مشكله عند ولدي - منتديات عروس

م

ماما حسون

عروس برونزية

13-01-2008 | 01:43 PM

السلام عليكم ،،،

شخباركم بنات ...

حسين ولدي عندي مشكلة معاه هالفترة ،، ملاحظته من حوالي اسبوع انه لما يندمج مع التلفزيون " وهو مدمن رسوم متحركة حاليا " انه يحط اصابعه في حلجه ،، مادري هو بالضبط شسوي ؟؟ هل هو ياكل اظافيره ولا يمص اصابعه ولا شنو بالضبط ما ادري .. وانا كل ما اشوفه اقول له لا ماما ما يحطون يدهم في حلجهم لكن بعد فترة يرد يندمج ويسوي هالحركة ..

وانا مرة قرأت ان الاطفال اللي يسوون هالحركات قد يكون عندهم اضطراب او مشكله نفسيه ،، وانا فعلا هالفترة صرت اشدد على سالفة انه ينام بسريره بدل ما ينام معانا وفي الوسط .. وطبعا هو يقعد يبكي ويقول يبي ينام معانا ع السرير لكن انا ارفض واستخدم القسوة شوي معاه وبالغصب ينام بالاخير على سريره وهو يبكي ..
لكن هذه ليلتين قمت سويت طريقه .. " هو سريره جنب ابوه " قمت اقوله تبغي تمسك البابا وتنام .. قال ايه والحين هي ليلتين ينام بسريره بس وهو ماسك يد ابوه ..

هل تشوفون ان الموضوع مترابط مع بعض ولا انا مكبره الموضوع !! خصوصا ان ما اشوف حركة وضع يده في حلجه راحت من قمت اسوي هالطريقه ؟؟

وهل في حل آخر !!!!

ملاحظة :: حسين ولدي عمره 3 سنوات و9 اشهر ..

ر

ريم81

عروس ماسية

13-01-2008 | 02:56 PM

هلا ام حسون ربي يحفظه ان شاء الله

اختي انا قريت في كتاب للدكتور كاثرين توبين اسمة حلول عمليه لمشكلات الآباء في تلابية الأبناء

عزيزتي لا تتخذي اي عنف او غصب مع ولدك و بنفس الوقت كوني حازمة

يعني لما يجي وقت النوم و تحطيه في سريره و يقولك انه يبي ينام عندكم شتتي انباهه و قولي بغنيلك اغنيه او بقرالك قصه ممكن يعصب بزياده و يصيح اياكي انك تعصبي او تهتمي اسكتي شوي و احضنيه و قوليله انت شاطر و حبيبي و اعرف انك تقدر تنام بروحك

و تبدي تغني مثلا يوم ورا يوم صدقيني بيتغير

و بالنسبه لمص اصبعه لا لا تزوديها يمكن الولد بس متسلي بهالعاده انتي بدون ضغط قوليله يشل يده و شوي شوي بيغيرها

م

مناليزا

مشرفة سابقة

13-01-2008 | 03:27 PM

انا أعرف ان الوحدة لما تكون بدها تغير حركة معينة بيعملها طفلها لازم ما تظل تقولو ما تعمل و ما تسوي عشان الطفل عنيد بطبعه
يعني خليكي مراقبة تصرفهو هو على التلفزيون كل مايحط ايدو بحلقه شيليها بهدوء و هكذا لغاية ما يتعود
و فعلا زي ما قالت الاخت ريم 81 لازم تكوني مع طفلك حازمة و غير عنيفة
الله يطمنك عليه

ج

جمـــانة

مشرفة سابقة

14-01-2008 | 03:18 AM

تتذكري يا ماما حسون لما كنت تشكي من طفلك انه مدمن توم وجيري وما ينفك عنها وعايف كل شيء عشانها؟؟؟

اللي صار مثل ما خبرتيني انه لوحده مل وتركها .. بدون شيء محدد لهاه ..

بس .. الاطفال جذي تحسينهم في فترة من الفترات يجذبهم شيء.. ويردون يتركونه لما يجذبهم شيء آخر..

اتوقع الامر له علاقة بالاكل جدام التلفزيون (( الاجباس خصوصا ً )) <<< تعرف خصوصياتها ههههههه

فوقت اللي ما عنده شيء يأكله لا شعورياً يده تروح بحلجه كأنه يأكل نفسه !!

الله يسلمه لج العفروت..

ن

نجمة الرضا

عروس رائعة

14-01-2008 | 04:59 AM

في أعتقادي أن ولدش يبغي يحس بالأمان و انتين تحاولين تباعدينه عنش في اللحظه اللي يبغي منها الدفئ والأمان علشان ينام :)

نامي جنبة في سريره و أقرأي ليه قصه الين ينام و بعدين تباعدي عنه و هو نايم ما بيحس اليش و اذا كان سريره صغيره قعدي على كرسي جنب سريره

و أذا ما قبل بهالشي أشتري اليه فراش جديد في شخصية يحبها مثل سبايدر مان أو بات مان أو ما شابة ذلك و خليه ينام فيه

م

ميلادا

عروس مشرقة

14-01-2008 | 09:17 AM

حبيبتي انا كتبت حلول للي ولدها بعده ينام في سريرها .... ان شاءالله يفيدج لانه الحل مب العنف الحل يكون بالتدريج http://www.3roos.com/forums/t301485_3.html

م

مناهل78

مشرفة سابقة

14-01-2008 | 10:39 AM

الله يعينج أم حسون،، أنا الحمدلله ماعندي هالمشكلة لأن عبودي فصلته من عمر سنتين ونص وكنت مسوية له غرفة جديدة وكان فرحان فيها وماكان يرجع لسريره لأن على قولته هذي الصغير سرير بيبيات....
فأنت إذا عندك إمكانية تسوين له غرفة بروحه او تحطين له مفرش جديد بسريره وكذا مخدة ملونة أكيد راح يحب السرير ومايعاند أن ينام عندكم..
وبخصوص يده،، أتصدقين لاحظت هالشي في ولدي لما تكررين عليه لا تسوي يرد يكرر الشي،، بس لما أتركه والهيه بشي ثاني تشوفينه فترة قصيرة وينسى ومايكررها.

م

ماما حسون

عروس برونزية

14-01-2008 | 06:46 PM

اهلين بنات ومشكورين على ردودكم ..

وبالنسبة عن سريره انا من كم شهر اشتريت له سرير جديد ومفرش حلو علشان اقدر عليه وينام بسريره بس ما نفعت السالفه ..

وهم عندهم غرفة بس للحين ابوهم مو راضي نفصلهم لانهم بنظره ما زالوا صغااار واذا اتناقش معاه يتحجج لي ويقول خل اول حسين ينام بسريره بعدين فكري تطلعينه غرفة ثانية ..

وانا بين يوم وليلة هالمرة قررت ان اصمم على نومته بسريره وفعلا في البداية كانت صعبه لكن لما خطرت على بالي فكرت انه يمسك يد ابوه وينام صار السالفه اسهل وعادي عنده الحين بس اقوله يالله ماما نوم الحين يقوم يروح سريره بس بشرط انه يمسك يد ابوه وينام بعدين عاااادي ..

وانا كانت لي محاولات ان اشغل يده بشي علشان لا يحطها في حلجه لكن ما كانت مفيده لانه بعد شوي يرجع يندمج ويحطها مرة ثانية ..

واليوم الصراحه حسيت انه ما حط يده في حلجه وايد .. وان شاء الله تكون بداية النهاية لهالحركة

وشكرا ،،،