تعبت ومابي الطلاق علشان بنتي !

اختي مرمر و الله كلامج زي العسل :)
والله العظيم ودي بكل اللي قلتيه اني اسويه بس اقولج شي في شخصية زوجي ،، انه وايد يكابر و مايتنازل و اهوا
ترا جرحني من يومين بجم كلمة والله جرحني جرح قوي، واذا سويت اللي قلتيه احس انه مالي قيمه !! يعني جرحني بكلام و فوق هذا اتنازل؟!! والله كلام حلو وودي من كل قلبي اسويه بس علميني شلون بعد كل هالكلام اللي قاله لي ؟!؟

ودي والله اني اتفق وياه ونوفر بالبنك للمستقبل ، وودي اتناقش وياه بس خايفة والله !

وسالفه انه يدفع بالسوق ماله داعي اسولف عن هالشي لاني اذا رحت السوق انا ادفع لنفسي و لبنتي و صارت معاي كثيييييييييييير!! ولا قدر اني حتى والله ما طالبته بشي !! وفوق هذا اصير انا البخيلة اللي ما اطلع الفلس !! الله يسامحه بس

اول شي مب على اي شي تفكرين بتطلق الطلاق مب شي سهل في مجتمعنا و موضوع مثل هذا ما ينحل بالطلاق ...و احمدي ربج ان ريلج انسان زين و الحمد الله و يشتغل ...غيرج وااايد حريم ريايلهم لا يشتغلون و لا يسون شي ... و و الحريم هم يصرفون على بيتهم و عيالهم و على ريلهم بعد و يعطون ريايلهم مصروف

في لحظه الغضب الانسان يقول وايد اشياء ....لازم تسامحين لازم تتنازلين ....اذا كل حرمه بتحاسب ريلها على الكلمه عيل ما تمت حرمه في بيت ريلها جان كلنا لمنا قشنا و قشارنا و رحنا بيت ابهاتنا ...و حتى نحن نغلط و نجرح الريايل لكم ما نحس ...يعني تحسن انج يوم تقولين له اصرف على بنتك و انا مالي خص و انت ما تصرف عليها و تحسسينه انه بخيل ما بينجرح ...الريايل ناس عملين عندهم الاساسيات مهم المكماليات ما يشوفونها فهو في مقياسه كرجل ما يشوف انج لو اشتريتي لبنتك كم فستان و لا بدله و تيشيرت صرتي تصرفين عليها و ان هذا مهم هذا شي عادي في نظرهم ...هو بعد يشوف عمره عليه ديون و التزامات و اقساط اذا كانت عنده و يشوف عمره يشتغل برع و يكرف علشان يامن مستقبلهم ...لو هم مب عارف كيف لازم انتي تنبهينه

خلاص ابدي من الاول ....مشي الموضوع اسكتي عنه فتره ....و لا تتكلمين في الموضوع لين ينسى السالفه ...و ابدي من يوم بيسافر ..اتصالحي وياه و سوي له عشاء هادي و شموع و ورد ...و تكشخي كانج رايحه عرس فستان و مكياج ...و كشخي بنتج وياج ...شوفي كيف بيسامح و بيفرح

و يوم بيسافر و هو رايح المطار بالمصخره و انتي تبتسم قولي له شو بتب لبنتنا هديه ..او لدلوعتك او كتكوتك يعني اي شي من هذا النوع يحسسه بابوه و الحنان ..لا تستخدمين كلمه بنتك او بنتي ..لان احسها مافيها ابوه و حنان ...و شوفي اذا ياب لها اي هديه لو مب حلوه او ما عيبتج ...افرحي فيها و لبسيها و وديها بيت اهلج ...و اذا لبستيها اي شي و كان بفلوسه و ديتيها بيت اهلج او ربعج ...عادي ارجعي قولي له اليوم الكل قال فستان بنتي حلو قلت لهم هذا ذوق ابوها ... و لا ابوها ياب لها ... و لا من خير ابوها ...يعني اي كلام حلو يستانس عليه ...و يحسن ان انتي و بنته لو كانت اكبر و تفهم بتفتخر .....و شوي شوي بيصير يهتم ان شاء الله ...و ان شاء الله بتشوفينه هو اذا اشترى لها شي روحه بيسالج شو قالوا عن لبسها ...جذي هو بينتبه ان الناس تطالع و تسال و انه شي مهم

و بعد فتره هاتي موضوع البيوت مثلا او العقار ان كيف زادت الاسعار ...يعني لما تشوفين موضوع بجريده و لا بالاخبار يعني كانج تتكلمين بشي عام و بالكلام لين توصلين تتكلمين عيل نحن شو بنسوي الله يعينا كيف بنشتري بيت و لا بنسوي بيت يعني جذي انج تنبهينه ان الدنيا نار و لازم نبدا من الحينه و بهذي الطريقه ممكن تدخلين على مدخل البيت

اذا رحت زياره عن ربع بالدوام بالشغل اي شي دوم الحريم يرمسون عن المدارس و تكاليف المدارس و كيف ان المدارس يغلون اسعارهم بزياده و كل مدرسه يديده اغلى و الروضه ما ادري كم قيمتها و الابتداءيه ما اعرف كم ...المهم انتي بعد هاتي السالفه هذي في يوم يكون مكيف و هادي و تناقشي وياه بالموضوع يعني كانها ضاهره عامه و بعدين قولي الله يعينا يوم بنودي عيالنا ...و بجذي ....لا تخلينهم ورا بعض يعني خلي فتره طويله بين كل نقاش علشان ما يشك انج تتعمدين

و شوفي حتى لو ما رد عليج كفايه انه بينتبه و بينه و بين نفسه بيقول هيه والله من وين بيب بيت و لا المدارس يبالها


و ان شاء الله كل شي يرجع بينكم احسن من اول و ربي يوفقكم ان شاء الله