انا بقولج عن فرش ماك ،، لأني ماستخدم فرش ميك آب فور ايفر
وبقولج عن الفرش اللي عندي ،، لأني احسهم شاملين ومب محتاجه ازيدهم
فرشاة البودره الكبيره و فرشاة البلاشر و الفرشاه المائله بصراحه انا اخذهم من ماركات عاديه ويأدون الغرض
لأن فرش ماك اسعارهم شوي غاليه ،، فلا تاخذين الا الفرش اللي فعلاً ما تتحصل بمكان ثاني

فرشاة الفاونديشن 190
حلوه لتوزيع الاساس السائل او الكريمي ،، توزيعها مضبوط ،، ممكن بعدها طبطبه خفيفه بالاسفنجه وتشوفين ان الاساس متوزع بطريقه حلوه على البشره ،، طريقتها ان كأنج بتصبغين ههههه خوش تشبيه
وفي منها في ماركس آند سبنسر بنص السعر ونفس الجوده ،، مادري بعدها موجوده او خلصت
فرشاة تمشيط الحواجب ،، ممكن تنلقى في اي ماركه حتى بو 10 ،، او حتى لو فرشاة ماسكارا قديمه تتنظف ومن احلى ما يمكن ..

208 ،، حلوه للخط تحت العين وبعد تنفع للحواجب ،، للأمانه عندي وحده تشبهها من جرير ،، فرشاة رسم ومن اروع ما يمكن ..واشوفهم نفس المفعول

209 ،، هذي للكحل خصوصاً الكحل الكريمي .. بصراحه جربت كذا نوع لكن هذي ميزتها انها متماسكه ورسمها مضبوط
وممكن بعد للشادو تحت العين لو تبين الخط ناعم ورفيع

212 بصراحه تقدرين تستبدلينها بـ 208

239 ،، هذي للشادو وايد مهمه ،، من اهم الفرش
وفي مثلها في رد ايرث طبعاً مع الفرق في السعر ،، ويأدون نفس الغرض

224 فرشاة الدمج
تساعد وايد في الدمج خصوصاً لو مستعجله وتبين تدمجين لونين مع بعض ،، مرريها على الجفن بعد ما تحطين الالوان وبحركات دائريه والالوان بتكون اندمجت مثل السحر ههههه
انا استخدمها في غرض ثاني بعد
لو عندج شادو وحابه تفتحين لونه او تخففينه وزعيه بهالفرشاه

219 ،، احب هالفرشاه عندي منها 2من حبي لها هههههه
لها اكثر من استخدام وبالنسبه لي اشوفها وايد مهمه
للقوس الفاصل بين الجفن الثابت والمتحرك
للجفن السفلي خصوصاً في المكياج السموكي والخط يكون عريض ومموه
وحتى لتوزيع الشادو تنفع يعني لتحت الحاجب او عند منبت الرموش

316 ،، فرشاة الروج ،، للأمانه اشوفها هي وفرشاة بدي شوب للشفايف نفس الشي وكالعاده الفرق في الاسعار
واهم فرشاه
187

احسها من اهم الفرش ،، حلوه لتوزيع كريم الاساس ،، البودره ،، بودرة البرونزاج ،، البلاشر
اذا تحبين تستخدمين الاسفنجات .. اسفنجات ماك حلوه وتوزيعها احلى

بس لأنها حتى مع التنظيف ما تنظف عدل ،، لأنها تمتص كريم الاساس فلازم تغيرينها كل شهر
افضل تاخذين المقطعه
استخدام استخدامين وتقطينها وترتاحين
في النهايه اكيد اختاري الفرش اللي تحسين انج بحاجه لها وبتساعدج
ومع الاستخدام بتكتشفين وبتخترعين اكتشافات جديده للفرش
واعذريني عطيتج خيارات ثانيه ،، لأن صج احسها بديله لفرش ماك وبنفس الجوده مع فرق السعر
لأن فرش ماااااك تفلس الواحد
السموحه طولت عليج