أنقلبت حياتنا ولازم أتقبل هالشي..بس وشلون؟؟

بسم الله الرحمن الرحيم

أخواتي..

السلام عليكم ورحمة الله وبركاته

لا أعرف كيف أبتدي بصياغة الموضوع ولكن سأحاول..
بداية أنا أعيش في بيت هادئ يضم أمي وأختي الكبيرة وأخوي وزوجته وأبنائهم<<أكبرهم بنتين توم عمرهم 5 سنوات..

وكنا نعيش حياة كلن كان يحسدنا عليها..أقصد من ناحية العلاقة القوية اللي تجمعنا وحبنا لبعض وحتى مرت أخوي ما حسينا ولا فكرنا أنها غريبة بالعكس كأنها أختنا وحتى هي كانت طيبة وحليوه خلال السنوات السبع اللي عاشتها معانا،،يعني كنا نسهر مع بعض ونشتري لها نفس اللي نشتريه لنفسنا..(ملاحظة):زوجها اللي هو أخوي هو اللي يصرف علينا وعلاقتنا فيه قوية بالمره وهو نور عيني أمي في هالدنيا تكفي دخلته علينا تسوى الدنيا وما فيها وحتى هو ما يقصر علينا بشي أبداً ولا على مرته وعياله..بتسألون وين المشكلة؟؟أنا أقولكم يا محفوظين السلامة

أحنا نعرف أن الحريم يأثرون على بعض من خلال الصداقات وإعطاء النصائح لبعضهم..ولكن ما ظنكم بالصديقة اللي تقول خير إن شاء الله بتقعدين طول عمرج مربوطه فيهم و زوجج ملزم بهم ويصرف عليهم وبتقعدين معهم في هالبيت على طول..

بدينا نلمس تغير طفيف في معاملتها ولكني ما انتبهت..بس لاحظت عليها تغير على زوجها منا وكان يبين عليها هالغيره..المهم هي فاتحت زوجها أنها تبي بيت بروحها حتى لو جنب بيتنا المهم تكون بروحها طبعاً زوجها ما قال لنا شي وبعدها بشهر تقريباً وحنا يا غافلين لكم الله جبت لأخوي هديه بمناسبة نزول راتبي..مع العلم أني جبت لها قبل هالمره..إلا هي بتنفجر من الغيظ والحره وتروح لأهلها ثاني يوم بس وهي في السيارة كانت تقول لأخوي أنا ما راح أرجع إلا في بيت بروحي قال لها بس هلج كلهم في بيت واحد وما أحد فيهم أعترض!!قالت لييييييييش هلي مثل هلك؟؟مع العلم إن أهلها كل واحد ومرته وعياله في غرفه،،هم مش فقراء بس عشان ما يهدون أمهاتهم ولإنهم متعلقين فيهم ويبون رضاهم..وزوجاتهم ولا وحده فيهم بطلت حلجها وأعترضت..

وهي في بيتنا لها 4 غرف وحمامين وأنتوا بكرامة..وأحنا نفس الشي يعني البيت عوووووووووود..
المهم راحت لبيت أهلها وقالت إن أحنا معذبينها وتبي بيت بروحها..وأمي قعدت تصيح عشان العيال بيضيعون وقالت لأخوي أطلعوا بكيفكم بس أهم شي العيال ما يهيتون ويضيعون وهو يبي يراضيها بأي طريقه وافق الأخ على شرطها ورجعت البيت واستقبلناها ولا كأن شي صار بس أمي لمن استقبلتها قعدت تصيح وأرتفع عليها الضغط والقلب وهي تبوسها وترجاها تسامحنا إذا شافت منا شي وعقبها طاحت أمي وقعد يصيح أخوي وصحنا كلنا من القهر ومن الخيانه اللي بدرت منها وبعد هالموقف أنا كرهتها من قلب وما أفكر أني أسامحها على عملتها المهم أخوي عرض عليها يجيب لها سيارة ودريول بس ما تفتح سيرة البيت مرة ثانية..
المشكلة أني كرهت أخوي وكرهتها وما أطلع من غرفتي إلا للشغل وعلى طول على الغرفة مرة
ثانية يعني ما أخلي أي مجال أنها تصيد علي شي كفايه أنها شوهت سمعتنا عند الناس أن أحنا معذبينها..

المشكلة أني تنازلت عن أشياء وااااااااايد عشان ما تحس بالغيرة منها أني ما أسلم على أخوي ولا أشوفه..يا الله وشلون أتقبل أن حياتنا تغيرت وأنا أخوي اللي أقرب لي نفسي صار مب من حقي أني أشوفه وأتكلم معاه..

مو من طبعي أحقد على حد بس عطوني نصايحكم..
وأسفه على الإطاله