صديقتي ما تستحي ومايشرفني تكون صديقتي

و يوم قالتلي انها متزوجه تميت فتره ما اكلمها وبعدين كسرت خاطري ورجعنا صديقات


<<<<<<< خاطرك ما ينفعك بكرة ان طحتي بمصيبة بسببها وفي مثل يقول : قل لي من تصاحب اقل لك من انت ... والناس مالها الا الظاهر والراضي كالفاعل في نظر الناس

يعني دامك تدرين عنها ومازلتي مصاحبتها كأنك بنظر الناس راضية باللي تسويه وعاجبك

حبيبتي الزم ماعليك سمعتك واسمك واسم اهلك ترى البنت سمعة..

واللي راحت تزوجت عرفي هذي بايعة نفسها ومامنها رجا .. وعلى فكرة الزواج العرفي باطل وحكمه حكم الزنا

(انك لاتهدي من احببت ولكن الله يهدي من يشاء)

وجودك معاها ماراح يغيرها لو رب العالمين ماكتب لها تتغير..نقذي نفسك وسمعتك وابتعدي عنها..واذا كنتي تحبينها ادعي لها بس وانتي بعيدة..

والله عطانا العقل علشان نميز فيه بين الصح والغلط ودام فلان وعلان يمسكك وينصحك معناتها البنية ريحتها فايحة ولا تخلين هالريحة تمسك فيك بكرة تندمين ولا ينفعك الندم..

هذا نصيحتي اختي وانتي عقلك براسك تعرفين خلاصك

لا حول ولا قوة إلا بالله
الله يهديها
والله يوفقج ويسعدج دنيا وآخره

حبيبتي بدون تفكير قطعي علاقتك فيها بس بدون ما تزعلينها منك خليني اقولك كيف نصحيها
وبيني لها وش كثر انتي تحبينها وقولي لها بعطيك فرصه تغيرين من نفسك وخلقي اي عذر انه
مثلا حد من اخوانك عرف عنها وعصب عليك ومنعك من انك تكلمينها لحد ما تعدل من نفسها

لاني بقولك سالفه صارت معي كانت عندي خويه ماتتخيلين وش كثر تحبني وكانت تكسر خاطري
وكانت مرة متدينة وملتزمه وفي يوم الفت لي قصه ماصارت ولا استوت وتقولي انا حامل بسم الله
هاذي الملتزمة اللي مايبين منها شيء واشوي فلان اتصل لي وفلان ارسلي صورته وكلهم بيتزوجونها
كنت حاسه انها محتاجه حنان باي وسيله

انا قلت يمكن تمزح على موضوع الحمل وماصدقت لكن اشوف حالها متغير وتعبانه وتبي ترجع كل اشوي
وسمنت وبعين قويه دخلت في الشهر الرابع واهلها ما يدرون واقولها وين الرجال تقول ماابيه وماقلت له

وبعدها جابت لي رساله مرسلها لها يعتذر ويقول لها لازم نصلح الخطأ

انا كنت مبهرة ومصدومه بس كسرت خاطري وكتمت هالشيء وحاولت اساعدها بعدين
الفت لي قصه ثانيه انها سقطت وبعدها كانت خايفه تتزوج وتبي تسوي عمليه

وانا خلاص كرهتها هاجمتها وقلت لها لا تدقين علي وشرشحتها ومن هالكلام

والله مااكذب عليك انها ذخرتها لي وردتها بصفعه ما تتخيلينا وكانت بتخرب مستقبلي
وانظلمت جد بسبب المشكله اللي سببتها لي لحد ماظهرت مظلوميتي واخذت جزاها

وكلمت اهلها وابتعدت عنها نهائي الحمد لله

فرجاءا لا تعنفينها لانه هالاشكال انتقامهم صعب

حاولي تبعديها عنك بدون ماتكرهك

وعندي خويه والله ملتزمه بس في مره طلعت مع بنات مو اوكيه شافها واحد بيخطبها معاهم والغى الموضوع بكبره وسمعها كلام جارح ما تتخيلينه وكرهت نفسها جد سمعة البنت كل شيء

الله يستر علي جميع بنات المسلمين

سمعيني يا اختي ... راعي الطبع ما يصبر عن طبعه ...

وانتي بنت اوادم اليوم تمشين وياها باجر يوصل الخبر عند اهلج واخوانج والله بنتكم مرابعة وحدها استغفر الله ريحتها فايحة .... السموحة على هالتعبير ....

الشي الثاني بقولج اياه ... تراه الساكت عن الحق شيطان اخرس .... وربي لو منج بهددها وبقولها بخبر عليج اهلج ... وذكريها بقصص وايد قوليلها شوفي فلانة يوم سوت شو عاقبها رب العالمين .... وذكريها بالموت وذكريها بقصص تخليها مو بس تخاف الا ما ترقد الليل ....

غير جي انصحج نصيحة والله ... ابتعدي عنها لا تقولين ارحمها لا ... احسن الحين تبتعدين عنها ولا عقب ترى ليمن يطيح الفاس في الراس حزتها ما ينفع شي ....ارحمي عمرج ولا تخلين الناس تتكلم عنج ..... وترى يقولون (قل لي من صديقك اقول لك من انت) ....

الله يبعد عنج بنات الحرام وعيال الحرام .... وفكري فيها اللي ما سوت قيمة لاهلها استحالة تسوي قيمة لغيرهم .... وصدقيني اللي مافيه خير لاهله مافيه خير للناس ....

وانتي وراج مستقبل ووراج زواج وخطبه .... وبيسأل عنج اللي بيخطبج قبل لا يتقدم .... والله الموفق ....

السلام عليكم ورحمه الله وبركاته ...

اختي ..... الاخوات ماشاء الله تبارك الله ما قصرو ,, انا بعقب على شي واحد .. أنتي كاتبه العنوان صديقتي ما تستحي وما يشرفني تكون صديقتي ..

لمه قريت العنوان ضنيت انج تاركتها ... بس لمه انتي من الاساس ان ما يشرفج تكونين صديقتها ليش انتي معاها ؟ ولا حاطه العنوان لفت نظر .... ولا عشان تبين نصايح وانتي تعرفين الصح من الغلط وفي اشياء ما له داعي الواحد ينتظر احد يقوله .. عيب بابا لا تسوي جذي ... يعني انتي موظفه وكبيره وفاهمه ...

اول خطوه عشان الواحد يغير من نفسه ان ما يستجدي عطف الاخرين وانتي تبين شنو بالضبط دام انج عارفه انها ما تشرف ؟ شنو تنتظرين بالضبط من الاخوات ... ان يمسكونج من يدج ويقولن عيب ماما لا تسوين جذي
عجيب امر بعض البنات ..
صراحه
تحياتي
ام جنى

عفاري يمكن هي تعاني من مشاكل في حياتها العائلية

لانه ما يلجأ لهل الطريق اللي الشخص الناقص

لا تقطعين علاقتج بها بشكل نهائي

لكن حطي حدود .. وخليها رسميه لأبعد حدود

وبيني لها ليش انتي جـذي تغيرتي عليها مره وحده

وحاولي انج تاخذين بيدها وتكسبين اجرها

والله يستر عليج وعليها وعلى جميع بنات المسلمين

الله يهديها ويبعد الشر عن كل مسلمه لكن عزيزتي ابتعدي عنها افضل لك

اختي اقولج اتركيها ..

البنت سمعه..

ماتدرين بعد الله يعلم يمكن تضرج هاذي..

اصلا ماتدرين يمكن تكلم الشباب باسمج ...

توكلي على الله واتركيها ..

حبيبتي اذا انتي ماعندج هالسوالف ليششششششش تمين عند وحده من دوووووووووون حياء؟؟؟؟؟؟

انا اقولج ومن دون تفكير ابتعدي عتها

وتفاحه الفاسده تفسد اللي معاها وعذريني عاد

من رأى منكم منكرا فليغيره بيده، فان لم يستطع فبلسانه، فإن لم يستطع فبقلبه، وذلك اضعف الإيمان... صدق رسولنا الكريم... يا حبيبتي انتي حاولتي بهالطرق كلها، ليش تقولين ما اقدر اخليها؟؟ كفاية انج حاولتي فلا تتمين معاها، ترى هالاشكال ممكن تجرج معاها باي طريقة...
زوجي قال لي قصة وحدة والله تكسر الخاطر، بيتقطع قلبج عليها لو سمعتيها... كانت محترمة حتى ان القسم كااااامل معاها في الدوام ما يعرفون لا اسمها ولا صوتها ولا شكلها، بنقابها تجي الشغل وتخلص شغلها وتطلع... حاولوا معاها عيال الحرام واااااايد لكن بدون فايدة، لانها ما شاء الله عليها قمة في الدين، ولكن فجأة شافوها قامت تطلع مع الشباب وراحت فيها البنت... واكتشفوا بعدها انها مسحوووووووووووووووورة، ما قدروا عليها فسحروها بسسسس علشان يدمرونها...
يا حبيبة قلبي، حاولي تبتعدين عنها قد ما تقدرين علشان تتقين شرها، وانتي اللي سويتي اللي عليج والله شاهد على هالشي وما راح يحاسبج لانج هديتيها،، وما تعرفين وشو اللي ممكن يجي منها بعدين... والله يهديها...

