ولدي والربو ...طالبة مساعدتكم لا تردوووووووووني

ياااربي

طيب وديه لدكتور ثاني
يختي كثيره الادويه الي كاتبهااااااا لكم وديه لدكتور اطفال يكون استشاري وفاهم

انصحك بالعسل الابيض الخفيف مو العسل العادي لا العسل الابيض ولازم تعرضيه على استشاري شاطر احسه صغير على هالادويه والله
في دكتور بجده اسمه طارق العراقي ممتاااااااااااااااااااااااز والله لو تحبي اعطيك العنوان او رقم العياده

طمنينااا وش يسير معاك

[GLINT]شكرا اختي عيون وليد
والله انتي الوحيدة اللي رديتي علي....
هذا نفس الكلام اللي اقوله حق زوجي هذي الادوية مررررررة قوية عليه , راح اجرب العسل الابيض وانشا الله يستفيد ونرتاح من هم الادوية الكميائية
شكرا عيون وليد مرة ثانية على المرور ...[/GLINT]

السلام عليكم و رحمة الله تعالى و بركاته،

مرحبا أختي أم عيالها .. بس لا تخافين إن شاء الله ماعليه شر .. أنا أكلمج عن خبرة طويلة مع الربو ويا عيالي إثنينهم .. ولدي الكبير عمره ألحين 6 سنوات و بدأت عنده أعراض الربو من هو عمره سنة تقريباً و لفيت على كذا دكتور معاه كل مرة أواصل لفترة و أشوف حالته ما تتحسن وايد و لا تستقر فأتملل و آخذه لعند دكتور ثاني لين ما الله هداني و خذيته لعند دكتور ما شاء الله عليه وايد شاطر في البحرين إسمه د. نادر ديواني .. كنت أسمع وايد ناس يمدحون فيه بس لما بديت أروح عنده عرفت السبب ما شاء الله و الله يوفقه يا رب ..

و ولدي الثاني عمره سنتين و بدت عنده الحالة من عمر 6 أشهر تقريباً .. و حالياً أشوف معظم الأطفال عندهم ربو الحمد لله و الشكر لله .. الله يحفظ عيالج و عيالي و كل عيال المؤمنين يا رب

المهم نرجع لموضوعنا .. بالنسبة للأدوية أنا إستخدمت حق عيالي إثنينهم combivent إللي قلتي عنه و أحطه في مكينة البخار و أخلطه مع نص إنبوبة من السلاين (normal salaine يجي في أنابيب صغيرة مثل عبوات الـcombivent) .. و ممكن أستخدمه في اليوم قد ما أبي .. لين حالتهم تعبانه تصل عدد المرات إللي أستخدم البخار حوالي 6 مرات يومياً إلى أن تهدأ حالتهم بعد يومين أو ثلاثة فأقلل عدد المرات إلى حوالي 3 مرات و لمدة حوالي 3 أيام و عادةً بإذن الله تروح منهم الحالة لفترة .. بس بطبيعة جسمهم الحساس ترجع لهم الحالة بعد فترة .. و عشان نباعد بين الفترات يحتاج المريض إلى دواء للوقاية .. في أدوية متعددة منها شراب و منها بخاخ و منها حبوب و منها قرص للإستنشاق (هذا مخصص للكبار) أنواع وايد بس لازم الطبيب المختص يحدد لج النوع و الجرعة المناسبة لولدج .. و هذه الأدوية تستخدم لفترات طويلة (عدة أشهر) و لازم تحت إشراف الطبيب و إن شاء الله لما تستقر حالة المريض يبتدي الطبيب يخفف الجرعة من دواء الوقاية أو يوقفه و يراقب المريض و إذا لاسمح الله عاودته حالة الربو فهانك إجراءات أخرى .. ممكن الطبيب يكرر الأدوية نفسها أو ممكن يغيرها حسب ظروف الحالة

الخلاصة إن مرض الربو يحتاج إلى علاج طويل الأمد و تحت إشراف طبيب متخصص في هذه الأمراض مو أي طبيب .. بس مو معنى هذا إن تخافين .. ترى هالمرض عادي و مثل ما قلت لج وايد أطفال يصيدهم ربو و يقولون إللي يصيده و هو طفل أحسن من إصابة الكبار به .. لأن الأطفال بعد فترة من العلاج عادةً تستقر حالتهم و يصيرون يقدرون يقاومون المرض و يوقف عنهم .. لكن الكبار يكون عادةً عندهم المرض مزمن و ما يروح بسهولة

أهم شي الصبر على العلاج عشان تساعدين طفلك إن تستقر حالته ..

