توزيعات حفلة صديقتي مع الستاند ( شلة 2.2 )

طبعاً دخنا دوخة يالله حصلنا أحد يخيط لنا الفساتين وهم عبارة عن 200 قطعة .. يعني 200 فستان

الخياييط درنا عليهم معظمهم محد راضي يخيطهم والسبب الحجم
وبعدين حصلنا وحدة تخيط في البيت مفارش أطفال وأطقم أطفال.. وخليناها تسويهم لنا بمساعدة خالتها لأن خالتها بعد تخيط.. وسووهم لنا بالوقعة والطحنة لأن واجد طولوا عندها وكل شوي يقصر الخلق وأضطر أروح اشتري بالخمسة والستة متر.. تقريباً أكثر من 12 متر خلق من النوعين كلفني ( الستن والتور ) وحوالي 5 قبات شرايط عشان حمالات الفستان.

بعد ما جبناهم من الخياطة.. كان لازم نتجمع ونسوي أكياس من شرايط عريضة ونحط فيهم حبة من بيض الحمام ووردة ونلصقهم في وسط الفستان.. هذي صورة أول دفعة كملناها عبارة عن 84 فستان تقريباً



وهذي صورة لمجموعة صغيرة من بيض الحمام داخل أكياس الشرايط مع الورد اللي سويناهم




نجي إلى العلاليق اللي شغلهم كان شغل

حاولت أن اسوي شكل العلاق.. كنت اسويه بس ما كان مضبوط وما يعجبني.. وأبويي ما شاء الله عليه و الله يعطيه الصحة والعافية وطولة العمر.. ساعدنا واجد في هالعمل.. وله جزيل الشكر والامتنان

سوى إلينا باترون من ألمنيوم بنفسه شكله ولحمه على شكل علاقة.. كل اللي علينا أن نلف السيم عليه ونشكل العلاقة

وهذا هو الباترون



وهذي صورة للأسيام اللي سوينا منهم العلاليق




طبعاً شكر خاص إلى أخويي اللي سوى إلينا العلاليق وساعدنا واجد.. لكن ما هنا ليه إلا يوم أخذ من عندي 10 دينار :1: 200 علاقة حسب الوحدة بنص :1: لكن بعد دخلناها من ضمن حسبة الفلوس والكل شارك ودفع :)





وأكي العلاقة بارزة حاملتنها فطوم بت أخويي :1:



200 علاقة.. هذا حجمهم وشكلهم وهم كلهم على بعض!!

خلصنا من مشكلة العلاليق.. نجي ألحين إلى الستاند اللي أخذ منا شغل واجد ووقت طويل.. وساعدنا فيه بالدرجة الأولى أبويي الله يخليه ويطول عمره :)

فكرة الستاند مالنا عبارة عن كوشة عروس مصغرة!
المشكلة أن فكرة الكوشة شوي معقدة.. وكنا بنخلي محل يسويها .. ورحنا محل عجزنا واحنا نشرح لهم بالغصب استوعوبوا احنا شنو نبي.. وبعدين قالوا لنا جيبوا لنا انتون الطاولة واحنا بس بنزينها!!

ما سوينا شي؟!! قلنا لهم انزين بجم بتزينونها؟؟ قالوا 20 دينار!!!!

على تزيين بس 20 دينار؟ صلي على النبي! بتجيبين الطاولة احنا بنزينها ما عليه .. بالعكس يعني ..

طبعاً هني يأسنا عدل

وكنا نبي نسوي الستاند بأي طريقة

اقترحت على أبويي ان يسوي لنا الطاولة.. على ان تكون بارتفاع معين وحجم معين.. واحنا علينا التزيين وكل شي

وفعلاً.. وافق أبويي واشتغل على الطاولة

وهذا محور الطاولة مع مجموعة الخشب



أبويي وهو يشتغل عليه





بعد ما اكتملت القاعدة.. الشكل المبدئي ( هوليكبتر )



لكن بعدين وبعد التعديل والتشطيب وإضافة القاعدة العلوية للطاولة والسفلية





الحين وبعد ما اكتملت الطاولة بغينا نضيف لها حلقتين فوق بعض من تحت الطاولة بحيث نقدر نعلق الفساتين فيهم
وكانت الحيرة كبيرة! شلون نسوي الحلقتين.. اذا سويناهم بالسيم بيكون ضعيف.. ويحتاج صيخ متين عشان يقدر يحمل الكم الكبير من الفساتين! وهذا يحتاج شغل لحام! ويكلف

وبعد تفكير طويل.. توصل أبويي إلى الحل

وهو





طبعاً أكيد عرفونه

غطاء مروحة ستاند قديمة.. أخذه أبويي وقص الجزء الوسط منه.. وشبكهم ببعض

وهذي مرحلة تركيبهم في الطاولة





بعدها صارت مرحلتين ما قدرت أصورهم

وهي مرحلة إضافة قوس فوق الطاولة من صيخ .. طبعاً ابويي سواه بعد
ومرحلة صباغة الطاولة اللي تبرع بالقيام بها أخويي ..بسبب انشغالنا بأشياء ثانية مهمة بعد

وبعدين أخذناها إلى نجار لضيق الوقت عشان يضيف لنا قوس خشبي فوق الطاولة وعلى حجمها وبإرتفاع أكبر من القوس المعدني

قياس قطر الطاولة 28 إنج.. القوس على حجم الطاولة وبإرتفاع 15 إنج
رفع الطاولة تقريباً 27 إنج

وهذي صورتها بعد إضافة الأفواس والصباغة

وهني بدينا بالمرحلة النهائية من الستاند لأن اكتمل عندنا الشكل العام لها

هذي طريقة تثبيت القوس الخشبي



ألحين الشغل علينا

بدأنا بتزيين الستاند ( الطاولة ) عشان نحول كل هالخشب والخردة إلى كوشة عروس مصغرة تحمل الفساتين الصغيرة

بدينا نغطي الطاولة بقماش ستن أوف وايت مع التزيين بسلاسل اللؤلؤ ( خرز )



بعدها حطينا طبقة التور والأورجنزا على القوس عشان يشكل نصف قبة.. وتزيينه بورود صغيرة



الشكل الشبه نهائي.. من الأمام



مع إضافة بعض اللمسات على شكل ستارة وورود.. ونثر الخرز والورد



تقريباً جهز الستاند عندنا باقي بعض التعديلات البسيطة وإضافة الفساتين

الحين الفساتين يحتاجون كروت

وهالكروت لازم تحمل اسم العروس ( تهنئة لها ) وتحمل اسم مقدم هذي الهدية

وبما أن شلة 2.2 اشتغلت على هذا كله

صممت أني كارد من ورا وقدام.. عبارة عن باتج أو نمرة الثياب الجدد اللي أول ما نشتريهم يكونون موجودين على الثياب ونشيلهم

وهذا شكل التصميم.. مع حذف الأسماء ولكن الفكرة واضحة :)



وهذا من الخلف...مع حذف الأسماء بعد.. ( ملاحظة.. الشكل الخلفي كان فيه 4 أنواع.. كلهم نفس الشكل بس مع تغيير الكلام والعبارات )




بعد ما طبعنا هالبطاقات بشكل مصغر.. شكيناهم في الفساتين بخيوط.. بعضهم صاروا بخيوط ميدار عشان يبينون كأنهم فعلاً مال محل :) ولضيق الوقت.. اضطرينا أن نسوي نص ونص.. يعني بعضهم بخيوط ميدار وبعضهم بخيوط عادية





حطيناهم في الستاند.. وأضفنا جلتر على الطاولة وكرسي إلى العروس مع تزيينه بوسادات وشوي من الورد











من ورا



أضفنا على الكوشة باقة.. احنا صانعينها.. كل وحدة فينا أضافت شي من لمساتها عليها :1:






وهذا شكلها على الكوشة





التوزيعات هذي خليناها على المسرح جنب العروس عشان لما يجي احد يسلم عليها تعطيه منهم






خلص الموضوع :shy: وما أحلل اي وحدة تنقل الموضوع من غير ما تذكر المصدر (Oriana)

مفاجأة 2.2 لصديقتهم

احترنا شنو ممكن نهدي صديقتنا مفاجأة في يوم حفلة خطوبتها! وفكرنا في التوزيعات
بس خلاص! احنا سوينا توزيعات الفساتين.. فما راح يكون في شي مميز في الموضوع!!

استغلينا حب صديقتنا للشعر وقررنا نهديها قصيدة.. وما اهتدينا لأحد يسوي لنا القصيدة غير زوج اخت وحدة من الشلة

صديقتنا هي تدرس في الخارج طلبت من زوج اختها يكتب لنا قصيدة

حصلنا على القصيدة


وهني بدا الشغل وكان باقي بالضبط 3 أيام

هلكت فيها هلاك!

القصيدة كنت محتاجة أكتبها على خلفية بالفوتو شوب واضيف لها صورنا وتوقيع شلة 2.2

كانت صورتي وصورة صديقتي موجودة بس ثالثتنا اللي تدرس في الخارج مو موجودة وكنا ننتظرها وهي خارج البحرين ترسل لنا صورتها! وطلعت روحنا لأنها ما كانت راضية تطرش صورة ليها بحجة انهم مو كشخة ولطعتنا عشان تروح ستوديو وتصور خصوصاً ان عندها امتحانات

وصلتني الصورة بعد 4 اتصالات لها في الخارج! هلكتني يالله حصلت هالصورة

وعلى قص وتركيب واضاءة وشغل فوتو شوب رغم بساطته الا انه كسر ظهري واخذ وقت خصوصاً ترتيب كتابة القصيدة في اللوحة

الحين كان لازم نروح الأستوديو

ورحنا استوديو الدانة.. وعطيتهم الصورة في فلاش ميموري وطلبت منهم طباعتها على ورق صور بحجم معين وينحط عليها نوع الورق الحراري اللي يخلي الصورة شبيهة بالرسم

وسوينا برواز ثاني.. هالبرواز الثاني كان عبارة عن واحد من الفساتين اللي سويناهم.. سرقناه دون علم العروس.. وسرقنا بطاقة منه وخيط أمام عينها دون أن تحس علينا وسوينا جريمتنا.. لما رجعت البيت لصقته في خلفية فيها اطار يتكون من 2.2 و صورة وردة >> اخذناه إلى الأستوديو وطلبنا انهم يبروزونه

هالليلة كانت ليلة الملجة وكانت حالتنا حالة! ومحتاجين حتى نروح نشتري طاولة من السوق الشعبي وقماش حق شرشف للطاولة عشان هالبراويز! يومها مليون مشوار رحته غير محاتانا لأن الشيخ بيجي ولازم نروح للملجة!

المهم عدت سالفة البرواز على خير

بقى جزء واحد من المفاجأة

وهو

القصيدة وإلقائها

وهني كنا نبي رجال يلقي القصيدة على متخصص دي جيه ويسجلها لنا مع موسيقى كلاسيك وبصوت جهور وواضح

ولما حصلنا شخص.. هالشخص دق بنا في آخر لحظة

واضطرينا نفكر من اول وجديد!!

وما صار في بالي إلا ولد خالي
كلمته عشان يلقي القصيدة.. ولأن الدي جيه داك دق بنا

أضطرينا نسويها بفلوس عند دي جيه متخصص

وراح ولد خالي وية اخويي وسجلوها واضافوا الصوت مال الموسيقى والصدى ووضحوا الصوت وحطوه لنا في سي دي
ودفعنا الفلوس

القصيدة تحمل أسمائنا واهداء منا إلى العروس

كان المفروض بعد ما تجلس العروس وتخلص تلبيس دبل نحطها اهداء

وصادتنا مشكلة يوم الحفلة اكتشفتها

طلعت الدي جيه ما ترضى تشغل ولا سي دي مو مالها ولازم تجيكه قبل الحفلة

طيب من وين احصل الدي جيه ألحين؟؟؟؟؟

واضطريت اسوي اتصالاتي بالصالة واتعامل معاهم يالله حصلت رقم الدي جيه واسمها واتصلت فيها وخليتها تدليني بيتهم ورحت لها الساعة 1 ونص الظهر عشان اعطيها السيدي وأوصيها ان لازم ضروري ينحط ويكون مفاجأة ولا تخبر العروس لأن كنا ندري ان العروس بتروح لها عشان سيدي ثاني

والحمد لله انحلت هالمشكلة

المشكلة الثانية

كانت ان احنا من الصبح رحنا الصالة عشان نعدلها ونحط اغراضنا ونرتبها

وكان من ضمن الأغرض.. الطاولة اللي بنحط عليها البراويز وهي مفاجأة العروس

لكن العروس فاجأتنا وجت الصالة تتطمن على الشغل

واخذنا وقت طويل يالله اقنعناها ان تطلع من الصالة وان هي عروس لازم تستريح وتنام شوي

والحمد لله بعد نقاش ونزاع قدرنا نطردها من الصالة ونحط الطاولة والبراويز

وفي الصالة تمت المفاجأة مثل ما نبي

انصدمت العروس باللي سويناه وكل هذا من وراها في حين ان الغرابة أن طوال الوقت احنا كنا وياها فمتى لحقنا نسوي هذا كله

ضمتها لنا كانت ضمة فرح.. وراها دموع امتنان

كان يوم أبداً ما ينسى

وأترككم مع صور البراويز والقصيدة

أختي Oriana

تسلم أيدينكم عالففكره الروعــــــــــه

طريقة الأستاند وااايد حلوه

الله يعطيج العافيه وعساج عالقوه دوم يارب

والله لا يغير عليكم ان شاء الله

وعقبالكم يارب

أختج الدانــــــه