بصير أم .. وأنا ماتزوجت! ..يارب رحمتك

السلام عليكم


الله يجزاكم خير ياخواتي ومشكورين على ردودكم واعرف انه فيه أسئله كثيييييييييره سألتوها لي فاجتني ظروف قويه مره في وجود الأطفال وانشغلت بالمذاكره لهم والأهتمام فيهم وماقدرت ادخل أكمل الردود فاعذروني وردودكم على عيني وراسي والله وماقصرتو بحلولكم ياقلبي ..

ولكن تأكدو والله العظيم وبالله الكريم انه أمي ولا تسوي لهم شي اللي يظن ان أمي متعاونه معي بالعكس والله هي سبب وجزء في الضغط النفسي اللي أعاني منه في وجود العيال والسبب انه احنا حاطين لها اكبر غرفه بالبيت وحاطين معاها بالأضافه لسريرها 2 أسره عشان بس يجي عندنا احد من عيال اخواني ينامون معاها والان بعد ماصارت عندنا الظروف خلينا البنات ينامون معاها ثم فجئه جات وقالت انا ماأبغاهم ينامون معي اتضايق من وجودهم بالغرفه هي طبعا مو متضايقه من وجودهم هي تخاف كثييييييييييييييير على اغراضها اللي بالغرفه ودائما عندها شكوك ان الصغار يخربون اغراضها وهم مساكين والله مايلمسون لها شي بس الشكوى لله وبنفس الوقت هي ماتحب تنام بالليل ونا لأني أسهر هي تبغا تسهر للساعه 2 بالليل او ثلاث لأنها ماتحب تنام الا بالنها عندها نوع من الخوف بالليل والصغار طبعا بالمدرسه ونا اخليهم ينامون الساعه 9 ونص فاتصور اخذت العيال كلهم عندي بغرفتي ينامون والله اني مقدر اتحرك ولا امشي بالغرفه من الضيق اللي فيها غير كذا حرام يتعب جسمهم من نومة الأرض وفيه أسره بغرفتها بس وش أقول يارب رحمتك بس ..

والله انه ماصار لي حتى خصوصيه في غرفتي تعبانه نفسيا لدرجة حتى صلاتي صرت أأخرها من قلة النوم لأن عندي صغار في المدرسه وصغار نايمين معي وكل شوي جالسين احس ان جسمي تعبان ناقصه راحه وهم الله يهديهم بعد فيهم عناد ويسمعون كلام امهم وتوصياتها ضدنا وتعرفون حتى لما تجي تسألهم عنا بطريقه مافيها احترام وحركات وجه وسخه خلاص يحسون انه ليش احنا نحترمهم خلينا نسوي اللي نبغاه على راحتنا حتى لو صرخت علينا او زعلت منا مو مهم بجد يعاندوني يعني تصورو المذاكره والله اني اصحى بدري وعلى طول اروح للصاله وأسألهم هاه وش سويتو بالمدرسه وروني وش حطت لكم المعلمه بالمستوى اليومي واقسم بالله ينشرح صدري لما اشوف الممتاز واقول الحمدلله تعبي جا بفايده مقارنة بمستواهم النصف الدراسي الأول اللي كله جيد او مقبول او لم تؤدي واجباتها الان الحمدلله كله ممتاز واحرص حتى الصباح بس امشطهم والبسهم وارتبهم على طول ومن ثم امسكهم واراجع لهم دروسهم اللي فيها حفظ .. بس انا بعد انسانه من اعصاب واحاسيس لما احس كأنهم اله يحركها شخص سئ هذا شئ يقهرني فاتكون ردودي مرات عليهم كلها تلميحات في انه ليش مكبرين هالشئ مثلا انتو كنتو من زمان عايشين في بيتكم بطريقه انتو عارفينها يعني الان انتو عايشين في راحه بعكس يوم كنتو ببيتكم احس احيانا أتذمر من تصرفاتهم واسلوبهم معنا بالبيت بس والله غصب عني يعني تصورو شخص واحد متولي تربية هالأطفال كلهم مامعي ابدا احد يساعدني صحيح ان الأكل والشرب والغسيل على الخادمه بس الأعتناء فيهم وتوجيهم وتدريسهم وصحوتهم الصباح هي اللي تضايقني احس تحملت مسؤوليه فوق طاقتي مع أب اتكالي يقول ماعندي امكانية خادمه ونا اقولكم بكل صراحه انا ماودي بخادمه لهم الا اذا كان في مساعده بس انها تكون لهم من ناحية انها تسوي لهم اكلهم ولبسهم بس اما تربيه فماعمر خادمه ربت عيال مستحيل بالعكس راح يربون معقدين وعنيفين ومجربين هالشئ مع ولد اخوي اللي اتركته امهم مع الخادمه والان جدا عنيف ومايفهم بسرعه عنده بطئ في الإستيعاب فأنا اذا في حاجه لشئ فأنا محتاجه لمساعدة اهل بيتي ومساعدة ابوهم ويارب الله يهديهم ويصلحهم ويسخرهم لي ويضع محبتي في قلوبهم وينزع من أنفسهم كل شر وسوسة اي شخص على انفسهم ويارب من يحاول تغيرهم علينا ان الله يرد كيده في نحره ويجعل كيده تدبيره يارب العالمين

