الموضوع مسبب لها ضيق واحراج ..

اهلين .. بنات ، ومسامحه على كثر مواضيعي ومشاكلنا انا واللي اعرفهم بس لاني واثقة فيكم وتعجبني آرائكم .. واليوم بطرح عليكم قضية تخص وحدة من خالاتي لانها مضايقتها وهي تفضفض لي وايد وما اعرف شقول لها ..

خالتي بعد حوالي شهرين بتكمل 22 سنة .. وهي انخطبت من سنة وشهر تقريبا .. وكانت تدرس دبلوم في احد المعاهد وكملت واخذت الدبلوم بنسبة زينة اللعام، وخطيبها من منطقة بعيييييدة عن هالمعهد وصعبة تتوفر لها مواصلات وهي بعدها ما تدربت على السياقة ..
المهم .. خطيبها كان في فترة الملجة والخطوبة دايما يقول لها انه يحب اليهال وان يبيها تحمل من بداية الزواج .. وهي كانت موافقة ، وصار الزواج في الصيف اللي طاف " شهر 8 " يعني من حوالي 6 اشهر لكن للاسف للحين ما حملت ..
وهي كانت متوقعة تحمل بسرعة وعلشانه ما واصلت دراستها لانها كانت حاطة في بالها الحمل والمعهد وايد بعيد عليها وما تبغي تتعب روحها .. وبتواصل بعد ما تولد ويكبر الياهل شوي وتتدرب على السياقة ..

والاحراج ان زوجها وايد يتكلم عن الحمل واهله بعد .. وفكرت تروح المستشفى تتعالج لكن الدكتورة تقول ما بتسوي لها فحوصات وهالسوالف الا لما تكمل سنة وان هالتأخير كللللش عادي .. وهي مشكلتها ان دورتها مو منتظمة وكل شهر تتوقع تحمل لكن تنصدم بنزول الدورة عليها .. نصحوها الناس تروح للمراخه ويمكن تستفيد وهي قاعده تروح من فترة وتصرف فلوس وايد وزوجها موافق ويحن على الحمل لدرجة انه احيانا بعد يخلصون " ذاك الشي " يقولها بمزحة ( ان شا الله تلقحت البويضة " وهالسؤال وايد يجرحها لكنها تبين روحها طبيعية قدامه :sad: ومن كم يوم ما شافت الا ظهرها يعورها وكانت توها مخلصة الدورة يعني مو حامل وراحت المستشفى علشان يعطونها شي يخفف الالم وكان معاها زوجها .. وهناك سألها الدكتور عن اذا كانت حامل فقالت لا انا توني مخلصة الدورة ، فلما كتب لها الدكتور على ادوية سأله زوجها هالأدوية ما تأثر على الحمل اذا كان توه صاير ؟؟؟؟ <<< تخيلوا موقفها حزتها :qaq:

وهي وايد تنحرج لما حد من اهله او اي احد يسألها قدامه ما حملتي ؟؟ والسالفة وايد متعبتها خصوصا لما تشوف اللي تزوجوا معاها او بعدها حملوا وهي للحين ؟؟ وحاليا قاعدة تخطط انها تتدرب سياقة في اقرب وقت علشان ترجع للمعهد وتكمل دراستها ويمكن لين انشغلت شوي تنسى موضوع الحمل وترتاح نفسيتها ..

المشكلة تقول انها تبغي تقول لزوجها على الاقل " لانها تستحي تقول لاهل لزوجها " انه ما يكلمها ويلح في موضوع الحمل لان هالشي بيد الله .. هي قدامه مخلية الموضوع عادي وتقوله انا توني عروس وتوني صغيرة وليش نستعجل ع الحمل خل نستانس بحياتنا " لكن في داخلها تتمنى الحمل بسرعة علشان تفرحه لانه وايد زين معاها ويستاهل انها تفرحه وعلشان طبعا انها تحب اليهال وخاطرها تصير ام ..

شلون توصل هالكلام لزوجها وهي ما تبغي تبين له انها متلهفة على الحمل وان كلامه وايد يضايقها ويجرحها علشان ما يحس ان اذاها ويأنبه ضميره وهي تدري ان اكيد مو قصده :sad: ؟؟!!!