نفيد ............ ونستفيد ....يا امهات ؟؟؟

موضوعش حلو اويد واستغرب ليش ما لاقى له صددى بس يمكن لاني احس الحين القسم بالامهات وايد صار نشيط :)

وتم التقييم

وبالنسبة الى تجربتي يمكن اكون اخذت من تجارب الاهل عامه مو بس من امي يعني اخذت من خالتي وامي وكل اللي اشوفهم حولي

اول شيء على الام تفهم البنت نقطه مهمة مهما احتوت البنت وعطتها وكرست لها كل شيء تبقى البنت عايشة في مجتمع مختلف مو لازم تحصل حياة مثل اللي عايشتها عند امها وانه الحياة غير اللي تعلمته في بيت امها بس وانها ساعات تعيش في مجتمع متناقض بعاداته وقناعاته وتصرفاته عن اللي متعودة عليه

يعني بصريح العبارة لازم تتخرج البنت من البيت وهي عارفة شلون تتاقلم مع اي مجتمع وتاخذ منه الزين وتحاول تبتعد عن الاشياء الشينة فيه ...

امي دلعتنا وايد والحمد لله لكن بزيادة يعني لين قلنا لها ما بنساعدش في اي امور المنزل تقوم هي تسويها وهي ساكته المفروض كانت تصر علينا من هالناحية وتعلمنا على الشغل اشوي خخخخخ والحين اشوفها مع اخواني ما تخليهم يسوون شيء الى نفسهم يعني معتمدين عليها في المرتبة الاولى مع انهم في الجامعه وبعضهم متخرج بس حتى كوب الحليب تحطه في يدهم يعني انا افكر شلون بيعيشون مع زوجاتهم وهم مدلعين وايد ؟؟؟ وفي اخر فترة كانت تسافر مثلا ولازم وحدة منا احنا البنات ( كلنا متزوجات) تكون في البيت حتى لو السفرة يومين علشان اقل شيء تتاكد انا قمنا بمهمه تقعيدهم من النوم لانها شايلة همهم في ابسط الامور مع انهم كبار ويقدرون يعتمدون على انفسهم

بصراحة احاول اني اكون مثل امي الله يخليها من ناحية العطاء بس ما اقدر احس روحي اتعب مع اني عندي 2 بس :( شلون لو جبت اكثر ؟؟؟؟

بس شيء حلو في امي واشكرها عليه طول عمري ... خلال تربيتنا ما علمتنا نحقد على احد او نرد على احد لما ياذينا ولو بكلمة او اذا كان كبير في السن كانت تقول ما عليه مو قصدهم او هم طيبين وهم يحبونكم والله ما قالوا او ما عاتبوا بس الكلمة خانتهم صدق صدق اشكرها على هالشيء اللي خلاااني اخلي للواحد الف عذر قبل لا اتهمه او احقد عليه ... فاتنمى اربي اولادي في هالمجتمع بهذي الطريقة


الله يخلي لي امي وابوي يا رب ويطول في اعمارهم ويخلي لكم والديكم يا رب



وتسلمين صاحبة الموضوع على هالوضوع الحلو :)