تقرير مفصل عن سفرتنا & صور & مواقف & أحداث

أ

أريش العين

عروس ماسية

24-08-2007 | 02:55 PM

سلام عليكم ورحمة الله وبركاته
شحال كلن بحاله .. ربكم كلكم بخييير وصحة وعافيه
الموووهم يايتنكم اليووم بتقريير مفصل عن سفرتنا
صور واحداث ومواقف
اخليكم مع التقرير

ملاحظة : ترى التقرير طويل اللي مافيه حيل يأجله حق وقت ثاني :gum:

اليوم : السبت 28/7/2007
توقيت الطيارة : ثمان المسا
المطار : مطار دبي
عدد المسافرين : سبعه ( باباتي وماماتي وخواتي الثنتين واخواني الاثنين وانا طبعا اول وحده )
وجهة السفر : سنغافورة وماليزيا
مجريات اليوم : قمنا كالعادة مثل أي يوم عادي وتريقنا وبعدين تغدينا وبعدين قعدنا نجيك على اغراضنا ونسكر الشنط
هاااه كل شي جاهز ؟
خل نتاكد
الhand bag جااهزة وتترياني اشلها خخخخ

ملابسي اللي لبستهم وانا سايره

ونعولي عزكم الله .. ادري شكلهم يضحك ههههههه

والاي بود طبعا

وشنطنا جاااهزة ( السودة مالتي والبنية مالت اختيه )

خلااااص كل شي جاهز ... بس ناقص شي بعد ؟
جوازاتنا .. كيف بنسافر من دون جوازات ..

اوكيييك الحين نحن جاهزيين
طلعنا من العين عالساعه اربع واشوي يعني بعد ما يه ابويه واخواني من صلاة العصر على طول ..
وصلنا مطار دبي عالسعه خمس ونص ولا ست الا ربع تقريبا .. ( كله من محمد اخرنا الحبيب يوم وقفنا في شيشة البترول طلع من السيارة اللي كان فيها ويانا في سيارتنا .. اونه بسير وياكم L .. يعني عز الله وصلنا المطار ونحن مصدعيين من حشرة محمد .. بس امي ما سوتله سالفه اول ما شافته ركب عطته كلمتيين في الصميم خخخ وستين مليون تحذير .. عشان يسكت وما يصدعها .. ) :2_106:

وصلنا المطار .. ونزلنا شنطنا وسلمنا على اخواني الكبار ( ماسارو ويانا L ) ودخلنا وخلصنا الاجرائات وسوينا ريااضه اشوي خخخخ اللي داخل مطار دبي يعرف انا شو اقصد .. من كبر المطاار ومن كثر ما نمشي تعبنا .. واخيرا وصلنا وركبنا الطياره ..
طرنا بالضبط الساعه ثمان بتوقيت الامارات .. الامور كانت طيبه واحسن شي انه كان بالليل عشان الشياطين اللي معانا يرقدون خخخخخخ

7 ساعات واكثر اشوي .. قضيناها في الطياره

حمد :gum:ولله الحمد رقد لكن محمد ما غمضت له عين طول هالسبع ساعات مب فالح غير يقولي وديني الحمام:gum: ووديني الحمام ( عزكم الله ) احلى شي يوم دخل الحماام ومليت من كثر ما اترياه فروحت عنه .. ولما بغى يطلع ما عرف يفتح الباب :2_106: كان وده يذبحني ذييج الساعه .. قام له واحد وفتحله الباب وهو يضحك عليه خخخخخخخخ ومحمد معصب

:9_28:

وصلنا الاجواء السنغافوريه الساعه ثلاث ونص تقريبا بتوقيت الامارات .. تأخرنا خذنا تقريبا سبع ساعات ونص .. بسبب الجو وشغلات انتو ما تعرفونها خخخ
:flower:
:flower:
:flower:

هذي صورة خذتها من الطياره لمنظر الشروق

وهذي بعد

بعد ما هبطنا بالسلامه في مطار سنغافورة .. كان في ناس من السفارة مستقبلينا .. ريال وحرمة وكاانت الحرمه واايد زينه وحبوبه وتسولف باللغة العربية الفصحى .. وتخبرنا عن الاماكن ووين نروح وجييه ..
:9_33:
خلصنا شغلنا بسرعه في المطار واول ما طلعنا لاحظنا انه الجو رطب بس مب حر ومب برد .. يعني زييين .. ركبنا السياره والحمدلله انها كفتنا كلنا .. جنها باص ..

:9_33:
وصلنا الفندق وقعدنا شوي في اللوبي
صورت كذا صورة بس ما طلعت حلوه ومب مبينات عدل .. تعرفون ماكان لي بارض والمود في التصوير يلعب دوور .. كنت في حالة يرثى لها بصراحه .. رقاد في رقاد في رقااد .. خاصة انه ما غمضت لي عين في الطياره

:9_33:
سكنا في فندق ماريوت .. فندق خمس نجوم ووايد اوكييه وعلى قولة الريال اللي من السفارة يعتبر من احسن فنادق سنغافوره ...

نظيف وخدماتهم اوكيه .. بس الغرف كانن صغييره
واول ما وصلنا كنا حاجزين 3 غرف بس ما لقينا غير غرفة وحده جاهزة

نحن ما سوينالهم سالفه دخلنا هالغرفة وكل واحد فرشله في مكاان ورقد :2_106: تقول اموااات مب ناس حيه
انا دخلت اتسبح ويوم طلعت لقيييتهم كلهم راقدييين خخخخخخخخخخ قعدت ادورلي مكان ارقد فييه ... الغرفة صغيره وبس فيها سريرين وطبعا الاثاث ماخذ حيز من الغرفة ... امي وابويه واخواني الصغار نامو عالشباري ووحده من خواتي راقده عالكرسي ( صوفا ) واختي الثانيه فارشه تحت .. رحت ورقدت عداالها عطووول ماشي وقت افكر وين ارقد الحينه :gum:

:9_33:

[SIZE="5"]قمنا تقريبا عالساعه 2 الظهر .. وعبالنا يوم ثاني وكل النشااط فينا ... يالله بنحووط
نزلنا تحت ولقينا وحده من مكتب سياحه اظني .. رتبتلنا كل شي ..
وكل شي موثق .. تعالو نشوف وين رحنا

اول شي هذا الباص اللي رحنا فيه .. وكان معانا ناس مب بس نحنا ..

لقطة عالسريع من الشارع

بعدين وصلنا للمكان المطلوب
دخلنا المول وقعدنا نتمشى وبعدين طلعنا للبحر وركبنا سفينة كبيرة

كان الجو حلووو .. استانسنا .. تقريبا 3ساعات قعدنا وضحكنا وتعشينا وبعدين رجعنا
بخلييكم مع الصور ..

غرفة الكابتن عقولتهم ..

اونهم مندمجيين في الطبيعة .. اخواني الصغار حمد ومحمد

منظر الغرووب

وبجذييه خلصت رحلتنا الاولى وردينا للفندق
بعدنا المشواار طويل
تابعوني في اليوم الثاني [/SIZE]

أ

أريش العين

عروس ماسية

24-08-2007 | 02:59 PM

وبدا يوم ثاني
قمت من الساعه 5 الفجر .. وكلهم كانو رقوود محد غيري انا
وبصراحه مليييت ..
فتحت الستاره عشان اللي عندي يقومون .. ولكن بائت محاولاتي بالفشل .. قعدت اصورهم وهم راقديين :2_106: ويوم نشو صدمتهم بالصور خخخخخخخخخخخخخخخخخخخخخخخخخخخ
هذا منظر الشرووق ..

وهنيه بعض الناس راقدييين ههههههههههههههههههههه

:2_106::2_106::2_106::2_106:

طبعا بعديين نشت العايلة الكريمه من الرقاد .. عالساعه عشر يمكن .. وانا من الساعه خمس غاابشه بروحي حليلي 
:9_33:

اليوم هذا رحنا فيه لمنطقة اسمها سنتوسا
مكااان رائع رائع رائع .. بكل معنى الكلمة ..
ركبنا نفس الشي الباص .. وصلنا لمكان ثاني وركبنا بااص كبيير .. وكان معانا وايد نااس .. شي عرب وشي اجانب
وصلنا لمكان مرتفع .. وهنيه بعض الصور اللي خذناها ونحن في الطريق

بعدين وصلنا لمكان نركب فيه التلفريك عشان يودينا لمكان ثاني ... وقفنا نتريا دورنا
وهنيه حمد والملل وااضح علييه

وكان مجابلنا وااحد ايبيع ايسكريم ... يمي يمي حد يبى

عقب ركبنا التلفرييك ... وصاارت الحفله عااد داخل التلفرييك هههههه امي واختي قابضات في بعض .. من الخوووووف خخخخخخخخخخ
وصادف انه اخويه متصل من البلاد يسلم .. ويسمع الحفله مسكيين تروع ههههههههههههههههههه
بخليكم مع الصور الي خذناها من التلفريك

شو بيستوي لو طحناا هههههههههههههاااااااااي

وصلنا للمكان المطلووب
وتمشينا اشوي وكاان شي مساااحه عووده حلوه للتصوير .. قبل ما ندخل المتحف ..
بس اول شي دخلنا المتحف وأجلنا القعدة لبعدين
المتحف كاااان فننننننننننننننن .. فعلا فن .. وايد حلو ..
صورت وااايد واايد واايد صور .. بس مب للعرض خخخخخخخ

اول شي هنيه المدخل .. باباتي وحمد متجدميينا ...

وهنييه شفنا آثار أقدام ..

وايد عيبني شكل هالتيلفوون

ومكينة الخياطة

كلولولولولولوليش عرسووووو .. عقباالكم ان شاء الله خخخخخخخ

بصراحه المجسمات اللي مسوينها قمة في الابداع .. اللي يشوفها يتحراهم ناس صدقيين
اختيه قالت لا هاذيلا ناس صدقيين ومحنطيينهم خخخخخخخخخ ماشي شغل ترى ..

وهذي ذكرتني ب نانسي عجرم خخخخخخخخخخخ
في الغنيه اللي تقعد تغسل فيها الملابس هههههههه

طلعنا من المتحف وكان في مكان نشتري منه هدايا تذكاريه وهالشغلات ... عندهم اشياء حلوه .. خذنا كم شغله وطلعنا ..
صرااحه قعدنا في مكااان يجنن .. الناس واقفيين ويصوروون .. ما الومهم الطبيعة تجنن ...

بعديين رحنا مكاان ما ادري بصراحه شو اسمه .. بس كله سمج واحياء مائية .. يعني خطوتين عن المكان الي كنا فيه ..
اففففففففففففففففففففف رييحة السمج كاانت صدق تلوع بالجبد عند الاماكن المفتوحه .. فخلييت اختي تصور

شوفو سبحان الله شكلها كييف .. وعيونها كييف !!!!!

بسم الله يا ثمه مكبره !!!! يروع والله .. حسيته بياكلني

وبعدين طلعنا من هالمكان .. وقعدنا بين الخضره والجمال .. خذنالنا ايس كريم وقعدنا نسولف .. كاان شي طاووس يمشي عدااالنا واخواني ماااتو علييه ( يحبون الحيوانات )
وانوااع ثانيه من الطيوور

يتبع .....

أ

أريش العين

عروس ماسية

24-08-2007 | 03:04 PM

بعدين رحنا لمكان ثاني بس هالمره بالباص .. اول ما وصلنا كان نفاف يعني مطر خفيييف .. دقيقتين ووقف .. نزلنا ومشينا لآخر محطه من رحلتنا
:9_33:
كان عرض الليزر على شاطيء البحر

@@@@@موقف ما ننساه @@@@@

[COLOR="Red"]وصلنا للمدرجات وقعدنا .. ثوااني الا والمطر يصب عليييينا صب !!!!!!!!!!!!!!!! :qaq:فجاة من دون مقدمات تقول حد ياب صطل مااي وجبه علينا !!!!! انصدمنا .. يعني مره وحده نزل علينا بقوة ما سوالنا ون تو :2_106:
ربع ابويه اييبلنا مظلات لكن للاسف الناس هجمو على راعي المظلات وخلصو المظلات عنا !!!!!!!!!!!!!!!:qaq:
هههههههههههههههههههههههههههههههههههه كان احلى موقف :2_106:
اشكالنا كانت تموت من الضحك :D_smil1: خفت على الكيمره لا تخترب .. والحمدلله ما ياها شي
الي يضحك في الموضووع انه كانت شي حرمة صينيه م ادري ماليزيه هي وريلها ما ادري حبيبها .. ما ادري منوه بالضبط هههههههههه بس كان شكلهم رومنسي الصراحه قعدين تحت المظله ومستانسين هههههههههههههههههههههه لكن يا فحرة ما تمت :2_106:الا ونيي نحن ونعفد عليهم وننخش معاهم تحت المظله :2_106:ههههههههههههههههههههههههههههههههههههههههههههههههه
تخيلو كلنا تحت مظلة وحده ماعدا ابويه تم واقف.. مسكين الرياال تروع ههههههههه قام من مكاانه وتغطى ببلاستيك ..
قمت انا واختي من تحت المظلة .. الحرمه بتمووت منا هههههههه
ورحنا ندورلنا مكان ننخش فييه .. بس ماشي المكاان كله مكشووف !!!! شفنا واحد تايلندي واقف عدال المقاعد وماسك بايده مظله .. رحنا انا واختي وقعدنا عالمقاعد وهو ما يدري انه واقف ومغطينا خخخخخخخخخخخخخخ بعدين اكشتف الموضوع وقعد يضحك قال u have to pay me later
هههههههههههه روووح زين ولا بتشوف فلس حمر :2_106:
احلى شي انه كان معانا اثنين توهم معاريس يدااد هههههه اشكالهم كااانت عجييبه وهم متسبحيين بالمطر ... ماتهنو مساكيين :2_106:
اشوي وقف المطر ورد الجو حلو وصافي !!!!!!!!!!!! :qaq:وقعدنا عالكراسي مره ثانيه وبدا العرض وكأن شيئا لم يكن !!!!! :gum:
كان العرض واااايد حلوو .. بس ما صورنا شي لانه الكيمره وقف الجرج مالها !!!

رجعنا البيت بدلنا وبعدين طلعت انا وابويه نييب لنا عشا .. خذنا ماكدونالدز وتعشينا ورقدنا ..
كااان يوم لا ينسى ...............

:9_33:

يتبع ....... [/COLOR]

أ

أريش العين

عروس ماسية

24-08-2007 | 03:07 PM

اليوم الثالث

نشينا من الصبح وطلعنا انا واختي وتمشينا ...
صور عالسريع

شوفو كيف حاطين اللحم .. وع لاعت جبدي يوم شفت المنظر

بعديين عالمسا كان عدنا رحلة الى ال Night Safari

كاان ممنوع التصوير لانه الحيوانات عيونهن حساسه ( اوووونه )
بس استانسنا .. حدييقه بصراحه ترتتوووووب .. كل شي منظم وحلو :gum:
بعدين رحنا نتعشى
وانا خذتلي شاينيز فود خخخخخخخخخ نودلز وهالسوالف .. بيني وبينكم ماكان حلو .. بس شسوي كلته خخخخ يوعاااانه :2_106:
وابويه اول ماشافني قال روحي بعيد عني .. حد ياخذ هالاكل !!!! وانا اقوله حلو حلو انتو اشدراكم خخخخخخ اخر شي كلته بالغصب .. مافيني اتهزأ :2_106:
أكلي هههههه

اما اهلي خذولهم من مطعم هندي ... اوووف اكله عجييب خخخخخخ بعد ما كلت مالي يلست كل وياهم ههههههه ما شبعت ياخي اكل الصينين ما يشبع ... :2_106:
في الصوره مبين حمد وهو مندمج في الاكل وكل ما اقرب من صحنه صاارخ هههههههه لا تاكليييييييين :gum: شو هالزط :2_106:

بعد ما خلصنا كان شي عرض .. بس ما عيبني وايد .. سخيفين يحطون الضو في حلجهم واونهم عااد فرحانين سوو انجااز ... بعدين رحنا خذنالنا ايس كريم .. وردينا البيت .. قصدي الفندق
:9_28:
:9_28:
:9_28:

يتبع .......

أ

أريش العين

عروس ماسية

24-08-2007 | 03:10 PM

اليوم الرابع كان اليوم الاخير في سنغافوره .. رحنا السووق وتمشينا وودعنا سنغافوره على امل العوده اليها مرة اخرى في السنوات المقبله :gum:

بعدين رحنا المطار عشان نسافر لماليزيا

.. نص ساعه واشوي بالطياره .. ما وحالنا قعدنا واقلعنا الا وسمعناهم قالو بنهبط هههههه .. يعني وايد قريبه

وصلنا ماليزيا .. وكان باستقبالنا ريال من السفارة لكن هالمره سوداني . صراحه ريال طيب .. ساعدنا واايد .. وراعي سوالف بعد هههههه

طلعنا من المطار على الفندق على طوول

بس كانت المسافه طويله نوعا ما .. لكن مرتاحين خاصه انه محمد في سياره ثانيه خخخخخخخ ماشي حشره:2_106:

وصلنا للفندق بعد ساعه تقريبا ( بين الفندق والمطار ساعه )

في الفندق كانت المفاجاة .. بصراحه ما كنت اتوقع الشقة تكون بهالحجم .. ماشاء الله وسيييعة وحلوه ... تقوول بييت .. صالة شكبرها ومطبخ حلو سوينا فيه عيش ههههه هاه اهم شي ... اخواني ما يعيشون من دون عيش وروب ما اعرف كيف عاشو الايام اللي طافت في سنغافوره خخخخخخ

فجأة يا بنات وانا قاعدة اطالع الشقة اسمع حد يناديني باسمي ... !!!! طلع الريال يناديني يقولي يا ..........تعالي خخخخخخخخخ
اليوم يوم ميلاد ابوكي وانتي مش داريه !!!!!!!!!!!! :2_106: هذا كيف عرف اسمي وكيف عرف يوم ميلاد ابويه .. ههههههه قعد ابويه يضحك على الزول ... بعد ما طلعو من الشقه قعدنا نضحك على الموقف .. هو ماشاء الله لاحظه من الجواز .. بعد اشويه الا نسمع حد يدق الجرس .. هههههه راح ياخذ كيكة و7 أكواب عصيير برتقال ..!!!! ههههه

الشقه كانت 3 غرف نوم .. وخمس حمامات عزكم الله .. كل غرفه معاها حمامها وشي حمام عدال الباب وحمام في المطبخ بس من دون الشاور والحوض ومطبخ وصالة كبيرة مع ملحق لطاولة الطعام وغرفة مكتب
السعر واايد واايد زين .. الليله كانت ب 1500 درهم اماراتي
نحن يوم سكنا في سنغافوره كانت الليله في الغرفة الوحده 1200 درهم !!!! وطبعا ما تسدنا غرفة وحده كان لازم ناخذ كذا غرفةلانه الغرفة مب من وسعها .. وفي ماليزيا شقة شكبرها ب1500 درهم !!!

عالعموم هي سنغافورة اصلا غاليه
اسم الفندق The Ritz Carlton
معظم الي ساكنيين فيه خليجين وقاعديين بالشهور .. موقعه ممتاز .. كل شي عداله .. والتونز تاور ما يبعد عنه وايد .. وحتى التايم سكوير

تعالو براويكم الشقة

هذي الصاله

وهنيه مبين الباب وطاولة الطعام وكله مفتوح عالصاله

غرفة نوم امايه وابويه ..

وهنيه غرفة الملابس

وهنيه الحمام

وباقي المكتب والمطبخ ما صورته ... بس بصراحه مب مقصريين في شي كل شي موجود .. حتى التوستر حاطينها والمايكروويف وغلاية الماي وغسالة الصحون وكل شي ..

والنت موجود بس لازم تيبون اللاب توب معاكم !!! انا ما يبته ولا جان حشرتكم من هناك خخخخخ
بس كان في اللوبي تحت شي كمبيوترات .. جرجت الاي بود عندهم كذا مره .. بس طبعا ما ترومون تاخذون راحتكم لانه ناس رايحين وناس راجعين ...

امممممممم قعدتنا في ماليزيا كانت نوعا ما مملة .. يعني في سنغافوره استانسنا اكثر لانه كنا نروح رحلات وتصير مواقف وجذييه لكن في ماليزيا اغلب وقتنا كان في السوق ههههههه لانه ما طلعنا من كوالالمبور الا مره يوم رحنا جنتنغ

ما اذكر شو بالترتيب اللي صار لكن بقولكم على حسب الصور الي عندي

رحنا التويز تاور .. وايد اشياء عندهم وخاصة هالمحلات الصغيره يبيون اشياء حلوه واسعارها زينه .. ومحلاتهم حلوه .. خذذتلي من التوينز تاور نظارة شمسية ..كشخه في اللبس :gum:

وكان شي محل واايد حلو اظني اسمه Girls يجنن فيه شغلات حق البنوتاات حلوه .. خواتي خذلهن شنط حق السكول وانا خذت من عندهم هاند باج ههههههه جنها مالت يهال بس حلوه عيبتني ..
وخذنا شغلات وايد توزعت بين الجواتي والملابس وشغلات المطبخ والهدايا ..

رحنا بعد التايم سكوير
هالموول حسيته الاحلى .. لسببين .. فيه العاب .. يعني اخواني يروحون يلعبون ونحن نتسوق من دون ازعاج
والسبب الثاني .. الاسعار مناسبه للجميع .. يعني شغلات حلوه باسعار حلوه ..

ورحنا مولات ما اعرف شو اسمها ..

اووف سوالف السوق ما تخلص ..

في اليوم الرابع اتوقع رحنا جنتنغ ... كاان احلى يوووم .. لاني انا وحده اموت في الالعاب والملاهي ...وغير جيه الطبيعة الخلابه والجو اللي كان يجنن

طلعنا من البيت تقريبا عالسعه 10 او 11 ما اذكر بالضبط ..
وصلنا بعد ساعه تقريبا .. كان الجو يميل للبروده لكن شمس .. تدرون كان الوقت الظهر والشمس فوق روسنا ..

شوفو الطبيعة الحلوه ..

وهذا مال البوذا .. قالي ابويه شتبيبه تصورينه .. خخخخخخخ شبابه بعد .. بس جييه حجمه عود ولفت نظريه اول ما شفته جان اصور بحسن نيه والله ههههههه

بعديين ركبنا السياره وصالنا الين فوق .. الين ما وصلنا لحديقة الملاهي .. دخلنا ولعبنا وتمشينا وتغدينا واستانسنا واايد

العابهم حلوه ... بس المشكله واايد كان زحمه يعني عاادي نوقف نتريا العبه ساعه كامله !!!! لا تستغربون والله عادي
نحن يمكن قعدنا في الحديقه خمس ساعات خلال هالخمس ساعات ما لعبنا غير 4 العاب !!!!!!!!!!!! بس استانسنا

هذي اول لعبة ركبناها .. مع انها عاديه بس كان عليها زحمه لكن اخف زحمه من غيرها ..

هذي تخوف !!!

كان شي مكان للصلاه .. بس الله لا يبليكم بمثل ذيج الحجيرة .. صغيرووووونه ما تسد ... بس الحمدلله صلينا فيها

تغدينا ولعبنا باللعبه اللي لعبناها اول ما دخلنا .. وبعدين طلعنا ورجعنا على كوالالمبور ..
صور ونحن نازلين ..

بااااي باااي جنتنغ

وبس رجعنا الفندق ..

مرت الايام في ماليزيا كاانت حلوه .. بس على اخر يومين حنيييت صدق للبلاد .. وكنت ابى ارجع خلااص .. بس ما لقينا حجز !!!

رجعنا للبلاد وكنت صدق صدق متولهة على كل شي .. لاهليه لاخواني للعين وهواها للبيت لحجرتي لشبريتي لكل شي ..

يتم الانسان مهما يروح ويلف ويستانس ويشوف يحن لبلاده لانه ماشي بعد الوطن وماشي مثل الوطن .. هنيه الاحساس بالامان والاستقرار .. هنيه نحن اصحاب الارض ..

الله يعيين كل مغترب عن بلاده ويرده لبلاده واهله سالم

فديييت بلادي ياربي فديت الامارات فدييت العين ... ماشي عقبج يا دار زايد

اتمنى تكونون استمتعتو ويانا في هالتقرير .. وما اكون مللتبكم بس حبيت تكونون وياي في كل لحظه عشان جييه ما خليت شي ما طريته هههههه
وشكرا لانكم عطيتوني من وقتكم ..

السموحه عالاطاله
اختكم
أريـــــــــــــ العين ـــــــــــــش

r

rawiyah

عروس ماسية

25-08-2007 | 03:30 AM

بصراحة روعه
تسلم يدك
و عليكم بالعافية

أ

أريش العين

عروس ماسية

25-08-2007 | 12:48 PM

لب لفواد;4267562:

الله يسلمج حبوبه
وشكرا عالمرور

أ

أريش العين

عروس ماسية

25-08-2007 | 12:54 PM

rawiyah;4271273:
بصراحة روعه
تسلم يدك
و عليكم بالعافية

تسلميين غناتي مرورج الاروع
وربي يعافييج ويسلمج ..
سلمتي عالمرور

أ

أريش العين

عروس ماسية

25-08-2007 | 12:57 PM

افاااااا
ليش جييه تحبطون بالوااحد
:(

غ

غالية الحبايب

عروس نشيطة

25-08-2007 | 01:29 PM

واااايد حلوة سفرتكم وتقريرج فن بصراحة
تسلم يدج وإن شاء الله نزور هالبلاد

!

!! عسل !!

عروس مبدعة

25-08-2007 | 02:11 PM

روووووووووعة حبيبتي

انا بشهر العسل بروح ماليزيا

حمستيني امر على سنغافورة بعد :)

ط

طيوبه

عروس رائعة

25-08-2007 | 03:22 PM

وعليكم السلام ورحمة الله وبركاته

ماشاء الله لاقوة الا بالله

تصوير وتقرير ولا اروع بارك الله فيج

رحت ماليزيا وكان ودي ازور سنغافوره من كثر ماتكلموا عن نظافتها وطبيعتها

وببعد تقريرج حبيتها اكثر :)

وعسى دوم ايامكم سعاده وافراح يالغاليه

والله يعطيج العافيه حبوبه

أ

أريش العين

عروس ماسية

26-08-2007 | 09:46 AM

غالية الحبايب;4273403:
واااايد حلوة سفرتكم وتقريرج فن بصراحة
تسلم يدج وإن شاء الله نزور هالبلاد

تسلمييين فديتج عيونج الحلوه
وربي يسلمج ويعافيج وشكرا عالمرور

أ

أريش العين

عروس ماسية

26-08-2007 | 10:07 AM

!! عسل !!;4273599:
روووووووووعة حبيبتي

انا بشهر العسل بروح ماليزيا

حمستيني امر على سنغافورة بعد :)

لا لاازم تمرييين
انا في نظريه سنغافوره احلى وارقى عن ماليزيا .. ستايلها مثل اوروبا
تشكرات حبوبه عالمرور

أ

أريش العين

عروس ماسية

26-08-2007 | 10:24 AM

طيوبه;4273994:
وعليكم السلام ورحمة الله وبركاته

ماشاء الله لاقوة الا بالله

تصوير وتقرير ولا اروع بارك الله فيج

رحت ماليزيا وكان ودي ازور سنغافوره من كثر ماتكلموا عن نظافتها وطبيعتها

وببعد تقريرج حبيتها اكثر :)

وعسى دوم ايامكم سعاده وافراح يالغاليه

والله يعطيج العافيه حبوبه

تسلميين غنااتي
لا بصرااحه ما يصيير تروحين ماليزيا من دون ما تمرين عسنغافوره .. لانها فعلا حلوه وتستسحق الزياره
يالله ان شاء الله تزورينها واكيد بتعيبج ..
شكرا الغاليه عمرورج

ع

عيون بوظبي

مشرفة سابقة

26-08-2007 | 12:48 PM

روووووووووووووووووووووعة ...

تصوير مفصل ودقيق ... صدق موضوع حلو ومتكامل ..

شكلها رحله ممتعه والله ياريتني وياكم هههههههههههه

بس اسميج حشيتي في اخوانج حمد ومحمد يحليلهم ههههههه بخبرهم عليج...

وفعلاً من كلامج حسيت سنغافورة احلى بوايد ..بس مثل ما قلتي اغلى ..

يالله عقبال السنة الياية ان شالله

ت

تووشي

عروس جديدة

26-08-2007 | 06:53 PM

الله عالتصوير الحلوو
تسلميييييييييييييين

س

سحاب الأمل

عروس ذهبية

26-08-2007 | 08:46 PM

رووووووووووعة بجد .. ماشاء الله .. باين عليكم تونستوا كثير.. بس زعلانة ليش مامريتوا علي :( :( :(

والحمد لله على سلامتكم وموضوعك مرة حلو .. ^_*

أ

أريش العين

عروس ماسية

26-08-2007 | 09:19 PM

3yoOon_AD;4280872:
روووووووووووووووووووووعة ...

تصوير مفصل ودقيق ... صدق موضوع حلو ومتكامل ..

شكلها رحله ممتعه والله ياريتني وياكم هههههههههههه

بس اسميج حشيتي في اخوانج حمد ومحمد يحليلهم ههههههه بخبرهم عليج...

وفعلاً من كلامج حسيت سنغافورة احلى بوايد ..بس مثل ما قلتي اغلى ..

يالله عقبال السنة الياية ان شالله

حي الله ام مصبح
هييه والله كانت رحله ممتعه وحلوه .. ان شاء الله السنه اليايه اقولهم بسير سويسرا .. بنشلج ويانا بس من دون مصبح:gum: .. بنخليه هو ومحمد وحمد في البلاد ونروح عنهم ... مافينا عالحشره:2_106:
ههههههه من حشرتهم لو كانو هاديين جان ما يبت طاريهم .. لا تخبرين ولاعندج خبر متوحشين هاذيلا كل واحد عليه ذااك الضرب اللي يعلم سنه ما يخووز وغير التقريص عند حمد :2_106: تبين تودينا في داهية يا ام مصبح مافينا :qaq:

هييه والله سنغافوره احلى بوايد عن ماليزيا .. في وجهة نظريه انا .. طبعا غيري يشوفون ماليزيا احلى .. لكن تعرفين سنغافوره تحسين عمرج في حديقه يوم تمشين في الشارع يعني ملمومه والشير من كل صوب ..وغير جيه ستايلها اوروبي .. امي اول ما طلعنا من المطار وشفنا الشارع قالت سنغافوره وايد اذكرني بمنشستر .. فعلا تحسين عمرج في لندن
شعبها طيب وعاد من يدرون انه من الامارات هههه تعالي شوفي الحفله اللي تستوي :2_106:
والاحلى من هذا كله انه ماشي وايد عرب :gum: عكس ماليزيا اللي جنج تمشين في البلاد من كثر العرب .. وغير جيه حتى للاسف تستحين انج عربية من تصرفات بعض العرب اللي هناك
عيبها انها غاليه .. اذكر في المطار كنا في مطعم وحاطين موز واشتهيت الموزه .. حبة موزة قولي بكم بدولار وستين سينز يعني يوصل اربع ولا خمس دراهم عدنا باخذلي درزن موز لو انا في البلاد ههههههههههههههه مب حبه بسرعة خلصت
حشا تقولين باكل القشاره بعد عشان احلل الفلوس خخخخخخخخخخخخ
بس تدرين هم اصلا دخل الفرد عندهم مرتفع عشان جيه ما يحسون بزيادة الاسعار
حياج الله اام مصبح وان شاء الله تروحين السنه اليايه وتستانسين

أريش العين

أ

أريش العين

عروس ماسية

26-08-2007 | 09:23 PM

تووشي;4283222:
الله عالتصوير الحلوو
تسلميييييييييييييين

عيونج الحلوه يا حلوه
سلمتي الغلا عالمرور