مغتربات مصر ... تعالوا ..........

توتى وشيكو;4160960:
اسماء ربنا يخليهوملك انا لسه بنتى صغيره هشوف اسهل والا زيهم اصل هما عفاريت ما شاء الله عليهم

ولادك اد ايه ؟؟

ربنا يحفظها إن شاء الله علشان بنتك هي الأولى ح تكون هادية ورقيقة لأن البنات مهما كانوا عفاريت وهم صغيرين لما بتبدأ تشوف أمها وتحس إنها زي ماما بتلاقيها بقت رقيقة وطيبة لا وح تساعدك مساعدة في شغل البيت ... :poster_dev:



ابني ما شاء الله عمره 11 سنة وبنتي جهاد عمرها 7 وجمانة الشهر الجاي تتم أربع سنوات :2_106::2_106:

ما شاء الله ربنا يخليهوملك وتفرحى بيهم عن قريب

انا لي صحبات من ايام الثانوي لسه موجودين وبقابلهم
وكمان بابا هنا معايا وماما بتيجي في زيارات
وكمان احنا بنخرج كتييير
بس بردوا مصر وحشاني جدا جدا جدا

طيب والله كويس يا ميدو عندك حد مسليكى
انا يا ستى بشتغل وايام الاجازة بنخرج مع صاحب جوزى ومراته وعياله من سن عيالى تقريبا واحيانا ان وجوزى بنخرج لوحدنا يا بنروح نقعد فى مكان او نعمل شوبنج والحياه ماشيه على هذا المنوال

انا بقى كنت بحكي لسه لاسماء عن اني لحد دلوقتي لسه مالقتش الكبلز ده اللي انا وجوزي نخرج معاهم
يعني اصحاب جوزي مش متجوزين او مرتتهم في مصر
وصحباتي مش متجوزات واللي متجوزه جوزها مايعرفش جوزي لانهم من جنسيه تانيه وجوزي مش متعود يتعرف على ناس مش من جنسيته
يعني السودانيين ممكن بس غيرهم بيستغرب شويه
ولما بنتعرف على حد جديد لاما معقدين حياتهم والستات لوحدها والرجاله لوحدها وطبعا احنا عادي بنخرج ستات وجوازهم وولادهم
لاما يعني مش زينا في المستوى ومش قصدي اننا كلاس بقى وكدى ههههههههههههههههههههه
لا انا قصدي تحسي انهم زيك مالقتهمش لسه
وبصراحه احيانا بقول اريح
وجوزي مصاحب ابن عمي جدا بس هو لسه ماتجوزش خاطب بس بنخرج معاه بس طبعا ببقى نفسي يبقى معايا بقى ست زي
بس يابختك انك بتشتغلي انت خريجه ايه انا بدور بس انت عارفه السعوده ولازم الخبره يعني لو ماكنتش بشتغل وقاعده بربي ولادي
لا ماينفعش لازم خبره لما اتخنقت نفسي اشتغل,,,,,,,,,,,,,,

وانت يا اسماء عامله ايه وحشانا والله
انت بتشتغلي بردوا ولا زي حالاتي شغاله في المنزل هههههههههههههههههههههه

ان شاء الله يا ميدو قريبا هتتقابلى مع الجروب اللى ترتاحيله انا صاحب جوزى لبنانى ومراته لبنانيه وفعلا فى بينا توافق فى كل حاجه ولما بنخرج بنستمتع مع بعض ودا ملقنهوش مع كتير من المصريين اللى هنا يمكن العيب فينا

انا خريجه كليه التجارة ومعايا كام كورس فى الكمبيوتر والانجليزى وكنت اشتغلت قبل كده مره فى الكويت ومرة فى مصر بس اقولك على حاجه كل اللى كتبته دا طظ فيه لانى مشتغلتش بيهم انا مقتنعه ان كل شغلى بسبب واحد توفيق من ربنا لانى ايام الدمام كنت بدور فلقيت نفسى حملت وقلت هدور تانى جبت شريف وبعدين جينا هنا وكان جوزى يقولى مش هندور غير لما يكمل شريف 3 سنين وفجأه حملت تانى فى ليلى وقالى انسى الشغل نهائى وبعدين جت علينا ظروف وهو ساب الشغل فعرضت عليا جارتى ادور انا على وظايف فى الجراي وكنت حامل فى الرابع وبعدها خدت منى السى فى وفجأه اتصلوا بيا وروحت عملت انترفيو 5 دقايق ونزلت لجوزى قالى معلش تتعوض قلتله بالعكس الحمد لله اتوفقت فيه فصدقينى لا هو شطارة منى والا تعليم والا اى حاجه كله بيد رب العالمين الف حمد وشكر ليك يا رب

وان شاء الله قريبا تتوفقى فى شغل وتجربى بقا الشحططه بين البيت والشغل زيي

اسماء مختفيه فين ؟؟؟ مخبيه المش عننا

ربنا يوفقك يا حبيبتي يارب
انا معايا بكالوريوس علوم قسم كيمياء وانت اديتيني الامل اني ماياسش وادور,,,انت عارفه انا مش مشكله عندي المرتب المهم يكون مكان مريح ارتاح فيه ويكون نظيف ومعايا ناس كويسه ومواعيده يعني عاوزه حاجه للظهر
حاجه تفصيل مش كدى,,,,بس اعمل ايه لو مالقتش ده اقعد في بيتي احسن
وانا بصراحه حرجع ادور تاني لاني بحب مفهوم ان الست تشتغل بس باللي يتناسب مع ظروفها وحياتها وبيتها
ياريتك يا بنتي كنت لسه في الدمام كنا خرجنا مع بعض ههههههههههههههههه
بمناسبه المش انا حماتي بعتالي مش كافيار مصري معتبر وقالتلي زوديه انت بقى
فناويه انشاء الله اضبطه اصل احنا قابلناها في العمره قريب


