إدمان و مشكلة مع أحذية طفلي ... ساعدوني

ألي لاحظته أنه أغلب الحريم عندهم هوس الشراء

بس اللي يفكر بالعقل بيعرف شلون ينظم كل شي بحياته

ونحن مشكلتنا عاطفيين بزياده ومسرفين بشكل مبالغ جدااا


وأني معااااج بنقاط أنش لمن ذكرتي روحتنا للسعوديه لانه أرخص ....


أنتي مالاحظتي انه كل زياره للسعوديه تكلفنا الكثير الكثييير من المال


لو فكرنا انه نشتري الضروريات فقط لاغير لوفرنا مبلغ كبير من المال


بس حطي ببالش شي مهم لاتفكرين بوقت الشراء انه هالشي راح احتفظه للطفل الثاني

تدرين ليه !!!


لأني لاحظت لو اني بستمر على هالفكره بتسوق وبلقط من كل محل شغله وشغلات على امل انهم


مو خساير لمن يلبسهم ولدي وبعدين عيالي ........ لكن هذلين ملابس وبأسعار مختلفه وكل فتره تنزل

الاسواق كلكشن جديد يشد أنتباهناااا وننسى انه أحنا من اسبوع بس كنت ماخذه لطفلي مايكفيه

شهوووور لقدام ووتتوالى المشتريات المبالغه وتمتلأ الخزائن عندنا بالبيت من لاحاجه لنا بهم ونقعد نسوي


تصفيه للملابس القديمه ونرميهم أو نتخلص منهم بأي طريقه وننسى انه احنا قلنا للطفل الثاني حزتهاا


والشي الثاني وهو وما أدرانا انه الطفل الثاني بيكون مثل جنس الطفل الاول !!!!!!!!!




.................


أني عااانيت من هذي المشكله بالطفل الاول حيث كنت أشتري من أماكن الملابس الماركه وبس

وحتى قبل لا أولد بالطفل الاول شريت له مايكفي عااام كامل وأخذت مقاسات صغيره جدا وبكميات

ومن كثر مشترياتي اللي صار انه كل لبس لبسه مره أو ثنتين و الكثير منهم صاروا صغار قبل لا يلبسهم حتى

وحتى من بعد ولادتي ماتوقفت كنت كل أسبوعين لازم أخذ له واشتريله وووووالخ


لمن شفت الهول والاهوال من كثر الملابس ضاقت بي نفسي بصراحه وخففت بس بوطبيع مايجوز عن طبعه



حاليا اني قاعده أضغط على نفسي واوقف الأسراف بحيث اني صرت اخذ اكثر ملابس ومستلزمات عيالي من السعوديه وما أروحها الا مرات قليله مب نفس قبل لا ..... يعني صرت أروحها تقريبا بالسنه مره صيفا ومره شتاءا ومرتين بوقت المناسبات اللي تصير عندناااا



طلعت شوي باللي بخاطري بس ودي أكمل ولو اني ثرثرت واجد بس وراي روحه ماتم يالله أشوفكم على خير

فعلا احذيه الاطفال تغررررري ...لان اشكالهم تجنن

و لكن الحمد الله عندي قوه تحمل لاني اعرف انهم بيضغرون قبل لا تلبسهم بنتي

اشتري صندل و جوتي رياضه و جوتي حلو للفساتين و الزيارات ... و اخذ الوان محايده يعني تنفع لكل الملابس .. افضل البيج ...و خاصه انهم يصغرون بسرعه يعني ما تكملين شهرين الا و انتي مغيره المقاس ...

و كيف تمسكن نفسج انج ما تشترين ....خلي ملابس عيالج ما تروحين تشترينهم الا ويا زوجك .... و بجذي لين ما هو يتفرغ و يقدر يوديج بتمر مده طويله و بجذي ما بتصيرين كل ما تروحين السوق تشترين لعيالج

أني برأيي ما يخص الطفل الأول أو الثاني
يخص قناعة الأم ومقدرتها على ضبط النفس
أني من ولدي الأول وألحين حتى لو عجبني الشي وأظل حتى في البيت يجي على بالي وإن كنت قادرة على شرائه أمنع نفسي وكم مرة أروح السعودية يوم كامل وأرجع فقط بقطعة أو قطعتين وأشتري في المواسم فقط يعني قبل العيد و محرم والشتا وبعدين اقول ما ليه داعي وممكن أخد بين فترة وفترة قطعة أو قطعتين

يعني واجد أشياء من اللي اشتريهم وقت التخفيض أخليهم وأخشهم لوقتهم فبالتالي ما أحتاج أرد اشتري ليهم غيرهم

أختي قناعتش هي الحل حطي لروحش مبدأ وانه قدامش مشاريع أكبر وأهم من جوتي أو بدلة
ولدش لما توفرين ليه مسكن مستقل ولائق بإدخارش أفضل له عندما يكبر من لعبة يلعب بها ويكسرها أو جوتي يمكن تضيع طبقته ويدوي به في التراب

وحطي في بالش أنه الأراضي نار وكلما جى ليها ترتفع وكذلك مواد البناء فإدا ما لحقتين أنش تخطين خطوة المسكن السالفة بتصعب اكثر وأكثر وبتشوفين روحش في طريق مشدود

شكراً لكل اللي ردوا ... ما قصرتوا أخواتي والله

بالنسبة لمشكلة الأحذية جربت طريقة رانيا والحمدلله حسيت أن كل شيء ألحين مرتب ، أما بالنسبة للمشكلة الأساسية وهي أدمان التسوق فأنا في مرحلة العلاج خخخخخخ ... وأشوف كل شيء لحد الآن أوكي

أول شيء سويته سويت جرد لكل ثياب ولدي جبت ورقة وقلم وكتبت عدد البنطلونات اللي عنده وألوانها وأشكالها وأحجامها ، والأقمصة والشورتات والتيشرتات إلخ وخليت الورقة في البوك عشان أشوفها دايما

وثاني شيء مثل ما نصحوني الأخوات حددت ميزانية معينة لمشتريات محمد في الشهر

وثالث شيء رجعت المشتري الرسمي لأبناء أختي خخخخخخ .... هي ما عندها وقت وأنا كنت أشتري بدالها ثياب أولادها بس بعدين صرت لما أتسوق أنشغل بكتكوتي وما انتبه لثيابهم ... حالياً إذا بروح السوق اسألها إذا محتاجة شيء عشان أنشغل بالبحث عن المطلوب فقط

والحمدلله هالفترة رحت السيف ومجمع الرفاع والمارينا وذي سنتر ... وما أخذيت غير جواريب ... رغم أني أدور بدلة لعيدميلاد الكتكوت ... بس ما حصلت اللي في بالي وما أخذت أشياء ثانية

يا رب ما تكون حالة مؤقتة وترجع حليمة لعادتها القديمة