تعالو شوفو اشلون اتبدلت حياتي

السلام عليكم ورحمة الله وبركاته

شخباركم يا خواتي أولا العيد ع الأبواب وحابة أبارلكم بالعيد كل عام والجميع ابخير وعافية

طبعا أنا قطعت فترة عشان أعيد حساباتي ولا يخفى على أغلبكم الموضوع أو المصيبه اللي أنا سويتها بعنوان (خنت زوجي وضايعة )

حابة أقولكم عن أخباري ... قبل فترة قعدت مع نفسي وواجهتها بحقيقتها المقززة ...أدركت حقيقة نفسي بعقل واعي وقلب صافي خبركم مافي أحد غيري أنا ونفسي والله محاوطني برحمته وستره علي فليش أخادع نفسي ... أنا فعلا كنت بليا ضمير مع أحن قلب اللي هو زوجي الله يحفظه بغربته ... يمكن الدلال الزايد الحب الزايد العاطفة الزايدة العيشة الراهية كلها خلوني أبطر ع النعمة ...
الله أنعم علي بشغلات واااااااااااااااااااااااااااااااااااااااااايدة العلم الجمال النسب الشغل الزوج الولد كل شي عندي سألت نفسي ليش سويت جذي ... تدرون شو اكتشفت ؟؟؟ اكتشفت إني مو مؤمنه بالقدر لابخيره ولابشره حتى لو ادعيت إني مؤمنه بها الشي كله كلام بس مافي فعل ... كانت هذي بداية المواجهة بيني وبين نفسي ..اعذروني على الإطالة ... يمكن وحدة منكم بتقول حنا اشدخلنا تحكيلنا هالقصة ... انتوا مرايتي اللي تواجهوني بالحقائق اللي ماتتريون مني شي ولاراح اتجاملوني بشي ...أنا كتبت عشان نتعلم كيف نواجه حقيقة أنفسنا ...

نرد للموضوع ... مثل ماقلت السبب الرئيسي خلو قلبي من الإيمان بالقدر صحيح أصلي أصوم أتصدق أستغفر ألخ ... بس ثقتي برب العالمين ماكانت قوية والعياذ بالله ... استغربت من نفسي يا أم عزوز هذا قدر من الله مكتوبلج اتكون حياتج مع هالشخص ليش التكبر ؟؟؟ تتكبرين ع رب العالمين ؟؟ أنتوا امنوا أصلا ؟؟؟ هه عبالي بحبي المزيف راح أواجه الدنيا وفي النهاية راح أسعد مع الشخص اللي حبيته تفكير غبي خالي من المسؤولية ... ولو أخذته شو السعادة اللي بحصلها مع انسان مايفكر اللي اشلون يمتع نفسه وبس انسان جبااااان يخاف من ظله حتى الضحكة محرمها ع نفسه والأكيد اني راح أعيش بغم وهم لأني متعودة ع الدلال ومتعودة ع كلمة أحبج ليل نهار ..
بعد هالحقيقة المرة قررت أني أترك هالشي واتوكل ع الله في كل صغيره وكبيره (وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وأنتم لاتعلمون ) صدق الله العظيم صح الواحد لو يتمعن بقلبه وعقله بها الآية الكريمة راح يتوكل ع الله ويثق برب العالمين وأنا ناوية ان شاء الله أقوي أيماني برب العباد وأنا مؤمنه ووائقة إنه زوجي خير الله سخر لي .. وابعد عني الشر ... ياحبيبي يالله اشقد أنت عطيتني واشقد أنا جحدت بنعمتك