و بقول لج على شي أفضل من البخار إسئلي طبيب ولدج عنه .. في combivent بس على هيئة بخاخ أنا حطيت لج صورته بس كأنها مو كلش واضحة إذا حصلت صورة أوضح راح أضيفها بإذن الله..



و لأن الطفال ما يعرفون يستخدمون البخاخ فلازم تحطين فوهة البخاخ في إنبوب يسمونه holding chamber و هذا الإنبوب في نهايته قناع ينحط على وجه الطفل على أنفه و فمه .. ميزة هذا الدواء إنه يحتاج تخلينه كل مرة على وجه الطفل لمدة نصف دقيقة و تكررينها ثلاث مرات .. يعني تشيلين البخاخ و ترجينه و ترجعين تركبينه في الإنبوب و تضغطين عليه بخه وحدة بس و تخلين الطفل يتنفس الدواء لمدة نصف دقيقة و بعدين تشيلينه مرة ثانية و ترجينه و تكررين السالفة ثلاث مرات و بس يعني كلها مدتها ما تحتاج دقيقتين و هذا أكيد أقصر من وقت البخار بكثير و بعد بتتخلصين من صوت مكينة البخار المزعج بالذات في الليل .. و البخاخ له نفس مفعول البخار و ممكن تستخدمينه بنفس عدد مرات البخار يعني حس ما يتطلبه وضع الطفل ممكن تصل إلى 6 مرات في اليوم

طبعاً هذا هو الدواء الأساسي لعلاج نوبات الربو عند الطفل و أنا دكتور عيالي واصف لهم بعد دواء إسمه دايمتاب



العلبة شوي مختلفة عن الصورة بس هذه أقرب شي شفته .. هذا الدواء ممتاز و سريع المفعول جربي سألي الدكتور عنه

أي معلومات أكثر تحتاجينها أنا حاضرة إن شاء الله

و سلامته أختي و ما عليه شر إن شاء الله

بالنسبة للـ holding chamber فإن شاء الله بحط لج صورتها بعد شوي لأن عندي موقعهم الإلكتروني في البيت و بتأكد منه و بحط لج الصور بعد حوالي ساعة إذا ما كان في عندي مشاكل مع الإنترنت في البيت

يسلموووو عيوني ام سلمان
ربي يطولي عمرج ويخليج حق عيالج يارب
د.نادر في اي منطقة في البحرين يا بنت ديرتي ؟؟؟
تسلميييين على المعلومات المفيدة
ونخدمج في الافراح يارب.

السلام عليكم و رحمة الله تعالى و بركاته،

هلا أختي .. د. نادر ديواني موجود في العيادات إللي فوق رويان إللي في البديع .. و لازم عشان تروحين له إنج تاخذين موعد و تروحين على الموعد بالضبط لأنه ما شاء الله دقيق في مواعيده عشان ما تنقعين و لا تنقعين أحد غيرج .. و يعطي لكل مريض حوالي نص ساعة يفحصة من راسه لأصابع رجله و يعطيج على راحتج من الأسئلة إللي تبين تسألينه .. يعني ممتاز حق الأمهات إللي يخافون على عيالهم و مهووسين بهم .. إتصلي بالعيادة و خذي موعد و لا تستصعبين السالفة و صدقيني إن شاء الله بترتاحين في التعامل وياه و ولدج بعد إن شاء الله بيرتاح معاه و بيخف إن شاء الله

بالنسبة للـ holdimg chamber هذه صورتها ...




و طمنينا على ولدج .. و ما يشوف شر إن شاء الله

تسلمين ام سلمان
وشكرا على المعلومات
وانشا الله اطمنكم على الولد

الله يعطيج العاقية اختي
حبيت اشارك معاكم انا بنتي منذ الولادة فيها الربو إلى الآن عمرها ثلاث سنوات دايما استخدم لها الفلكسوتيد والفانتولين الاول وقائي طول العمر مرتين في اليوم حسب وصف الطبيب والثاني عند حدوث الازمة واحيانا احتاج لماكينة الصد

سوري اقصد ماكينة الصدر