لا تطنشوووني بنات - منتديات عروس

أ

أمل مقتول

عروس متألقة

15-04-2003 | 11:16 PM

ممكن مساعده
السلام عليكم بنات

بغيت منكم خدمة ........

ممكن يا بنات واللي عندها خبرة بالخلطات ... تكتبلي جدول يومي عشان امشي عليه الصراحه من كثر الخلطات مب عارفه شو اسوي ( سواء للجسم أو الشعر ) .....

بليييييييييز بنات ساعدووووني ( عندي مناسبة قريبه ) على شهر 9 انشاءالله

انشاءالله ما طولت عليكم

X

XxSnow WhitexX

مشرفة سابقة

15-04-2003 | 11:43 PM

حددي نوعية بشرتج الغاليه وما يسر خاطرج الا الطيب :) هذا بنسبه للويه..

بعلمج طريقتي الغاليه وشوفي الي يريحج سويه..

**جهزي هالاشياء:
1- كريم مرطب للجسم ( جليسوليد) تحصلينه في الجمعيات أو الصيدليات علبه لونها أحمر صنع المانيا..
2- فازلين..
3- ماء ورد..
4- خلطة ( ليمون+ زيت الزيوت+ ملح)..
5- ليمون+ جليسرين.. جلسرين سائل يبيعونه في الغرشه اتحصلينه في الصيدليات..
6- صابونه مغريبه+ ليفه.. من عند العطار..
7- زيت السمسم.. من عند العطار..
8- زيت جوز الهند سي بي سي من الجمعيه..
9- حمام زيت (فاشكول الي بالثوم) أو أي نويعه ثاني خذيها من الصالونات..
10- فوطه صغيره..
11- Cover .. البلاستيك الي يغطون به الشعر يوم السبوح..

أول شي..
قبل لتسبحين بساعتين أو 3 سوي هالاشياء انزين..
1- صنفره للجسم: خلطة ( ليمون+ زيت الزيوت+ ملح).. وتمي افركي الجسم ليما يطلع الوصخ..
2- ويوم بتخلصين من الجسم انتقلي للشعر.. خذي الزيت (جوز الهند) وسخنيه شوي لينما يصير دافئ ووزعي على الشعر كامل وسوي مساج لمدة ربع ساعه وعقصي (عجفي) الشعر..
3- بعده بساعتين او 3 سوي حمام المغربي..
4- وعقب ما اتخلصين من الحمام المغربي اغسلي شعرج بالشامبو المناسب وخذي حمام زيت وحطي على شعرج وتمي اتسوين مساج لمدة ربع ساعه وعقب خذي الفوطه الصغيره طبعا اتكون مبلوله بالماي الدافئ جدا وغطي فيه الشعر وعقب ييبي البلاستيك الCover مال الراس وغطي فيه الراس (الشعر).. وبعده بنص ساعه غسلي شعرج عادي بالماي..
5- عقب ما اتخلصين جففي جسمج وشعرج وعقب حطي ماي ورد شوي شوي على الجسم..
6- وزعي كريم جليسوليد على كافة الجسم ما عدا الاماكن الحساسه..
7- خذي خلطة ليمون+ جليسرين.. حق الباط يبيض ويقضي على الروائح..
8- لا تجففين شعرج على طول او اتسحينه (اتمشطينه) اتريي لين ما يجف شوي ويكون مبلول شوي هنيه سحي الشعر وحطي اي كريم مرطب للشعر..

9** قبل لتنامين يوميا افركي الجسم بزيت السمسم (يبيض+ينعم+ تتخلصين من السيولولايت والخطوط الي في الجسم+ يشد الجسم)..

10** عشان تتخلصين من التشققات الي في الريل ( الرجل) استخدمي الفازلين يوميا وبعد ربع ساعه لبسي الزبلاق (الجراب)..

11** لنتايج أحسن استخدمي الزيت للشعر كل يومين أو 3 وحمام زيت في الاسبوع مرتين فقط.. وحمام المغربي في الاسبوع مره..

وأي سؤال انا في الخدمه ان شاء الله :)

أ

أمل مقتول

عروس متألقة

16-04-2003 | 01:24 AM

ماشاءالله عليج ...... مشكوووووووورة يالغاليه :D

يالله انتظر المزيد منكم يا بنات :D