تعااالو اكسبو اجر الله فيني .... :(

انا ما عندي كلام اكثر عن خواتي اللي قالوه بس ما دام انه في شي داخلج وحابه تغيرينه بس مش عارفه كيف صدقيني اعتمري والله انها تغير وااايد اشياء في النفس واكثري من الدعاء هناك حبيبتي والله عفو كريم صدقيني بيقبل دعائج واطلبيه في البيت الحرام اوثقي فيني استشعري وجوده والله بيسهل عليج وبعدها ما فيه حد بينزعج منج وامج بترضى عليج الغاليه

حبيبتي من اول بشاير الخير،، انج كتبتي هالموضوع ،، وهو دليل صااادق على ان ان شاء الله راح تحافظين على صلاتج،،،

طبعا الاخوات ما قصروا بنصايحهم طبعا انتي مب محتاجه لتعرفي اهميه وفضل الصلاة وعقاب تاركها،، الخ
لانج تقرين كتب والحمدلله

انت محتاجه لنظام او مثل جدول او طريقه مدروسه تسوينها ،، لجل تصلين كل يوم وتحافظين على الصلاه،،

خذي عهد على نفسج انج اول ما تسمعين الآذن على طول الى الحمام تتوضين ،، وعلى طول على سجادتك+ دائما ادعي في صلاتك ان الله يساعدك على المحافظة عليها وخلي امك تدعيلك بعد ،، وان شاء الله راح تقدرين

ممكن بعد على سبيل المثال يكون لج دفتر يوميات تكتبين فيه انجازك،، مثلا تقولين:: اليوم لقد تغلبت على الشيطان وصليت جميع الصلوات في وقتها والان اشعر بسعاده غامرة،، و زاد قربي اللي الله وهكذا

وممكن تعملين على مبدأ مكافاة نفسك ،، ممكن توعدي نفسك بعد شهر اذا شفتي روحك صليتي كل الصلوات تمام التمام ،، انج تشترين لج شي حلو ،، حلاوة شوكليت عروسه موبايل اي شي ،، ترى مو عيب، وبهالشكل راح تتعودين ،،، لان مثل ما قلت لج انتي الخوف من الله عندج بس ناقصج حد يقولج بطريقه تعودين فيها نفسك على هذا الشي،،


يا حبي لو تعرفين انا عندي مشكله في الصلاه ،، مب اني ما اصلي لا لا ،، مشكلتي هي الوسواس في الصلاه يعني تجيني افكار مو زينه وقت الصلاه ،، الخ ،، لكن بالرغم من ذالك اضغط على نفسي واصلي ،،

ف يا حبي الموضوع سهل جدا جدا جدا ،،،


واي خدمه لا تتردي بسؤالي او سؤال الاخوات،، وبشرينا،، ودعواتي معك

حبيبتي هذا الشي بيدك انتي

انتي الحين تحتاجين القرب من الله


اكثري من الاستغفار والدعاء وصدقيني بكثرةا لاستغفار والدعاء بتقدرين تتغلبين على الشي اللي فيكي

لان هذا شيطان ويلعب عليكي ويمنعك

انتي تعوذي من الشيطان ولمن تسمعين الاذان وتبغين تصلين قولي في نفسك يارب اني اشتاق اليك

وسمي بالله واتوضي وصلي وخلي تفكيرك كله في ربك


ولاتنسين اللي وصيتك عليه

والله يهديكي يارب وينور طريقك ويبعد عنك كل شر

السلام عليكم و رحمة الله تعالى و بركاته،

أنا بقول لج قصتي الشخصية .. أعرف بشنو تحسين لأني بدون فخر و للأسف مريت فيه بفترة من حياتي .. الصراحة أستحي من ذيك الفترة من حياتي بس بقول لج عنها يمكن يكون فيها حل و راحة لج .. أنا كنت مثلج .. بنت مؤدبة و من عيلة و عايشة في حالي و دايماً أحاول أرض أهلي و كل شي فيني تمام .. لكن ما كنت أصلي و ما كنت متحجبة .. ما كنت مستهترة و كل لهوي كان بريئ .. يعني أقضي وقتي في البيت مع أخواني أقرأ قصص و مجلات .. أسمع أغاني و أتفرج على التلفزيون .. أكلم صديقاتي مهما سمعت منهم عن مغامرات أو حركات طيش صغيرة و لا كبيرة ماكنت أقلهم أبداً .. كنت عارفة حدودي و حريصة على كوني بنت مؤدبة و ما أبي أخذل أهلي .. لكن كان شي في داخلي معذبني و أخاف أفكر فيه .. كنت عارفة إني ما أصلي و في نفس الوقت أبعد عن بالي أي أفكار تجيني من هالناحية من خوفي من ربي .. أعرف إن الشي إللي أسويه غلط و عارفة إن إستمراري عليه يعني غضب رب العالمين علي بس لا إللي أستعيذ من إبليس و أروح أصلي و لا أفكر في حالي و العذاب إللي راح يطالني لا محالة من جراء إهمالي لصلاتي ... كنت أصلي بس إذا جت جدتي و باتت عندنا لأني أعرف إنها راح تسألني "صليتي؟" و لأني ما أكذب فعشان أقول لها إي صليت كنت أصلي .. بس في غيرها من الأيام نادراً إللي أصلي .. يعني في بعض أيام رمضان و لما أكون مع بنات ملتزمات ..

