افضل ماركة صبغ شعر .. (( شاركينا الحديــث ))

بسم الله الرحمن الرحيم.......

مشكورة إختي نعووومة عالموضوع المفيد:flower:,,,,,, وانشالله نفيدكم,,,,,

أنا بقولكم من تجربتي أنا وأخواتي الأربع كل وحدة نوع شعر وكل وحدة جربت كذا صبغة:

أنا شعري جاف ومموج بس الحمدلله كثيف وكانت أول تجاربي مع ويللا 2000 "اللي كأنه مرهم"صبغت يمكن 3 ألوان منها مايبين علي إلا لمعة على لون الصبغة لأنها تحتاج إنج تسحبين لون الشعر وهذا طبعا" شي مستحيـــــــــــــــل أسويه خصوصا" إن شعري جاف... عشان جذيه تستخدمها الصالونات..

ويللا 2000:

مميزاتها...
اللون صريح وواضح وقوي بس للأسف لازم سحب لون الشعر قبل الصبغة..

عيوبها....
درجات الأحمر بعد كم شهر يصبح على برتقالي وهذا من تجربة إختي أنا ماأحب الأحمر..
بطيء المفعول خصوصا" على الشعر الغامق نسبيا" ..
طريقة استخدامه بدائية..


وبعدين علمتني وحدة على صبغة طريقتها غريبة شوي لأني كان ودي أفتح لون شعري بدون ماأضره وفعلا" علمتني على صبغة اسمها SUN IN توجد بثلاث أشكال"ألوان"
العلبة الصفراء: لون كستنائي فاتح على أشقر.
العلبة الأورانج: لون بني محمر روووعة.
العلبة الحمراء: "ماجربته لأنه لايناسبني الأحمر" بس أتوقع اللون حلو.

طريقة عمل الصبغة إنها تفتح شعرج وبنفس الوقت تلونه حتى لو كان شعرك أسود فااااحم مثلي إختاري اللون المناسب لبشرتج وتمتعي بدرجة لون روووعة وطبيعية.. لما صبغتها مافي أحد ماسألني عنها بس كنت نحيسة ماأعلم.... لأن إختي كانت عروس وبتصبغها مابي أخرب عليها وفعلا" صبغتها وسوت ضجة.....

الطريقة بعد ماتغسلين شعرج كالمعتاد جففيه بمنشفة"يعني رطب شوي" رشي الصبغة عل شعرج بالكامل والجذور والأطراف وكله... ومشطيه بمشط أسنان,, واستلقي بالشمس:21_102: أو عرضيه لحرارة السشوار بدقة.. يعني سشوري شعرج جيبي رول وأبدأي سشوري كأنك رايحة مناسبة أو شي وبس خليه على شعرج إلى موعد الحمام الجاي... وتكررين العملية لين توصلين للنتيجة المرغوبة "3مرات ناسبتني" وتزيدين إذا تبين لون أقوى........


SUN IN:

مميزاتها....
لاتحتاج إلى خلط وملط تكون بعلبة على شكل بخاخ.
قوامها سائل شفاف.
ماتوصخ الملابس أو البشرة ولا لها لون ظاهر.
سهلة الإستخدام جدا".
إقتصادية وسعرها مناسب وعلبة وحدة تكفي للشعر متوسط الطول لثلاث إلى أربع استخدامات أو أكثر.
تستخدم على فترات متقاربة أو متباعدة مو مثل باقي الصبغات.
عند ظهور الجذور تكرر نفس العملية بسهولة دون حاجة لعلبة جديدة"ربع العلبة يكفي".
تعطي نتيجة مرضية للون المرغوب ولونها واضح وفاتح وألوانها شبابية تصلح للصغار والكبار.
لاتسبب تساقط الشعر "بالنسبة لي"
تعطي لون واحد من الجذور إلى الأطراف" يعني ماتلقين من فوق لون ومن تحت لون".
يمكنك التركيز على بعض الخصل لعمل هايلايت خفيف.
لايتغير اللون مع الوقت كأنك توك صابغتها.
يمكنك أن تصبغي أي صبغة فوقها بحيث تكون بديل لسحب اللون.

عيوبها..
غير مناسبة لتغطية الشيب "مع إن صغيرة مافيني شيب ماجربت بس أكيد ماتغطيه لأنها تفتح الشعرة".
لاتنفع للشعر الخشن الجاف جدا".


ثالث تجربة لي كانت مع LORE'AL EXCELLENCE مع المصل الواقي مكتوب عليها الصبغة الأولى للأستخدام في البيت... حلوة وفعلا المصل يقلل الضرر على الشعر.. بس أنا حطيتها وشعري مصبوغ بسن إن وطلعلي لون روووووووووووعة ماأدري اللون هو من اللوريال أو اختلط مع اللون القديم لشعري بس النتيجة حلوة.

لوريال إكسيلنس:

مميزاتها...
المصل الواقي نفع شعري خصوصا" الأطراف.
لمعته حلوة .
سريع المفعول"اللون يظهر بعد 45 دقيقة".
تغطية كاملة للشعرة من فوق لتحت" بالتالي حلوة للشيب".
معاها بلسم مو طبيعي.

عيوبها...
ألوانها صعبة أغلبها أشقر.
ماتطلع من الشعر بسهولة عند الغسل.


وتجربتي الرابعة مع غارنييه حلوة الصبغة وخفيفة عالشعر بس مأظن بجربها مرة ثانية مادري ليش ماحبيتها.. يمكن لأن ألوانها عادية..

غارنييه:

مميزاتها...
ضررها خفيف على الشعر.
لمعة وحيوية للشعر.
سعرها مناسب.

عيوبها..
خفيفة بسرعة تروح.
اللون يتغير مع الوقت وغسل الشعر.
لوكنتي صابغتها على هايلايت.. يرد الهايلايت يظهر كأنك ماصبغتيه بعد شهر واحد فقط وأقل بعد.
تحتاجين لعلبتين لو كان شعرك للكتفين.. وكل ماطال شعرك زادت الكمية.

وتجربتي الأخيرة قبل أسبوعين صبغت لأول مرة في الصالون لأني كنت ناوية أعمل هايلايت بلاتيني وماينفع بالبيت.. للأسف ماشفت شنو ماركة الصبغة اللي حطتها لي.. بس اللي ريحني إني ماسوي سحب لون والفضل طبعا" لSUN IN..


وباختصار من تجارب خواتي .... مع إختلاف أنواع شعورهم"بس تقريبا شعورهم ناعمة" أجمعو على اللوريال كصبغة دائمة للأستخدام المنزلي...
مع كثرة أنواع اللوريال إختاري اللي يناسب شعرج وبشرتج.....



ومن رأيي الشخصي اللي ناسبني وصارلي من 6 سنين ماأغيرها الSUN IN رووووعة وبالسنة الأخيرة بديت أغير "بسوي نيو لوك"....
عجبتني اللوريال إكسلنس لدرجات البني والكستنائي.....
الويللا ماحبيتها حيل قوية عالشعر....
والفيفا ماجربتها بس أمي تستخدم اللون الأحمر حلو ومايتغير عموما" معروف الفيفا مشهورة بالأحمر اللون يطلع غني وواضح.... جربو أحمر ساطع للي يحب الأحمر......

وآسفة على الإطالة بس الموضوع شدني قلت أفيدكم حسب تجربتي مع الصبغات.....:21_11:...