قصة ولادتي

عدت من جديد بقصة ولادتي بطفلي الثاني " احمد " ..

طبعا موعد ولادتي حسب ما عطاني الالتراساوند 3 \ 12 ، دخلنا شهر 12 وما في بوادر ولادة والتعب قاعد يزيد وكنت ابغي اولد بسرررعة .. وصلنا لتاريخ 3 \ 12 وما في بوادر ولادة وكان عندي في نفس اليوم موعد عند الدكتورة وقالت لي اتمشى عشان اولد بسرعه ..

يوم ثاني الساعه 4 الفجر قعدت من النوم عشان ابغي اروح الحمام " عزكم الله " وهناك لاحظت نقطة دم في ملابسي الداخلية ، نقطة صغييييرة بحجم الذبابة تقريبا .. رجعت السرير عشان انام فابتدا علي الالم .. انا متعودة على هالآلام اللي كانت تجيني من الشهر السابع فاسبتعدت الولادة وقتها ..
على الساعه 7 الصبح حسيت ان نوع الماي نزل علي لكن بشكل خفيف وخبرت زوجي اللي كان يتجهز بيروح الشغل فقال لي اذا ابغي اروح المستشفى فقلت لا اذا تطور الموضوع باتصل فيك ..
وطبعا كانت الآلام قاعده تروح وتجي بشكل خفيف وعقب فترة رد نزل علي نوع الماي ، وعلى الساعه 10 الصبح نزل علي شوية دم فقلت اكيد هذي ولادة خلاص فاتصلت لزوجي وقلت يجي يوديني المستشفى وقعدت اجهز اغراض لولدي حسون عشان ياخذه ابوه على بيت ابوي ..

وصلت المستشفى الساعه 11 الصبح تقريبا وبعد الفحص طلع ان الرحم مفتوح من 2 - 3 سم وبعد التخطيط طلع ان معاي طلق .. بس المشكله ان كان عندهم زحمممة في المستشفى يومها وما في سرير فاضي فقالوا بيطرشوني مستشفى ثاني وانا وافقت لاني كنت تعبانه وااااايد .. وبدلت ثيابي هناك ونقلوني في الاسعاف للمستشفى الثاني وزوجي راح وصل حسون لبيت ابوي ولحقني على المستشفى ..

لما وصلت المستشفى الثاني على الساعه 1 ونص الظهر كنت للحين مفتوحه 2 - 3 سم :sad: بس الطلق كان قاعد يزيد وايد :confused: وهناك سووا لي تخطيط مرة ثانية وعطوني ابرة تلين الرحم وبعدين ردوا عطوني ابرة تخفف الالم بس ما كان منها فايده وانا كنت اتعذب من الالم وردوا عطوني ابرة ثانية لتخفيف الالم بدون الالم وبدون فايدة بعد ..
الدكتورة كانت تقولي اتمشى عشان الرحم بنفتح بسرعة بس انا ما كنت قادرة اتمشى من الالم وكان بطني تكرمون يمشيني وايد ومعاي لوعة بعد وقعدت ارجع :sad:

على الساعة 6 المغرب الله سهلها وانفتحت ال10 سم وابتدت الولادة اللي كانت اصعب ما في الموضوع لان الدكتورة كانت تطلب مني ادفع وقت الالم ولما يخف الالم آخذ نفس عشان ما يضطرون يشقون لي تحت وما احتاج بعدها لخياطة فحاولت اطبق كلامها لكن للاسف وقت الولادة وخروج راس البيبي انشقيت واضطرت بعدها تسوي لي خياطة :sad:

حمودي طلع للدنيا يوم 4 \ 12 الساعة 6 و 10 دقايق المغرب .. تعبني اكثر من اخوه مع ان اخوه كان طلق صناعي وهذا طبيعي لكنه وايد تعبني ..

امس كملت الاربعين .. يعني القصة بايتة شوي بس مسامحه كنت مشغولة طول هالفترة ..


وشكرا :shy: