@@@@كيف تقضون اليوم مع بيبياتكم؟؟؟؟@@@@

الياهل شو بتسويبه غير انج تلعبين معاه وتاكلينه وتبدلينه وترقدينه


شوفي انا عيالي يقومون الساعه 11 العب وياهم قبل لا افتح الليتات وعقب نص ساعه اخذهم وابدلهم البامبرز واغسلهم وااكلهم ...

واخليهم يلعبون بالعابهم اليما يصيحون من الملل ويردون يرقدون يوم يقومون اغديهم وعقب يلعب معاهم ابوهم ويطلعهم عند اهله ( احنا ساكنين معاهم) واذا كنت بيت قوم امي اطلعهم عندهم .. والعصر نطلع يا اني اتسوق او اوديهم الالعاب (مريومه من الشهر الخامس احطها فالالعاب تستانس) نرجع الساعه 8 او 9 اعشيهم والعب معاهم واغنيلهم اغاني الاطفال اليما يهلكون وعقب انيمهم ...

بجعه يعني كل يوووووووووم تطلعون السوق او الالعاب؟؟؟؟
اذا في يوم يلستي في البيت شتسوين؟؟

وماشالله عيالج ينشون عال 11

انا ولدي ماشالله من 7 الصبح يوقفلي عالشبريه و يوعيني انا وابوه :)
يعني وقت طويييييييل الولد بيمل فيه وانا بعد امل وما اهرف شسوي وياه :(

واااي يا انجل..

مشكلة اللي طول الوقت تيلس مع ولدها...

حتى الولد يطفر ويطفش من امه خخخخخ

بحسين تعودنا كلنا انا وهو وعمتي .. انه جزء من اليوم عندي والجزء الثاني يكون عند عمتي.. من ايام الدراسة..
والحين حتى بعد ما خلصت.. عمتي وايد متعلقة فيه وهو بعد مثلها.. فأنا ما بغيتها الا هي..
وصار حسون الحين كل يوم ينزل الظهر بعد الغذا الى اذان المغرب عندها.. تطلع معاه الى الجيران او تظل بالبيت تحت..

قبل لاا اولد بزينب. كنت يا اطلع اتسوق او اسوي شغل ماا قدر اسويه ووحسون معاي مثل اخذ لي حمام اعشاب ههههههههه والله وناسة ايام راحت خلاص ههههههه
بس من يبت زينب الله يحفظها خلاص كل الدلع راح .. :) الحين زين اذا حصلت فرصة اسبح وهي راقدة قيلولة الظهر..


انا عيالي مثل بجعة يقعدون من 11 وساعات 12
ما دري شكنت بسوي لو يقعدون مثل ولدج يا انجل !! اذكر حتى عيون بوظبي كانت تشكي من ولدها مثلج خخخخخ يقعد لهم من الصبح ههههههههههه
المهم انا عوديت حسين وزينب على نفس الدرب الحين وقت النوم من 11 ونص الى 12 من جذي يتأخرون شوي بنوم الضحى..
نجلس واسويلهم فطور متأخر خخخخ بس ما اثقل عليهم عشان يتغدون..
وبعدين الحمام ساعات بس زينب احممها وحسين اخليه لبعد الغدا..
اسوى غدانا وهم معاي يا رايحين صالة الالعاب او جايين عندي المطبخ .. وزينب بمشايتها ورا اخوها..
يوصل ابوهم .. تاخذ زينب غفوة عشان نقدر نتغدى .. خخخ
بعدين حمام حسين.. وينزل تحت عند عمتي..
تقعد زينب اسحبها معاي على الكمبيوتر ( ترا هذي مهمة .. كل يوم هههه )
وتاخذ لها غفوة ثانية العصر.. اروح اسبح واجهز اغراضي..

بس يأذن المغرب تحين ساعةا لصفر.. يجي حسين من عند عمتي.. وتقعد زينب .. واصلي.. نلبس كلنا..
ونشيييييل عليه عند امي.. هههه كل يوم اروح عندها لأني ساكنة معاهم بنفس المنطقة وقريب بيتنا من بيتهم..

هناك اخليه يلعب بحوشهم واظل اسولف شوي مع امي.. لي 8 ونص او 9 واخواني يتكفلون بولدي يا يطلعون فيه او يلعبون معاه كورة بالحوش .. او يلعب بروحه بموتر سيكل ماله..