لا حول ولا قوة الا بالله

البدايه الغاليه من كلامج انه البنت تغيرت من الاحسن الى الاسواء
معناتة انه الغلط من البيت اكيد في واحد من بيت البنت يلعب بسمعه البنات
ومثل ما تدين تدان...

ثاني شيء اتوقعه انها ممكن انجرحت وقاعده تعاقب نفسها وهي بداخلها تقول
راح اقهر الشخص الى جرحني...

ثالث شيء وهو الاكيد انها قبل وبعد الزواج العرفي انخدعت والله يكون فعونها


بس اسمعها مني خلي علاقتج فيها بسيطه السلام عليكم وعليكم السلام
ولاتنسى يالغاليه الصاحب ساحب اوكيه حبيبتي....


والله يستر عليه وعليج وعلى جميع المسلمين والمسلمات

اللة يهديها يارب
كل اللي عليك أنك تنصحيها
وأذا ماطلعتي بنتيجة وكانت صداقتكم قوية هدديها بقطع علاقتك معها
وأذا ماأهتمت أخر الطب الكي أنتي أبتعدي عنها لأن الصاحب ساحب
ويمكن بكرة أذا فكر أحد يتقدم لك وعرف أنها صديفتك يمكن يبتعد عنك
اللة يستر عليك ويهديها

والله عفاري تترين انقولج ودريها........ شو تبين اكثر اذا الشباب ايوون يقوووولج هالكلام....

ابا اعرف منو تترين ايج يقوولج ودريها...

اقطعي علاقتج وياهااااااا حبيبتي...ترا الصديق ساحب. باجر من الملل والضيج الشيطان بيقص عليج ويخليج تمشين وراها...الله يحفظج

بس ودريها خلاص اقطعي كلشي من بينج وبينها حتى لو بدوون سبب...

قلنا ترمس ما عليه زواج عرفي وتتطلع من اول ما تتعرف عليهم عفاني الله هاي موول خلاص...استغفر الله

ودريها نصيحه لج الدنيا مامنها امااااااااااااان احنا الاهل ما نامنهم وين الربع

السلام عليكم
أختي أنا مع البناات أتركيها والله يهديها
لكن أنتي هيك بتتأثر سمعتك أبعدي عنها أحسن لك واتقي شرها
وادعيلها بالهداية هيك بتكوني عم تعملي شي تساعديها بدون ما تتأذي انتي
دعاء المسلم في ظهر الغيب مستجاب
والله يختار لك الخير وييسرلك أمورك

صدى الامارات فديتج .. البنت من اول ما عرفتها وهي مغازل وشباب بس في الفتره الاخيره زاااادت بشكل جنوني _ تخيلي مره قتلها يا فلانه شو رايج تبدين صفحه يديده خلاص.. قالتلي انا ما اقدر اعيش بدون شباب .. تخيلي ؟؟

وانشالله راح احاول ابتعد شوي شوي الين ما اتحس لان بصراحه استحي اقوللها بقطع العلاقه صعبه شوي :(

ثاني شيء اتوقعه انها ممكن انجرحت وقاعده تعاقب نفسها وهي بداخلها تقول
راح اقهر الشخص الى جرحني...

صدى الامارات >>>>صح هاللي صار

حبيبتى لازم تبعدى عنها

الله يبعد عننا وعنك شر الانس والجن

أختي ابتعدي عنها أفضل وكما قال الرسول الكريم عليه الصلاة والسلام: المرء على دين خليله

والأفضل أهلها يعرفوا باللي بتعمله

الصاحب

ساحب

حطي هالشي ببالج ولا تقولين تكسر خاطري

الواحد اللي عنده عقل يعرف دربه


انتي بمكان عمل معاها العين كله عليكم فديري بالج

رايح يقولون دام هذي رفيجتها اكيد اهي مثالها دام انها اماشيتها