تجربتي وبداياتي مع التصوير

.






السلام عليكم ورحمة الله وبركاته

صارلي فتره غايبه وماحطيت مواضيع لاني كنت مشغوله في الفتره الاخيره

المهم ماعلينا .... حبيت اقولكم تجربتي مع فن التصوير

من زمان وانا احب التصوير وكنت متصوره انه مستحيل في يوم اعرف اصور مثل المحترفين ومن سنتين اشتركت في موقع خاص للتصوير وكنت بس اشوف الصور وكانت عندي كاميرا دجيتل 3.2 ميغابيكسل وتصويرها يعني وبديت اجرب فيها واجرب و مع الوقت تعمقت شويه وصرت اقرا عن الكاميرات وصارت عندي خبره بسيطه وشريت كاميرا ثانيه Sony DSCP-200 وكانت 7.2 ميغابيكسل يعني وضوحها حلو وصافي وبديت اصور ومع الوقت صرت اتحسن وبعد سنه حسيت اني مستعده اني اشتري كاميرا بروفيشنال وشريتها الحمدالله وهي Sony DSC-R1 وبديت اتعلم عليها وماخذيت دورات فالتصوير ولا شي كنت اجرب بروحي ويوم عن يوم صرت احب التصوير اكثر واكثر...

وراح اعطيكم نصائح للتصوير الجيد والتحسين من شكل والوان الصوره

اول شي لازم تحطينه في بالج فالتصوير :

الاضاءه وافضل اضاءه هي اضاءه الشمس الطبيعيه و من بعدها اضاءة الاستوديو وفالاخير اضاءة الابجوره او الثريا..

وفي التصوير مع اضاءة الشمس لازم تكون الشمس وراج عشان ماتطلع قويه وايد.. او اذا كانت الشمس ساطعه وايد ممكن انج تخففينها بالشيفون مال الستاره يعني تخلينه مسكر جذي راح تطلع عندج اضاءه ناعمه وحلوه..

ثاني شي الالوان يعني عشان الصوره تطلع حلوه و مميزه لازم تكون الوانها متناسقه سواء في اختيار الخلفيات او المكان..

و من افضل الخلفيات اللي ممكن تستخدمينها فالتصوير هي القماش الساده بس لازم يكون مكوي قبل الاستخدام ولوحات الكرتون الساده Cardboard Paper اللي كنا نستخدمها حق لوح المدرسه هذي افضل الخامات المستخدمه لان ماينعكس عليها الاضاءه.

و طبعاً الزوايا شي وايد مهم وهالشي راح تعرفينه و تضبطينه مع التجارب ..

واخر شي تضبيط الصوره بالفوتوشوب وهالشي مايحتاج انج تكونين خبيره فالفوتوشوب لان اللي راح تعدلينه الالوان شوي والتباين واذا الاضاءه محتاجه تعديل بس و ممكن تحطين فريم عالصوره وهالشي يحددها ويخليها احلى..

وحبيت احطلكم مجموعه من صوري وانشالله تعجبكم.. وراح احط مجموعه ثانيه قريب..