عطوني حل لولدي والمرضعة

هلا اختي ربي يساعدج يعني هالمرحلة أصعب مرحلة بحياة الطفل

انا حبيبي ابد ما عانيت ويا عيالي واهم بروحهم يتركونها ربي لك الحمد

بس انتي حفزيه وشجعيه قولي له انت كبير وقوي ومن هالكلام اللي يحبونه الاطفال

واذا يحب شخصية كرتونية قولي له انه هالشخصية ما تحب اللي يمصون المرضعة

وكرهيه فيها شوي شوي واخذيه انتي للزبالة يكرم ويعز وجه السامع وخليه يرميها بايده

يعني حاولي معاه أكثر واكثر وان شاء الله ربي يهداه ويفيد معاه

دعواتي

شوفي أختى آنه شسويت مع ولدي ويارب تنفعك الطريقة..... طبعا ولدي كان معاند مايرضى يشرب الا بالرضاعة ومستحيل يشرب بالكاس،، كان له سنتين وشهرين،،، خذيت الحلمة وطقعتها بالمقص ، فتحها شاف الحلمة خربانة قال شفيها،، قلت له الفار اللي في المطبخ أكلها،، ومن يومها مو راضي يشرب ورمى بنفسة الرضاعة بالزبالة...

أحلى شوق..

لك الف شكر ..

بس انا سويت الا قلتي عنه ان أخليه بيده يرميها ..

ومع هذا من يبي ينام يصيح صياح الا في البطابق الأول يسمعونه ..



رانيا البحرينية ..

الليلة إن شاء الله بسوي طريقتش وعلى الله ..

مشكورة حبيبتي..

دعواتكم ..

اتصدقين انتي نهتيني على شي .. انا ولدي عمرة سنتين و4 شهور والين الحين ما فكرت اني اقطع عنه المرضعه .. لكن لازم احاول .. بس عندس سوال يعني اذا قطعت عنه المرضعه كم كوب حليب اعطيه ..؟؟

وما بيجوع بالليل يعني ما بينش يصيح ..؟؟

اتصدقين انب الين الحين احاول معاه يترك البامبرز لكن مب راضي

حطي في حلمة المرضعه فلفل

وبشوفها حاره وماراح يبيها

وحاولي في الليل تعطينه وايد عصيرات وفي اخر شي يعني اذا يبي انام اعطيه ماي

واذا قعد في الليل شربيه ماي

جربي هذي الطريقه انشالله تفيد

والله اساعدش

انا عندي طريقة ..

هي اتظحك و مؤرفة شوي ...


جربي اتحطين حليب شويه في المرظعة و حطي مثلا حشرة او زاحف من الزواحف

بس شكله يكون جريب من الحقيقي ... بلاستيك او مطاط ..

يمكن ينفر و يكره المرظعة ...

يا أمهات يا حلوات :888345: بخصوص الرضعه حطوا فيها شي طعمه مر أو فلفل :angry:كلما طلبها الولد
وكذا راح يكرهها :mad2: و حاولوا لما تعشوا الأولاد تخلونهم يشبعوا :21_21: وقبل لا يناموا
عطوهم حليب بس بالكاسه ولو رفضوا قولولهم هذا الموجود :21_179:

الله يعينج يا رب

انا ام زوجي تقول لي ولدها اصغر واحد ما كان يرضى يرضع الا من حلمة معينة
تقول قطيتها فالزبالة الله يكرمج وغيرتها له لانها تمت معاه سنتين تقريبا وصارت قديمة وتغير لونها لكنه ما رضى غيرها الا تطلعها من الزباله!!!

بس انتي حاولي تغرين ولدج
يعني اخذيه محل الالعاب وخلي لعبة تدخل في خاطره تحسين انه يبيها وقولي له اختار اللعبة اللي تبيها
بس لما يختارها لا تشترينها له قولي له اذا تركت المرضاعة بشتري لك ياها

والله يعينج

ام عبدالله عادي اليهال نفس الوقت بيقولون اوكي بس يوم بيملون من اللعبه بيقولون خذي اللعبه وعطينا المرضعه ..