اعشيهم لي رجعت وخلالااااص


اي نسيت اقول ان زوجي يشتغل وظيفتين صباحية ومسائية .. من جذي اليهال على طول معاي.. يشوفون ابوهم ساعة او ساعتين باليوم بس :)


اخ لو ماما حسون هني جان عطتكم تفاصيل يومها.. برنامج مع عيالها :D

السلام عليكم يا امهات يا مكروفااات :)

احم اول شئ يبدا يومنا 9 ونص 10 تنش بنتي تشرب حليب شوي وبعدين اسبحها والبسها ونطلع نتريق واتم العب وياها واشغل لها التلفزيون تسمع بارني وربعه وتشوف الوان الرسوم المتحركه وتجذبها وفي نفس الوقت اهذرب في التلفون ويا امي او صديقاتي،، بعد صلاه الظهر اغديها واخلي شوي يعني اتعبها علشان ترقد عدل الظهر ويكون عندي وقت اريح لين العصر. وقت العصر يكون وقت الحوي اسير وياها المريحانه واحوطها في سيكلها ونلحق الطيور والحمام،، قبل كان الجو حلو بس الحين نهلك من الحر وطبعا لازم نرد نتسبح. على فكره انجل ايز اليهال يملون من اليلسه داخل وادري نخاف عليهم من تغيير الجو بين داخل وبرع بس تعرفين انا شو اسوي اول ما ادخلها من برع تكون طبعا حرانه وعرقانه فادخلها على طوول الغرفه ويكون المكيف مبند اخليها شوي لين ما تتعدل حراره جسمها ويحف العرق بعدين اسبحها ويكون كل شئ تمام. المهم بعد لعب الحوي ترقد لها شوي لين عقب المغرب بعدين اعشيها ونيلس ويا الاهل لين وقت الرقاد بالليل وبس!

تحياتي لكل ام مكروووفه

ما ايلس فالبيت اذا ما سرت السوق ولا الالعاب اسير بيت قوم امي .. بس لازم كل يوم اطلع بجن اذا ما طلعت ...

حباااااااااايبي شكرا لمروركم و مؤازرتكم :)

جمانه

زيييييييييين بيت امج قريب..انا بيت امي بعيييييييد نص ساعه درب اذا الشوارع فاضيه فما اسير الا يومين في الاسبوع..وطبعا ناك اكون ملكه لان ولدي امي وخواتي يتعبلون به ...خخخخخ
كيف اخليه ينام للضحى؟؟ انا ما اصدق ايي وقت نومه في الليل عالعشر عشان اعيش حياتي خخخخ..فديت قلبه..اصلا يكون واااااااصل حده و يبغي ينام

هلا endless hope

اصلا ولدي يموت في طلعه الحوي...بس بسوي مثلج بحاول اوديه غرفه بدون مكيف

شكلي لازم اسوي بروغرام اني اطلع يوميا..بس ترى حتى في الطلعه يطلع عيني...يمل بسرعه من العربانه ويتم يصييييييييح يبا شل!!!!وطبعا حرب تستوي جدام العالم لاني ارفض اشله عشان ما يتعود و هو ما يسكت...وشكلي من هالامهات الاشرار اللي كنت اشوفهم قبل لا يكون عندي عيال..كنت اقول في خاطري..صدق ام متوحشه ولدها مسكين يصيح وما تشله!!! ما كنت ادري انها هي المسكينه ..وهو مطلع عينها :)
بس وين اسيرر كل يوم؟؟؟

انا يومين في الاسبوع في بيت اهلي
ويومين بيت اهل ريلي
و يوم نطلع او اطلع ويا ريلي
باقي يومين..وين اسير في هالزحمه اللي ما ترحم :(

الله يعينكم والله


الغاليه انا للحين ما سويتلي بورغرام بعدني في الاربعين انا اللحين ع مزااج ولدي فهد من رقد انا راقدة ومن نش انا ناشه ع هواة انا

حلوة برامجكم والله، بعد نتمنى نسمع برنامج ماما حسون لاني عندي اجازة طويلة ومن الحين افكر اشلون بقضي وقتي مع نونو

انجل ايز وبجعه لا تضروون عيالكم على الهياته والله بتتعبون عقب الحين هم ما يفطنون فكله واحد عندهم بس عقب صدقوني انتوا بتملون من الطلعه او مثل ما قلتي يا انجل ايز انتي اللي تتعبين في الطلعه من الصياح والضرابه،، قروا في البيت ابرك لكم. كم ام سمعتها تشتكي من هالموضوع. بالمختصر المفيد انتي اليوم بتحصلين حد يطلعج وفاضيه بس باجر ما تدرين شو يستوي.

يمكن خيوتي بس انا اللي صار معي بالعكس كنت كل يوم اطلع مع بنتي الحين هي ما ترضى تطلع ولا تحب شي اسمه طلعه ولا شي اسمه العاب وتسوي لي مشكلة كل ما بغيت اطلع

هلا بنات

endless hope

الغاليه بالعكس لازم الطفل يتعود عالطلعه و شوفه الناس...انا يمكن لاني ما اطلعه وايد يسويلي هالحفله كل ما نطلع...

