بن حارب;4934778:
الغاليه انتي وانا اسمحيلي انا وايد اسال بس انا توني صغيرة وماعرف شي شو تقصدين بالاساسيات يعني والكتاب اسمه اول سنه من عمري؟؟ سامحيني فديتج والغاليه بسالج انا بعد ابا اسوي توزيعات وجي بس يوم سالت ام ريلي قالت احنا مانسوي جي بس اذا بتسوين سوي وانا مضايجه لانه ماشاء الله اهل ريلي عندهم صغاريه وايد وهم من النوع اللي مايقولون شي حق اليهال يعني عيب وبس ولا خلاص لا والله حتى اتذكر ان يوم كانو ييون المستشفى وييبولي العشا يعني السسترات اكل المستشفى طشونه وانا ماكنت اكل شي مول من التعب واول ماييبونه كلهم يتيمعون حتى ريلي يضايج ف شو تنصحيني اني اسوي توزيعات وحلويات عاديه وجي بس اخشهن ومابقولهم بس شو احط حق الناس ف المستشفى يعني اخلي ام ريلي تيب الجاي والقهوه دام انهم مايسوون التوزيعات فهمتي عليه انتي شو اتقولين؟؟؟
اسالي غناتي كثر ما تبين .. نحن موجودين هني عسب الوحده تفيد و تستفيد ..
بالنسبه للكتاب عباه عن البوم مذكرات للبيبي تحتفظين فيه حق ولدج .. انا عندي 2واحد اسمه (السنوات الاولى من عمري ) هذا بالعربي .. والثاني يابتلي ياه ربيعتي
(babys first year- baby ecord book)
بتحصلينه في المكتبات ان شاء الله و كارفور على ما اعتقد ...
وبالنسبه للتوزيعات - اذا في خاطرج اتسوين وعندج ميزانيه سوي سواء هل الريل يسون او لا .. و بتكون في المستشفى للناس اللي بيزورونج يعني ماشي صغاريه يخربون او من ها القبيل .. انتي جهزي الهدايا ومب لازم اتراويهم خليها مفاجأه و خلي ام اريلج اتيب الجاي و ها السوالف وذا تبين سوي اوردر حلويات و معجنات ..
اني احين حق موضوعنا الاساسي انا ما حصلت لج الرابط بس مسويه كوبي للموضوع بحطيلج النقاط بدون الصور .. و للامانه منقــــــــــــــــــــــــــــــول مع اضافه بعض التعليقات .. والف شكر لصاحبه الموضوع بس للاسف ماعرف اسمها :o
تجهيزات الولاده :-
-السرير
وممكن تأخرينه شهرين أو ثلاثه حسب مقدرتج لأن ممكن تستعيضين عنه بالسله أو سرير( منز ) صغير.
-بجامات كامله ( أحسن من القطعتين ) الاوفارولات
أذرب للنونو وأسهل بالشيل خصوصا للأم الجديده
-ملابس مرتبه للطلعه وللضيوف
-ملابس داخليه
من الي يتسكرون من تحت لاتاخذون القطعتين بيطيحون بجبودكم
-مهادات
يبيلج سته على الأقل اذا ناويه تمهدينه
وهذا المهاد المودرن
-فوط كبار وصغار
الصغار بتحتاجينهم وايد كثري منهم
-كرسي للسياره ( احتمال اييج هديه لا تاخذينه من احين )
اختاري النوع الي يصلح للرضع والي ممكن يتعدل لما النونو يكبر
-عربه النونو ( احتمال ايج هديه لاتاخذينه من احين )
مثل كرسي السياره اختاري نوعيه للرضع وتتعدل لما يكبر
-طاوله لأغراض النونو وتبديل ملابسه
هذي الله يسلمج تصفين عليها علب الحليب والحفاضات والكريمات وما شابه
-شنطة الحفاضات
يبي لج وحده صغيره ووحده كبيره تستعملينها حسب الطلعه
-سليبنج باج
أدفى للنوم
-مراضع
قد ماتسمح ميزانيتج كثري عشان تغلينهم مره وحده وتستعملينهم وحده وحده بالليل وماتحاتين تبين تغسلينهم لأنهم خلصو.
-فرشاة غسيل المراضع
هذي كل أسبوعين أو شهر بالكثير بدليها
-شنطة حفظ المراضع
تخلي المرضعه دافيه
-مراضع
-حلمات المراضع
غيريها كل فتره خصوصا لمايسنن
-شفاطة الحليب
-بانيو النونو + البكس ماله حقاغراض السبوح ( خذته من مذركير نوعيته ممتازه )
-معقمة المراضع
هذي أستغني عن أي شي ولا أستغني عنها
-جواتي عنونات
-علبة تجهيز الحليب البودره
هذي مفيده للطلعه مايحتاج تودين كل علبة الحليب تجهزين شوي على قد الرضعه
-قبعات وقفازات و دلاغات
-مناديل تنظيف
-بطانيات خفيفه وثقيله (انا خذت من مذركير + زارا هوم ها الايام مسوي تخفيض و عندهم اشياء وايد نايس )
الخفيفه بتحتاجين أكثر من وحده
-خزانه
لهدوم النونو وأغراضه بتتفاجئين ان هالكائن الصغير عنده هالكثر أغراض
-سلة تنحمل بالايد للطلعه بالنونو
-مريله
موتقولون للحين ماياكل مانحتاج لها. النونو مايقدر يحكم شفايفه على المرضاعه ويبلل هدومه بالحليب فتصوفر المريلخ تحمي هدومه.
-مشط ومقص للأظافر وبمب تنظيف الأنف
ممكن يجون طقم
-مفرش للسرير
يبيلج اثنين على الأقل واحد ينغسل وواحد على السرير
-شامبو - بودره - زيت الاطفال - لوشن - قطن - صابون سائل
-مونيتر الصوت
عشان من يتحرك تسمعينه
-كرسي مايل( احتمال اييج هديه )
يكون النونو فيه كأنه نايم فمايعور ظهره
-ميزان الحراره ( احسن نوع اللي يقيس الحراره من الاذن )
-شنطة الاسعافات الأوليه
ان شاء الله محد يحتاجها
-المصاصه الي ينحط فيها الدوى
-حبوب تعقيم
للمراضع الي ماتتحمل الحراره والألعاب الي تبين تعقمينهم حطيهم بالماي ونقعي المراضع فيهم.
-مصاصات
-تلبيسة المرضاعه ( مهمه جدا )
تدرون ليش هذي مهمه؟ لأن العين حق لاتخلين أحد يشوف ولدج شكثر شرب حليب
-جوارب ( دلاغات )
ان شاء الله اكون افدتج باللي عندي .. وذا عندج اي سؤال نحن حاضريـــــــــــــــــــــــن ..
تحياتي ..