خلاص تعبت افطمه ولالا؟

أحلى ملح;4884275:
بصراحة انا مستغربة من الي يقولون ان الرضاعة الطبيعية متعبة !!!!

لان انا و امي و اختي و كثيييييير من الي اعرفهم يقولون اسهل شي الرضاعة الطبيعية
انا الحمدلله ارضع بنتي طبيعي 100% و اطلع و استانس و اروح مولات و اتمشى و معاي بنتي و ما تسويلي مشاكل اتتم 3 الي 4 ساعات بدون رضاعه و اول ما ارجع البيت ارضعها
امي رضعت كل عيالها طبيعي و ليحد سنتين و ماعانت مشاكل ابداً
من بعد ما يبتدي الطفل ياكل يعني من الاربع شهور تقل الرضعات من الصدر تدريجياً الين تصير 3 رضعات باليوم فقط

و هذا بعد الصح و المفروض كل الناس جذيه لان حتى بالكتب هذا الي يقولونه الدكاترة


و الي وضعها غير جذيه معناته انها عوت بنتها او ولدها على ان يدمن على صدرها
و هذا يصير لمن الوحدة تخلي الطفل يرض في اي وقت و بمجرد ان الطفل يصيح تعطيه صدرها
ممكن في وااايد اسباب تخلي الطفل يصيح مو شرط يبي يرضع


انا لمن كنت بالاربعين توني والدة كنت كلما بنتي بجت ارضعها
و امي لاحظت هالشي و زوجي كذلك جان تقولي ديريبالج لا بنتج تتعود و بعدين تدمن عالصدر و يصير مثل المصاصة يعني بس تمصمص بدون لا تكون يوعانه


و من يومها قمت احاسب و اشوف متى اخر مرة رضعت و اشوف الساعة و احاول قدر الامكان ما ارضعها اقل من كل ساعتين (خلال النهار طبعاً)

اما بالليل ما ترضع الا مرة او مرتين و هذا الشي مضايقني احس اني مدلعتها و لازم احاول احل هذي المشكلة لان صار عمرها 3 اشهر المفروض ما ترضع يبالليل

ارجع واقول مو كل العيال نفس بعض
والله يسهل ع الكل وانشالله ع التعب الي نتعبه على عيالنا
وهم صغار نشوف ثمارها يوم نكبر ونعجز هههههههههه

ويكونوا ذريه صالحه وبارين بنا يااااااااا رب

صح لسانكم والله انا كنت اطي ولدي على كيفه يرضع عشان يزيد الحلي بصدري مع المص وهالحين جنيت هالنتيجه

انزين باقولج ..
انا ريلي نادر ما يمسك بنتي يلعب معاها شوي وخلاص .. بس يساعد لا .. يمكن ساعات يغير لها بس نادرااا
الواحد ينسق وقته ..
رضعي ولدج كل 3 ساعات فقط .. بين الرضاعات عطيه ماي بس .. عطيه ماي تمر .. سكر نبات .. وبس ..
بين الرضعات حطي ولدج في اللعبة مالته بتلاقينها في التعليم المبكر وخليه بيلتهي وسوي الاشياء اللي تبينها في هل الوقت وطلي كل شوي عليه وكلمية ..
ونفس ما قلتلج من الساعة 8 لا تخلينه ينام ولعبيه بزيادة وسويله مساج بزيت الزيتون الدافى ومسديه وبتشوفينه ينام على طول ...
واذا تحسين انج ما تبين ترضعينه بالليل .. عطيه بدل الرضعة ماي وسكر نبات او عطيه حليب مع شويه سيرلاك ارز ..
وبيطول ان شاء الله ..
ومن ناحية الترتيب .. ممكن تخلين الخدامة تسوي اشغال البيت الضرورية .. وخلي غرفة النوم عليج .. واهتمي بروحج .. روحي يوم في السبا او سوي تنظيف بشرة او استشوار .. حطي مكياج .. روحي سينما .. هل الاشياء تنسي الواحد .. اانا بنتي اغلب الاوقات اطلعها وياي والحمد لله ما بهدلتني .. ارضعها في الطريق .. وتاخذ تقريبا 3 ساعات اكون خلصت اغلب مشاويري ..