إغفرلي يارب وسامحني

الشغلة الثانية اللي امدمرة حياتي الحرية الزايدة اللي مالها معنى والغرور الزايد ..هه على شو مادري يمكن ع الهبل اللي أنا فيه ...شفت واااااااااااااااااااااااااايد في دنياي الخير والشر ألين مادمجت الخير مع الشر في شخصيتي ، انسانه مريضة عايشة بشخصيتين أنا ما أكره زوجي بالعكس أنا أحبه والجدار اللي بينا واللي كنت متصورة أني أحبه وطلع جذاب خلااااااااااص انتهى من حياتي حتى لو فيه حنية أو شوق أو ذكريات بين فتره والثانية هذي لحظات ضعف ماراح أخليها تأثر بحياتي وتخليني ألتفت لورا راح أكون أقوى والحزن راح أحرمه ف حياتي محد يستاهل حزني أو إني أنزل دمعة عشانه غير زوجي وعائلتي وولدي ماراح أخلي الحزن يخيم على حياتي مره ثانية وأقعد أعيش في كدر باقي عمري ..كفاية اللي ضاع من عمري بذل وقهر وظلم لنفسي ... مايسوى علي

هذي حياتي وهذي حقيقة النفس والأخطاء كثيرة بس البداية

البداية الجديدة لحياتي ...

الماضي ماراح ألتفتله بتييني لحظات ضعف لكن بإيماني وإصراري ماراح أخليها ادمرني مرة ثانية ...ذكرى أليمه وما أقول غير حسبي الله ونعم الوكيل فيه وف كل ذيب مثله بتقولون أنتي غلطانه بعد عطيتيه مجال صح بس أنا بنت عواطفها هي اللي اتسيرها وأنا عرفته من صغري وعاش حبه داخلي 10 سنوات عقلي قليل لما كنت أستخدمه معاه أما الحين عواطفي بخليها في بيتي ومع زوجي وولدي وبره راح أستخدم عقلي وبسسسسسسسسسس

في الفترة الأخيره كنت أقول الحب خراب ودمار بس اكتشفت انه الحب أسمى النعم حب الأهل والحياه حب الله ورسوله قبل كل شي أما الحب اللي يتبني ع مقابلات وغراميات بالتلفون هذا مب حب هذا طريق الهلاك واللي أنا هلكت فيه

ضروري الواحد يؤمن بالقدر خيره وشره ويتوكل ع الله في كل تفاصيل حياته صدقوني هذا هو مفتاح السعادة الدنيوية واللي أنا توني بسسسسس حصلت المفتاح

الله أنعم علي بنعم لا تعد ولاتحصى وأهمها الإيمان أنا انسانه مسلمة والحمدالله جم تسوى هالكلمة ..ولااااااااااااااااااااااازم وبإذن الله راح أحافظ ع هالنعم وأصونها راح أركز ع بيتي وزوجي وأهلي وشغلي وع العبادات

عزيزاتي أكيد في هالمنتدى واااااااااااااااايد من البنات اللي مروا بنفس اللي مريت فيه اللي نشرت قصتها واللي آثرت إنها تقرا مشاكل شبيه لمشكلتها هذي مصيبتي كانت بين أيديكم وأغلب اللي في القسم قراها ورد عليها والحين أنا أقدملكم نفسي الجديدة اللي انولدت من يديد بفضل الله ودعواتكم لي وصرخاتكم اللي ف إذني كانت مؤلمة وجارحة بس أنا أستاهل أكثر من اللوم والعتاب

أشكر كل من وقف معايا ف محنتي وصحاني من كابوس مزعج عهد علي إني ما أرجع للأرف اللي كنت فيه عهد بيني وبينكم وبين رب العالمين

همسة بإذن كل وحدة عندها نفس مشكلتي ( إرجعي للصواب ولادمرين نفسج ترا الله ينظرلج

يارب أنا خطييييييييييييييت اغفرلي وسامحني ياربي يارحمن ارحمني وثبتني ع طاعتك

ادعووووووووووووووووولي بنات الله يهديني لزوجي ويسخرني له ويبث حب زوجي في قلبي ..

إختكم اللي انولدت من جديد
أم عزوزي الحلو وتابعوني انشالله في مواضيع جديدة وفي أقسام ثانية
تحياتي لكم جميعا وكل عام وانتوا ابخير