وسامحوني طولت عليكم

السلام عليكم ورحمه الله وبركاته

الله يعينك على تربيتهم والاهتمام فيهم وابشري إن شاءالله بالدعاء ان الله يصبرك ويزرع حبك بقلوبهم وينزع عنهم كل ذره حقد عليكم وعلى ابوهم بالاخص ،،
اما على تربيتهم لا تخافين اختي إن شاءالله مع الوقت بيكتسبون منك اخلاقك العاليه وادبك وتمسكك بدينك ...
المهم تعلمينهم ان الصلاه واجبه عليهم ومايتركون اي فرض وياليت تحببينهم بالدعاء بعد الصلاه او اثناء السجود وتقولين لهم اذا صليتو بخشوع وكررتو الدعاء ربي بيستجيب دعائكم وكل شي تتمنونه واذا حافظو على صلاتهم بيسهل تعاملك معاهم اكثر حتى ممكن تكسبين عيال اخوانك الثانيين اذا شافوهم تركو اللعب وتوجهو للصلاه صدقيني بيوم راح يقلدونهم حتى حريم اخوانك بيلاحظون تغيرهم وغصب عنهم بيفرضون احترامهم على عيالهم ابسط شي ممكن يقولونه لعيالهم شوفو عيال عمكم احسن منكم يصلون ويدعون لربهم يوفقهم ويسر امرهم ..المهم حببيهم بالدعاء وياليت انتي في البدايه تختارين لهم الادعيه اللي ترفع من معنوياتهم وتطمن قلوبهم مثل .. يارب وفقنا بدراستنا وحبب الناس فينا وحنن قلوب اهلنا علينا ((واحفظ لنا عمتنا )) وقولي لهم حتى انا ادعي لكم وانتو اختارو دعاء اقوله لربي اذا صليت .. واسأليهم وش يتمنون ووضحي لهم انك بتدعين اللحين بصلاتك ان ربي يحقق امانيهم وبعد الصلاه قولي دعيت ربي يحقق امانيكم واذا تحققت بشروني عشان ادعي لكم ادعيه ثانيه ..
وياليتك وضحتي اعمارهم عشان نساعدك بتشكيل جدول يومي لهم من يصحون للمدرسه لين ينامون مع يومين الاجازه المدرسيه .. بتكلم ع اللي فهمته انه اثنين اولاد بالثانويه واعتقد بنتين بالابتدائيه وثنين صغار بالبيت .. شوفي اذا تقدرين تسجلينهم بمعاهد بالفتره المسائيه مثلا من 4 الى 6 سجليهم اولا يستفيدون وثانيا يخف الازعاج بالبيت وتقل شوفتهم لبعض وبتلاحظين يخف هواشهم مع بعض وبنفس الوقت تحصلين وقت لنفسك شوي ويستحسن المعاهد هذي تكون دينيه يحفظون قرآن او يسمعون ندوات تثقفهم او معاهد رياضيه يحرقون طاقتهم بالرياضه مثل السباحه وغيرها وصدقيني من يوصلون البيت يبون شي ياكلونه وينامون لثاني يوم يعني الازعاج والهواش بيخف كثييير وان شاءالله يكون فيه معاهد ..
اما بخصوص الشغاله اذا تشوفين خدامتكم تلحق ع الشغل من غسيل ملابسهم وتجهيز اكلهم بدون مايأثر على خدمتها لكم عادي مايحتاج خدامه . بس ياليت تقنعين اخوك يجي يسكن عندكم عشان يشرف على تربيتهم بالاخص العيال اللي بالثانويه صعب تتحكمين فيهم وتراقبين كل تصرفاتهم لازم يكون ابوهم موجود ويراقبهم لان الانحراف بعمرهم سهل جدا وصعب انك ترجعيهم للسلوك الحسن بعدين لازم توضحين له نقطه ان عياله ماخذين بخاطرهم عليه وان امهم فهمتهم اشياء غلط ولازم يشوفون العكس منه عشان مايخسرهم ويرجع ثقتهم فيه لانه موب حلو ولا حتى بمصلحته تكون صورته مهزوزه بعيونهم .. ولا تضغطين عليه بالكلام لان مبين من طريقة تعامله انه حنون ويمكن هو متضرر اكثر من عياله بتصرف زوجته وشريكة عمره ويمكن يكون عايش بضغوط نفسيه ومايشتكي لكم حاولي تكسبينه بالكلام الطيب اللي يريح النفس وانصحيه يروح عمره يومين وقولي له بتلقى الراحه هناك بين يدين ربك وبترجع نفسيتك احسن من اللحين ان شاءالله وقرار اتخذته وطبقته خلاص لا تندم عليه انسى اللي فات وابدا حياه جديده ..
وطرحي عليه فكره زواجه مره ثانيه بس مو اللحين بعد مايهدى شوي وتستقر اموره وقولي هالمره احنا بنختار زوجتك ومن بيئتك ومتربيه نفس تربيتك وتعرف الله وتخافه وان شاءالله ربي بيرزقك على قد نيتك وبيعوض اللي فات .. (( اختي اخذي بالحسبان ان هذي زوجته ومن اختياره واكيد يحبها اذا مو لاخلاقها للعشره اللي كانت بينهم واكيد بتكون نفسيته تعبانه من اللي مر عليه وشافه وقضيه الشرف مو شي هين بالعكس ممكن تشوفينه متماسك قدامكم بس مهزوز من داخل من تصرفات زوجته وتلقينه يسأل نفسه هالسؤال وش فيني ماعجبها وخلاها تشوف غيري ؟؟ ))
* . * . * . *
كلامي هذا للأخوات اللي يقولون مو مسؤليتك تربيتهم واخلي نفسك ..اما قولو خير واعينوها على مشكلتها او اسكتو افضل لان مافيه احد يتخلى عن دمه ولحمه وبالاخص ان هذولا عيال اخوها مو عيال محصلتهم بشارع مع العلم لو قالت لكم لقيت طفلين بالشارع مقطوطين وودي اكسب فيهم اجر واربيهم كلكم بتعينونها وبتشجعونها على فعل الخير

آسفه ع الاطاله واعذريني اختي واي شي تحتاجينه انا موجوده راسليني ع الخاص والاخوات بعد موجودين وماراح يقصرون معاك بشي ابد ،،، موفقـــه إن شـــاءاللــــــه