توزيعات ولدي ركاني فديته .. مع دلوعة توتــي ..

قبل كل شئ أعتذر من الجميع عن إنقطاعي إلي دام أكثر من شهر ومن إلي راسلوني على الخاص عن عدم رد
بس أكيد محد يلومني ..
ثانياً شكر خاص لحبيباتي أسيرة قلبة ورومانسية ورعشة قلب ودلوعة حبيبي
إلي ماقصرو أبد ..وقامو بالواجب وأكثر معاي .. وماتضايقو أبد من إنقطاعي عن المنتدى وبالأخص القسم ..
وثالثاً .. ههههههه إلي هو إني ممكن ما أتواجد يومياً ولكن بحاول وبأقصى جهد أتواجد يومياً لو لساعة على الأقل ..
الصراحة أبد ماتوقعت مسؤلية الأم هالكثر صعبة وساااااااااالفة
والسالفة الكبيرة التوفيق بين البيبي والبيت والزوج ..
الحين بس عرفت قد ايش عانت أمي وتعبت عشاني .. وفهمت ليش كانت بعض العضوات تقولي ايش اسوي بعيالي ..
من جد الله يكون بعون كل الأمهات .. على التربية والسهر وو و و ..
فا من الحين إذا قصرت مع أي أحد منكم المعذرة .. لانو كتكوتي الصغير ركان لو ماشلته على أيدي يسويلي ساااالفة بالصياح وساعتها ما أقدر اسوي شئ ..

هههههه مصختها ماصار موضوع هذا ..
خلاص بدخل بالجد ..
أول شئ .. رحت شريت سلل صغيرة مثل مانتم شايفين .. وهذا هو الشئ الوحيد الجاهز إلي جبته



صحيح كان بودي اصور كل شئ مثل ما أسوي دايم .. طريقة العمل يعني .. بس ساعتها كنت بالتاسع
وزين مني سويت كل هذا .. بديت أصور ولكن تعاجزت أكمل الصراحة ..
لكن أي سؤال أنا حاظرة ..

جبت كرتون السرير الصغير حق ركاني وشريت زي القطن هذاك إلي يحشون فيه المخدات حق المجالس ..
جبته من المحل إلي يسوون فيه المجالس .. وغطيت فيه أطراف الكرتون عشان يطلع منفخ وشكلة حلو ..



شريت سلتين وحدة كبيرة ووحدة صغيرة .. وزينتهم طبعاً بالشرايط و و و



ههههههههه وهذا الكرتون حق السرير بعد الترتيب .. ههههههه نطيت نطه من كرتون فاضي لهالشكل ..
بعد الأسفنج غلفته بقماش فستقي ولفيت حوله شريطين بمقاسين مختلفين وحطيت ورد وفيونكه ودبدوب وبرواز بوسطة وعصيان ورى الدبدوب حطيت عليهم شرايط صغيرة .. ورحت باتشي وجبت منهم شوكولاتة بلونين الأخضر والأزرق .. ورصيتهم على الكرتون من الأطراف .. حطيت تحتهم لزقة من أبو وجهين عشان يثبت عليها الكاكاو ..
وطبعاً سلل التوزيعات بعد التعديل ..



هذا طرف الكرتون



وهذي العصيان مع الفوينكات والشرايط



هذي السلل من قريب .. حطيت فيهم ألعاب صغار ..



وحلويات داخل قماش ترتر وربطتهم .. وجبت من الأنترنت صورة رضاعة وكتبت عليها الكلام وطبعتهم
وربطتهم بشريطة على طرف السلة ..



حطيت
شريط ومن القماش الترتر بعد على الطاولة ..



وهذي طاولة ثانية حطيت عليها دبدوب والسلة الصغيرة والكبيرة بعد التزيين
الصغيرة حطيت فيها حلويات للأطفال بأشكال تبسطهم ..
والكبيرة سويتها عشان زوجي للشغل يوزع فيهم التوزيعات .. ورحت محل البالونات وركبت عليها بالونات ..
وحطيت بالونات طايرة بمدخل البيت بس للأسف ماصورتهم ..



هذي السلة الصغيرة عن قرب





وهذي السلة الكبيرة





وهذي أطرافها عشان يكون واضح عندكم التزيين ..



أنا ما تكلفت بالتوزيعات .. ولا كثرت بعد .. عشان مثل ما الكثير يعرف أنا جديدة في عمان وما أعرف ناس واجد ..
لكن طبعاً الواحد وسط أهله وربعه يبيله واجد وأشياء أحلى بعد ..
سامحوني على القصور ..
وسلامتكم .. وكل العادة أنا حاظرة لمساعدة الجميع .. ولأي سؤال طبعاً..


تحياتي القلبية لك