مشكلتي مع بنتي المراهقة

الله يعينج اختي ...

بس ان شاء الله هالفتره تنتهي بسرعه ....

بس النصيحه اللي بقولها لج ... ((كوني صديقتها))

اطلعي معاها ... بروحكم ...

سولفي معاها تقربي منها ... خليها تحس بالامان ... والثقه ...

حاولي ولا تيأسين وان شاءالله بتنحل مشكلتج ...

فدييتج .. بالعكس انتي مو مكبره المساله ..

اي ام ودها تكسب بنتها من الطبيعي بتحس انها مشكله كبييره ....


حبيبتي انا مب ام بس اقدر اقولج اني بنت و عندي ام .. و علاقتنا انا و امي كانت شوي متشابه و ليحين شوي ...


من ايام ماكنت صغيره كنت جافه مع امي ... يعني احس بالضيق اذا تزاعلت معاها .. ودي اعبر لها بس من صغري عودت نفسي اني اكتم .... و ليومج اعبر لها شوي ... بس يعني ماقدر اعبر على راحتي لاني عودت نفسي على طبع الجفاف معاها في التعبير ...


انا مادري عن طريقة تعاملج مع بنتج بس انا عن نفسيه النتيجه الي توصلت لها مع ماما هي بسبة

1) ماما دووم يهمها راي الناس و حكمهم علي قبل حكمها هي .. يعني من صغري تتشكل تربيتها على حسب الناس الي حوالينا ... اهلها مدينين يعني اخوانها و خواتها فيوم يكونون معانا تصير مدييينه وايد و يوم اكون مثلا بس مع بيتنا او اهل ابوي تصير عادي... ساعات تسكت عني اذا اسوي الغلط و ساعات تنفجر فيني ... و انا ذاك الوقت ماكنت افهم غير انه ماما متناقضه فيلست اعاندها و اعاند نفسي ...

2) انا بنت ماما الوحيده .. و هي من شدة حبها لي يخونها التعبير .. يعني الخوف الزايد الي يقيد الواحد احيانا .. الحنه الزايده .. العصبييييه ساعات

3) ماتعرف توصل مشاعرها صح .. حنونه لاقصى درجه لكنها سريعة الانفعال و انفعالها ساعات يخرعني


4) ماتسمع قد ماتبي هي تحكم علي ... و ساعات حكمها يجرح


ففل مقابل .. انا اعاند .. ابتعد .. فهل اشيه تبين لها انها على صواب


شوفي حبيبتي ممكن تشوفين بنتج تبتعد .. تصد .. تصرخ .. تعاند ... انانيه ... يعني من الصفات الي ممكن ماتعجبج في بنتج و تخافين عليهها

بس تعالي اتنتي و سالي نفسج

1) خوفي عليعا مبالغ فيه؟؟؟ لدرجه انه يقيدها في الحريه المحدوده الي منحتها اياها؟

2) توصيل التعبير لبنتج .. يعني هل التوصيل يكون عادتا انفعالي ...

ساعات يعني يوم هي تعاند ... انتي كيف توصليين احتجاج؟؟ تعصبين عليها ؟ تنفعلين ولا تكلمينها بداوه


الي احاول اتصوله كيف طريقه تعاملج مع بنتج يعني يمكن في اشيه صغيره انتي مو حاسه فيها هي الي ساعادت على هل تاثير السلبي ..


ايعني مثل ماقتلج مثلا عن طريقة ماما ... يمكن انتي نفس الطريقة او يمكن طريقة مختلفه مادري بس هي بعد في سن مراهق ... و الي في هل سن دايما يعتقدون انه هم على حق ولي حوالينهم مايفهمون ههههههههه كنت منهم بكل فخر .. فانتي حاولي تكسبينها بلين و اذا في شي انتي حابه تغيرينه مع بنتج يعني مثل مبالغه في العصاب او شي حاولي توقفينه و صدقيني مردها بتعقل انشالله

:flower:
:flower: :flower:
:flower: :flower: :flower:

اول شي ابا ابد فيه

بسم الله الرحمن الرحيم

شو اخبارج اختي عساج مرتاحة

معروف ان فترة المراهقة وايد وايد صعبة فيكون تفكير البنت او الولد جدا متقلب وصعب وايد وايد ومتعب وكل تفكير سلبي
وبنتج يا اختي توها ف بداية مرحلة المراهقة وانتي تحسين نفسج تعبانه ,,, بعدها ما وصلت منتصف العمر وانتي تشكين انج تعبانه هذا شي طبيعي ومن حقج ( هذا من حبج الها) اكيد وع اخر سن المراهقة هذا كل بيروح بيبتدي تفكير البنت يتغير
وبترتاحين بأذن الله .. كل اللي اطلبة منج انج تستجمعين قوتج لان توج ف بداية الطريق

المهم ف الموضوع كيف اكسب الشخص اللي امامي سواء كان مراهق او كبير ف السن او الصغير

ف حكمة حلو وايد احب ارددها ع نفسي وبرددها عليج الحين الها معنى كبير ويمكن تساعدج ف مشكلتج ( وللعلم انا قريتها في موضوع انبعث لي ع الايميل)

"ليتعلّموا أنهم لا يستطيعون جَعل أحدٍٍ يحبهم،كل ما يستطيعون فعله هو جَعل أنفسهم محبوبين"

شو معناة هالكلام ؟؟ يعني انتي ما بتقدرين تخلين بنتج تحبج او ما تحبج الحين .. كل اللي تقدرين وبتشتغلين عليه هو نفسج ( مب بنتج) لان البنت ف هالسن ابد ابد ما تشوف نفسها غلطانه تشوف ان كل الناس غلطانين وان اهلها ما يحبونها وللعلم والحرص الشديد ابد لا تحاولون تمدون ايدكم عليها ( اذا كانت بنت او ولد) سوا انتي او الاب لان هذا شي للأسف عمرها ما بتنسه وبيتم يتردد ع ذهنها وما بيتولد غير الحقد والكراهية

كيف تكسبين ثقتها كيف تكونين انسانه محبوبه الها

نفس ما قالو الصبايا " كوني صديقتها حبيبتها اختها دكتورتها النفسية ... كل شي احتاجته ف هالدنيا وما حصلته

يعني شوفي شو ف خاطرها ف هالوقت من لبس من تغير الغرفة من اثاث من لون من اي شي
اقترحي عليها تغيرون لون الحجرة (مب امر) اقتراح خذي ريها ف اللون اصبغو الحجرة مع بعض
شوفي شو ف خاطرها من ملابس اكسسوار ... خذيها الها واعرف ما بتقصرين

شوفي منو احب ربيعة الها ف المدرسة اقترحي تتساعدون ع تقديم هديه لصديقتها
خليها تعزم ربيعتها ف البيت

اتعرفي عليهم سلمي عليهم ( جي بتظربين عصفورين ف حجر) بتقدرين تعرفين نوع البنات اللي تحبهم وتحاولين تكون مثلهم

قوليلها خلينا نسوي معاج جلسة كل شهر او اسبوع او اسابيع اذا حابة
ايلسو ف غرفة بدون ازعاج باقي العائلة .... سكري الليت خلي اضاءة خفيفة ... خليها تقول اللي ف خاطرها خليها تتكلم منو زعلها منو فرحها منو محتاجة ولشو محتاجة ف هالحياة شو امنياتها وكيف تقدر تحققهم
شو مناسبة الضوء الخافت ... لان الانسان ف الضوء الخفيف يقدر يطلع اللي ف خاطة اكبر واكثر عن يوم تكون الاضاءة قوية ع العين

انتي مستغربة من تسلطها ع اخونها الاصغر

هذا شي طبيعي .. لان البنت او الولد ف سن المراهقة يريدون يبين للي حواليهم من اهل انهم الاكبر والاحكم والافهم فعسب هالشي تلحظين التسلط

يوم بتشوفينها تسلطت ع الاصغار .. اول ما تشوفينها يلست بروحها كلميها بينج وبينها وخبريها ان هذيلا اخونها وبي يوم وبينفعونها وان لو هالاخوان ما كانو موجودين كانن بتحس بوحده قاتله واتوقع مافي انسنان ف هالحياه يتمنى يحس بوحده

وبعد ارجعي للأصغر واعتذري بالنيابه عنها الهم
وحاولي بعد ف يوم من الايام تجمعيلهم فلوس ويشترون اهدية حلوه وبسيطه لـ اختهم الها تعبير عن حبهم الها صدقيني نظرتها ببتغير بس يبالها وقت وصبر وطولت بال

((وع فكرة اكيد لحظتي وايد كررت كلمة هدية ف رسالتي ... بس لان الهدية لغه حلوة ..... بس نادر محد يفهمها))

اريدج يوم بتنصحينها ف شي غلط سوته انصحيها بطريقة حلوة ( يعني يا حبيتي ان سمعت جي او اريدج اتسوي جي
دخلي هالكلمات ترا وايد تأثر ع البنت

حاولي تحضنينها كل يوم هذا شي ياثر فيها صدقيني وبتذكره طول عمرها
يعني لو صارت من بينكم مشكلة ورفعت صوتها عليج .. كل اللي اطلبة منج الهدوء وردي ع صريخها (( الله يسامحج))
((انا من حبي لج نصحتج وبس)) وترا انا احبج لا تنسين هالشي
صدقيني مصيرها ترجع وتعتذر .. واذا ما رجعت ف شي ثاني (( اللي هو ادخلي عليها فجاة اكيد بترد عليج بعصبيه بتقولج شو تبين روحي او مابا اشوفج .. تمي ساكته كل اللي عليج تسوينه قوليها انا ما بغيت شي انا بس بغيت احظنج واقولج اني احبج وايد وانتي بنتي الكبيرة

ودايما اذا في شي ف البيت ناوين تغيرونه يعني حمام ميلس غرفة نوم خذي ريها فيها حتى لو كان الغرفة اللي بتغيرونها ما تخصها خذي رايها وطبقي ... ويوم بتي الناس تشوف الغرفة اللي غيرتوها افتخري وقولي انا هذا ذوق بنتج الكبيرة واللي تحبينها وايد .... عززي الثقة بالنفس عندها عشان يقل التسلط

حاولي دايما قبل لا تنام تمسحين ع راسها وتقوليها احبج ..... ونفس الشي لباقي ابناءئج مش بس هي

و ع طاري ان كل شي تحبة الها ومب لغيرها .. دايما كرري ع مسامعها ان الرسل وصى (احب لنفسك ما تحب لاخيك)
وحاولي تقوين عندها العقيدة والدين وصلتها بربها
وحاولي دايما ترددين عليها ان علاقتها بربها شي وعلاقتها بالعائلة شي ثاني متصلة بشي واحد اللي هو رضى الوالدين من رضى الله وهي ع فكرة يوم بتحاول ترضى ربها هي بروحها وباي طريقة بتحاول ترضى الوالدين

حاولي معها ع المحافظة ع الصلوت وقراءة القران لو صفحة الدعاء الها ولنفسها الاستغفار
والحين هي بنت كبير (مثل ما هي تزعم) وقوليها دايما انتي كبيرة لازم وواجب عليج تحافظين ع علاقتج بربج ولا بتتحاسبين) تعرفين المراهقين يحبون حد يسمعهم انهم كبار


الوضع يطلب هدوء واتخاذ قرارات اوكي

وع فكرة جي بأذن الله بتقدرين تكسبين ثقتها وما بتخلينها تلجأء لاشياء اللي مب اوكي واللي قامت كل المرهقات تحب تجربها وتلجاء الها في غياب حب الاهل

زع فكرة البنات اللي تلجاء لأسلوب المعجبات او التعرف ع الشباب واتخاذ منه حبيب الها .. هذا كل من نقص خب الاهل فتضطرب البنت تلجاء لـ هالاشياء .. للأسف

بمجرد ما تكسبين ثقتها كل شي تسويه من وراج بتعترف فيه لج :)

اذكر انا كنت وايد اشوف سوالف المعجبات واعجاب البنت بالنت ف المدرسة .. بس ف البعض منهم لا فكنت دايما اتقرب من البنت اللي احس انها ما تميل لـ هالسوالف (اللي هي سوالف المعجبات) احاول اعرف هي ليش ما تميل لـ هالشي
واكتشف اخيرا ان الحمدلله حب اهلها واخوتها مكفنها والعائلة كاها حب وحنان فما تحتاج لحب صديقتها وهذا شي صحيح

ويا اختي قولي الحمدلله انت بنتج مراهقة مب ولد لان تربية الولد ف سن المراهقة ترا وايد اصعب وايد من البنت

والحمدلله ع كل حال

تحياتي لج

Miss Oops :gum:

اذا احتجتي اي مساعده في اشي شي انا تحت امرج :salam:

:flower:
:flower: :flower:
:flower: :flower: :flower:

انا من رايي انه هي تمر بمرحلة مراهقة و ما ادراك ما المراهقة

لازم انتي تتقربين منها و تحسسينها انكم صديقان لكن بدون تجاوز منها يعني انت ام و هيه الابنة

و الله يوفقكم

السموحة من كل اللي اتفاعل معاي في مشكلتي وبعث لي برايه ووجهة نظره ما قدرت بالأمس انه أرد عليكم ..
كل وحدة منكم أتحفتني بمشورة جزاها الله خيرا و جعلها في ميزان حياتها
و إن شاءالله ببدأ أعمل بمشورتكم و ادعو لي بالتوفيق و كسب قلب بنتي

السموحة من كل اللي اتفاعل معاي في مشكلتي وبعث لي برايه ووجهة نظره ما قدرت بالأمس انه أرد عليكم ..
كل وحدة منكم أتحفتني بمشورة جزاها الله خيرا و جعلها في ميزان حياتها
و إن شاءالله ببدأ أعمل بمشورتكم و ادعو لي بالتوفيق و كسب قلب بنتي
ولكم مني باقات شكر و عرفان (f) (f) (f) (f) (f) (f)

الله يعينك

انا ما عندي تجربة ولاكن اعتقد انه من الاحسن انك تسولفي معها كانك صديقتها

ما تعطيها الاحساس انك راح تعاقبيها اذا فعلت شي

اتحملي دي اشياء عاديه في فتره المراهقه
حتى يقال تجي فتره البنت يكون عدوها الاول امها لان الام دوما هي الحازمه

تحملي وحاولي عيشي نعاها مراهقتها اطلعي معاهي خليها تهتم بنشاط معين ساعديها فيه

والبنات ما قصروا معاك

حبيبتي مافي بنت ماتحب امها بس يمكن انها تكن لج مشاعر بقلبها وما تقدر تعبر عنها هالمسكينة فتعبر عن طريق العصبية اكسبيها بحنيتج وطلعي معاااها بروحج وانتبهي لصديقاتها والله يعينج