وردات الجوري بالسميد .. بالخطوات المصورة..

عجبني شكل هذا الحلو وحبيت اجربه ... وطبعا صورته لكم عشان تستفيدون منه ...

المقادير:
- كوب دقيق
-كوب وربع سميد
-ملعقة صغيرة بيكنج باودر
-ملعقة صغيرة خميرة فوريه
-علبة قشطة
-اصبع زبده (100 جرام) مذوبه على النار

الحشوة:
- 2 تفاحه مبشورة
-3 ملاعق سكر بني (ممكن استخدام السكر الابيض اذا لم يتوفر البني)
-ملعقة قرفة
أو
-تمر معجون مع جوز
انا استخدمت حشوة التفاح ..

الطريقة:
1- اخلطوا المقادير الجافة مع بعض ..
2- اضيفوا لهم الزبدة والقشطة واعجنوا..
3- اتركوها تقريبا ربع ساعة عشان ترتاح..


4- في هذي الفترة انجهز الحشوة.. نطبخ جميع مقادير الحشوة الي هي التفاح والقرفة والسكر البني على النار حتى يتبخر ماءوه..


5- نقطع العجين الى كرتين ونفرد كل كره ونقطعها على شكل دوائر..
6- نقطع كل دائره مثل ما موضع بالصورة.. اقطعوا خطيين متوازيين بحيث انكم ما توصلون لمنتصف الدائرة..
7- ضعوا الحشوة في المنتصف..
8- لفي طرفي العجينه الي في النص .. اول انلف الطرف اليمين..
9- انلف الطرف اليسار وانسكرها عدل عشان ما تفتح..
10- بعدين لفوا الطرف الخارجي وسكروه على الحشوه وبيطلع شكلها مثل الورده وسكروها عدل عشان اذا حطيتوها في الفرن ما اتفج عندكم ويخترب شكلها .. حاولوا انكم تضغطون من تحت وتفتحونها اشوي من فوق عشان يطلع شكلها مضبوط..


11- رصوهم في في الصينية واخبزوها وترى ما تاخذ وقت من ربع ساعة الى 20 دقيقة..


12 يوم بتطلع من الفرن سقوها بالشيرة بس اشوي وحاولوا تصفونها من الشيرة الزايدة عشان ما اتصير رطبة .. انا بدل الشيرة استخدمت عسل ورشيت فوقهم فستق مطحون ..:Zb_sor1:للاسف الصورة الاخيره عقب ما طلعتهم من الفرن وزينتهم انمسحت وانا ما ادري وما اكتشفت هذا الشي الا بعد ما طرشت الحلو ويا بو الشباب ايوديه معاه الميلس .. خسارة والله طلع شكلها ايجنن ..