بتسأليني وين و متى و شلون صار التغيير .. بقول لج الموضوع يبي له عدة أشياء عشان ينجح .. خل أكمل لج قصتي و بعدين أفهمج ..

مرة كانت أمي مسافرة و تاركتني و أخواني مع أبوي .. أعتقد إني وقتها كنت في بداية المرحلة الثانوية .. حسيت إني وحيدة و خفت شوي .. أنا أكبر أخواني و بيني و بينهم فرق في العمر .. 4 سنوات مع إختي و 5 سنوات مع أخوي .. و لما وصلت للمراهقة و هم بعدهم في الطفولة ما كنت أنسجم معاهم وايد .. بس في نفس الوقت حاسة إني مسأولة عنهم لأن أمي ما كانت معانا .. و في ذاك الوقت برغم حنان أبوي و حبه لنا لكن ما كنا من النوع إللي نتكلم مع بعض وايد أو نتناقش في أي أمور و كنت متعودة إن أي شي أبه أقول لأمي عنه .. المهم إني حسيت بأني وحيدة شوي و حسيت بالخوف شوي .. عشان أتغلب على خوفي قمت أصلي .. و لما شفت نفسي أصلي و أنا وقتها كنت كبرت و بلغت قلت خلاص .. أنا هالصلاة ما بتركها يعني ما بتركها .. لين متى بظل خايفة و أحاتي .. صدق إني كنت أحياناً أجمع صلوات يوم كامل من صلاة الصبح إلى صلاة العشاء و أصليهم قبل لا أنام .. يعني كلهم تقريباً قضاء .. بس بعد في نفسي كنت أقول ما عليه و لا إني أتركهم .. حيت إن نفسيتي تحسنت شوي .. بعدين صارت حرب الكويت و العراق .. خفت أكثر و حسيت إن الموت ممكن يكون قريب أكثر من ما نتصور .. قمت أحاول أجتهد شوي أكثر بس بعد للحين أخربط في الأوقات و أحب أشير إلى إني بعدي ما كنت متحجبة بس كنت أقنع روحي إني بنت محافظة و ملابسي مو فاضحة ..

المهم لما دخلت الجامعة الحمد لله تعرفت على بنات كانو مثلي .. مؤدبات و محترمات بس مومتحجبين .. لكن كان فيهم ميزة لا تقدر بثمن بالنسبة لي .. إن الصلاة لازم يصلونها في وقتها .. أنا في بداية الجامعة كنت أخلي صلاتي لين ما أرجع البيت بس بعدين لما تعرفت عليهم قاموا يسحبوني معاهم .. شوي شوي تعودت .. صارت السالفة سهلة بالنسبة لي .. حتى صلاة الصبح صرت أحبها لما تعودت عليها ..تقريباً راح الخوف من قلبي .. قمت أقدر أذكر الله تعالى .. كنت قبلها أخاف أذكره بسبب تقصيري و ألحين صرت أقدر أروح له و ألجأ له و أكلمه و أطلب منه .. ما عاد في الخوف من المواجه بقدر ما هي رهبة وجوده كخالق و إحساسي بالضعف و الحاجة إليه .. قمت أكلم الله تعالى .. تقريباً يومياً قبل لا أنام و أنا على سريري أذكر إللي صار لي طول اليوم و أكلم رب العالمين عنه و أشكره إذا شي حلو صار لي و أعتذر منه إذا غلطت و أطلب منه يعيني على إني ما أعود أسوي هالغلطة مرة ثانية .. كنت أناجي الله .. آه لو تعرفين هالمناجاة أي قد إنعكست آثارها على حياتي .. أحببت مناجاة الله و الكلام معاه بلغتي العامية العادية بدون حواجز و لا عوائق .. قمت قلت خلى بعد أقرأ قرآن .. كنت وقتها ما ختمت القرآن و لا مرة في حياتي .. كل سنة في بداية رمضان أقرأ شوي و أتركه بدون ما أكملة .. قلت في نفسي حتى لو الطريق طويل بقرأ كل يوم ثلاث صفحات بس .. فكنت أقوم لصلاة الصبح أصلي و أقرأ الثلاث صفحات بعدين أروح أذاكر أو أتفرج على التلفزيون أو أنام إذا كنت تعبانة .. صدقيني من يومها حسيت إن رب العالمين موفقني .. كل أموري تعدلت للأفضل ملايين المرات .. .. أنا كنت أشوف حياتي زينة و راضية بكل إللي عندي من رزق .. بس بعدين عرفت نعم من رب العالمين ماكنت أدري عنها .. كنت أحس برضا في نفسي و أحس بسعادة تغمرني طول الوقت .. المعلومات إللي كنا ناخذها في الجامعة كانت تدخل مخي بكل يسر و سهولة .. درجاتي صارت كلها إمتياز .. وزني نقص و أنا إللي كنت أعاني من السمنة .. صرت رشيقة .. لا وصرت محط أنظار الشباب :21_186: .. صاروا يجون عندي يحاولون يتوددون و أنا أطردهم .. شنو تبين أعدد لج الحمد لله .. و إن تعدوا نعمة الله لن تحصوها .. و تعرفين حتى علاقاتي مع الناس صارت أفضل .. كان عندنا مدرس يخوف محد يقدر يناقشه في شي صعب في التعامل معاه لآخر درجة .. تصدقين قدرت أكلمه وأتفاهم معاه .. لدرجة في مرة ماعطنا واجب و أنا سويته و خلصته بس المجموعة إللي معاي ترجوني أكلمه إن يأجل موعد تسليم الواجب لأنهم ما خلصوه .. رحت و قلت له .. في وقت المحاضرة قال لهم "الظاهر إن زميلتكم "فلانة" ولي من أولياء الله الصالحين" طبعاً قالها بمزحة لأني قدرت أخليه يأجل الموعد .. و أقول لج شي صار لي أكبر و أفضل .. حلم حلمته .. ما بتصدقين .. حلمت بشخص ما شفت ملامحة ماخذني و موديني مكان دخلته و كان المكان مثل البيت فيه بعض الأسطوانات أو الأعمدة إللي تكون موجودة أحياناً عشان ترفع سقف البيت و كان في غرفة على جنب مادخلتها بس سمعت صوت صادر منها .. صوت أحد يقرأ قرآن .. تعرفين كان بيت من و صوت من ؟؟ .. صوت نبي الله محمد (ص) و البيت كان بيته أو مسجده .. تصدقين لما دارت بي الأيام و زرت المدينة المنورة شفت المسجد القديم جهة قبر الرسول بالأعمدة أو الأسطوانات التي كانت هناك مشابه لما رأيته في الحلم بفارق إنه كان مافيه الزخارف و النقوش الفخمة الحديثة عليه .. هذا أغلى حلم حلمته في حياتي ولا كنت أتصور إن لي الشرف إني أحلم فيه

بعدها مو مباشرة لكن بعدها بفترة .. فكرت في نفسي .. قلت ربي عطاني كل شي حلمت فيه و أكثر .. من واجبي ولو عشان أقول له شكراً يا ربي إني أتحجب و أنا عارفة الحجاب فرض واجب علي لا محال .. ما إنتظرت لين ما أجهز لنفسي ملابس و قلت ما بتحجج بشي إللي يبي شي يسويه رأساً خصوصاً إذا الأمر يتعلق بتعديل شي غلط .. رحت و خذيت حجاب عندي كنت شاريته تحسباً لهذه اللحظة .. لبسته و طلعت من البيت و أنا لابسته .. و قيدت روحي فيه .. بس هالقيد إللي ناس يشوفونه قيد لو تعرفين أي قد حررني و أي قد حبيته .. خلاني أحس إني غالية مو أي أحد يقدر يشوف شعري و جسمي .. خلاني كنز مصان للإنسان إللي بيرزقني فيه رب العالمين و بيكون زوجي .. و منها ما أبي أحسد روحي بس توالت الأحداث لين ما وصلت ليومي هذا .. لو أحمد ربي ليل و نهار و قياماً و قعوداً و في مع كل نفس آخذه ما أوفيه حقه .. ما أكذب و أقول لج ما مرت علي مشاكل .. بس سبحان الله كل مشكلة كانت تواجهني أنا بنفسي أستغرب كيف تهون و تتيسر و أتحملها و ما أحس بآلامها مثل أي شخص غيري ممكن تصيبه هالمشاكل .. تعودت إني أترك كل شي على الله عز وجل .. هو من يقول للأمر كن فيكون .. و الحمد لله رب العالمين

أدري طولت وايد .. و صدقيني مو سهل علي أذكر أخطائي بس حبيت أساهم في توصيل أفكار لج يمكن تفيدج

و إذا تبين الخلاصة .. واجهي مشكلتك لأن الهروب منها يخليها أكبر .. و قاومي بكل الطرق .. حتى لو ما صليتي الصلوات في وقتها في البداية قاومي و رب العالمين بيسهل عليج لإن شاء الله .. و إحذري من إبليس و طرديه لأن أكيد بيحاول يثنيج عن محاولاتج .. و إختاري الرفقة الصالحة إللي يعينونج على هالأمر ..

بقول لج على شي بعد خلج على وضوء دائماً و أول ما تسمعين الأذان فزي و صلي .. لين كنتي على وضوء ما بيكون فيه تثاقل عشان تروحيت تتوضأين .ز و الصلاة في أول لحظات وقتها تكون وايد خفيفة و سهلة .. جربي و بتقولين قالت

البنات ما شاء الله ما قصروا... ولكني حبيت اضيف نقطة صغنونة ان شاء الله تكون مفيدة... عليج بالصحبة الصاااالحة اللي تعينج عالخير، والله انا ما عرفت الطريج السوي الا لما عرفت الصحبة الصالحة، والصديقات يأثرون واااايد، فاحسني الاختيار :)