السلا عليكم و رحمة الله و بركاته

اختي وهج الحب

انا بعطيج طريقة عشان يتخلص ولدج من عادة المص و كثرة الرضعات الليلية بس ترا يبيله مثابرة و صبر
و النتيجة يمكن ماتشوفينها بسرعة بس لا تيأسين و استمري


اول شي علاج مشكلة المص:

حاولي اذا عطيتي ولدج صدرج ما يمص اكثر من 30 دقيقة بالكثييييييييير و بعدين شيليه
اكيد راح يصيح و يسوي مشكله
انتي بدورج حاولي تلهينه لعبيه و ونسيه غيري الحفاظ غيري ملابسه خل احد ثاني يشيله
كلميه و تمشي معاه بالبيت سوي كل شي عشان ينسى
و لا تعطينه صدرج مرة ثانية الا بعد مرور ساعتييييين كاملين عالاقل خلي الساعة دايمأ معاج و اذا مرت اكثر من ساعتين احسن و لا تعطينه صدرج الا اذا طلب و ممكن اذا صاح تلهينه و تخلين اخر شي الرضاعة
و استمري على هالطريقة و شوي شوي راح يتعود و يفهم ان مو على كيفه يرضع اي وقت
انا اتبعت هذي الطريقةبس من فترة الاربعين و الحمدلله مرتاحه مع بنتي




ثاني شي مشكلة كثرة الرضعات الليلية:

طبعاً السبب الرئيسي حق هذي المشكلة ان ولدج متعود عالمص و معتبرج المصاصة او اللهاية الي يقدر يحصل عليها باي وقت و هذا الغلط
و اتوقع السبب الثاني انج ما علمتيه الفرق بين الليل و النهار و علاج هالمشكلة يكون عن طريق انج تسوين روتين ما قبل النوم او bedtime routine

طريقة روتين ما قبل النوم:

اول شي اختاري وقت لبدأ الروتين و يكون مناسب حق نمط حياتج و لازم تسوينه كل يوم بنفس الوقت ترا الطفل جداً حساس من هالناحية و ممكن انتي تكونين سبب بلخبطة الروتين اذا ما استمريتي عليه يومياً
مثلاانا اختار الساعة 9 كبدايه و يستمر حوالي ساعة فا يكون الطفل نايم بفراشه الساعه 10

الساعه 9 تاخذين ولدج و تفصخينه ثيابه و تحطينله زيت الاطفال و تسوينله مساااج و تلعبين وياه و تناغين وياه
بعدين تسبحينه زين
بعدين تحطين حفاظه يديدة و ملابس نوم مريحة
تغطين راسه بفوطة و ترضعينه بغرفة النوم
و تكونين مطفيه الانوار و تخلين اضاءة خااااااااااااااااافتة جداً (عشان يفهم ان وقت نوم)
و رضعيه زين و تأكدي ان شبع و اقري عليه المعوذات و اذكار النوم
و لمن ينام حطيه بفراشه و لحفيه بطريقة مريحة
قبل لا ينام تأكدي ان خشمه مو مسدود اذا مسدود رشيله بخاخ الي يفتح
اذا فيه مغص او احتمال يصير فيه مغص عطيه الدوا قبل لا ينام
عشان تضمنين ان يرتاح بنومته

الحين طفي جميع الانوار و خلي يكون هدوووووووووووووء و حاولي ما تتكلمين مع زوجج و يفضل انج تنامين
و اتبعي طيقة انج ما ترضعينه باقل من كل ساعتين
و عندي كتاب امريكي تقول فيه الدكتورة ممكن تعطين الطفل اللهايه فترة النوم فا ممكن هالطريقة تنفعج لكن للامانه انا ماجربتها ولا راح اجربها لان زوجي مانعني اعطي بنتي لهايه


طبعاً مو من اول مرة ولدج راح يتحسن لكن بأذن الله يوم عن يوم راح تطول فترة النوم الاولية و طبعاً لازم ما ينام بعد المغرب
و يوم من الايام راح تتفاجاين او ولدج صار يقوم مرة وحدة بالليل و شوي شوي ولا مرة ان شاءالله



عليج بالدعااااااااااااااء كثري الدعاء
و خلي زوجج يساندج و يساعدج و يوقف معاج لان اول فترة راح تكون صعبة
ثقفي نفسج و اقري زيادة عن علاج المشكلة و طرق الروتين المختلفة
و شوفي يمكن صار الوقت مناسب انج تعطينه اكل و سيريلاك


و الله يوفقج و اي سؤال انا حاضرة ان شاءالله

السلام عليكم و رحمة الله تعالى و بركاته،

رغم إن الأخولت ما شاء الله عليهم ما قصروا بس ما أقدر أسكت و ما أتكلم لأنج جيتي على الجرح :cry: .. آآآآآآآآآخ أقدر أألف مجلدات عن معاناتي مع السهر ويا عيالي...

أول شي بقول لج محد يفهم أكثر من رب العالمين سبحانه و تعالى .. أفضل شي الرضاعة الطبيعية لمدة سنتين مثل ما قال لنا رب العالمين في القرآن الكريم .. و كون الرضاعة طبيعية أول لا ما لها علاقة بالنوم .. بنت أخت زوجي عمرها تسعة أشهر و ترضع صناعي و تقوم في الليل كذا مرة .. و بالعكس الرضاعة الطبيعية تقي الطفل من الأمراض و تعطيه مناعة .. ولدي سلمان رضعته طبيعي و أولاد أعمامه عمرهم نفس عمره رضعوا صناعي كانوا يمرضون أكثر في أول أيامهم بشكل ملحوظ

و ثانياً من واقع خبرتي مع عيالي سلمان عمره ست سنوات و طلال راح يكمل سنتين إن شاء الله بعد إسبوعين بس بالهجري كمل خلاص سنتين و عشان جذي فطمته من حوالي إسبوع و نفس الشي سويته مع ولدي الكبير سلمان و الحمد لله .. أحس و لله الحمد برضا كبير و ما عندي أي إحساس بالذنب و لا عندي أي شك إللي ممكن ينتج عن إني حرمت أي منهم أو جوعتهم و الحمد لله على منه إحسانه أن مكني من هذا الشي و أتمناه لكم جميعاً ياللي ترضعون و كل المؤمنات يا رب.

بالنسبة للتعب .. والله أي المسألة متعبة و مو هينة ... خل أقول لج بعض التفاصيل عن معاناتي

لما ولدت سلمان كنت ساكنة في شقة صغيرة جداً و لأني أعمل فكنت أودي سلمان عند أمي أو عند أم زوجي الصبح و لأنهم كبرو في السن فإضطريت أجيب شغالة عشان تلاحق سلمان تحت إشرافهم .. مثل ما قلت شقتي وايد صغيرة مافيها حتى مكان لسرير الطفل و فيها الله يعزكم حمام واحد فصعب شوي إن تسكن فيها معانا شغالة و كنا نبني بيت فقلنا نتصبر و أقعد عند أهلي لحد ما يجهز البيت .. بس زوجي لعدة أسباب رفض أن نترك الشقة بالكامل عشان أثاثنا وين نخليه و عشان على قولته ما يضايق أمي و أختي بنومته عندنا كل يوم رغم إنه يقعد طول النهار و الليل معانا و ما يروح الشقة إلا وقت النوم .. و يمكن يكون خوفه من مسئولية الطفل الجديد في حياتنا أو تهرب من السهر لأنه عنده دوام .. المهم إني كنت أنام في بيت أهلي و كان زوجي ينام معانا في ليالي الإجازات..

أنا بنفسي كنت مختبصة حدي مع ولدي .. كان يصيح طول الوقت و مهما ألهيه و أحاول أهزه أو ألاعبه يظل يصيح خصوصاً الثلاثة أشهر الأولى مع مغص بطنه .. و زاد علي إني ما كنت مجهزة ملابس حلوة لبعد الولادة فكنت أحس نفسي مبهدلة و ما عندي وقت أسشور شعري و الجو كان حار و الحليب يتصبب مني فكنت قمة في البهدلة .. هذا غير الضيوف إللي ما شاء الله ظلوا يتوافدون علينا و لهفة أهلي على ولدي لأنه حفيدهم الأول كل هذا سبب لي لخبطة قوية في نظام حياتي و ما كنت مسيطرة على نظام حياة ولدي أبداً.. بس لما كبر شوي و خلص الأربعين بديت من تصير الساعة 8 في الليل أركب معاه فوق لغرفتي .. و أسبحه و ألبسه ملابس النوم و أوديه غرفتي و أخليها ظلام و هدوء و أرضعه زين و أقرأ عليه المعوذات و بعض الآيات القرآنية و أهزه لحد ما ينام .. و مثل ما قالت إحدى الأخوات أعتقد ملح ما أبدل حفاظته في الليل إلا للضرورة القصوى (هذا من بعد الأربعين تقريباً) و لما يقعد في الليل ما أتكلم معاه و لا أفتح الإضاءة و لا شي بس أشيله أرضعه و أرجعه في السرير .. الموضوع أخذ له عدة أشهر بس تعود بعدها على هالروتين و ما شاء الله بدأت قومته في الليل تخف و على ما أذكر لما صار عمره سنة قام ينام طول الليل ما عدا بعض الأيام إللي كان يصحى فيها عطشان فأعطيه ماء (هذا الكلام لما صار عمره سنة تقريباً) و ظليت كل جم شهر أقلل وحدة من الرضعات النهارية إلى أن صار عمره سنتين الحمد لله الله سهل الأمر و فطمته حتى من بعد ما فطمته كان يوتعي من نومته في الليل بعض الأحيان عطشان و بعض الأحيان مسويها في الفراش و أحياناً أنا أقوم أشيله و أوديه الحمام في الليل لما بديت أستغني عن الحفاظات و بعض الأحيان حلمان بكوابيس و خايف و هالوضع مستمر إلى الآن بس مو يومياً و الحق يقال نادراً إللي يتكرر هالشي..

أما طلال و ما أدراك ما طلال .. فإلى الآن و عمره تقريباً سنتين ما نمت ولا ليلة طول الليل ... لازم يوتعي في أغلب الأيام كل ساعة أو كل ساعتين و أحياناً كل نص ساعة :21_164: في أول سنة من عمره المديد إن شاء الله كان عنده ربو و طول الليل عنده كحة و من بعدها يرجع و طبعاً تعرفون الترجيع الله يعزكم معناتها أسبحة و أبدله و أنيمه و أنظف الأرض إللي رجع عليها و أتسبح أنا غالباً يرجع علي و على ما أنهي كل هالطقوس و أحاول أنام أول ما تجيني النومة يرجع يقعد من جديد .. و إذا مو طلال فسلمان .. و بس طول الليل عندي مشاوير بين غرفتي و غرفة سلمان و الحمام ... و طلال عشان ينام لازم أحمله و ظل أمشي فيه داخل أرجاء البيت و أظل أهز فيه .. و عنده مقاومة قوية للنوم ما شاء الله ... سلمان كنت أعطيه المصاصة (اللهاية) بعض الأحيان بس أشيلها عنه بسرعة عشان ما يتعود مع إنه كان يبيها .. طلال من قلة حيلتي معاه أبيه ياخذها ما يرضى .. كان يمصها شوي و بعدين يرميها و يبكي .. و بعد من قلة حيلتي كنت ناوية إني ما أنيمه معاي في الفراش عشان ما يتعود لأن سلمان كان يحب ينام معاي بعض الأحيان .. لكن طلال آآآآآآآآآآآآآآآآآآآآخ منه إذا حطيته جنبي على الفراش يظل يصيح .. حتى ألحين لما كبر و الله إني شاكه إنه عندي بوادر ديسك في ظهري لأن الألم ملازمني :sa24: الظاهر إنه خايف من بعد ما فطمته فزاد معدل قيام الليل عنده و ما يسكت إلا و أنا حاطته في حضني و أهز فيه أو أشيله و أمشي في البيت و لما أحاول أنيمه جنبي أقول في هالجو البارد خل أحضنه و أغطيه معاي باللحاف يمكن تعجبه النومه ..أبداً يوقف لنا في نص السرير و يصيح أبي ماما أقول له أنا ماما وياك يعني أنا من؟ .. يظل يصيح إلى أن أنيمه بحضني مرة ثانية .. و طبعاً كل ما أرجعه السرير ينام شوي و يقوم مرة ثانية يناديني و يصيح