اكبر قلب

حياج الله معانا..:)

هههههههههههههههههههههههههههههههه الحين بحط بروجرامي :deal:

طبعا في فرق في البروجرام بين لما يكون عندج طفل واحد وبين لما يكون عند طفلين .. وبالنسبة لي اريح فترة نوعا ما كانت الفترة اللي كنت حامل فيها بولدي الثاني .. لان في بداية حملي قطعت الرضاعة عن ولدي الكبير فصار ما يقعد بالليل وبالتالي كنت اشبع نوم .. وانا من النوع اللي احب النوم .. انا مالى الظهر وارد انام العصر وعودت ولدي الكبير على هالشي والحمد لله كنت مرتاحه ، اضافة الى في الصيف اللي طاف نزلت اخت زوجي البحرين لانها ساكنة مع زوجها برا بسبب ظروف دراسته وهي عندها اولاد اثنين .. هي سكنت عند اهل زوجي وانا بعد شقتي في بيت اهل زوجي وصار يوميا يروح عندهم وارتحت منه وايد .. كان يرفض يرجع الشقة وحتى اذا بنطلع ما يرضى يجي معانا واخدت راحتي وااايد لدرجة اني كنت اتمنى يطلع معانا لكنه يرفض .. قمنا بعدين نطلعه هو وعيال عمته ونوديهم الالعاب :up: ذكرتوني بايام العز :cry:

المهم .. عن بروجرامي الحين كله ملل في ملل :sad:

احنا بعد ننام متأخرين .. بالتالي نقعد من النوم متأخرين ، نقعد الساعه 11 او 12 .. اطلع اليهال في الصالة واقعد ارتب غرفة النوم واذا في شوية اشغال في الشقة اسويها .. هالاشغال تشمل باني اغسل وجههي وابدل واذا وقت الصلاة اصلي وكذا .. وبعدين اتفرغ لحمود ، أأكله واسبحه واذا حسيته يبغي ينام انومه واذا مصحصح اخليه في المشاية يلعب ..
بعد ما اخلص منه ادور لحسون ، في فترة اللي اكون مع اخوه يكون غالبا هو مع التلفزيون واحيانا يطلب ياكل شي فأعطيه شي خفيف علشان ما يخرب غداه .. بعدين اغسل له واوديه الحمام " في هالوقت يبدأ وقت الحمام لانه ما زال يلبس بامبرز وقت النوم " .. وبعدين يجي ابو زوجي يجيب لي الغدا وياخد معاه حسون يغديه معاه << انا زوجي يشتغل من الصبح للمغرب فما يكون معاي طول النهار :(

بعدين اتغدى انا واقعد ع النت .. حمود يكون هالوقت يا اما انه بعده في المشاية يلعب او انه تعب فأنومه .. واذا كان نايم وقعد احطه في المشاية والحين ساعات اخليه يحبي ويلعب وساعات اخليه في مرجحانته جنبي وانا قاعده على الكمبيوتر واخليه فيها الين ما يدوخ وينام << مجرمه (6)

اما حسون يقعد مع جده بس شوي .. يعني بالكثير ساعة وغالبا يقعد بس نص ساعة ويرجع .. ولين رجع يقضي الوقت بين التلفزيون وبين اللعب ونااادرا اذا نام .. انا طبعا نسيت شي اسمه نومة العصر من ولدت بحمود :confused: احيانا انام لين حسيت روحي تعبانه وشفت حمود نايم بس اغلب الايام ما انام العصر ..

زوجي يرجع من الشغل في ال6 ونص المغرب ، ويخف علي الحمل شوي .. لانه اليهال يقعدون مع ابوهم يلعبون معاه وانا ارتاح منهم شوي .. حمود احيانا ينام المغرب لكن مستحيل اخليه ينام بعد الساعه 9 ، وحسون يا اما يكون معانا او يطالع التلفزيون ..
نتم على هالحال .. احيانا نطلع الليل واحيانا نقعد مع بعض نطالع التلفزيون وحمود يكون في المشاية او يحبي .. طبعا اعشيه ويكمل لعبه الين الساعه 11 او 11 ونص .. ندخل غرفة النوم.

ابدل لهم واجهزهم للنوم ويبدأ الصراع والمعاناة علشان ينامون ، ابوهم اذا كان تعبان ينام ويخليني معاهم بروحي :angry: واحيانا يحاول معاهم ويساعدني شوي عليهم حتى ينامون .. وانا اذا كنت تعابنه انام واذا ما جاني نوم اطلع للكمبيوتر :yahoo:

وخلص اليوم :2_106:

أخيرا شرفتي يا ماما حسون الله يعينج بس لازم تعوديهم على النوم بدري لانج الحين في البيت بس اذا توظفتي بتتعبين وايد.