وبعدين قوم بو سنتين وسنتين ونص ما يفهمون هالكلام ...

انا بنتي نفس الشي لازم تشرب الحليب في المرضعه..

بس انا حبيت اسأل هو خلاص يعني مانعطيهم حليب.. او انه بس حليب في المرضعه مانعطيهم إياها؟


يعني إذا مانعطيهم حليب .. في الاساس مابشتريه لها عشان تعرف انه ماشي حليب في البيت ........

هلا خواتي

شوفوا وش سويت بنتي ن اكثر العضوات بالقسم يعرفون ان عندي بنت عمرها سنتين وجم يوم ، المهم انا جربت معاها هذي الطريقة من شهرين تقريبا وجابت نتيجة جدا ممتازة

بنتي متعلقة بالمرضعة بدرجة غريبة وين ما تروح وتجي يا ماسكة المرضعة يا حاطتناها بحلجها ،،
المهم اخذت قرار لآزم اخفف عنها المرضعة تمهيد للفطام
وفعلا نجحت معاها لين خليتها تشرب مرة وحدة باليوم يعني بس بالليل عند النوم واذا قعدت من النوم اعطيها المرضعة علشان اتواصل بالنوم
خطرت بالي فكرة قلت بطبقها بس يبغلي لي اشويه صبر جاء وقت النوم وصاحت بنتي تبغي مرضعة قمت حطيت بالمرضهة ماي لرقم 8 اي 240 مل وحطيت ملعقة وحدة حليب
تدرون اكيد بصير طعم الحليب مب حلو وقلت اكيد ما بترضى تشربها
والغريب ة ان اهي شربتها كلها بدون ما تقول لي شئ ويوم خلصت المرضعة قالت لي ماما بح خلاص

بصراحة انا وابوها استغربنا من الموضوع واتوقعنا ردة فعل ثانية قلنا اكيد بتقوم وبتعفس وبتصيح بس ما صار ولا شئي خطرت بالي فكرة حطيت حلمة المرضعة في قليل من الماء كنت ناقعة فيه صبره " تآخذينها من الحواج " مثل الحجرة لونها بني مائل للأسود بس ايكون طعمها مر جدا

سويته كثيف وحطيته على الحلمة وصار لون الحلمه اسود وغطيتها بالمغطاه ، اويوم صاحت وقالت تبغي مرضعة جبت ليها المرضعة وأول ما شافت اللون الأسود قالت يع يع ورمت المرضعة

وقامت اتصيح اشوي وكل ما اتقول تبغي مرضعة اجيب ليها المرضعة وتفلتها ونامت بعد معاناه طويله وياها البارحة ونامت وهي حاضنة المرضهة على صدرها

كسرت خاطري وقلبي امعورني عليها بس هذي كانت البدايه ، بعد يومين بالضبط كنت اناديها اقول ليها ماما تبغين حليب قالت لي يع يع واخذت المرضعة ورمتها بالزبالة وللحين اذا اتشوف اختها الصغيرة اللي عمرها 3 شهور تشرب المرضعة اتقول يع يع والحمدلله الحين نستها كلش

ما شاء الله البنات يعطون حلول مختلفه واعتقد انها مفيده

يارب تنفع ولدك ويترك المرضعه

انا بقولج على طريقتي اللي استخدمتها حق بناتي

جيبي شاي ليبتون ورق حطيه في المرضعه مع شوي ماي 3-5 قطرات ماي ورجي المرضعه بتلاحظين الورق ينتشر في كل المرضعه وبيصير مثل النمل وحطيها يدامه
لا يشوفج وانتي تسوين الحركه..

اتمنى ان الطريقه تنفع معاج...