موقف تأثرت به

السلام عليكم ..


كيف الحال ؟؟


كل عام وانتوا جميعا بخير يا رب ..



بقول لكم موقف اثر فيني كثيييييييرا ..


قبل كم يوم انا كنت في العمرة .. وكان معانا بنفس الحملة ناس من منطقتنا من بينهم عائلة مكونة من زوج وزوجته وعندهم عيال اثنين صغار ومرافقهم ابو الزواج وعمره في الخمسينات ..


المهم امي تعرفهم اكثر خبرتني بقصتهم :: تقول ان في مشاكل بين الزوج وزوجته وبين الزوجة واهل زوجها وانها دايما تحرد عند اهلها ، وكثرة المشاكل ادت الى مرض الزوج بالضغط والسكر لانه كان دايما يحاول يهدئ المشاكل بس الزوجة كانت تكبرها ..

المهم انها هالفترة اصرت انها تسافر وزوجها اختار انه يروح العمرة ، اهله قالوا خلوا اليهال هني لا تاخذونهم وتتعبون معاهم .. الزوجة لما شافت موقف اهل زوجها من اليهال اصرت انها تاخذهم معاهم مع ان اعمارهم صغيرة ، الكبير عمره 3 سنوات وشوي والصغير 11 شهر .. على الرغم ان امها بعد قالت لها خلي اليهال عندي وسافري غيري جو مع زوجك لكنها رفضت عناد في اهل زوجها ..


اللي اثر فيني .. ان ابو الزوج لما شاف ان مرت ولده مصرة على موقفها وانها تاخذ اليهال معاهم .. وان ولده كان تعبان من مرض الضغط والسكر خصوصا انه وايد يطيح عليهم ويرقد في المستشفى قرر ان يسافر معاهم علشان يساعد ولده على عياله وهو كبير نوعا ما في السن ..
حسيت شكثر هو يحب ولده وقاعد يضحى علشان ولده .. وكنت اشوفهم هناك في السوق مثلا شلون كان الابو يحمل الكبير والجد يحمل الصغير والام تتمشى على راحة .. <<< وبصراحة كنت احس انها تحتقر ابو زوجها (w)

واللي استغربت منه ان انا اعرف الام وهي شخصية حبوبة وملتزمة دينيا وتدرس بالجامعه .. شلون تطلع منها كل هالحركات !!!



يمكن انتوا تشوفون الموقف عادي .. لكن انا لان عايشت هالموقف فأحس انه اثر فيني وايد ومو قادرة انساه وحبيت اني اعرضه في المنتدى واشوف ارائكم ...


بصراحة انا اشوف ان مثل هذا الاب الحنون " الجد " ينحط فوق الراس والعين واكثر بعد .. وانا شفت مواقف كثير للآباء لكن مثل هذا الموقف في مثل هذا السن ما قط شفت :21_149: