عشت بوهم وعيشت غيري معاي

السلام عليكم

شحالكن خواتي عساكن بخير

في البداية حبيت أشكر كل أخت عزيزة علي مرت على موضوع ودعت لي
وإن شاء الله يا ربي ينول حق كل وحده الي بخاطرها

وكان هذا رابط الموضوع
http://www.3roos.com/forums/t315099_3.html

ثانيا اسمحولي أكتب لكم الي بخاطري وراح أطول عليكم وتحملوا كلامي

اليوم مثل ماقلت لكم كنت ناويه أحلل دم بس للأسف يتني الدورة الصبح
ماتتخيلون الصدمة الي عشتها لدرجة اني تميت اروح وارجع الحمام الله يعزكم أكثر من مره
قلت يمكن كنت أحلم والا غيره ...

راح أقول لكم قصتي الي صارت بس أمس ...كنت أتريا ريلي يرجع من الجامعه بالليل
عشان يتعشى ويرجع مره ثاني الدوام بس قبل لا يروح قلت له أني بروح بيت أهلي
وانا من يوم الخميس ما انام بالليل من كثر ما راسي يعورني الم فظيع
وانا من العادة اذا بتيني الدوره لازم راسي يعورني يوم وباليوم الثاني تنزل

أمي يحليلها كنت يوم الخميس عندهم وكنت تعبانه حيل على اساس ان الدوره بتيني وكانت هذاك اليوم متاخره يومين ...بعد مارجعت بيت زوجي لهالساعه الي قاعده اكتب موضوع تتصل تطمن علي تقولي يت او لا ...بيني وبينكم ماكنت ابي اعيشها بوهم وحلم وبنفس الوقت كنت مابي اجذب عليها مستحيل اجذب على امي ...وقلت لها اذا ييتكم يوم الثلاثاء بروح اسوي فحص دم لاني حيل تعبانه اكثر من قبل ....واختي الصغيره تقول مافيني صبر اذا رحتي دزي لي مسج بشروني لاني حاسه انج حامل ...

البارحه رجع ريلي متاخر من الجامعه و قالي ان خلاص هون بيروح الصبح لان الوقت متاخر
وشافني حيل تعبانه وكان يبي يودي المستشفى اساس راسي يسون لي اشعه قال انتي من يوم الخميس وراسج يعورج ..وانا اتحايل عليه مابي اقول له ...وهو مصر واخر شيء قلت ان آلام الراس من الدوره والدوره متاخر للحين ( هو حافظ تاريخ موعدها يحليله ) قال يمكن في شيء
قعدت اضحك قلت له ما اعتقد قال خلاص انتي مو باجر بتروحين عند اهلج روحي سوي فحص دم
( ما ادري كيف حس اني مخططه على هالشيء ) قلت له ان شاء الله ...

كنت مخططه اذا طلعت حامل اروح اشتري له هديه واسوي له مفاجئه ...

بالليل ما قدرت انام من الالام الفظيعه بالراس واخر شيء غفيت ونمت الساعه 3
والله ما اجذب عليكم كله احلم اني اسوي فحص واطلع حامل

قمت الساعه 5 وعيت ريلي عشان يتزهب للاصلاه والدوام وقعد يحاول يوديني هو المستشفى وانا مو راضيه ...

بعد ماراح قعدت شوي ورحت اتسبح وصليت ورجعت انام ...يتني عمتي عشان تطمن علي لان اهو قالها اني تعبانه وبروح بيت اهلي على ااساس عمي بيوديني .. بعد ماراحت عمتي عني نص ساعه ويتصل ريلي كانت الساعه 10 عشان يطمن يحليله ..لان من كثر آلام الراس كان ويهي حار وأحمر يزيغ
انا اكلم ريلي كنت حاسه ان الدوره تنزل وهو يقولي لو سويتي فحص عطول بشريني وانا اضحك عليه وبنفس الوقت خايفه ان الدوره يت ...صكرت عنه رحت الحمام صدمه

اول شي ما استوعبت طلعت قعدت شوي استوعب ورجعت مره ثانيه وثالثه اخر شيء
قعدت اصيح منهاره خلاص تعبت ...كل هالتعب والتاخير واخر شيء الدوره يتني عقب قعدت اقول حمدلله ما انا خلاص تعودت على هالوضع ...مو اول مره تيني الدوره ولا اخر مره
بس الي حز في خاطري زوجي وامي واختي الي عيشتهم بوهم وقاعدين يتريون هالحلم الي مستحيل يتحقق الا بيد رب العالمين...
قعدت اصيح وقلت خلاص مابروح بيت اهلي وبدز مسج لريلي عشان ما يسالني بعدين ليش مارحت المستشفى لاني وعدته اروح ...دزيت له مسج

آسفه ...... لأني عيشت بوهم وحلم
ما كنت أقصد ،، وخلاص يتني الدوره
وما بروح المستشفى لان راسي كان يعورني بسببها
والسموحه مره ثاني

رد علي بمسج فرحني وبنفس الوقت كسر خاطر

عادي ... الي أيي من الله حياه الله
أهم شيء أنتي بخير.. وروحي بيت اهلج عشان تنسين

رجعت أصيح من الضيقه الي فيني .. كنت محتاجه احد يواسيني
اتصلت في أمي الله يخليها لي وقعدت تواسيني وتهديني


بنات أنا من بدت تيني الدوره من أيام المراهقه ليومكم عمرها ما تأخرت بهالشكل
بس مره بشهر 12 تاخرت 5 لان كنت اخذ ابر وحبوب
وهالمره هي ثاني مره انا ماكلت شيء ولا سويت شيء عشان تتاخر 7 ايام
حرام عليها والله

كنت ودي أسعد ريلي واهلي
كنت ودي افتك من كلام الناس
كنت ودي أملي حياتي وبيتي بياهل يونسني

لكن كل شيء بيد رب العالمين
بيده الأخذ و العطاء والرزق
ويارب ترزقني وترزق كل محرومه عاجل غير آجل

والسموحه خواتي طولت عليكن هذه بس مجرد قصه لمعاناتي ليوم واحد
لو أقول لكم معاناتي الي صارت قبل من ايام الزواج راح تعذروني
آسفه حبيت اطلع الي بخاطري بس
وتحملوني