حاولت أسوي له روتين مثل سلمان بس ساعات زوجي يرجع البيت و يفتح التلفزيون أو يتكلم معاي فيضيع الهدوء ... لما صار عمره حوالي سنة و نص كنت أقلل الرضاعات تدريجياً و خصوصا ً إنه صار يفهم الكلام كنت أعطيه رضعه قبل النوم و بعدين أقول له إن ألحين مافي شمس يعني مافي حليب .. و كل يوم أول ما يطلع أول نور للشمس يفز بالصياح يبي الحليب و أعطيه .. بس هالأيام لما قررت أفطمه كلمته و حاولت أفهمه من قبلها بحوالي إسبوعين و أنا أقول له إنت ولد كبير مثل سلمان .. و أمدحه لأنه صار ولد كبير .. و بعدين مرة قلت له بنروح فوق في سرير الماما طلولي ما بيشرب حليب لأنه ولد كبير مثل سلمان بس بنشرب ماي و بنصك الليت (الإضاءة) و الماما بتسويلك Big Huge (على قولة تلي تبيز) و بنام قول OK قال OK :wavetowel2: ما صدقت من الوناسة و الحمد لله رب العالمين الله سهل و عدت الليلة على خير بس رضعته ثاني يوم الصبح و الليوم إللي بعدها نفس الشي رغم إنه نام بصعوبة اليوم الثالث أعلن تمرده و ما رضى بس هزيته و رفضت أعطيه و قعد الصبح شال البيت على راسه من الصياح و بعد ما عطيته و شغلت له التلفزيون و لهيته كم يوم و عرف إنه ما فيه أمل و أحاول أمشي على روتين واحد يعني أبدل الحفاظة و يلبس ملابس النوم و نودي سلمان لغرفته و نقرأ له قرآن و بعدين نروح لغرفتي و نقرأ قصة قصيرة (هو يحبها وايد) و يشرب ماي و نطفي النور و نقرأ قرآن و بعدين نسكت و أهزه إلى أن ينام بس قومة الليل المتكررة الله يعيني عليها و يعينكم على عيالكم ..

طبعاً تلاحظون إن دور زوجي في الموضوع غير مذكور لأنه قصير جداً جداً ينحصر في إنه حمل لي طلال مرتين يمكن خلال السنتين الماضيتين بس شاله من السرير و عطاني إياه و كم مره يحمله لما أكون في الحمام و يوقف معاه عند باب الحمام و يسمعني صراخة إلى أن أطلع و كم مرة كان يصرخ عليه عشان يخليه ينام .. و أذكر إنه مرة حمل سلمان عشان يسكته لما كان صغير مشى فيه إلى نهاية الصالة و رجعه لي مرة ثانية .. و حجته إنه ما يعرف للأطفال .. و بعض الأيام لما أحاول أتجاهل صراخ طلال كان زوجي يقعدني من النوم عشان أقوم أشيله و يقول لي عندي دوام باجر إنزين و أنا بعد عندي دوام .. هو الحمد لله متفهم إني إذا أهملته شوي يعني مو متفرغة له مثل بداية حياتنا الزوجية فهذا عشان عياله و يفتخر بأني أرضعهم طبيعي لمدة سنتين و عاجبه هالشي و عاجبه إهتمامي فيهم .. و مقدر لي تضحياتي خصوصاً بعد ما شاف معاناتي الليلية مع طلال لأن مثل ما ذكرت بداية عمر سلمان ما كان ينام معانا بإستمرار .. بس بعد أحاول بعض الأيام إني أبدي بعض الإهتمام بزوجي في أي فرصة ممكنة .. و أحاول أهتم بلبسي بالذات في البيت و أحاول بعض المرات القليلة جداً إن أخلي الأولاد عند أمي و أطلع لومشوار قصير مع زوجي.. بس الصراحة انا أتعب هالتعب و أنا محتسبة أجري عند رب العالمين إن شاء الله .. لأني دايماً ٌأقول إن بيتي و زوجي و أطفالي هم مشروع حياتي و هم الأولوية الأولى في حياتي .. صج النتيجة إن عيوني صارت منفخة و وجهي أصفر و هزيل و آلام الظهر تلازمني و ديماً أبي أنام بس والله النتيجة تستاهل .. و لو الزمان يعيد نفسه كنت بأختار نفس الإختيارات إللي إخترتها .. عموماً يا أخواتي هذا الشي مؤقت حتى لو حسيتوا في البداية إن الأيام طويلة و ما تعدي بس من يكبر الطفل و يصير عمره سنتينو نص أو ثلاث سنوات يبتدي يعيش ببعض الإستقلالية و تسهل حياة أمه معاه