انا مش عارفه فين بقيت البنات يتحمسوا جدا وبعدين خلاص

اه والله يا ميدو لو كنا لسه فى الدمام كنا عيشنا حياتنا بس الحمد لله على كل حال
ان شاء الله تتوفقى فى شغل يكون مريح ودوامه كويس ومرتبه ممتاز ولعلمك مفيش حاجه صعبه على ربنا انا اول ما عملت الانترفيو قالولى مواعيد دوام كانت صعبه جدا رجعت اتكلمت مع جوزى وقلتلهم لاء مينفعش عندى عيال وفضلنا نتفاوض لغايه ما اتظبط شويه وبرضه مش شطارة عموما ليا رجعه تانى هرغى معاكى بس لازم اقفل الشغل ينادينى

يارب يا بنتي يسمع منك ربنا
امال فين اسماء مش ظاهره والبنات هو مفيش الا انا وانت اللي رغايين ولا ايه

والله مش عارفه ليه محدش بيشارك معانا اوعى تختفى انتى كمان

انتى يا ميدو جهزى السى فى بتاعتك عشان لما تحتاجيها تلاقيها جاهزة ودورى لغايه ما تلاقى ان شاء الله وقبل دا كله قولى يا رب

يااااااااااااااااااااااااااااااااااااارب
لا والمشكله ان فيه ناس بتدخل ومابتشاركش يعني صفحه المصريات المغتربات تتقفل وبعدين فين اسماء وهي صاحبه الفكره

صباح الخير يا ميدو ايه اخبارك واخبار الكتاكيت ؟؟؟

انا مستغربه ان اسماء مش بترد بجد الصفحه هتتقفل وهو مفيش مغتربات غيرنا احنا التلاته والا ايه ؟؟

طيب يا ميدو شاركى انتى وانا هشارك ونحاول اننا نستمر لغايه ما حد يعبرنا

أهلا يا رغاية أنت وهي هههههههه


فين أسماء؟ فين أسماء؟
وبعدين ليه بسألوا على المش ؟؟؟

هنا المش ده أعجوبة ,, يا سلام .. يا سلام

ده عملة نادرة جدا

وعلى فكرة أنا عاملة فسيخ بس خايفة أقرب عليه لحسن اروح فيها


انا يا ميدو كنت باشتغل وادرس السنة اللي فاتت

وبعدين صاحبة المدرسة كرهتني فيها فسحبت ولادي وما رحتش تاني

على الرغم إنها كانت بتديني مرتب حلو أوي على ثلاث أيام شغل وساعة واحدة

وواحد من ولادي كان مجاني.. يعني مش بأدفع له مصاريف !!

لكن معقولة تشترينا بالراتب؟

معلش يا اسماء فى ناس كده بتاخد الامور بطريقه شخصيه بكره تتوفقى فى احسن منه انتى وميدو ان شاء الله

وايه يا ميدو لاقينا اسماء تختفى انتى محدش رغااااااااااااااااااااااااااااااى غيرى انا

ممكن اشاركم مع انى مش مغتربات ولا حاجه

يااااااااااااه دانتوا فى ملكوت تانى دانا قريت ال6 صفح اللى فاتوا حسيت بكل اللى بتحسوا بيه

انا يمكن هكون متغربه لكن لانى هتجوز ان شاء الله بعيد عن اهلى بس هى اه 5 ساعات سفر بس بردوا حساها غربه وربنا يوقوينا ويقويكم ويرجعكم لمصر بالسلامه

ازيكم يا بنات عاملين ايه,,,اصل انا مابقعدش غير بلليل غالبا لما الولاد والزوج بينامه ...واحيانا وهم صاحيين فتلاقيني بقعد متاخر
ازيك يا اسماء انت فين يابنتي ...وليه المديره زهقتك احكيلنا وفضفضي
وكنت بتدرسي ايه بقى يعني كان معاكي ايه وبتدرسي ايه
وازيك يا اسيره حنانه مش مهم مغتربه او لا اشتركي معانا عرفينا اخبار مصر كفايه انك في بلدك والله ,,,انت حتروحي انت وجوزك فين,,,في اي مدينه ربنا يعينك

صباح الخير عليكم جميعا
وارحب بالاخت اسيره حنانه ونتمنى دايما انها تشارك معانا ومش مهم انها مغتربه والا لاء

ها يا اسماء ادخلى يا ستى وفضفضى خلى القعده تحلو
النهارده انا عندى اليوم الرخم اللى فيه دوامين وزهقانه خالص وماليش مزاج اشتغل فى حاله من الملل
ليلى النهارده هيروح جوزى يطعمها يارب متسخنش انتم عارفين انا بحس انها عامله زى القطه الصغيره لانها مفعوصه وكل يوم لما برجع من الشغل بلاضى قطه صغننه اوى قاعده قدام باب العمارة فارده جسمها اول ما بشوفها بفتكر لولو علطول

ميدو لازم نتقابل فى يوم ونرغى ان شالله على الشات رغم انه مللللللللللللللللللللللللللللللللل وبطىء اوى بس احسن من قلته

ازيكم يا بنات عاملين ايه
ربنا يعينك يابنتي على التطعيم انا بنتي طعمتها ويومها رجلها ولامت وسخنت وكان يوم ملل
وانت بتسبيي بنتك فين وانت في الشغل وولادك ربنا يعينك
وانت يا اسمااااااااء انت فين احكيلنا ماساتك مع المديره عشان نستفيد احسن انا بدور على شغل