى لو ما كان عنده الخشب بيشتريه ومو غالي بيكون لأن كمية بسيطة بالكثير بالكثير 5 دينار.. باقي الشغل كله هو سواه!

الشمعدان والمنظرة والقرآن كانت هدية من عند البابا منزمان عاطني اياها

الشموع اللي في السفرة عندي اياهم من قبل بالذات القلوب اللي حوالين الجوز

كيلو جوز وبيدان ما يكلف اكثر من 5 دينار

حوض السمج بدينارين ونص

البيض أهل المعرس جايبينه مع الفواكه! والسمجتين بعد :D

الشي الوحيد اللي احس كلفني كان الأقمشة اللي سويت بها المسرح وسويت بها السفرة.. وما كانوا واجد لأني اخذت طاقة ب18 دينار

اني ما بحسب حساب دقيق بس بشكل عام يمكن كلفتني بين ال40 وال50 دينار

ألحين المحلات مال السفر يأجرون السفرة بدون توزيعات ب150 دينار
طبعاً ما يمنع ان يكون في محلات يأجرون ب50 لكن قعدي قارني الفرق في الديزاين والاشكال!
وكل واحد وذوقه! يعني مو شرط سعرها غلي يعني حلوة ولا شرط سعرها رخيص يعني كريهة

في النهاية الشغلة شغلة ذوق وبارض ومزاج
وبصراحة أني ما كنت أنظر للميزانية بقدر ما كنت واجد أحب هالشغلة... لأني لو بنظر للميزانية جان اكتفيت بتوزيعات الحلقات اللي ما كلفوني شي وما سويت عسل وسطول... غير المكسرات وغير طلبيات الأكل والبارسلات والمشروبات والحلويات اللي توزعت :)

بلوي.. مشكورة حبوبة تسلمين


كيوت قطري.. شكراً يالغالية كلش ذوق

ياسمينة رقية.. هلا خيو.. شحواليش :D إن شاء الله زينة :D عليش بالعافية والله يخليش مشكورة الغالية والله يسهل لش وتتوظفين


دنه الدلوعة.. تسلمين خيو والله يبارك في حياتش ويسعدش.. وفعلاً كل دولة وعاداتها تختلف عن الثانية :)

الأخت روح مغليها.. تسلمين خيوتي.. القماش ذا متعارف عليه عندنا دوم يزينون به البيوت في الأعراس والاحتفالات.. ونسميه سناح.. يعني هو شي ضمن العادات.. وعشان جدي استخدمته :) وعلى فكرة هالقماش يأجرونه لأنه مطلوب للمناسبات

قمر صحار.. مشكورة خيو تسلمين وما تقصرين وكلش ذوق... جاني احساس انش تعرفيني! مادري ليش!!


ملاك وعنوان الأنوثة.. تسلمون والله يخليكم ويبارك في حياتكم... كلكم ذوق

غزالة الفريج.. تسلمين حبيبتي.. وسوي لش بالحنة عادي

هندم وشوشو.. تسلمون حبيباتي.. والله يوفقكم ويسعدكم

منوري تسلمين خيو والله يوفقش ولا تقولين عن روحش جدي

جناوي.. تسلمين حبيبتي.. والله يوفقش ويسعدش.. وهذي شهادة اعتز فيها.. ولولا الأذواق لبارت السلع :)

Blo0owi;5618693:

السلام عليكم ورحمة الله وبركاته

شغلج وايد حلو ومتعوب عليه ... والله يعطيج العافيه

................بس عندي ملاحظـــــــــــــــه..................

فكرة الشجره : مش كأنها مثل شجره الكرسمس وهذي مش من تقاليدنا ود يــــــــــــــــنا ...
فكرة البيض الملون : هذا عيد الفصح عند المسيحيــــــــــــــــــــــــــــن ...
فكرة وضع القرآن حوالينه الشموع ..........الخ ...... مثل الديانات الثانيه لما يحطون صور موتاهم او كتابهم وحولينه هذي الاشياء .......

اتمنى كل وحده تنتبه لهذه الاشياء قبل عملها .... لان في يوم بيتحاسب عليه الواحد جدام رب العالمين .....

واسمحيلي

اخوات في الله

حبيبتي .. دعينا لا نخلط الأوراق ..

سفرة العقد هذه مقتبسة من عادات وتقاليد الإيرانين وهي من مئات السنين وليست وليدة هذه الأيام

المنظرة وحوالينها الشمعة .. أغلب الناس بديكورات بيتهم يحطون منظرة وشمعدانات .. وبالسفرة لأن قديما في إيران يسمحون للشاب برؤية عروسه عن طريق المنظرة .. لأن غير مسموح الجلوس لوحدهم أو رؤيته لها بخلوة والبنت تكون بوضع الخجل .. وأما القرآن وبجانبه شموع فلا تعليق على ذلك .. غير ان القرآن تحل به البركة والشموع فقديما ومن ايام الرسول صلى الله عليه وآله كانوا يقرأون القرآن تحت ضوء الشموع ..

بينما اليهود .. شمعداناتهم بقاعدة واحدة تتفرع منها ثمان شموع ..

أما البيض .. فهي أيضا عادة جداااا قديمة .. قبل أن يكون هناك عيد الفصح لدى المسيح .. وأتصور البيض متواجد في كل بلد مسلم وغير مسلم .. وتلوينه مجرد ليعطي جمالية ومنظر..

نأتي للشجرة .. شجرة الكرسمس يختلف مضمونها وفكرتها كلياً .. بينما هنا هي فقط ديكور ولا تسمى شجرة لأنها دون أغصان وشكلها يختلف عن شجرة المسيح ..

في سفرتي قد قمت بعمل أغصان ملتوية ويتدلى منها التوزيعات .. وأحد معارفي قد أعطت ما يشبه ملاحظتك أيضاً .. ولا أدري على أي أساس تبنى هذه الأفكار ..

وهناك تقاليد تتبع السفرة وهي ليست فقط شكل .. وهي مجرد تقاليد إن قامت بها العروس كان بها وإن لم تقم بها فليس هناك ضرر ..

هنا فقط توضيح حتى لا يختلط الأمر وتحسبوا أنه تقليد أعمى أو ما شابه .. وأكيد لن يقوم أحد بعمل شئ إلا وهو متيقن بأنه لن يحاسب عليه في يوم لاينفع فيه مال ولا بنون ..

وأتمنى أن تتقبلي توضيحي برحابة صدر :)

ماشاء الله حركات حلوه

الله يوفقكم ويسعدكم

^_^