بس بصراحة اللي يشوف غيره يهون عليه حاله احس نفسي في نعمة ما شاء الله.

أنا الحين اشتغل فبرنامجي يكون كالتالي:-

اوصل نور روضتها واروح الدوام ارجع من الدوام اقعد زوجي من الدوام لانه يوصل قبلي وينام على طول ونتغذى مع بعض وبعدين نشرب الشاي ونطالع فيلم ونور تلعب بأي شي يا انها تلون او انها تلعب معانا وتضحك وبالذات مع ابوها الى اذان المغرب وبعدين نصلي واسوي العشاء وابدأ في تنظيف البيت والغسيل وكل شي وهذا ما ياخذ مني وقت لان ما في شي يخرب البيت نور صارت تفهم ومعودتنها انها ترجع كل شي الى محله وبعدها اذا يا انا نطلع مع زوجي او نروح بيت اهلي واوقات ننزل تحت ونجلس مع اهل زوجي لين ما نتعب وننام.

بس اني قررت اني اترك شغلي واتفرغ الى نونو لين ما احصل وظيفة بوقت ملائم.

فما ادري ويش بيكون البرنامج وقتها فعلى هالاساس انا اتباع برامجكم عشان استفيد والله يعين اذا صار عندي غير نور

انا تلعوزت يوم حمود صغير لاني ما كنت اطلعه كان يصيح من نطلع ولا يشوف الناس اليما نرجع ..

طلع روحي ليما عودته .. والحين ايلس فالبيت ما عليه هو ولد وبيصير شاب ويطلع ويدخل على كيفه .. المهم البنت ..

اما انا اعيالي يقومون الساعه 12 الضهر ........والخدمات ياخذونهم ويغيرون لهم

ويفطرونهم .......وانا اقوم الساعه وحده ........وبعدين اقعد وياهم ولدي الكبير يقعد

مع التلفزيون ......والصغار حوالي .....وانا قاعده على النت .......وهم يلعبون حوالي

وبعد اذان المغرب ......نطلع اوديهم المنتزه فيه العاب ......ولدي ياخذ الدراجه مالته ....

وبنتي تاخذ العاب التراب .......واخليهم في المنتزه يلعبون .......وبعدين نرجع البيت.......

واحيانا نروح زيارات .......او السوق .....والجمعه البحر .........وبس

هلا ام الاحزان

ما قلتيلنا اعمارهم؟؟

أنا بروجرامي متقلب .... لأني متنقله ما بين بيتي وبيت أهلي ريلي عنده دورة وأنا إف بيت أهلي ويوم يرجع أرجع مهاه ويوم يسير أسير بيت أهلي بس برنامجي إف بيت أهلي وايد حلو حتى شهيته انفتحت لأن في صغارية وبيت أخوي عدالنا وهو من يقوم أغيرله وأأكله وعقب أنزله ييلس وياي ويا أمي وإذا يى حد من الكبار لعبه ويتصفح مجلات وأحسه ما شاء الله عليه يحب يتعلم وها الشيء عايبني بس ما أعرف شو اشتريله عشان أعلمه يحب يتكلم ويلقط بسرعة يعني كل أسبوع يتعلمله 4 أو 5 كلمات المهم عقب ما أغذيه أخليه يلعب ويا الصغارية وعقب يرقد شوي ويوم ينش أأكله وينزل يلعب ويا الصغارية وع المغرب أوديه بيت خاله يلعب ويا ولد أخوي إف غرفة الألعاب وعقب أأكله وأوديه غرفة أختي يلعب ويا عيالها ويوم الجو حلو أخلي يلعب فالحوي ومرات الصغارية يسبحون فالحوض وهو يطالعهم أو يلعب وياهم فالماي بس ما يسبح وياهم ( خواف) ويوم نرجع البيت يجابل بارني وبس طول اليوم ولازم نطلع عشان ينسى ولا بالقاه شوي ولابسلي نظارة ويوم أهل ريلي موجودين بعد شوي أهون يلس وياهم ما يجابلي بارني..........

بس بليز إذا في شيء لعبة أو شيء يستانس عليه ولدي ويتعلم منه قولولي شو هو أو وين أحصله ولا تبخلون علي بلييييز.......

[COLOR="black"]هلا بام محمد

حبيبتي ما قلتيلنا عمر ولدج الله يحفظه

فيه وااااااااايد العاب في مركز التعليم المبكر ...والعابهم ميزتها انها تعليميه و تنمي مواهبه...
فيه بعد بتحصلين في فيرجن دي في ديات تعليميه حسب عمر الطفل..من الولاده..انا ماخذه حق ولدي من شركه بيبي [/COLOR]اينستاين