سامحوني وايد طولت بس الموضوع عندي ذو أشجان و حبيت أفضفض شوي

مشكورة ام سلمان ووشيكي على الخاص بطرشلج رساله واحلى ملح ترى ولدى مامنه فايده خلاص انا ياست والله حاولت اسوي الروتيين بس فشلت الله يعين ولدى عمره الحين 6 شهور واليوم واتقولى احنا مستغربين من ولدج ليش ماينام !!وبعيدين الللى ترضعون طبيعي بعد سنه مايورح الحليب انا حليبي قللللللللللل وصدري صغر عن اول كيف اكمل رضاعه شكلى بوقف لانه كيه الحليب ماتستاهل اكممل

السلام عليكم و رحمة الله تعالى و بركاته،

العفو أختي .. بس ما إستلمت أي شي منج على الخاص مثل ما قلتي ...

و بالنسبة إلى أن الحليب يقل .. يمكن يكون عادي .. إنتي بس إهتمي بأكلج و أكلي خضار بالذات الأوراق الخضراء و فواكه و بروتينات و شربي حليب و سوائل كفاية و حاولي ترتاحين شوي خلال اليوم عشان تساعدين الحليب إنه يتكون عندج .. و بعد إهتمي بتغذيته و عطيه فواكه و خضار و من منتجات الألبان ممكن تعطينه روب (زبادي) .. الروب إللي على فواكه كل الأطفال يحبونه .. و ممكن تعطينه لبنه شوي أو شوية جبن بس لا تكثرين لأن يقولون يسوي إمساك للطفل و إستمري معاه على الرضاعة الطبيعية و لا حظي إن شوي شوي لازم يقل إحتياجه للرضعات و يزيد إعتماده على الأكل .. بس لا توقفين عنه الرضاعة قبل لا يصير سنتين .. منطقياً و بعد من كلام الدكاترة ترضعينه جزئياً طبيعي .. يعني شوي طبيعي و شوي صناعي أفضل من لاشيئ و أفضل من إنج تمنعين عنه الرضاعة خير شر... هي الرضاعة متعبة أنا أعرف هالشي بس والله الفايدة إللي تجنينها تستاهل التعب

و الله يوفقج و يحفظ ولدج و يهديج للي فيه صلاح لج و لولدج إن شاء الله

حبيبتي ولدج يتنفس زين يوم يرقد؟؟
اذا ووااايد يناخر(يشخر) ... احتمال لحميه في خشمه انا اخويه كان مثل ولدج طووول الليل مايرقد وعقب اكتشفو انه عنده لحميه شالوها وهو صغير 9 شهور وارتحنا ...

انا والله مثلكم ولدي مايشرب غير حليب صدري والحين عمره ماشاء الله 1سنهة2 شهر مع ان حليبي احيان يكفيه واحيان لا..
.
وماينام غير جنبي الله يحفظه وغير كذا لامنه نام كل شوي يبي يرضع لدرجة ظهري يعورني..
.
تكفون نبي شوركم علينا..
لكن مهما الاقي من تعب مارح احرم من حقه اللي ربي افرضه لحكمه حولين كاملين والله يصبرنا ويجبرنا
.

أذا فيك حليب لاتفطمينه حرام

سلام .. حبيبتي دلوعة زوجها مالج إلا الصبر .. الأعراض إللي تتكلمين عليها مشابهة للي تعرضت لها .. و يالله هانت باقي لج عشرة أشهر بس إن شاء الله و تفطمينه و الله يعينج

السلام عليكم

حبيباتي اقول لكم اني ها يالفترة بافطم ولدي عمره سنة وشهر بدكم الصراحة انا زهقت و الولد صحته حلوة وياكل ثلاث وجبات في اليوم وبنصحكم افضل شهور للفطام 3/4/5 بعد هيك الصيف صعب الفطام فيه

والفطام يكون بالتدريج مثل ما عملت وخففي الرضعات بالتدريج بدون ان يشعر ابنك
وعوضي ذلك بحليب صناعي وكيك وفاكهة اي شئ يحبه الولد

ولتخفيف الحليب من الصدر اشربي مرمرية (مرمية) تراها تنزل هرمون الحليب

والله يحفظ اولادنا جميعا

ويكون في عون الجميع
دمتم بخير