بنات الامارات احتاج مساعدتكم ...

Pink Lily 12-02-2008 8 رد 337 مشاهدة
P
عرسي ان شاء الله قريب بس ايش المشكلة انه انا اول وحده من العائلة تعرس ومحد ابدا عنده خبرة .. وشكلي بطيح فيها :(
بس الحمدلله هالمنتدى ما قصر الله يخليهم البنات ما خلوا شي :) استفدت منه كثير الحمدلله ..

بس و الله مادري وين يأجرون فساتين اعراس !! يقولون بدبي والشارجة بس وين بالتحديد ماااعرف !! حتى مسكة الورد ما اعرف من وين يجيبونها !
عرايس الله يخليكم اللي من الامارات وتعرف تخبرني .. وعن اسعار التأجير بعد !
وعن الصالونات ... وين احصل احسن صالون في ابوظبي اقدر اسوي فيه تسريحة ومكياج يوم عرسي !
بعدني ما خلصت :o يعني بالمره اللي تعرف مصورة تصويرها فنان حق العرس !
وعن الكوشات الصراحة ماعندي فكرة عن اسعارها ! اللي تعرف حد يسوي كوشات حلوة وباسعار مقبولة تخبرني ...
سوري طولت عليكم بس و الله ما كتبت هالشي الا لاني صدق محتاجة لكم وانتو ما شاء الله اهل الخبرة :wink::D
P
وين ردودكم ياعرااااااااايس :( :( :(
P
up :(
ق
انا نفسج عروس .. و متوهقه شوي لووول

يعني لين الحين ماخترت الصالون ولا الكوشه ولا اي شي ..

بس اللي اعرفه عن اللي في بوظبي ..

1) تأجير الفستان .. اسمحيلي ماعرف ..
بس اعرف يفصلون في دبي في اروشي حلووه تصاميمهم ..

2) المسكه .. عندج اماني للزهور في النادي السياحي رووعه مسكاتهم و ترتيبهم للورود ..

3) الصالون .. مادري لو انتي تبين وحده اتييلج الفندق او وحده انتي تروحين لها .. ؟

4) الكوشات .. اماني يسوون كوشات .. بس الصراحه ماشفت كوشاتهم حق العرس ..
شفت كوشاتهم البسيطه حق الملجه و وااايد رووعه ..

اتمنى اني اكون ساعدتج .. و لو عندج اي سؤال .. ما يردج الا الكيبووورد ^^

و ربي يوفقج ان شالله ..
ط
مكياج:دولا وا جيتا عروس الخليج
مسكات:جلوريس للزهور
هذا اللي اعرفه والسمووحه
P
مشكوووورات خواتي قلب دلوع وطروف :)
R
هلا حبوبه

عندج صالون دولا وصالون ظبية في بوظبي
والحنا .. صالون ابتهال في بني ياس
صالون مراسيم للحنا في الشارجه

المسكات .. سوري سمحيلي ماعرف المحلات اللي عندكم




وسمحيلي
ا
الله يوفقج اختي

الصالون،،، جيتا،، شمس وايد روعه،،، منيره

بالتوفيق
ذ
انا عرسي شهر 8

وان شاء الله كل شي يمر على خير

الفستان باجره من محل تينا فاشن في المارينا مول بيب ديزاينات يديده على شهر 6 واسعاره روعه من 2500 درهم وطالع للايجار

الميكب و التسريحه بسويه في عروس الخليج شغلهم عدددددددددددددل وروعه ومضبوط والكل يمدح فيه واسعارهم الايام العاديه 1300درهم بس والجمعه 2400 اظن لان الجمعه عندهم اجازه وما يفتحون الا للعرايس ^^ وعندج بيت الجمال الدائم روووووووووووووعه وخاصه سوزي فنانه بالميكب ونسيت اسم الي تسوي الشعر خخخخخ شعرهم للعروس 3500درهم

المسكه انصحج سويها في ازهار بينونه ما شاء الله عليهم ابداع وترتيب وتعامل جميييييييل مع الزباين والكل يطلع من عندهم راضي بس تعرفين المسكات في بوظبي اغلى من الشارجه ودبي اقل شي المسكه بتكلفج 400 درهم بس

الحنه الي جربتهم عندج صالون اخوات في بني ياس والشهامه وشارع المطار اظني داخل بوظبي نقوشهم رهيبه واسعارهم لليد 350درهم والريل على حسب انا سويت ريولي كامل نقش وفوق شوي 150 يعني اذا بتطولينها وايد 250 او 300درهم وعندج صالون الفراشه الذهبيه مارحت لهم بس ربيعي في الدوام وااايد مدحهم لي وقال انه خواته كلهم متحنين هناك فاتصلت فضول خخخخ قالت لي الحرمه ان اليد كامله 200درهم والريل 100درهم عاد ما سالتها الريل لين وين بس الاسعار في بوظبي ارخص من دبي والشارجه بالنسبه للحنه

التصوير عندج فوتوغرافيه رووووووووووعه شويه عليهم و العدسه الذهبيه اسعارهم وحده لالبوم العرس ال70 صوره بـ 3500 وعندج اللمسه الذهبيه سعرهم لالبوم العرس ال100 صوره بـ 1900 شي بنات مدحوه لي وبنات ما مدحوه تعرفين الناس اذواق

الحمام المغربي اذا تبين تسوين انصح بمركز النجمه الاولى الي بالخالديه في بنايه المحلات الكبرى روووووووووعه مكان راقي ونظيف والي تسوي الحماما المغربي اسمها فاطمه طيوبه وتحسينها نفس اختج وتعاملهم رهيب بس الحف عندهم مب شي خخخخخخ اسعارهم للملكي 250 درهم والي بالاعشاب 150 والعادي 95درهم

للحف بروحي محتاره بس ربيعتي دووووم تروح صالون لولو وواااايد تمدحه لي وان شاء الله بجربه

الكوش اسمحيلي حبوبه ماعرف المحلات والاسعار لاني مخليتها على ريلي

ان شاء الله اكون فدتج وما قصرت بشي

واي سؤال او استفسار عندج

لا تترددين وتطرشين لي رساله وتساليني

انا حاضره في اي وقت
X